Sim-hiân_25
|
心弦 (25) |
| Gân Sìn-seng |
顏信星 |
|
Peh-tang chêng, tng góa koat tēng beh ēng pē-bó-ōe lâi siá chok liáu-āu, tùi Tâi-oân ê it-chhè, m̄ nā lú lâi lú ū hèng-chhù, mā lú lâi lú tiōng-sī, góa khai-sí ēng sim khì khòaⁿ, khòaⁿ Tâi-oân lâng án-chóaⁿ teh seng-oa̍h, góa khai sí ēng sim khì chhōe, chhōe Tâi-oân bûn-hòa ê kha-jiah, le̍k-sú, bîn-sio̍k, koa-iâu, bûn-ha̍k chi̍t-hāng, chi̍t-hāng khì kha̍p, chi̍t-hāng, chi̍t-hāng khì phīⁿ, kha̍p lú chōe lú tio̍h kiaⁿ, phīⁿ lú chhim sim lú sng, m̄ sī ūi-tio̍h kâⁿ hoeh ê le̍k-sú tio̍h kiaⁿ, m̄ sī ūi-tio̍h khàu-tiāu-á koa-iâu sim sng, sī ūi-tio̍h chhī-bīn-siōng ē tàng khòaⁿ--tio̍h iú koan Tâi-oân bûn-hòa ê chheh, kèng-jiân chhōe bô chi̍t-tiám-á Ki-tok-kàu ê iáⁿ, pah-kúi-tang lâi tû liáu chèng-tī ê ho͘-io̍k kap hêng-tōng í-gōa, lán tàu té ūi-tio̍h Tâi-oân ê bûn-hòa——chi̍t-tè pha-hng ê thó͘-tē, chù ji̍p lōa-chōe ê êng-ióng hūn lâi thīn i tōa châng, thīn i khui-hoe, thīn i kiat-chí!
|
八冬前，當我決定beh用父母話來寫作了後，對台灣ê一切，m̄若愈來愈有興趣，mā愈來愈重視。我開始用心去看，看台灣人án-chóaⁿ teh生活；我開始用心去chhōe,chhōe台灣文化ê腳跡。歷史、民俗、歌謠、文學，一項一項去kha̍p,一項一項去鼻，kha̍p愈濟愈著驚，鼻愈深心愈酸。M̄是為著kâⁿ血ê歷史著驚，m̄是為著哭調仔歌謠心酸，是為著市面上會當看著有關台灣文化ê冊，竟然chhōe無一點仔基督教ê影，百幾冬來除了政治ê呼籲kap行動以外，咱到底為著台灣ê文化——一塊拋荒ê土地，注入偌濟ê營養分來thīn伊大欉，thīn伊開花，thīn伊結子！？ |
|
(Tâi-oân Kàu-hōe Kong-pò tē 2170 kî, 1993 nî, 10 goe̍h)
|
（台灣教會公報第2170期，1993年，10月） |
