Chong-kàu chhiò-ōe
|
宗教笑話 |
| Tân Gī-jîn |
陳義仁 |
|
Kiàn-tio̍k lé-pài-tn̂g ê kang-lâng kā bo̍k-su kóng: “Bo̍k-su ah, kám ē-sái mâ-hoân lí chiong hit-ê o͘-bah-sáng ê 500 kho͘ thè hêng i, i put-sî to lâi tùi goán chòe ê khang-khòe liām-tang liām-sai, koh kóng kiàn-tio̍k hōng-hiàn i ū hiàn 500 kho͘ leh . . . . . .”
|
建築禮拜堂ê工人kā牧師講：「牧師--ah，kám會使麻煩你將hit個o͘-bah-sáng ê 500箍退還伊，伊不時都來tùi阮做ê工課唸東唸西，koh講建築奉獻伊有獻500箍leh.....」 |
|
Kui tōa-tīn ê kúi-á chū-chi̍p tī chi̍t-keng lé-pài-tn̂g. Chiah-ê kúi-á chin lī-hāi, ē chhiùⁿ Sèng-si, ē tha̍k Sèng-keng, iā ē kî-tó, koh sian kóaⁿ to kóaⁿ bōe cháu.
|
歸大tīn ê鬼仔聚集tī一間禮拜堂。Chiah-ê鬼仔真厲害，會唱聖詩，會讀聖經，也會祈禱，koh千趕都趕bōe走。 |
|
Hó-ka-chài, āu--lâi ū chi̍t-ê chin ū lêng-le̍k ê bo̍k-su lâi kóaⁿ . . . . . I chiong hōng-hiàn-tē-á ǹg kúi-á tu--chhut-khì, só͘-ū ê kúi-á cháu kah ná teh poe leh.
|
好佳哉，後--來有一個真有能力ê牧師來趕.....伊將奉獻袋仔向鬼仔tu--出-去，所有ê鬼仔走kah若teh飛leh。 |
|
Chia̍h-pn̄g chêng, chi̍t-ê gín-á chhōa kî-tó: “Kám-siā Siōng-tè, siúⁿ-sù goán hong-hù ê bí-niû chhài-se. Khò Chú ê miâ, a-men......ta̍k-ji̍t lóng chiah-ê chhài!”
|
食飯前，一個囡仔chhōa祈禱：「感謝上帝，賞賜阮豐富ê 米糧菜蔬。靠主ê 名，阿門……逐日攏chiah-ê菜！」 |
|
Lí tiúⁿ-ló si̍t-chāi sī ū-kàu bô-êng. Lé-pài-ji̍t ōaⁿ i ū-hōe koh ài chò seng-lí. Bô-êng liáu, chông khì kàu kàu-hōe í-keng 10 tiám chhiau-kòe 5 hun. I chiū tōa-lia̍p-kōaⁿ kiâⁿ chiūⁿ tâi-á-téng, khòaⁿ chiu-pò, tōa-siaⁿ hoah: “Sèng-si 57 kho͘ . . . . ah, sit-lé sit-lé, sèng-si 57 kin.”
|
李長老實在是有夠無閒。禮拜日換伊司會koh ài做生理。無閒了，chông去到教會已經10點超過5分。伊就大粒汗行上台仔頂，看周報，大聲喝：「聖詩57箍....ah，失禮失禮，聖詩57斤。」 |
|
Chi̍t-tīn kàu-hōe hōe-iú lé-pài soah, lâi chhōe tiúⁿ-ló: “Tiúⁿ-ló ah, lán ê bo̍k-su sī teh káng siáⁿ tō ? Goán ta̍k lé-pài liáu sî-kan sái hiah-kú ê chhia lâi chò lé-pài, bo̍k-su kóng he sī siáⁿ tō-lí lah ? Tiúⁿ-ló ah, lí kóng khòaⁿ-māi leh, lí lâi chò lé-pài ū tit-tio̍h siáⁿ ?”
|
一tīn教會會友禮拜煞，來chhōe長老：「長老--ah，咱ê牧師是teh講啥道？阮逐禮拜了時間駛hiah久ê車來做禮拜，牧師講he是啥道理--lah？長老--ah，你講看māi--leh，你來做禮拜有得著啥？」 |
|
Tiúⁿ-ló kóng: “Tit-tio̍h an-hioh, tit-tio̍h ho̍k-sāi Siōng-tè, hiaⁿ-tī chí-bōe ê kau-gî . . . .”
|
長老講：「得著安歇，得著服事上帝，兄弟姐妹ê交誼.....」 |
|
Hōe-iú kóng: “Goán m̄-sī kóng che lah, goán sī kóng, lí thiaⁿ káng-tō. O̍h-tio̍h siáⁿ ?”
|
會友講：「阮m̄是講che--lah，阮是講，你聽講道。學著啥？」 |
|
Tiúⁿ-ló kóng: “O̍h thun-lún.”
|
長老講：「學吞忍。」 |
|
(Hong-hiòng Tē 18 kî, 1992 nî 3 goe̍h)
|
（風向第18期，1992年9月） |
