Hòa-hak-phín ê Hiân-ki_03
|
化學品 ê 玄機_03 |
| Chng Hūi-phêng |
莊惠平 |
|
Cha̍p Greenworld
|
10 Greenworld |
|
Nn̄g kang āu, thàu-chá 5 tiám Hūi-chin kah Liông-kian kàu Bûn-Hiàn ê chhù, in bô khok mn̂g. Bô siūⁿ beh kiaⁿ-chhéⁿ--lâng, si̍t-chè-siōng Bûn-hiàn bô tī chhù, Hūi-chin chai-iáⁿ i khì Scotland kìⁿ Lē-bí, tī kong-thiaⁿ-hōe ê chái-khí, chiah ē tńg--lâi.
|
兩工後，透早五點，惠真kah良堅到文憲ê 厝，in 無khok門。無想beh驚醒--人，實際上文憲無tī 厝，惠真知影伊去 Scotland chhōe 麗美，tī 公聽會ê 早起，才會轉--來。 |
|
Hūi-chin kah Liông-kian tiām-tiām kiâⁿ khì hô-piⁿ ê chûn-ok, in bô-siaⁿ-bô-soeh kā chûn pàng-lo̍h hô, koh sái kàu hô ê tùi-bīn.
|
惠真kah良堅恬恬行去河邊ê 船屋，in 無聲無說kā 船放落河，koh 駛到河ê 對面。 |
|
Tī hô ê tùi-bīn in khì tn̄g tio̍h nn̄g ê pêng-iú---Thian-sù kah Bí-lêng, in nn̄g ê chhēng pe̍h-saⁿ, saⁿ téng-bīn ìn Greenworld ê Mark, jiân-āu in lóng peh-chiūⁿ chûn-téng, chìⁿ-chúi sái tùi chhat-liāu-chhiáng.
|
Tī 河ê 對面in去tn̄g著兩個朋友---天賜kah美玲，in兩個穿白衫，衫頂面印Geenworld ê Mark，然後in 攏peh上船頂，箭水駛tùi 漆料廠。 |
|
Thàu-hong ê chá-khí hô ê éng chin tōa, m̄-koh Hūi-chin sī chin gâu ê chúi-chhiú, tāi-iok pòaⁿ tiám-cheng, tō kàu kang-tiûⁿ, nn̄g ê liap-iáⁿ-chhiú khiā tī hô-piⁿ hip-siòng.
|
透風ê 早起河ê 湧真大，m̄-koh惠真是真gâu ê 水手，大約半點鐘，tō 到工場，兩個攝影手企tī 河邊hip 相。 |
|
Hūi-chin hoah kóng,“ Liông-kian, tī tó-ūi? ”
|
惠真喝講：「良堅，tī tó 位？」 |
|
Liông-kian kóng,“ Tī hia, tī thiâu-á ê thâu-chêng. ” Hūi-chin sái tùi thiâu-á hia khì, tng in chiap-kīn ê sî, in khòaⁿ ē tio̍h tī chúi-té ê chúi-kóng, che tō sī kang-tiûⁿ tò hùi-liāu ê kóng, Liông-kian hoah kóng,“ Tī chia! ” Hūi-chin kā chûn oat ǹg hong ê hong-hiòng, Bí-lêng lám hit ki thiâu-á, jiân-āu Liông-kian kah Thian-sù lo̍h chûn ji̍p-khì hô--ni̍h
|
良堅講：「Tī hia，tī 柱仔ê 頭前。」，惠真駛tùi柱仔hia去，當in 接近ê 時，in看會著tī 水底ê 水管，che tō 是工場倒廢料ê 管，良堅喝講：「Tī chia！」惠真kā船斡向風ê 方向，美玲攬hit 枝柱仔，然後良堅kah天賜落船入去河--ni̍h。 |
|
Hia ê chúi lâu chin kín, in ài lám tī kóng kah chûn ê téng-bīn, Thian-sù tùi chûn-téng the̍h kúi-nā-ê ngē-chóa tē-á, tē-á sè-ê, m̄-koh chin tēng, in-ūi in lāi-té té âng-mn̂g-thô͘. Thian-sù 1 pái the̍h chi̍t tē hō͘ Liông-kian, Liông-kian lo̍h khì chúi-té, chiōng tē-á that ji̍p khì chúi-kóng, kúi hun-cheng liáu, kóng ê chhùi lóng sī âng-mn̂g-thô͘ ê tē-á, chòe-āu, Liông-kian tùi chúi-té peh--khí- lâi, hoah kóng,“ Hó--ah, lán chò hó--ah, âng-mn̂g-thô͘ í-keng tâm--ah, kúi tiám-cheng kòe, tō ē chhiūⁿ chio̍h-thâu hiah tēng, taⁿ mi̍h-kiāⁿ bô-hoat-tō͘ lâu tùi hia chhut-- lâi! In nn̄g-ê peh khí-lâi chûn-téng koh chhiò-chhiò khòaⁿ liap-iáⁿ-chhiú. Koh-lâi Liông-kian kah Hūi-chin tī chûn-téng khiā--khí-lâi, giâ chi̍t tè pe̍h-sek ê pò͘-tiâu, pò͘-tiâu téng-bīn siá:
|
Hia ê 水流真急，in愛攬tī 管kah 船ê 頂面，天賜tùi 船頂提幾若個硬紙袋仔，袋仔細ê,m̄-koh真tēng,因為in內底té 紅毛土。天賜一擺提一袋hō͘良堅，良堅落去水底，將袋仔塞入去水管，幾分鐘了，管ê 嘴攏是紅毛土ê 袋仔，最後，良堅tùi水底peh--起來，喝講「好--ah，咱做好--ah，紅毛土已經tâm--ah，幾點鐘過，tō 會像石頭hiah tēng,今物件無法度流tùi hia 出--來！In兩個peh起來船頂koh笑笑看攝影手。Koh來良堅kah惠真tī 船頂企--起-來，giâ一塊白色ê 布條，布條頂面寫： |
|
“Greenworld CHIT KI KOⁿG2 THAÎ-SÍ HAÍ-KAÚ !”
|
「Greenworld 這枝管thâi 死海狗！」 |
|
Tī hit ê sî-chūn ū nn̄g hāng tāi-chì hoat-seng. Thâu-chi̍t-hāng, chi̍t ê cha-po͘-lâng tùi kang-tiûⁿ cháu--chhut-lâi, ná hoah ná siūⁿ-khì, tē-jī-hāng hiông-hiông hong piàn tōa, chin kín tō kā chûn-phâng tùi chûn ê chit pêng chhoe kàu lēng-gōa hit pêng, phâng ê āu-táu tōa-la̍t cheng tio̍h Hūi-chin ê āu-thâu-khok, Hūi-chin ná-chhiūⁿ han-chî-tē, siak lo̍h chúi, jiân-āu hong koh kā chûn-phâng chhoe hàiⁿ tńg-khì goân-lâi hit pêng, chit ê sî-chūn chûn tó tī hit pêng, phâng mā tó tī chúi-té, Liông-kian tī phâng ê ē-bīn, phâng kah pò͘-tiâu kā i om-tiâu--leh, ū kúi--ā bió bô-hoat-tō͘ khòaⁿ tio̍h mi̍h-kiāⁿ, jiân-āu i peh khí-lâi chúi-bīn, tī i āu-piah ū chi̍t ki kha tī chúi-té ti̍t-ti̍t that, ū lâng iáu khàm tī phâng-pò͘ ê ē-bīn, i kín koh lo̍h-khì chúi-té kā Thian-sù tàu-saⁿ-kāng, kiat-kó Thian-sù soah kā Liông-kian lám giú lo̍h chúi, keng-kòe kín-tiuⁿ koh kiaⁿ-hiâⁿ ê piàⁿ-miā, Liông-kian chiah kā nn̄g-lâng giú khí-lâi chúi-bīn. In nn̄g-lâng tàu-tīn mo͘h tī chûn ê téng-bīn, tī hia phēⁿ-phēⁿ-chhoán.
|
Tī hit ê 時陣有兩項代誌發生。頭一項，一個查甫人tùi工場走--出-來，那喝那受氣，第二項雄雄風變大，真緊就kā 船帆tùi 船ê 這爿吹到另外hit 爿，帆ê 後táu 大力cheng 著惠真ê 後頭khok，惠真那像番薯袋，摔落水，然後風koh kā 船帆吹hàiⁿ 轉來原來這爿，這個時陣船倒tī hit爿，帆mā 倒tī 水底，良堅tī 帆ê 下面，帆kah 布條kā 伊om-tiâu--leh，有幾若秒無法度看著物件，然後伊peh 起來水面，tī 伊後壁有一枝腳tī 水底直直踢，有人iáu khàm tī 帆布ê 下面，伊緊koh 落去水底kā天賜鬥相仝，結果天賜煞kā 良堅攬giú 落水，經過緊張koh驚惶ê 拚命，良堅才kā 兩人giú 起來水面。In 兩人鬥陣mo͘h tī 船ê 頂面，tī hia phēⁿ-phēⁿ 喘。 |
|
Liông-kian khòaⁿ Bí-lêng moh tī chûn ê āu-táu, jiân-āu thiaⁿ tio̍h lâng teh hoah, oa̍t-thâu khòaⁿ tio̍h kang-tiûⁿ ū chi̍t ê lâng, ná hoah ná kí-tùi chúi-bóe hia, m̄-koh Liông-kian hīⁿ-á lāi ū chúi, thâu-sian thiaⁿ bē chheng-chhó, bóe-á chiah liáu-kái.
|
良堅看美玲mo͘h tī 船ê 後táu,然後聽著人teh喝，越頭看著工場有一個人，那喝那kí-tùi 水尾hia，m̄-koh良堅耳仔內有水，頭先聽bē 清楚，尾仔才了解。 |
|
Chit ê lâng hoah kóng,“Kiù-lâng-- ò͘! Hit ê cha-bó͘ gín-á teh-beh im--sí--ah! ”
|
這個人喝講：「救人--ò͘!，hit ê 查某囡仔teh-beh淹--死-ah！」 |
|
Liông-kian khòaⁿ i kí ê só͘-chāi, hn̄g-hn̄g khòaⁿ tio̍h ū pe̍h-pe̍h ê mi̍h-kiāⁿ phû--leh phû--leh, bô án-chóaⁿ, chhiūⁿ kū-saⁿ- tē-á tī chúi-bīn ná phû ná se̍h-lin-long, sī Hūi-chin! Chúi chin kín teh kā i lâu kàu chúi-bóe----hái--ni̍h khì.
|
良堅看伊kí ê 所在，遠遠看著有白白ê 物件浮--leh 浮--leh，無án-chóaⁿ，像舊衫袋仔tī 水面那浮那se̍h-lin-long，是惠真！河水真緊teh kā 伊流到水尾----海--ni̍h去。 |
|
Liông-kian chheⁿ-kông siû tùi Hūi-chin hia khì, i chin gâu siû-chúi, m̄-koh pe̍h-saⁿ hō͘ i bān--lo̍h-lâi, i piàⁿ-miā siû, m̄-koh kán-ná chin bān chin bān, chúi chin tōa koh kā i ek--tńg khì. Kàu í-āu i thè-hiu ê sî chò-bāng mā ē bāng--tio̍h--siû tùi pe̍h-pe̍h ê khu-thé sī hiah-n̍i̍h-á hn̄g, hiah-n̍i̍h-á bān, jî-chhiáⁿ khu-thé tī i ê thâu-chêng chin kín phû lī-khui.
|
良堅chheⁿ 狂泅tùi 惠真hia去，伊真gâu泅水，m̄-koh白衫hō͘ 伊慢--落-來，伊拚命泅，m̄-koh假那真慢真慢，水真大koh kā伊溢轉--去。到以後伊退休ê 時做夢mā 會夢--著----泅tùi 白白ê 軀體是hiah-n̍i̍h仔長、hiah-n̍i̍h仔慢，而且軀體tī 伊ê 頭前真緊浮離開。 |
|
Chòe-āu Liông-kian sa tio̍h Hūi-chin, Hūi-chin m̄-chai-lâng, bīn phak--leh tī hia phû--leh phû--leh, Liông-kian beh kā i péng-sin, m̄-koh chin lân, Hūi-chin chin tāng, tng Liông-kian ka-la̍uh Hūi-chin ê chhiú, in koh lak lo̍h-khì chúi-té, i kā Hūi-chin ê bīn chhòng khí-lâi chúi-bīn, m̄-koh thâu tò-siàng-hiàⁿ, bô teh tín-tāng, mā bô teh chhoán-khùi, Liông-kian mo͘h Hūi-chin ê bīn, tùi i ê chhùi pûn-khùi, nā thêng siû, tō koh tùi i ê chhùi pûn-khùi, chi̍t piàn koh chi̍t piàn, m̄-koh bô siáⁿ khí-sek.
|
最後良堅sa著惠真，惠真m̄ 知人，面仆leh tī hia 浮--leh 浮--leh，良堅beh kā伊 péng身，m̄-koh真難，惠真真重，當良堅ka-la̍uh惠真ê 手，in koh lak落去水底，伊 kā惠真ê 面chhòng 起來水面，m̄-koh頭倒siàng-hiàⁿ，無teh振動，mā無teh喘氣，良堅mo͘h 惠真ê 面，對伊ê 嘴pûn氣，若停泅，tō koh對伊ê 嘴pûn氣，一遍koh 一遍，m̄-koh 無啥起色。 |
|
I 4 kè khòaⁿ-khòaⁿ--leh, in iáu tī hô tiong-ng, it-ti̍t hō͘ chúi chhiong tùi chúi-bóe, tī hia lī hōaⁿ-piⁿ 25 bí, m̄-koh kah tī tò-pêng tē jī tiâu hô ê chúi-bóe ū 200 bí hn̄g.
|
伊四界看看--leh，in iáu-tī 河中央，一直hō͘ 水沖tùi 水尾，tī hia 離岸邊 25 米，m̄-koh kah tī tò爿第二條河ê 水尾有200 米遠。 |
|
Hōaⁿ hiah hn̄g, chúi lâu hiah kín, Liông-kian thiám koh kiaⁿ, cha-hng lo̍h-kòe hō͘, hō͘-chúi chin tōa, tng teh lâu tùi chúi-bóe ê hái, hō͘ tōa-hong sàu--khì-lâi ê chúi-éng siàn tio̍h i ê bīn.
|
岸hiah遠，水流hiah緊，良堅thiám koh驚，昨昏落過雨，雨水真大，當teh流tùi水尾ê 海，hō͘ 大風掃--起-來ê 水湧搧著伊ê 面。 |
|
Liông-kian khai-sí iōng sí-gín-á-the ê hong-sek thoa Hūi-chin, thoa tùi hōaⁿ-piⁿ ê chhiū-á khì, múi siû pòaⁿ hun-cheng, tō thêng--lo̍h-lâi tùi Hūi-chin ê chhùi pûn 4 pái khùi, chit pái i jīn-ûi ū khòaⁿ tio̍h Hūi-chin teh chhoán-khùi, m̄-koh bô khak-tēng, Hūi-chin ê bīn chin pe̍h, Liông-kian bô siūⁿ kóng i sī m̄ sī teh chhoán-khùi, chúi chin kín kā in chhiong tùi hái khì.
|
良堅開始用死囡仔撐ê方式拖惠真，拖tùi 岸邊ê 樹仔去，每泅半分鐘，就停落來tùi惠真ê 嘴pûn四擺氣，這擺伊認為有看著惠真teh 喘氣，m̄-koh 無確定，惠真ê 面真白，良堅無想講伊是m̄是teh 喘氣，水真緊kā in 沖tùi 海去。 |
|
Liông-kian kha tōa-la̍t ti̍t-ti̍t that, koh khah piàⁿ-miā siû, ū khah kín, chit-má chhun 5 bí, m̄-koh hōaⁿ kòe-sòa chin kín, tī hōaⁿ-piⁿ ū 1 châng chhiū-á ê chhiū-ki lī chúi-bīn chin kīn, Liông-kian piàⁿ-miā that, khì sa tio̍h chhiū-ki, koh mo͘h tī téng-bīn, hô-chúi teh thoa i cháu, suh chi̍t ê tōa-khùi, koh sàng tōa-tōa khùi hō͘ Hūi-chin, Liông-kian chit-chūn chiah khak-tēng āu chi̍t khùi sī Hūi-chin ka-tī chhoán-khùi--ê.
|
良堅腳大力直直踢，koh較拚命泅，有較緊，chit-má chhun 5 米，m̄-koh 岸過續真緊，tī 岸邊有一欉樹仔ê 樹枝離水面真近，良堅拚命踢，去sa 著樹枝，koh mo͘h tī 頂面，河水teh 拖伊走，suh 一個大氣，koh 送大大氣hō͘ 惠真，良堅這陣才確定後一氣是惠真家己喘氣--ê。 |
|
Tāi-iok gō͘ hun-cheng āu i chiah kā Hūi-chin thoa chiūⁿ hōaⁿ, chiūⁿ hōaⁿ ê sî, i kah Hūi-chin tó-tī thô͘-kha, koh sàng khùi hō͘ Hūi-chin, jiân-āu bong i ê sim-chōng, thâu-á chhiú siuⁿ léng, kám-kak bē chhut--lâi, jiân-āu, thiàu--ah! Teh chhoán-khùi--ah.
|
大約5分鐘後伊才kā 惠真拖上岸，上岸ê 時，伊kah 惠真倒tī 塗腳，koh送氣hō͘ 惠真，然後摸伊ê 心臟，頭仔手siuⁿ 冷，感覺bē 出--來，然後，跳--ah！Teh 喘氣--ah！ |
|
Liông-Kian chō͘ Hūi-chin suh-khùi, kàu i ka-tī ū-hoat-tō͘ chhoán-khùi ê sî, ū gō͘ hun cheng kú, liáu-āu khai-sí teh chhoah, sin chhēng tâm saⁿ, hō͘ hong chhōe ē kôaⁿ. I m̄-chai beh án-chóaⁿ, chiong thâu àⁿ-kē, khòaⁿ tio̍h Hūi-chin ê ba̍k-chiu peh-kim.
|
良堅助惠真suh氣，到伊家己有法度喘氣ê 時，有5分鐘久，了後開始teh chhoah，身穿tâm衫，hō͘ 風吹會寒。伊m̄ 知beh án-chóaⁿ，將頭àⁿ 低，看著惠真ê 目珠peh 金。 |
|
Liông-kian kóng,“ Hūi-chin, lí ū án-chóaⁿ--bô? ”
|
良堅講：「惠真，你有án-chóaⁿ--無？」 |
|
Hūi-chin ū khui-chhùi kóng ōe, m̄-koh chin sè siaⁿ, Liông-kian thiaⁿ bô teh kóng siáⁿ, Liông-kian tó--lo̍h-lâi, iōng chhiú moa Hūi-chin, hō͘ i î-chhî thé-un, ū kám-kak Hūi-chin ê sim-chōng teh thiàu, tī i ē-bīn ê sin-khu teh chhoán-khùi, Liông-kian khai-sí khàu.
|
惠真有開嘴講話，m̄-koh真細聲，良堅聽無teh講啥，良堅倒--落-來，用手moa惠真，hō͘ 伊維持體溫，有感覺惠真ê 心臟teh跳，tī 伊下面ê 身軀teh 喘氣，良堅開始哭。 |
|
Cha̍p-it Kong-thiaⁿ-hōe
|
11 公聽會 |
|
Nn̄g kang āu, kong-thiaⁿ-hōe khai-sí, London ê kho-ha̍k-ka, mn̄g hāi-sí hái-káu ê pēⁿ-in. Bûn-hiàn khì Scotland í-chêng, ū in-ūi chit ê hōe, kah Tek-á kìⁿ kòe bīn, Tek-á ài Bûn-hiàn thè kong-si kóng-ōe.
|
兩工後，公聽會開始，London ê 科學家，問害死海狗ê 病因。文憲去Scotland以前，有因為這個會，kah德仔見過面，德仔ài文憲替公司講話。 |
|
Tek-á kóng,“ Lí sī lán chú-iàu ê seng-bu̍t-ha̍k kang-têng-su, chin tiōng-iàu, in ē siong-sìn lí. ”
|
德仔講：「你是咱主要ê 生物學工程師，真重要，in 會相信你。」 |
|
Bûn-hiàn bô kóng-ōe, siūⁿ kóng bô ài tī kong-thiaⁿ-hōe soat-bêng, m̄-koh chai-iáⁿ it-tēng ài khì, Tek-á chhiò-chhiò, chì-chió i ê chhùi ū teh chhiò, m̄-koh i ê ba̍k-chiu lóng teh chim-chiok khòaⁿ Bûn-hiàn, chhiūⁿ hî-á ê sí-lâng-ba̍k.
|
文憲無講話，想講無ài tī 公聽會說明，m̄-koh知影一定ài去，德仔笑笑，至少伊ê 嘴有teh 笑，m̄-koh 伊ê目珠攏teh 斟酌看文憲，像魚仔ê 死人目。 |
|
Tek-á kóng,“ Bûn-hiàn, beh kóng siáⁿ, siūⁿ hō͘ siông-sè, āu lé-pài, lí nā kóng m̄-tio̍h, kúi-ā pah lâng ē bô thâu-lō͘, thâu chi̍t ê tō sī lí, góa kā lí pó-chèng. ”
|
德仔講：「文憲，beh講啥，想hō͘ 詳細，後禮拜，你若講m̄著，幾若百人會無頭路，頭一個tō是你，我kā 你保證。」 |
|
Hōe-tiûⁿ lâng chin kheh, tī hia chin-chē kì-chiá kah liap-iáⁿ-chhiú, chng-thâu kah kang-tiûⁿ lâi ê lâng, mā bē chió, Bûn-hiàn ê hóe-chhia bān hun, m̄-chiah tī hóe-chhia-thâu chā kheh-têng-á, tng i ji̍p hōe-tiûⁿ ê sî, khòaⁿ Liông-kian kah Greenworld ê siàu-liân--ê mā chē tī hia, Bûn-hiàn tùi Hūi-chin chhiò, m̄-koh Hūi-chin bô chhiò, Hūi-chin bīn-sek pe̍h-sì-sat koh phòa-pēⁿ, Bûn-hiàn siūⁿ kóng i khó-lêng ū-sin ê khoán, ē-kì-tit Hūi-chin chhut-sì chìn-chêng, in bó͘ Sò͘-Gio̍k, bat tī chá-khí chhiūⁿ án-ni, só͘-í tùi ka-tī khó͘-chhiò.
|
會場人真kheh，tī hia 真濟記者kah攝影手，庄頭kah工場來ê人，mā bē 少，文憲ê 火車慢分，m̄-chiah tī 火車頭截計程仔，當伊入會場ê 時，看良堅坐kah Greenworld ê 少年--ê mā tī hia，文憲對惠真笑，m̄-koh惠真無笑，惠真面色白死殺koh破病，文憲想伊可能有身ê 款，會記得惠真出世進前，in某素玉，bat tī 早起像án-ni，所以對家己苦笑。 |
|
Chú-chhî kóng,“Tiuⁿ--sian-siⁿ, chhiáⁿ. ”
|
主持講：「張--先生，請。」 |
|
Bûn-hiàn kiâⁿ kàu hōe-tiûⁿ ê thâu-chêng, chē lo̍h ê sî khòaⁿ tio̍h Tek-á léng koh phú ê gán-sîn teh siòng --i, siūⁿ kóng èng-kai sī ōaⁿ Tek-á khí-lâi kóng chia ê hau-siâu-ōe.
|
文憲行到會場ê 頭前，坐--落ê 時看著德仔冷koh phú ê 眼神teh gîn--伊，想講應該是換德仔起來講chia ê hau-siâu 話。 |
|
Lu̍t-su khai-sí mn̄g Bûn-hiàn būn-tê, thâu-khí-seng iông-īⁿ, Bûn-hiàn soat-bêng i tī kong-si chò jōa-kú, kang-tiûⁿ chhut-sán jōa-chē chhat-liāu, jiân-āu mn̄g tio̍h hùi-liāu-phín.
|
律師開始問文憲問題，頭起先容易，文憲說明伊tī 公司做偌久，工場出產偌濟漆料，然後問著廢料品。 |
|
Lu̍t-su kóng,“ In sī chin gûi-hiám ê hòa-hak2-phín, sī-- bô? ”
|
律師講：「In 是真危險ê 化學品，是--無？」 |
|
Bûn-hiàn ìn kóng,“Tio̍h--ah, tong-jiân, nā tùi in bô sè-jī, tōa-pō͘-hūn sī gûi-hiám, m̄-koh tī gún tiûⁿ--ni̍h, gún tùi in chin sió-sim, ta̍k-ê lâng chhēng te̍k-sû ê saⁿ, goán saⁿ nî lâi m̄-bat ū giâm-tiōng ê ì-gōa. ”
|
文憲應講：「著--ah，當然，若對in 無細膩，大部分是危險，m̄-koh tī 阮工場--ni̍h，阮對in真小心，逐個人穿特殊ê 衫，阮3年來m̄-bat有嚴重ê 意外。」 |
|
Lu̍t-su kóng,“Thiaⁿ tio̍h án-ni, góa chin hoaⁿ-hí, m̄-koh kang-tiûⁿ gōa--leh? Lín chin-chiàⁿ tò chiah gûi-hiám ê hùi-liāu lo̍h khì hô--ni̍h? ”
|
律師講：「聽著án-ni，我真歡喜，m̄-koh工場外--leh？Lín真正倒chiah危險ê廢料落去河--ni̍h？」 |
|
Bûn-hiàn kóng,“ Sī--ah, goán ū tò. ” Hōe-tiûⁿ tō chi̍t-chūn ê hoah siaⁿ, Hūi-chin piⁿ-á chi̍t ê lâng, siūⁿ-khì teh hoah-hiu, kéng-chhat kiò i tiām-tiām, Bûn-hiàn kè-sio̍k kóng,“Tong-jiân, goán tò chia ê hùi-liāu lo̍h khì hô, m̄-koh bô tò chē, kan-nā ta̍k kang nn̄g, saⁿ pah kong-seng, bô chin chē, jî-chhiáⁿ gún ta̍k kang tùi hô chhì-giām saⁿ pái, tī kang-tiûⁿ piⁿ-á ê hô-chúi thong-siông chí-ū 2 ppm í-hā ê lông-tō͘, tī hô ê chúi-bóe koh lú chió, he bô gûi-hiám. ”
|
文憲講：「是--ah，阮有倒。」會場tō一陣ê 喝聲，惠真邊仔一個人，受氣teh喝咻，警察叫伊恬恬；文憲繼續講：「當然，阮倒chia ê 廢料落去河，m̄-koh無倒濟，kan-na 逐工兩、三百公升，無真濟，而且阮逐工對河試驗三擺，tī 工場邊仔ê 河水通常只有 2 ppm 以下ê 濃度，tī 河ê 水尾koh 愈少，he 無危險。」 |
|
Lu̍t-su tāu-tāu-á kóng,“ Bô gûi-hiám? Lí ū khak-tēng? ”
|
律師ta̍uh-ta̍uh仔講：「無危險！你有確定？」 |
|
Bûn-hiàn giâ-thâu kóng,“ Sī, góa khak-tēng. ” ê sî ū Tek-á, Liông-kian, Hūi-chin chāi-lāi kúi-ā pah lâng ê ba̍k-chiu teh khòaⁿ--i.
|
文憲giâ 頭講：「是，我確定。」ê 時有德仔、良堅、惠真在內幾若百人 ê 目珠teh看--伊。 |
|
Lu̍t-su bān-bān-á kóng,“ Góa chai-iáⁿ lín bat iōng niáu-chhí si̍t-giām--kòe, pō͘-hūn ê niáu-chhí bó lim ū chham hùi-liāu ê chúi, in ê kiáⁿ ū ê chhut-sì tō bô kha, tio̍h--bô, Tiuⁿ--sian-siⁿ? ”
|
律師慢慢仔講：「我知影lín bat 用老鼠實驗過，部分ê 老鼠母lim有摻廢料ê 水，in ê 子有ê 出世就無腳，著--無？張--先生！」 |
|
Bûn-hiàn thâu-pái khòaⁿ chi̍t ê lu̍t-su, sī sè-hàn bē hiáⁿ-ba̍k, bīn sán, chhēng phú-sek ê saⁿ, thâu-mn̂g koh phú, Bûn-hiàn kám-kak i chiok sêng niáu-chhí, i ê ba̍k-chiu kng koh sè. Koh khah kî-koài ê goân-in sī i chhiú the̍h chi̍t tiuⁿ pò-chóa, Bûn-hiàn khai-sí kám-kak ē kiaⁿ--i.
|
文憲頭擺看一個律師，是細漢bē顯目、面瘦、穿phú 色ê 衫、頭毛koh phú,文憲感覺伊足成老鼠，伊ê 目珠光koh 細。Koh較奇怪ê 原因是伊手提一張報紙，文憲開始感覺會驚--伊。 |
|
Bûn-hiàn kóng,“ Sī, bô m̄-tio̍h, m̄-koh niáu-chhí pí lâng ke chin sè, jî-chhiáⁿ in tī cha̍p kang lāi lim 5 ppm hùi-liāu lông-tō͘ ê chúi, he sī chin tōa ê chha-pia̍t, bô lâng ē khì lim hô--ni̍h ê chúi, hô ti̍t-chiap chhut hái. ”
|
文憲講：「是，無m̄著，m̄-koh老鼠比人加真細，而且in tī 10工內lim 5 ppm 廢料濃度ê 水，he 是真大ê 差別，無人會去lim 河--ni̍h ê 水，河直接出海。」 |
|
Bûn-hiàn khòaⁿ lu̍t-su, teh tán mn̄g hái-káu ê būn-tê, m̄-koh i bô mn̄g, hoán-tó-tńg kóng,“Tiuⁿ--sian-siⁿ, só͘-í lí bē hoân-ló, nā ū lâng ì-gōa lok-lo̍h khì hô, lim chin chē hô-chúi, chhiūⁿ lí ka-tī ê cha-bó͘-kiáⁿ án-ni ê ì-gōa, bô gûi-hiám, tio̍h--bô? ”
|
文憲看律師，teh等問海狗ê 問題，m̄-koh伊無問，反倒轉講：「張--先生，所以你bē 煩惱，若有人意外lak 落去河，lim 真濟河水，像你家己ê 查某子án-ni ê意外，無危險，著--無？」 |
|
Bûn-hiàn khòaⁿ tī hōe-tiûⁿ tùi-bīn ê Hūi-chin, lia̍h-chún i ê ba̍k-chiu hoán-pe̍h kah bīn-kheng piàn tōa, sī in-ūi ū-sin ê koan-hē.
|
文憲看tī 會場對面ê 惠真，掠準伊目珠tī 反白kah面框變大，是因為有身ê 關係。 |
|
Bûn-hiàn kóng,“ Bô gûi-hiám, chi̍t-tiám-á tō bô gûi-hiám. ”
|
文憲講：「無危險，一點仔都無危險。」 |
|
Hōe-tiûⁿ ū ki-ki-kiò ê siaⁿ, he sī lu̍t-su sè koh ná niáu-chhí ê chhiò, lu̍t-su the̍h chhut i ê pò-chóa.
|
會場有ki-ki 叫ê 聲，he 是律師細koh那老鼠ê 笑，律師提出伊ê 報紙。 |
|
Lu̍t-su kóng,“ Tiuⁿ--sian-siⁿ, lí ū khì Scotland--bô? Ū khòaⁿ kòe che--bô? ”
|
律師講：「張--先生，你有去Scotland--無？有看過che--無？」 |
|
Tng Bûn-hiàn khòaⁿ tio̍h pò-chóa chhiú khai-sí phi̍h8-phi̍h8-chhoah, chhoah kah ài hōaⁿ toh-á piⁿ, ū chi̍t tiuⁿ siòng-phìⁿ sī Hūi-chin khiā tī kang-tiûⁿ piⁿ-á ê chûn-téng, lēng-gōa chi̍t tiuⁿ sī Hūi-Chin tó tī kiù-hō͘-chhia, Liông-kian tī piⁿ-á, phiau-tê siá:
|
當文憲看著報紙，手開始phi̍h8-phi̍h8 chhoah，chhoah kah愛hōaⁿ桌仔邊，有一張相片是惠真企 tī 工場邊仔ê 船頂，另外一張是惠真倒tī 救護車，良堅tī 邊仔，標題寫： |
|
“Seng-bu̍t kang-têng-su ê cha-bó͘-kiáⁿ Chha chi̍t-tiám-á im sí tī hô”
|
「生物工程師ê 查某子 差一點仔淹死tī 河」 |
|
Tiām chi̍t khùn á, Bûn-hiàn siông-sè khòaⁿ pò-chóa, m̄-koh ba̍k-chiu koài-koài, thâu-khak lāi lóng-sī tîm tī hô--ni̍h ê Hūi-chin, kah khah-chá í-chêng tîm tī hong-éng ê Sò͘-Gio̍k---in bó͘.
|
恬一睏仔，文憲詳細看報紙，m̄-koh目珠怪怪，頭殼內攏是沉tī 河--ni̍h ê 惠真，kah 較早以前沉tī 風湧ê 素玉---in某。 |
|
Bûn-hiàn thâu it-ti̍t hàiⁿ lâi hàiⁿ khì, jiân-āu kā ba̍k-kiàⁿ the̍h lo̍h lâi chhit-chhit--leh.
|
文憲頭一直hàiⁿ 來hàiⁿ 去，然後kā目鏡提落來拭拭--leh。 |
|
Bûn-hiàn í pêng-chēng ê siaⁿ kóng,“ Bô, góa í-chêng m̄-bat khòaⁿ--kòe. ”
|
文憲以平靜ê 聲講：「無，我以前m̄-bat看--過。」 |
|
Lu̍t-su ûn-ûn-á kóng,“ Hó, Tiuⁿ--sian-siⁿ, lín cha-bó͘-kiáⁿ an-choân ah, in ang kiù--i, mā bô sit-khì gín-á, m̄-koh lim chin chē hô-chúi, hô-chúi mā tī kang-tiûⁿ ê piⁿ-á, lí bē hoân-ló he--ho͘N3? ”
|
律師勻勻仔講：「好，張--先生，lín查某子安全--ah，in翁救--伊，mā 無失去囡仔，m̄-koh lim真濟河水，河水mā tī工場ê 邊仔，你bē 煩惱he--ho͘N3？」 |
|
Lu̍t-su kim-si̍h-si̍h ê ba̍k-chiu teh siòng Bûn-hiàn, chhiūⁿ niáu-chhí tng teh khòaⁿ i ê chia̍h-mi̍h, tī Bûn-hiàn āu-bīn ê Tek-á bô-tiuⁿ-tî soah khiā--khí-lâi, tī tiām-chēng ê hōe-tiûⁿ, hoah kóng,“ Mn̄g chit ê būn-tê siuⁿ chhiau-kòe, bē-sái mn̄g hit khoán ê būn-tê, tong-jiân Bûn-hiàn ē hoân-ló in cha-bó͘-kiáⁿ, lí má-siōng thêng-chí cha-mn̄g. ”
|
律師金si̍h-si̍h ê 目珠teh gîn文憲，像老鼠當teh看伊ê 食物，tī 文憲後面ê 德仔無張持煞企--起-來，tī 恬靜ê 會場，喝講：「問這個問題siuⁿ 超過，bē 使問 hit款ê 問題，當然文憲會煩惱in 查某子，你馬上停止查問。」 |
|
Lu̍t-su kóng,“ Lōa--sian-siⁿ, koh chi̍t hun-cheng, chi̍t hun-cheng lāi Tiuⁿ--sian-siⁿ, tō ē-sái cháu, chit-chūn i ài hôe-tap chit ê būn-tê, Tiuⁿ--sian-siⁿ, lín cha-bó͘-kiáⁿ lim chiah chē hô-chúi, lí ē hoân-ló--bô? Lí ē hoân-ló lí ê sun--bô? ”
|
律師講：「賴--先生，koh一分鐘，一分鐘內張--先生，tō 會使走，這陣伊ài 回答這個問題，張--先生，lín查某子 lim chiah濟河水，你會煩惱--無？你會煩惱你ê 孫--無？」 |
|
Bûn-hiàn iōng kiaⁿ-hiâⁿ ê gán-sîn, kim-kim-khòaⁿ lu̍t-su, thut-jiân-kan kiàn-siàu tńg siūⁿ-khì, pò-chóa the̍h khí lâi tàn tùi sè-hàn kiam niáu-chhí-bīn ê lu̍t-su, tōa-siaⁿ hoah kóng,“Tio̍h! Tio̍h! Tio̍h! Tong-jiân góa hoân-ló chit ê gín-á, i kāng-khoán sī gûi-hiám, chit-má hō͘ góa cháu. ”
|
文憲用驚惶ê 眼神，金金看律師，突然間見笑轉受氣，報紙提起來tàn tùi細漢兼老鼠面ê 律師，大聲喝講：「著！著！著！當然我煩惱這個囡仔，伊仝款是危險，chit-má hō͘ 我走。」 |
|
Bûn-hiàn cháu chhut hōe-tiûⁿ, kiâⁿ khì lō͘--ni̍h, pah gōa lâng ê ba̍k-chiu kim-kim khòaⁿ i cháu.
|
文憲走出會場，行去路--ni̍h，百外人 ê 目珠金金看伊走。 |
|
Cha̍p-jī Bī-lâi
|
12 未來 |
|
La̍k kò-goe̍h āu, Bûn-hiàn tòa tī hái-piⁿ ê sió-kong-ú, thâu-lō͘ bô khì, tāi-khoán hū-tam bē-khí, mā kā chhù bē-tiāu.
|
6個月後，文憲tòa tī 海邊ê 小公寓，頭路無去，貸款負擔bē 起，mā kā 厝賣掉。 |
|
Tùi kong-ú ê thang-á-mn̂g ē-tàng khòaⁿ tio̍h hái, ta̍k kang chē teh hân-léng koh phú-phú ê hái, kúi-ā tiám-cheng kú.
|
Tùi 公寓ê 窗仔門會當看著海，逐工坐teh看冷koh phú-phú ê 海，幾若點鐘久。 |
|
Hūi-chin liam-mi beh seⁿ--lò͘, Bûn-hiàn bé chin chē gín-á-saⁿ hō͘ i, pâng-keng lóng-sī gín-á-saⁿ---ū gōa-saⁿ kah khò͘, hún-âng-sek sī hō͘ cha-bó͘ gín-á, nâ-sek sī hō͘ cha-po͘ gín-á, mā ū sè-hāng, nńg-nńg ê chhit-thô-mi̍h ū nâ-sek chhim ba̍k-chiu ê chhit-thô-hîm kah sè-chiah tōng-bu̍t.
|
惠真liâm-mi beh生--lò͘,文憲買真濟囡仔衫hō͘--伊，房間攏是囡仔衫---有外衫kah褲，粉紅色是hō͘ 查某囡仔，藍色是hō͘ 查甫囡仔，mā 有細項、軟軟ê chhit-thô物有藍色深目珠ê chhit-thô 熊kah細隻動物。 |
|
M̄-koh Bûn-hiàn pēng bô sàng chia--ê hō͘ Hūi-chin, in-ūi Hūi-chin bô ài kah i kóng-ōe, tng i khì khòaⁿ Hūi-chin, Hūi-chin bô beh chhap--i, nā khà tiān-ōe, Hūi-chin tō kā tiān-ōe kòa tiāu, nā siá phoe,bô phah-khui tō thè tò-tńg--lâi.
|
M̄-koh文憲並無送chia--ê hō͘ 惠真，因為惠真無ài kah 伊講話，當伊去看惠真，惠真無beh chhap--伊，若khà電話，惠真tō kā 電話掛掉，若寫批，無拆開就退倒轉--來。 |
|
Tī pâng-keng ū chin chē chheh kah cha̍p-chì, m̄-koh lóng khǹg tī bîn-chhn̂g-kha, àm-sî ū-sî ē khì khòaⁿ, ji̍t--sî tian-tó bô ài khòaⁿ, in lóng sī iú-koan gín-á chhut-sì chêng ê tāi-chì kah ē jiám--tio̍h ê pēⁿ, Bûn-hiàn bô ài khì siūⁿ--in, m̄-koh bô-hoat-tō͘ bô siūⁿ, kui kang lóng teh siūⁿ.
|
Tī 房間有真濟冊kah雜誌，m̄-koh攏囥tī 眠床腳，暗時有時會去看，日時顛倒無ài看，in攏是有關囡仔出世前ê 代誌kah 會染著 ê 病，文憲無ài去想--in，m̄-koh無法度無想，歸工攏teh想。 |
|
Kin-á-ji̍t, tng Bûn-hiàn chē teh khòaⁿ thang-á-mn̂g gōa ê hái, chhiú ti̍t-ti̍t iô, iô bē soah. Ta̍k chá-khí lóng ē khà tiān-ōe khì pēⁿ-īⁿ mn̄g in cha-bó͘-kiáⁿ ū tī hia-- bô? Chit chái-khí, hō͘-sū kóng Hūi-chin ū tī hia, jî-chhiáⁿ, tng teh seⁿ gín-á. Tī chêng 4 tiám-cheng, ū nn̄g tiám-cheng Bûn-hiàn chē tī tiān-ōe piⁿ, kiaⁿ koh khà khì pēⁿ-īⁿ, tiān-ōe giâ saⁿ pái, saⁿ pái koh khǹg--leh.
|
今仔日，當文憲坐teh看窗仔門外ê 海，手直直搖，搖bē 煞。逐早起攏會khà 電話去病院問 in查某子有tī hia--無？這早起，護士講惠真有tī hia，而且，當teh生囡仔。Tī 前4 點鐘，有兩點鐘文憲坐tī 電話邊，驚koh khà 去病院，電話giâ 三擺，三擺 koh囥--leh。 |
|
Bûn-hiàn koh giâ tiān-ōe, ji̍h8 hō-bé,7,8,3,--án-ne m̄-tio̍h, koh kā tiān-ōe khǹg--leh, Bûn-hiàn bô-hoat-tō͘ thàu-kòe tiān-ōe ùi hō͘-sū léng-tām ê siaⁿ chai-iáⁿ siau-sit, ài chhin-sin khì khòaⁿ gín-á.
|
文憲koh giâ 電話，ji̍h8號碼，7--8--3--án-ne m̄著，koh kā 電話囥--leh，文憲無法度透過電話ùi 護士冷淡ê 聲知影消息，ài親身去看囡仔。 |
|
Bûn-hiàn khiā--khí-lâi, gōa-thò chhēng--leh, lo̍h khì lâu-kha, gōa-kháu chhoe--lâi ê hái-hong chin léng, hái kah thiⁿ phú-phú koh o͘-im. I ji̍p khì tiàm--ni̍h bé kúi-lúi-á hoe, chin chim-chiok kéng kng-âng kah kng-n̂g ê sek, tiàm-oân iōng chóa kā in pau--khí-lâi, bián-tit hō͘ hoe siū sún-hāi, Bûn-hiàn the̍h tio̍h hoe, kín koh kín-tiuⁿ iân hái-piⁿ thàu-hong ê lō͘ kiâⁿ tùi pēⁿ-īⁿ khì.
|
文憲企--起來，外套穿--leh，落去樓腳，外口吹--來ê 海風真冷，海kah天phú-phú koh烏陰。伊 入去店--ni̍h買幾蕊仔花，真斟酌揀光紅kah光黃ê 色，店員用紙kā in包--起來，免得hō͘花受損害，文憲提著花，緊koh緊張沿海邊透風ê 路行tùi 病院去。 |
|
Hái--ni̍h tng teh lo̍h-hō͘, hái-káu sî-siông teh khiā ê soa-chiu, í-keng teh lo̍h-hō͘, bô jōa-kú chng--ni̍h mā ē lo̍h-hō͘, Bûn-hiàn phi̍h8-phi̍h8-chhoah, kā gōa-thò ê ām-niá hiau koân, jiân-āu chhiú the̍h tio̍h kng-iām ê hoe, kiâⁿ ji̍p khì kôaⁿ-thiⁿ ê hân-hong--ni̍h.
|
海--ni̍h當teh落雨，海狗時常teh企 ê 沙洲，已經teh落雨，無偌久庄--ni̍h mā會落雨，文憲phi̍h8-phi̍h8 chhoah，kā 外套ê 頷領hiau懸，然後手提著光豔ê 花，行入去寒天 ê 寒風--ni̍h。 |
