Iû-thài chhiò-ōe
|
猶太笑話 |
| Tân Gī-jîn |
陳義仁 |
|
Ū chi̍t-ê siàu-liân lâng, thâi sí ka-kī ê pē-bú, hō͘ kéng-chhat lia̍h--khì, sàng kàu hoat-têng sím-phòaⁿ, siàu-liân lâng kā hoat-koaⁿ kóng: “Hoat-koaⁿ tāi-jîn ah, khó-liân--góa, góa sī chi̍t-ê ko͘-jî.”
|
有一個少年人，thâi死家己ê父母，hō͘警察掠--去，送到法庭審判，少年人kā法官講：「法官大人--ah！可憐--我，我是一個孤兒。」 |
|
Chi̍t-ê lîm-chiong ê Iû-thài-lâng kā só͘-ū ê kiáⁿ kiò óa--lâi, kā in kóng: “Só͘-ū khiàm góa chîⁿ ê lâng ê miâ, góa liām hō͘--lín, chi̍t-ê á chi̍t-ê kì hō͘ hó . . . . .” liām liáu chiū ba̍k-chiu kheh-kheh.
|
一個臨終ê猶太人kā所有ê子叫倚--來，kā in講：「所有欠我錢ê人ê名，我唸hō͘--lín,一個仔一個記hō͘好....」唸了就目珠kheh-kheh。 |
|
I ê tōa-hàn-kiáⁿ chiū mn̄g kóng: “A-pa, ia lán khiàm--lâng-ê leh ?” Lāu-pē sûi-sî ba̍k-chiu tián tōa-lúi, tùi bîn-chhn̂g pha--khí-lâi tōa-siaⁿ jiáng: “Put-siàu-kiáⁿ, lí che put-siàu-kiáⁿ, chhau-hoân hiah chōe. Lán khiàm--lâng-ê, lâng ka-kī chū-jiân ē lâi thó lah!”
|
伊ê大漢子就問講：「阿爸，ia咱欠--人-ê leh？」老父隨時目珠展大蕊，tùi眠床pha--起-來大聲嚷：「不肖子，你che不肖子，操煩hiah濟。咱欠--人-ê,人家己自然會來討--lah！」 |
|
“Ū-kàu pháiⁿ-ūn, cha-hng góa kā A-lûn chioh 100 kho͘, siūⁿ bōe-kàu i chá-khí sí--khì ah. “Án-ni ná ē pháiⁿ-ūn ?” “Tong-jiân sī pháiⁿ-ūn ah. Góa nā chai-iáⁿ i kin-á-ji̍t ē sí, it-tēng ka chioh chi̍t-bān.”
|
「有夠歹運，昨昏我kā阿倫借100箍，想bōe到伊早起死--去ah。」「Án-ni哪會歹運？」「當然是歹運ah。我若知影伊今仔日會死，一定加借一萬。」 |
|
Tī hóe-chhia-téng, N̄g-ê lâng teh kóng ōe.
|
Tī火車頂，兩個人teh講話。 |
|
“Lí tùi tó-ūi lâi--ê ?”
|
「你tùi tó位來--ê?」 |
|
“Soah m̄-sī kap lí kāng-khoán, tùi lāu-pē lāu-bú hia lâi--ê.”
|
「煞m̄是kap你共款，tùi老父老母hia來--ê。」 |
|
Ū chi̍t-ê-lâng khì chhōe lia̍p-pí (sian-siⁿ) thò͘-lō͘ ka-tī só͘ hoān it-chhè ê chōe, thau-the̍h, thong-kan, sat-jîn, chà-khi, pūn-tōaⁿ, put-hàu, poa̍h-kiáu . . . . chha-put-to Sèng-keng só͘ kì só͘-ū ê pháiⁿ-tāi lóng hoān--tio̍h ah. Kóng liáu m̄-nā bô hoán-hóe ê khoán, tian-tò ná-chhiūⁿ chin chhàu-phùi: “Góa hoān tio̍h só͘-ū ê chōe, siong-sìn choân sè-kài bô lâng chhin-chhiūⁿ góa, bô hit-hō bô hoān--tio̍h ê chōe.” lia̍p-pí chiū kóng: “Ná ū-iáⁿ, lí iáu ū chi̍t-hāng bô hoān--tio̍h-ê leh!”
|
有一個人去chhōe拉比（先生）透露家己所犯一切ê罪：偷提、通姦、殺人、詐欺、笨惰、不孝、poa̍h-kiáu ....差不多聖經所記所有ê歹代攏犯--著ah。講了m̄若無反悔ê款，顛倒若像真臭屁：「我犯著所有ê罪，相信全世界無人親像我，無hit號無犯--著ê罪。」拉比就講：「哪有影，你iáu有一項無犯--著-ê leh！」 |
|
Chit-ê lâng chin put-ho̍k: “Tó chi̍t-hāng ?”
|
這個人真不服：「Tó一項？」 |
|
Lia̍p-pí kóng: “Lí iáu-bōe chū-sat ah!”
|
聶彼講：「你iáu未自殺ah！」 |
|
Se-bûn khì chhōe i-seng kiám-cha. I-seng kóng: “Se-bûn-hiaⁿ, lí chin kiān-khong, sió-khóa ū thn̂g-jiō-pīⁿ ê kheng-hiòng nā-tiāⁿ. Góa nā-sī lí, kin-pún bōe hoân-ló.”
|
西文去chhōe醫生檢查。醫生講：「西文兄，你真健康，小可有糖尿病ê傾向nā-tiāⁿ。我若是你，根本bōe煩惱。」 |
|
“Ōaⁿ chò sī lí ū thn̂g-jiō-pīⁿ, góa tong-jiân mā-sī bōe hoân-ló ah!” Se-bûn án-ni hôe-tap.
|
「換做是你有糖尿病，我當然mā是bōe煩惱ah！」西文án-ni回答。 |
|
Chi̍t-ê hū-jîn-lâng khì chhōe lia̍p-pí, kóng i siūⁿ beh lī-hun. Tān-sī, i ū 9 ê gín-á, iā in hu-hū lóng ài beh poàn-sò͘ ê gín-á. 9 ê beh án-chóaⁿ tùi-pòaⁿ pun ? Lia̍p-pí chiū kóng: “Án-ni lín koh chòe-hóe chi̍t-nî, koh siⁿ chi̍t-ê, chiah lâi lī-hun lah.”
|
一個婦人人去chhōe拉比，講伊想beh離婚。但是，伊有9個囡仔，iā in夫婦攏ài beh半數ê囡仔。9個beh án-chóaⁿ對半分？拉比就講：「Án-ni lín koh做伙一年，koh生一個，才來離婚lah！」 |
|
Chi̍t-nî-pòaⁿ liáu āu, lia̍p-pí tú tio̍h hit-ê hū-jîn-lâng. Lia̍p-pí mn̄g: “Chit-má án-chóaⁿ ?”
|
一年半了後，拉比tú著hit個婦人人。拉比問：「Chit-má án-chóaⁿ？」 |
|
“Bô hoat-tō͘.”
|
「無法度。」 |
|
“M̄-kú góa thiaⁿ kóng lí í-keng siⁿ--ah.”
|
「M̄-kú我聽講你已經生--ah。」 |
|
“Sī ah, m̄-kú, chit-pái siⁿ siang-siⁿ ah.”
|
「是--ah！m̄-kú,這擺生雙生ah。」 |
|
Tú-á seng khí-lâi chò liân-tiúⁿ ê A-pek, siūⁿ kóng tī pō͘-hā ê bīn-chêng ū pit-iàu kek chi̍t-ê ui-hong lím-lím ê kè-sè.
|
Tú仔升起來做連長ê阿柏，想講tī部下ê面前有必要kek一個威風凜凜ê架勢。 |
|
Ū chi̍t-kang, i tī pān-kong-sek teh khòaⁿ ang-á-chheh, ū lâng lòng mn̂g. A-pek chiū kín kā chheh lok ji̍p-khì thoah-á-té, jiân-āu ké-sian ké-tak gia̍h tiān-ōe óa tòa hīⁿ-á, chiah tōa-siaⁿ hoah: “Ji̍p-lâi!”
|
有一工，伊tī辦公室teh看尪仔冊，有人lòng門。阿柏就緊kā冊lok入去屜仔底，然後假仙假tak gia̍h電話倚tòa耳仔，才大聲喝：「入來！」 |
|
Ji̍p--lâi-ê sī chi̍t-ê peng-á, chhiú the̍h kang-chok siuⁿ-á.
|
入--來-ê是一個兵仔，手提工作箱仔。 |
|
A-pek kek chi̍t-ê khùi-kháu: “Góa tú teh kap chóng-su-lēng chham-siông tiōng-iàu ê sū-hāng. Lí tàu-té ū siáⁿ tāi-chì ah ?”
|
阿柏kek一個氣口：「我tú teh kap總司令參詳重要ê事項。你到底有啥代誌ah？」 |
|
Peng-á: “Pò-kò liân-tiúⁿ, hù-koan kóng tiān-ōe pháiⁿ--khì, kiò góa lâi siu-lí.”
|
兵仔：「報告連長，副官講電話歹--去，叫我來修理。」 |
|
(Hong-hiòng Tē 18 kî, 1992 nî 9 goe̍h)
|
（風向第18期，1992年9月） |
