Chó͘-ke ê phoe
|
祖家ê 批 |
| Phian-chip-sek |
編輯室 |
|
Tī Tāi-eng-kok ū chiú-kóaⁿ-lâng, i to̍k- to̍k chi̍t-ê cha-bó͘-kiáⁿ niā-tiāⁿ. Hit-ê lāu-bú hō͘ i-ê kiáⁿ khì pa̍t só͘-chāi tha̍k chheh, chhin-chhiūⁿ chháu-tē lâng lo̍h- lâi Hú-siâⁿ chi̍t-poaⁿ-iūⁿ. Kàu pàng-kè ê sî gín-ná tò-lâi chhù--n̍i̍h kap i-ê lāu- bú chò-hóe. Hit-ê gín-ná ta̍k-ji̍t thiaⁿ- kìⁿ in niâ teh tha̍k Sèng-chheh, ná tha̍k ná hoaⁿ-hí; in-ūi i iáu sè-hàn bô sím- mi̍h ē-hiáu-tit in niâ teh hoaⁿ-hí sím-mi̍h tāi-chì. Chiū mn̄g i, Án-niâ in-ūi siáⁿ- sū, só͘ tha̍k só͘ khòaⁿ ê chheh sī àn-chóaⁿ- iūⁿ, lí kàu chiah hoaⁿ-hí leh ?
|
Tī 大英國有守寡人，伊獨獨一個查某子niā-tiāⁿ。Hit個老母hō͘ 伊ê子去別所在讀冊，親像草地人落來府城一般樣。到放假ê 時囡仔倒來厝--裡kap伊ê老母做伙。Hit個囡仔逐日聽見in 娘teh讀聖冊，那讀那歡喜；因為伊iáu細漢無甚mi̍h會曉titin娘teh歡喜甚mi̍h代誌。就問伊：「俺娘因為啥事，所讀所看ê冊是àn-chóaⁿ樣，你到chiah歡喜--leh ?」 |
|
In niâ chiū kā i kóng, Lí hit-sî chhut- gōa, góa só͘ kià hō͘ lí ê phoe; lí ū siông- siông khòaⁿ, siông-siông tha̍k á-bô ? Gín- ná chiū ìn i,Ū-no͘h ! in-ūi góa chai sī lí siá ê, só͘-í góa put-chí ài tha̍k, tha̍k liáu koh-chài tha̍k, góa ê sim chin-chiàⁿ hoaⁿ- hí chi̍h--tio̍h. Lāu-bú kā i kóng, Lí káⁿ- sī in-ūi phoe--n̍i̍h ū kóng-khí ke-lāi ê sū hō͘ lí khòaⁿ-liáu chhin-chhiūⁿ tò--lâi lán tau, ta̍k-hāng lóng chai; só͘-í kàu chiah hoaⁿ-hí. Góa só͘-tha̍k--ê teh hoaⁿ-hí iā chhin-chhiūⁿ lí án-ni, in-ūi chit pún chheh sī Thiⁿ-pē kià--lâi ê phoe, hō͘ lán thang chai tī Thian-tông ū éng-oán-oa̍h ê hok-khì, hit só͘-chāi sǹg sī lán ê chó͘- ke só͘ thong-ti ê siau-sit, góa chiah ū hiah ài tha̍k. Siōng-tè ê chí-ì nā lâu lí ê sèⁿ-miā kàu tōa-hàn tióng-sêng, lí chiū chiām-chiām ē-hiáu--tit, pa̍t-ji̍t góa teh- beh ǹg-bāng lí ē chhin-chhiūⁿ góa hiah ài tha̍k.
|
In娘就kā伊講：「你hit 時出外，我所寄hō͘ 你ê批；你有常常看，常常讀抑無？」囡仔就應--伊：「有--no͘h ! 因為我知是你寫--ê,所以我不止愛讀，讀了koh再讀，我ê心真正歡喜接--著。老母kā伊講：「你káⁿ是因為批--裡有講起家內ê事hō͘ 你看了親像倒--來咱兜，逐項攏知；所以到chiah歡喜。我所讀--ê teh歡喜也親像你án-ni，因為這本冊是天父寄--來ê批，hō͘ 咱thang知tī 天堂有永遠活ê福氣，hit所在算是咱ê祖家所通知ê消息，我才有hiah 愛讀。上帝ê旨意若留你ê生命到大漢長成，你就漸漸會曉--tit，別日我teh-beh向望你會親像我hiah愛讀。」 |
|
Gín-ná mn̄g kóng,Chiàu lí teh kóng, Thian-tông sī góa ê chó͘-ke--mah ? lí nā beh khì hit sî, m̄ chai beh chhōa góa kap lí chò-hóe khì--bô ? Lāu-bú ìn i kóng, Góa ê sim khiok chhin-chhiūⁿ teh ǹg- bāng Thian-tông chin-chiàⁿ sī lí ê chó͘- ke; chóng-sī lí chit sì, góa bô tek-khak chai, góa pún-sin si̍t-chāi bē kham-tit chhōa lí khì hia, iáu-kú chai nā óa-khò hit-ê lâng I chiū ē.
|
囡仔問講：「照你teh講，天堂是我ê祖家--mah？你若beh去hit 時，m̄ 知beh chhōa我kap你做伙去--無？」老母應伊講：「我ê 心卻親像teh向望天堂真正是你ê祖家；總--是你這世，我無的確知，我本身實在bē堪tit chhōa你去hia，iáu-kú知若倚靠hit 個人伊就會。」 |
|
Gín-ná ìn kóng,Hit-ê lâng sī Iâ-so͘ Ki-tok sī á-m̄-sī ? Lāu-bú ìn kóng,Chiū- sī lah ! góa ta̍k ji̍t thè lí kî-tó kiû Siōng-tè siúⁿ-sù Sèng-sîn kám-kek lí ê sim kā lí chí-sī ín-chhōa lí chiū-kīn Iâ-so͘. Lí nā khò I-ê gī tòe I-ê kha-jiah só͘ kiâⁿ, pa̍t-ji̍t chiū ē ún-tàng kap góa chò-hóe tī hia.
|
囡仔應講：「Hit 個人是耶穌基督是抑m̄ 是？」老母應講：「就是--lah！我逐日替你祈禱求上帝賞賜聖神感激你ê心kā你指示引chhōa你就近耶穌。你若靠伊ê義tòe伊ê腳跡所行，別日就會穩當kap我做伙tī hia。」 |
|
(Tâi-oân Hú-siâⁿ-kàu-hōe-pò tē 80 tiuⁿ,1891 nî 12 ge̍h)
|
(台灣府城教會報第80號，1891年12月) |
