OPERA lāi ê Mô͘-sîn-á_03
|
OPERA 內ê魔神仔_03 |
| Lo͘ⁿg |
Lo͘ⁿg |
|
V. Hō͘ Rao͘l ê phoe
|
V.Hō͘ Rao͘l ê 批 |
|
Hit lé-pài-saⁿ, Rao͘l mā siu tio̍h chi̍t tiuⁿ phoe. I kā phoe phah khui, khòaⁿ tio̍h ē-té ê chhiam-miâ, tu̍t-jiân kan suh chi̍t-kháu-khùi chhiò chhut-lâi. He sī hit kang thàu-chá kàu chit-chūn ûi-it chhut-hiān kòe ê chhiò-iông.
|
Hit禮拜三，Rao͘l mā 收著一張批。伊 kā 批扑開，看著下底 ê 簽名，突然間suh一口氣笑出來。He是hit工透早到這陣唯一出現過 ê 笑容。 |
|
Chhin ài ê Rao͘l:
|
「親愛 ê Rao͘l： |
|
Góa tong-liân ē kì-tit lí, góa nā ū khó-lêng ê kā lí pàng bōe-kì-tit. Góa kám ē-sái iok lí tòa pài-sì ē-pō͘ saⁿ tiám lâi Tuileries hoe-hn̂g khòaⁿ góa. Pài-thok lí chhian-bān m̄-thang siūⁿ-khì.
|
我當然會記得你，我ná有可能會 kā 你放bōe記得。我kám會使約你tòa拜四e晡三點來 Tuileries 花園看我。拜託你千萬 m̄-thang 受氣。 |
|
Christine Daaé
|
Christine Daaé」 |
|
Rao͘l kā phoe siu-ji̍p i ê khò͘-tē-á lāi. Siūⁿ-khì ? Mài kóng-chhiò ! I ná ū hoat-tō͘ tùi sian-lú lâi hoat-phî-khì. Nn̄g tiám iá-bōe kàu, I chiū í-keng tī kong-hn̂g leh tán-hāu I ê Christine.
|
Rao͘l kā 批收入伊 e 褲袋仔內。受氣？mài講笑！伊ná有法度對仙女來發脾氣。二點iá 未到，伊就已經tī 公園 leh 等候伊 e Christine。 |
|
Saⁿ tiám kòe 10 hun, i khai-sí kám-kak bōe chū-chāi. Saⁿ tiám pòaⁿ chi̍t kòe, I kám-kak kui ê lâng kiông-kiông beh sí-khì ah! Ū sî chhiong-tōng kah sīm-chí siūⁿ beh khì thâi-lâng.
|
三點過10分，伊開始感覺bōe自在。三點半一過，伊感覺歸個人強強beh 死去--ah！有時衝動 kah 甚至想beh 去thâi人。 |
|
Kòe-liáu chin-kú liáu-āu...liáu-āu...i lâi ah! I àn hoe-hn̂g lēng-gōa hit-pêng cháu kòe-lâi. Bô chi̍t bió cheng kú, í-keng lak-ji̍p-khì Rao͘l ê heng-khám lāi.
|
過了真久了後…了後…伊來--ah！伊按花園另外hit爿走過來。無一秒鐘久，已經落入去Rao͘l e 胸坎內。 |
|
"O͘h ! Góa ê Christine ! " Chi̍t pái koh chi̍t pái leh hoah, "O͘h ! Góa ê Christine!" Liáu-āu, in kiâⁿ-kòe hoe-hn̂g, ná kiâⁿ ná kóng, kóng liáu chin kú. Chit ê chêng-kéng chiū kán-ná tńg-khì kàu sì-nî chêng tī Brittany hái-hōaⁿ...
|
「O͘h！我 e Christine！」一擺 koh 一擺 leh 喝，「O͘h！我 e Christine！」了後，in行過花園，ná行ná講，講了真久。這個情景就kán-ná轉去到四年前tī Brittany海岸… |
|
"M̄-koh Lí nà ē cháu khui m̄ chhap góa?" Rao͘l ti̍h mn̄g, "Ūi-sím-mi̍h Lí bô siá phoe hō͘ Góa ? "
|
「m̄-koh 你nà會走開m̄ chhap我？」Rao͘l ti̍h問，「為甚 mi̍h 你無寫批hō͘ 我？」 |
|
Sòa lo̍h-lâi ū nn̄g, saⁿ hun-cheng kú, siang-lâng lóng bô-siaⁿ bô-soeh. Liáu-āu Christine seng khui-chhùi, i bān-bān-á kóng "Lí kap góa lóng iá-koh hiah siàu-liân. Góa chí-sī chi̍t ê àn Norway lâi ê saⁿ-liû koa-chiá. Ah lí...lí sī Vicomte de Chagny ê kùi-cho̍k. Góa chai-iáⁿ góa éng-oán mā bô khó-lêng chò lí ê khan-chhiú."
|
續落來有兩、三分鐘久，雙人攏無聲無說。了後Christine先開嘴，伊慢慢仔講「你kap我攏iá-koh hiah少年。我只是一個按Norway來 e 三流歌者。Ah你…你是Vicomtede Chagny e 貴族。我知影我永遠mā 無可能做你 e 牽手。」 |
|
"M̄-koh, Christine, góa chin-chiàⁿ ài lí ! "
|
「M̄-koh ，Christine，我真正愛你！」 |
|
"M̄-sī án-ne, Rao͘l ! Chhiáⁿ lí thiaⁿ góa kóng, hit ê sî-chūn góa cháu tńg-khì Norway. Chi̍t nî-āu, gún lāu-pē chiū kòe-sin khì ah! Chi̍t-sî kan-khó͘ sim-būn, góa koh tńg-lâi Paris, chiū it-ti̍t chhiùⁿ, phah-piàⁿ chhiùⁿ, siūⁿ beh chiâⁿ-chò chi̍t ê Opera ê koa-chiá, m̄-sī beh chò chi̍t ê phó͘-thong ê koa-chiá niā-niā, góa phah-piàⁿ siūⁿ beh chò choân Paris siōng hó ê Opera ián-oân ! "
|
「M̄是án-ne，Rao͘l！請你聽我講，hit個時陣我走轉去Norway。一年後，阮老爸就過身去--ah！一時艱苦心悶，我 koh 轉來Paris，就一直唱，拍拚唱，想beh 成做一個Opera e 歌者，m̄是beh 做一個普通 e 歌者niā-niā,我拍拚想beh 做全Paris上好 e Opera演員！」 |
|
"Lí í-keng ta̍t-sêng ah! " Rao͘l bīn-tòa-chhiò-iông kóng, "Choân Paris siâⁿ lóng í-keng tī lí ê kha-té."
|
「你已經達成--ah！」Rao͘l面帶笑容講，「全Paris城攏已經tī 你 e 腳底。」 |
|
Christine kā thâu tàm lo̍h-lâi, bô koh kóng pòaⁿ kù ōe.
|
Christine kā 頭tàm落來，無 koh 講半句話。 |
|
" Christine ! " Rao͘l khin-khin-á kóng, "Góa siūⁿ beh mn̄g lí chi̍t hāng tāi-chì. Pài-jī hit-àm, tī lí hòa-chong-sek lāi-té ê cha-po͘ sī siáⁿ lâng? Chhiáⁿ lí it-tēng ài kā góa kóng! Góa sī lí ê pêng-iú, pêng-iú kám m̄-sī ài hō͘-siong tàu-saⁿ-kāng ê? Kā Góa kóng i kiò-chò siáⁿ-mi̍h miâ hó bô? "
|
「Christine！」Rao͘l輕輕仔講，「我想beh 問你一項代誌。拜二hit暗，tī 你化妝室內底 e 查甫是啥人？請你一定愛 kā 我講！我是你 e 朋友，朋友kám m̄是 ài 互相tàu saⁿ-kāng e ？ kā 我講伊叫啥 mi̍h 名好無？」 |
|
"Góa bōe-sái kā lí kóng, che sī chi̍t ê pì-bi̍t!" Christine chin sè-siaⁿ kā ìn, hó chhin-chhiūⁿ kiaⁿ lâng thiaⁿ tio̍h. "Góa mā m̄-bat khòaⁿ kòe i, góa kan-taⁿ thiaⁿ-kòe i ê siaⁿ. M̄-koh i kán-ná bû-só͘-put-ti. I chai-iáⁿ jīn-hô ê tāi-chì, só͘-í pài-jī hit-àm, góa m̄-káⁿ kap lí kóng-ōe. I sī Góa ê im-ga̍k lāu-su. I sī chi̍t ê chiok hó ê koa-chiá. Góa chit-chūn ū hoat-tō͘ chhiùⁿ kah chiah hó lóng-sī i kà góa ê. I sī góa im-ga̍k sìⁿ-miā tiong ê thian-sài. I kóng i í-keng chhim-chhim ài tio̍h góa, góa kám ē-tàng lī-khui i leh? "
|
「我bōe使 kā 你講，這是一個祕密！」Christine真細聲 kā 應，好親像驚人聽著。「我mā m̄-bat看過伊，我kan-taⁿ聽過伊 e 聲。M̄-koh 伊kán-ná無所不知。伊知影任何 e 代誌，所以拜二hit暗，我 m̄-káⁿ kap你講話。伊是我 e 音樂老師。伊是一個足好 e 歌者。我這陣有法度唱 kah chiah好攏是伊教我 e 。伊是我音樂生命中 e 天使。伊講伊已經深深愛著我，我kám會當離開伊？」 |
|
VI. La Carlotta pān Margarita
|
VI. La Carlotta扮 Margarita |
|
Pài-gō͘ thàu-chá, La Carlotta tī i bîn-chhn̂g téng chia̍h chái-khí-tǹg. I ná lim ka-pi ná thiah-khui chái-khí sàng lâi ê phoe-sìn. Kî-tiong ū chi̍t tiuⁿ phoe pēng bô chhiam-miâ. Hit tiuⁿ phoe chiâⁿ té :
|
拜五透早，La Carlotta tī 伊眠床頂食早起頓。伊nalím咖啡ná拆開早起送來 e 批信。其中有一張批並無簽名。Hit張批誠短： |
|
Lí tng teh phoah-pīⁿ, lí kin-á-ji̍t àm-ah bô hoat-tō͘ chhiùⁿ Margarita, lí hó hó á kā góa lâu tòa chhù-lāi, bōe-sái khì Opera hì-īⁿ. Nā bô, ì-gōa sûi-sî ē hoat-seng! Lí kám goān-ì éng-oán sit-khì lí ê siaⁿ?
|
「你當teh破病，你今仔日暗仔無法度唱 Margarita，你好好仔 kā 我留tòa厝內，bōe使去Opera戲院。若無，意外隨時會發生！你kám願意永遠失去你 e 聲？」 |
|
La Carlotta khòaⁿ liáu khì kah kui-sian-lâng peh khí-lâi thiàu, liân chái-khí-tǹg tio̍h bô chia̍h oân.
|
La Carlotta看了氣 kah 歸仙人peh起來跳，連早起頓著無食完。 |
|
"Che it-tēng sī Christine ê sí-tóng kià lâi eh ! " I leh siūⁿ, "In siūⁿ beh hō͘ i kin-á-ji̍t àm-ah koh ē-tàng chiūⁿ-tâi. Pháiⁿ-sè! Lín chó͘-má bô-thang hiah hó liāu-lí! Ba̍k-chiu peh khah kim leh, Góa chiah sī choân Paris siōng hó ê Opera ián-oân! Bô lâng ē-tàng chó͘-tòng góa kin-á-ji̍t chiūⁿ-tâi chhiùⁿ Margarita."
|
「Che一定是Christine e 死黨寄來--eh！」伊 leh 想，「in想beh hō͘ 伊今仔日暗仔 koh 會當上台。歹勢！Lín 祖媽無 thang hiah好料理！目珠peh較金--leh ，我才是全Paris上好 e Opera演員！無人會當阻擋我今仔日上台唱 Margarita。」 |
|
Hit kang àm-sî la̍k tiám, phōaⁿ-bú-ê í-keng tī in ê hòa-chong-sek leh ōaⁿ-saⁿ. Ná khai-káng ná kā o͘ tò͘ âng ê ho̍k-chong chhēng khí-lâi. Kî-tiong ū chi̍t ê cha-bó͘ gín-á, Meg Giry, chi̍t ê lâng tiām-tiām bô kóng-ōe.
|
Hit工暗時六點，伴舞 e 已經tī in e 化妝室 leh 換衫。ná開講ná kā 黑tò͘紅 e 服裝穿起來。其中有一個查某囡仔，Meg Giry，一個人恬恬無講話。 |
|
"Meg! Lí sī án-chóaⁿ lah! " Aⁿie Sorell koan-sim leh kā mn̄g.
|
「Meg！你是按怎啦！」Aⁿie Sorell關心 leh kā 問。 |
|
"Góa leh hoân-ló Opera kúi." Meg kóng, "Gún ma-ah kóng mô͘-sîn-á tng leh siūⁿ-khì, i teh hoân-ló eng-àm ē hoat-seng siáⁿ-mi̍h tāi-chì."
|
「我 leh 煩惱Opera鬼。」Meg講，「阮媽ah講魔神仔當 leh 受氣，伊teh煩惱eng暗會發生啥物代誌。」 |
|
"Ái-iô ! " Chi̍t ê o͘ thâu-chang ê cha-bó͘ gín-á kóng, "Siáng ē khì kiaⁿ chi̍t ê lāu-hòe-á kúi ? "
|
「Ái-iô!」一個黑頭鬃 e 查某囡仔講，「siáng會去驚一個老歲仔鬼？」 |
|
Chi̍t tiám-cheng āu, Monsieur Armand kap Monsieur Firmin in nn̄g lâng kiâⁿ ji̍p-khì Box 5 lāi-té chē lo̍h-lâi. Siáⁿ-mi̍h kúi-á-kó͘? In chi̍t-tiám-á to bô kā sìn-táu. Chit-keng hì-īⁿ lāi kun-pún to bô siáⁿ-mi̍h mô͘-sîn-á !
|
一點鐘後，Monsieur Armand kap Monsieur Armandin兩人行入去 Box5內底坐落來。啥物鬼仔古？In一點仔就無 kā 信táu。這間戲院內根本就無啥物魔神仔！ |
|
Chē lo̍h-lâi bô jōa-kú, Monsieur Armand khòaⁿ tio̍h ū lâng kā hoe khǹg tòa mn̂g-kháu, "Firmin!" I sè-siaⁿ kā hoah, "Kám sī lí kā hoe khǹg tòa hia ? "
|
坐落來無偌久，Monsieur Armand看著有人 kā 花囥tòa門口，「Firmin！」伊細聲 kā 喝，「kám是你 kā 花囥tòa hia？」 |
|
Monsieur Firmin oa̍t-thâu khòaⁿ chi̍t ê, "Bô ah, Góa bé hoe beh chhòng siàⁿ? " Thâu-khak bong-bong-leh kóng, "Kám sī Lí ka-kī bé ê hoⁿh!"
|
Monsieur Armand越頭看一下，「無--ah，我買花beh 創啥？」頭殼摸摸--leh 講，「kám是你家己買 e--hoⁿh！」 |
|
"Lí leh khí-siáu hio͘h! Shi! Tiām-tiām, im-ga̍k í-keng khai-sí ah!"
|
「你 leh 起痟hio͘h！shi！恬恬，音樂已經開始--ah！」 |
|
Thâu ah chi̍t tiám-cheng iá bōe lûn-kàu La Carlotta chhiùⁿ. Tē 5 ê Box lāi mā bô siáⁿ-mi̍h kî-koài ê tāi-chì hoat-seng. Chit nn̄g ê tō-ián ê sim-chêng chiū lú lâi lú khin-sang khí-lâi. Bô jōa-kú lûn-kàu La Carlotta chiūⁿ-tiûⁿ, Monsieur Firmin chiū oa̍t-thâu thau-thau-á mn̄g Monsieur Armand
|
頭仔一點鐘iá未輪到 La Carlotta 唱。第五個 Box 內mā 無啥物奇怪 e 代誌發生。這兩個導演 e 心情就lú來lú輕鬆起來。無偌久輪到La Carlotta出場，Monsieur Armand就越頭偷偷仔問Monsieur Armand |
|
"Lí kám ū thiaⁿ tio̍h siáⁿ-mi̍h siaⁿ? "
|
「你kám有聽著啥物聲？」 |
|
"Bô ah! " Monsieur Armand kā ìn, m̄-koh I it-ti̍t oa̍t-thâu khòaⁿ i ê āu-piah, nn̄g pái, saⁿ pái..., bīn-sek lú lâi lú pe̍h, pe̍h kah bīn-sek í-keng hoán-chheⁿ.
|
「無--ah！」Monsieur Armand kā 應，m̄-koh 伊一直越頭看伊 e 後壁，兩擺，三擺…，面色lú來lú白，白 kah 面色已經反青… |
|
La Carlotta chi̍t tiâu koa koh chi̍t tiâu koa it-ti̍t chhiùⁿ lo̍h-khì, pēng bô siáⁿ-mi̍h tāi-chì hoat-seng. Sòa-lo̍h-lâi, tng i khai-sí chhiùⁿ chi̍t siú chin iu-bí ê chêng-koa ê sî-chūn...
|
La Carlotta一條歌 koh 一條歌一直唱落去，並無啥物代誌發生。續落來，當伊開始唱一首真優美 e 情歌 e 時陣… |
|
"Góa ê ài khai-sí beh---khô͘-a̍k ! "
|
「我 e 愛開始beh …khô͘-a̍k!」 |
|
Ta̍k-ke sa lóng bô, tàu-té Carlotta sī chhut siáⁿ-mi̍h būn-tôe? Nà ē ū hit ê kî-koài ê siaⁿ--khô͘-a̍k?
|
逐家sa攏無，tàu底 Carlotta 是出啥物問題？ná會有hit個奇怪 e 聲--khô͘-a̍k? |
|
Carlotta thêng chi̍t-chām-á, koh khai-sí têng chhiùⁿ chi̍t kái.
|
Carlotta停一chām仔， koh 開始重唱一kái。 |
|
"Góa ê ài khai sí beh---khô͘-a̍k!"
|
「我 e 愛開始beh …khô͘-a̍k!」 |
|
"Góa bô hoat-tō͘ bōe kì-tit Góa ê---khô͘-a̍k!"
|
「我無法度bōe記得我 e …khô͘-a̍k!」 |
|
He sī chiuⁿ-chî ê siaⁿ! Ta̍k-ke chiām-chiām bêng-liâu āu chiū khai-sí ū lâng tòng-bōe-tiâu chhiò chhut-lâi. Monsieur Armand kā thâu tàm-lo̍h-lâi, iōng chhiú thèⁿ leh. Chit ê sî-chūn, Box lāi thoân-kòe-lâi chi̍t ê siaⁿ, chi̍t ê cha-po͘-lâng ê siaⁿ, leh chhiò !
|
He是chiuⁿ-chî e 聲！逐家漸漸明瞭後就開始有人tòng-bōe-tiâu笑出來。Monsieur Armand kā 頭tàm落來，用手thèⁿ--leh 。這個時陣，Box內傳來一個聲，一個查甫人 e 聲， leh 笑！ |
|
Lēng-gōa, tī hì-tâi-téng, khó-liân ê La Carlotta chi̍t kái koh chi̍t kái leh têng-chhiùⁿ.
|
另外，tī 戲台頂，可憐 e La Carlotta一kái koh 一kái leh 重唱。 |
|
"Góa bô hoat-tō͘ bōe kì-tit Góa ê---khô͘-a̍k!"
|
「我無法度bōe記得我 e …khô͘-a̍k!」 |
|
Chit ê sî-chūn, chit nn̄g ê tō-ián koh thiaⁿ tio̍h hit ê cha-po͘-lâng ê siaⁿ, tī In ê thâu-chêng, āu-piah, boán sì-kòe.
|
這個時陣，這兩個導演 koh 聽著hit個查甫人 e 聲，tī in e 頭前，後壁，滿四過。 |
|
"I kin-á-ji̍t ê koa-siaⁿ ē kā tiàu tī chhù-téng ê tiān-hóe-kōaⁿ kám-tōng kah lak-lo̍h-lâi! "
|
「伊今仔日 e 歌聲會 kā 吊tī 厝頂 e 電火kōaⁿ感動 kah lak落來！」 |
|
Nn̄g ê lâng hiông-hiông giâ-thâu khì khòaⁿ hit pha kui chheng, kui bān lia̍p tiān-hóe-kiû-á só͘ cho͘ khí-lâi ê tiàu-teng. "Taⁿ chhám ah!" In ê bīn chiⁿ-sún-sún. Chit pha chhut-miâ ê tiàu-teng í-keng lī-khui soh-á, ti̍t-ti̍t hiòng ē-kha ê thiaⁿ-chiòng teh lo̍h-khì !
|
兩個人雄雄 giâ頭去看hit pha kui千、kui萬粒電火球仔所組起來 e 吊燈。「今慘mah5!」in e 面青sún-sún。這pha出名 e 吊燈已經離開索仔，直直向下腳 e 聽眾teh落去！ |
|
Tùi chit keng Opera hì-īⁿ lâi kóng, che chin-chiàⁿ sī chi̍t ê khióng-pò͘ ê àm-mî. Ū chi̍t ê hū-jîn-lâng khì hō͘ hit pha tiān-hóe teh-sí. Lēng-gōa koh ū chin chōe lâng tio̍h tāng-siong. Hì-īⁿ chiok-chiok koaiⁿ-mn̂g nn̄g lé-pài. La Carlotta chiông-chhú í-āu, tio̍h kiat-sok liáu i chhiùⁿ-koa ê sìⁿ-miā.
|
對這間Opera戲院來講，這真正是一 e 恐怖 e 暗暝。有一個婦人人去hō͘ hit pha電火tè死。另外 koh 有真濟人著重傷。戲院足足關門兩禮拜。La Carlotta從此以後，著結束了伊唱歌 e 生命。 |
