Ngá-kok khì kìⁿ-tio̍h Lú-ông
|
雅各去見著女王 |
| Phian-chip-sek |
編輯室 |
|
Tī So͘-kek-lân ū chi̍t-ê gín-ná miâ kiò Ngá-kok. I-ê pē-bó í-keng kòe-óng lah. Khó-sioh bô pêng-iú thang chiù-kò͘ i.
|
Tī蘇格蘭有一個囡仔名叫雅各。伊ê父母已經過往lah。可惜無朋友thang照顧伊。 |
|
Chit-ê gín-ná ài ji̍p-o̍h khì tha̍k-chheh siū kà-sī; m̄-kú bô lâng thang thè i chhut-chîⁿ, só͘-í bē-tàng khì tha̍k. I siông-siông teh hoân-ló chit-chân tāi- chì, kàu ū chi̍t-ji̍t i ka-tī siūⁿ kóng, “Taⁿ góa bô pē-bó lah, ia̍h bô chhin-chhek lah, góa beh khì kìⁿ goán ê Lú- ông, kiû i pang-chān góa.”
|
這個囡仔ài入學去讀冊受教示；m̄-kú無人thang 替伊出錢，所以bē-tàng去讀。伊常常teh煩惱chit層代誌，到有一日伊家己想講：「今我無父母--lah，亦無親戚--lah，我beh去見阮ê女王，求伊幫贊我。」 |
|
I án-ni kóng, sī in-ūi chai hit-ê Lú-ông put-chó hó sim, ia̍h gâu lîn-bín thé- thiap sàn-hiong lâng.
|
伊án-ni講，是因為知hit-ê女王不止好心，亦 gâu憐憫體貼散hiong人。 |
|
Só͘-í chit-ê gín-ná ū kiâⁿ-kàu Lú-ông só͘ tòa ê só͘-chāi. Tī ông-kiong ê mn̂g- kháu ū chi̍t miâ peng teh pé-siú. I khòaⁿ gín-ná beh ji̍p--khì, chiū liâm-piⁿ chó͘-chí, hoah i kóng, “Lí ài-beh chhòng sím-mi̍h tāi-chì? M̄-thang ji̍p--khì.”
|
所以這個囡仔有行到女王所tòa ê所在。Tī王宮ê門口有一名兵teh把守。伊看囡仔beh入去，就liâm-piⁿ阻止，hoah伊講：「你ài-beh chhòng 甚mi̍h代誌？M̄-thang入去。」 |
|
Ngá-kok ìn kóng, “Góa ài khì kìⁿ Lú-ông, chhiáⁿ lí hō͘ góa ji̍p--khì.”
|
雅各應講：「我ài去見女王，請你hō͘我入去。」 |
|
Hit-ê peng-teng kan-ta chhiò i kóng, “Khám-mé khì ah! Lí bē-kham-tit kìⁿ i.”
|
Hit-ê兵丁kan-ta笑伊講：「堪bē去ah!你bē堪tit見伊。」 |
|
Ngá-kok thiaⁿ-kìⁿ án-ni, chiū iu-būn tò-tńg-khì, iân-lō͘ kiâⁿ, iân-lō͘ háu, ka-tī teh phah-sǹg kàu chia sī bô lō͘-ēng lah.
|
雅各聽見án-ni，就憂悶倒轉去，沿路行，沿路吼，家己 teh 扑算到chia是無路用--lah。 |
|
Tú-tú teh-beh thêng-kha, ū chi̍t lâng tùi i bīn-chêng keng-kòe; khòaⁿ-kìⁿ Ngá-kok iu-thâu khó͘-bīn, chiū mn̄g i kóng, “Gín-ná ah, lí in-ūi sím-mi̍h tāi- chì teh iu-būn kàu án-ni?”
|
Tú-tú teh-beh停腳，有一人 tùi伊面前經過；看見雅各憂頭土面，就問伊講：「囡仔--ah，你因為甚mi̍h代 誌teh憂悶到án-ni?」 |
|
Ngá-kok chiū chiong i-ê tāi-chì lóng- chóng kā i kóng. Hit-ê lâng chiū an-ùi i kóng, “Taⁿ lí thang an-sim, m̄-bián hoân-ló, góa beh chhōa lí kàu Lú-ông ê bīn-chêng.”
|
雅各就將伊ê代誌攏總kā伊講。Hit-ê人就安慰 伊講：「今你thang安心，m̄免煩惱，我beh chhōa你到女王ê 面前。」 |
|
I chiū ìn kóng, “M̄-kú tī mn̂g-kháu ū chi̍t-ê peng-teng, i m̄ hō͘ góa ji̍p--khì.”
|
伊就應講：「M̄-kú tī門口有一個兵丁，伊m̄ hō͘我入去。」 |
|
Hit-ê lâng kóng, “Lí m̄-bián khòaⁿ-lū, m̄-sái kiaⁿ hit-ê peng-teng m̄ hō͘ lí ji̍p-- khì; lí tio̍h óa-khò góa, góa ún-tàng chhōa lí kàu Lú-ông ê bīn-chêng.”
|
Hit-ê人講：「你m̄免掛慮，m̄-sái驚hit-ê兵丁m̄ hō͘你入去；你著倚靠我，我穩當 chhōa你到女王ê面前。」 |
|
Kóng-liáu chiū khan Ngá-kok ê chhiú,nn̄g langch5o-hóe kiâⁿ kàu mn̂g-kháu. Hit-tia̍p peng-teng lóng m̄-káⁿ chó͘- tòng i, koh kā hit-ê chhōa-i ê lâng kiâⁿ-lé.
|
講了就牽雅各ê手，兩人作伙行到門口。Hit-tia̍p兵丁攏m̄敢阻擋伊，koh kā hit-ê chhōa伊ê人行禮。 |
|
Kiâⁿ ū hiah hn̄g, koh khòaⁿ-kìⁿ chi̍t- ê peng-teng tī-hia teh khiā. Ngá-kok ê sim iū-koh lóe-chì. I chiū kóng, “Tī hia iáu ū chi̍t-ê peng-teng, lí phah-sǹg i beh hō͘ lán ji̍p--khì á-m̄?”
|
行有hiah遠，koh看見一個兵丁tī-hia teh khiā。雅各ê心又koh餒志。伊就講：「Tī hia iáu有一個兵丁，你扑算伊beh hō͘咱入去抑m̄?」 |
|
I kóng, “M̄-sái kiaⁿ, góa kā lí kóng, tio̍h óa-khò góa, koat-toàn ē-thang ji̍p.”
|
伊講：「M̄-sái驚，我kā你講，著倚靠我，決斷會thang入。」 |
|
Taⁿ hit-tia̍p Ngá-kok siūⁿ bē-hiáu-tit, m̄-chai chit-ê lâng sī chī-chūi; ia̍h m̄- chai hó khoán-thāi i kàu án-ni, sī ūi-tio̍h sím-mi̍h iân-kò͘.
|
今hit-tia̍p,雅各想bē曉tit，m̄知這個人是是誰；亦m̄ 知好款待伊到án-ni，是為著甚mi̍h緣故。 |
|
Só͘-í chiū hó-táⁿ lâi mn̄g. Hit-ê lâng kóng, “Góa sī Lú-ông ê kiáⁿ.”
|
所以就好膽來問。Hit-ê人講：「我是女王ê子。」 |
|
Ngá-kok thiaⁿ-kìⁿ chit-kù-ōe, chiū liâm-piⁿ chai i ún-tàng ē chhōa i tī Lú- ông ê bīn-chêng; só͘-í bô koh khòa-lū; hoán-tńg hoaⁿ-hí hō͘ Thài-chú ti̍t-ti̍t chhōa i kàu Lú-ông ê pâng.
|
雅各聽見這句話，就liâm-piⁿ知伊穩當會chhōa伊tī女王ê面前；所以無koh掛慮；反轉歡喜ho͘太子直直chhōa伊到女王ê房。 |
|
Lú-ông kap i kóng-ōe, ia̍h put-chí hó khoán-thāi i; kàu āu-lâi chiàu Ngá-kok só͘ ì-ài, hō͘ i ji̍p-o̍h the̍k-chheh siá-jī, í- ki̍p ha̍k-si̍p pa̍t-mi̍h ê kà-sī; kàu tōa- hàn ê sî-hāu chiū sêng-khì, chiâⁿ-chò ū tōa lō͘-ēng ê lâng.
|
女王kap伊講話，亦不止好款待伊；到後來照雅各所意愛，hō͘伊入學讀寫字，以及學習別物ê教示；到大漢ê時候就成器，成做有大路用ê人。 |
|
Taⁿ lán tāi-ke chiong chit-ê gín-ná ê sū thang lâi siūⁿ chi̍t-hāng tē-it iàu-kín ê tāi-chì, chiū-sī lán tio̍h óa-khò lán ê Chú Iâ-so͘, chhin-chhiūⁿ Ngá-kok óa- khò hit-ê Lú-ông ê kiáⁿ chi̍t-poaⁿ-iūⁿ.
|
今咱大家將這個囡仔ê事thang來想一項第一要緊 ê代誌，就是咱著倚靠咱ê 主耶穌，親像雅各倚靠hit-ê女王ê子一般樣。 |
|
Lán ê Chú Iâ-so͘ sī Thiⁿ-téng Siōng- tè ê Kiáⁿ; lán nā óa-khò i, i ún-tàng ē- tit-thang ín-chhōa lán kàu Siōng-tè ê bīn-chêng, ia̍h ē hō͘ lán tī bān Ông ê Ông ê só͘-chāi khiā-khí kàu éng-oán.
|
咱ê主耶穌是天頂上帝ê子；咱若倚靠伊，伊穩當會tit thang引chhōa咱到上帝ê 面前，亦會hō͘咱tī萬王ê王ê所在企起到永遠。 |
|
Éng-oán kap Chú khiā-khí,
|
永遠kap主企起， |
|
Chiàⁿ-sī góa sim só͘ goān;
|
正是我心所願； |
|
Thian-tông tn̂g oa̍h, bān sè bô sí,
|
天堂長活， |
|
Hióng-hok ti̍t kàu éng-oán.
|
萬世無死，享福直到永遠。 |
|
(Tâi-lâm Kàu-hōe-pò, Tē 63 tiuⁿ, 1890 nî 8 ge̍h)
|
（台灣府城教會報第63張，1890年8月） |
