Góa ê lāu-su
|
我ê老師 |
| Tiuⁿ Ho̍k-chû |
張復聚 |
|
Ū chi̍t pái, sai, hîm kap hô͘-lî chò-hóe khì phah-la̍h, sai phah tio̍h chi̍t chiah bé; Hîm phah tio̍h chi̍t chiah lî-á; Hô͘-lî phah tio̍h chi̍t chiah thò͘-á. In beh pun-pheⁿ chia-ê la̍h-mi̍h.
|
有一擺，獅、熊kap狐狸做伙去扑獵，獅扑著一隻馬；熊扑著一隻驢仔；狐狸扑著一隻兔仔。In beh分pheⁿ chia-ê獵物。 |
|
Sai kā hîm kóng: “Taⁿ, lí tāi-seng kóng, la̍h-mi̍h beh án-chóaⁿ pun?” Hîm ìn kóng: “Bé siōng tōa-chiah, hō͘ tāi-ông lí chia̍h; Lî-á khah sè, hō͘ góa chia̍h; Thò͘-á siōng-kài sè-chiah, tio̍h hō͘ hô͘-lî chia̍h.”
|
獅kā熊講：「今，你代先講，獵物beh án-chóaⁿ分？」熊應講：「馬，上大隻，hō͘大王你食；驢仔較細，hō͘我食；兔仔上介細隻，tio̍h hō͘ 狐狸食。」 |
|
Sai thiaⁿ liáu, bô-kóng-bô-tàⁿ tō iōng i sông-koh-ū-la̍t ê jiáu chhut la̍t kā hîm mau--lo̍h-khì; Hîm chi̍t siaⁿ tō sí--khì a. Sòa--lo̍h khì mn̄g hô͘-lî khòaⁿ la̍h-mi̍h ài án-chóaⁿ pun chiah hó. Hô͘-lî chin kín sòa-chhùi tō kóng: “Tāi-ông chái-khí khùn-chhéⁿ ê sî, seng chia̍h thò͘-á seh chi̍t ē chhùi-khí phāng; Tiong-tàu pak-tó͘ iau, chia̍h lî-á thang-hó khùn-tàu; Kàu àm-sî, tāi-ông pak-tó͘ chin iau ê sî chiah chia̍h bé, án-ne tāi-ông chiah ē-tàng tòng kàu keh-tńg-kang chái-khí.”
|
獅聽了，無講無tàⁿ tō用伊sông koh有力ê爪出力kā熊mau--落去；熊一聲tō死--去啊。續--落去問狐狸看獵物ài án-chóaⁿ分才好。狐狸真緊續嘴tō講：「大王早起睏醒ê時，先食兔仔 seh一下嘴齒縫；中晝腹肚枵，食驢仔thang好睏晝，到暗時，大王腹肚真枵 ê時才食馬，án-ne 大王才會當擋到隔轉工早起。」 |
|
Sai thiaⁿ liáu chin hoaⁿ-hí, chiok boán-ì, i mn̄g hô͘-lî kóng: “Lí ná-ē hiah gâu ? Sī siáⁿ-lâng kà--lí ê ?”
|
獅聽了真歡喜、足滿意。伊問狐狸講：「你哪會hiah gâu?是啥人教你--ê?」 |
|
Hô͘-lî iōng i kan-kúi koh káu-koài ê jiáu kí hit chiah hîm kóng: “I tō-sī góa ê lāu-su.”
|
狐狸用伊奸鬼koh狡怪ê爪指 hit 隻熊講：「伊tō是我ê老師。」 |
|
(Tâi-bûn Bóng-pò Tē 11 kî, 1997 nî 7 goe̍h)
|
（台文罔報第11期，1997年7月） |
