Kî-tó Seⁿ Sun
|
祈禱生孫 |
| Tiuⁿ Ho̍k-chû |
張復聚 |
|
Chi̍t ê khiân-sêng ê ki-tok-tô͘, chiok hó-gia̍h. I sì ê kiáⁿ lóng í-keng kiat-hun. M̄-kú lóng bô tòa tàu-tīn, mā lóng bô seⁿ kiáⁿ.
|
一個虔誠ê 基督徒，足好額。伊四個子攏已經結婚。M̄-kú 攏無tòa tàu-tīn,mā攏無生子。 |
|
Chi̍t kang, i kiò in sì ê kiáⁿ tńg-lâi chò-hóe chia̍h pn̄g. I soan-pò: “Góa taⁿ lāu--lo͘h, chiok siūⁿ beh phō sun. Tān-sī lín lóng bô-êng thang seⁿ. Góa chit-má beh kā lín kó͘-lē. Bîn-á-chài góa beh chhiáⁿ lu̍t-su lâi siá ûi-sio̍k. Lín siáⁿ-lâng tāi-seng seⁿ sun hō͘ góa phō, góa beh ke pun chi̍t hūn châi-sán hō͘..i. Taⁿ, lán chò-hóe lâi kî-tó, kám-siā Siōng-tè.” Kóng soah, i chiū àⁿ thâu kî-tó.
|
一工，伊叫in四個子轉來做伙食飯。伊宣佈：「我今老--lo͘h，足想beh抱孫。但是lín攏無閒thang生。我chit-má beh kā lín鼓勵。明仔再我beh 請律師來寫遺屬。Lín啥人代先生孫hō͘ 我抱，我beh加分一份財產hō͘--伊。今，咱做伙來祈禱，感謝上帝！」講煞，伊就àⁿ 頭祈禱。 |
|
Kî-tó soah, i taⁿ thâu khí lâi beh chia̍h pn̄g, hoat-hiān i sì ê kiáⁿ lóng bô tī--leh-ah !
|
祈禱煞，伊taⁿ頭起來beh食飯，發現伊四個子攏無tī--leh ah！ |
