Chèng-tī chhiò-ōe
|
政治笑話 |
|---|---|
| Tân Gī-jîn | 陳義仁 |
|
Ū chi̍t-pái po̍k-kun Sú-ta̍t-lîm ê chhiú-pió bô--khì, chiū kiò pì-bi̍t kéng-chhat-thâu Pōe-lī-a lâi, hān i 24 tiám-cheng lāi ài chhōe--tio̍h. Tē jī kang thàu-chá, Sú-ta̍t-lîm hoat-kiàn chhiú-pió sī tī thoah-á-lāi, chiū phah tiān-ōe kā Pōe-lī-a kóng. Pōe-lī-a hôe-tap kóng: “Pò-kò Sú-ta̍t-lîm tông-chì, bōe-hù ah, goán í-keng lia̍h tio̍h 50 ê hiâm-gî-hoān, in lóng siá chū-pe̍k-su sêng-jīn thau-the̍h lí ê pió-á. Chhōe--tio̍h ê pió-á í-keng ū 35 lia̍p, lēng-gōa 15 lia̍p ē[e]-po͘ ē-tàng chhōe--tio̍h.”
|
有一擺暴君史達林ê手錶無--去，就叫秘密警察頭Pōe-lī-a來，限伊24點鐘內ài chhōe--著。第二工透早，史達林發見手錶是tī屜仔內，就扑電話kā Pōe-lī-a講。Pōe-lī-a回答講：「報告史達林同志，bōe赴ah！阮已經掠著50個嫌疑犯，in攏寫自白書承認偷提你ê錶仔。Chhōe--著ê錶仔已經有35粒，另外15粒e晡會當chhōe--著。」 |
|
1994 nî Kok-bîn-tóng tī in chèng-lâng soān, kò͘-lâng-oàn ê sî-tāi, ūi-tio̍h beh khip-siu khah-chōe ê lâng ji̍p Tóng, chiū thê chhut chióng-lē ê pān-hoat:
|
1994年國民黨tī in眾人soān,顧人怨ê時代，為著beh吸收較濟ê人入黨，就提出獎勵ê辦法： |
|
1. Kài-siāu chi̍t-ê ji̍p Tóng, ē-sái 3 koh-goe̍h bián chham-ka Tóng ê chi̍p-hōe.
|
1、介紹1個入黨，會使3個月免參加黨ê集會。 |
|
2. Kài-siāu 5 ê ji̍p Tóng, i pún-lâng ē-sái thoat Tóng.
|
2、介紹5個入黨，伊本人會使脫黨。 |
|
3. Kài-siāu 10 ê ji̍p Tóng, iû Tóng-pō͘ chhut chèng-bêng, chèng-bêng chit-ê-lâng chāi-lâi kap kok-bîn-tóng lóng bô koan-hē.
|
3、介紹10個入黨，由黨部出證明，證明這個人在來kap國民黨攏無關係。 |
|
“Sè-kài siōng-kài tiong-li̍p ê kok-ka sī tó chi̍t-kok ? Tiong-hôa bîn-kok. Mài kóng pa̍t-kok ê lōe-chèng lah, Tiong-hôa bîn-kok ê peh-sìⁿ liân ka-tī pún-kok ê lōe-chèng to lóng bô teh kan-sia̍p neh!”
|
「世界上kài中立ê國家是tó一國？中華民國。Mài講別國ê內政--lah，中華民國ê百姓連家己本國ê內政都攏無teh干涉neh！」 |
|
Múi chi̍t-kok ê kok-ông, chóng-thóng, goân-siú sí liáu-āu khì-kàu thian-tông, Siōng-tè lóng ē chhin-sin chhut-lâi hoan-gêng.
|
每一國ê國王、總統、元首死了後去到天堂，上帝攏會親身出來歡迎。 |
|
Pí-tek mn̄g kóng: “Chit-má lâi--ê chit-ūi sī Tiong-hôa bîn-kok ê chóng-thóng Chiúⁿ Kài-se̍k, Siōng-tè sī án-chóaⁿ chē--leh m̄ tín-tāng neh ?”
|
彼得問講：「Chit-má來--ê這位是中華民國ê總統蔣介石，上帝是án-chóaⁿ坐--leh m̄振動neh？」 |
|
Siōng-tè ìn kóng: “Che lí m̄-bat lah, Chiúⁿ Kài-se̍k chit-kho͘ sió-kiáⁿ, nā khòaⁿ-tio̍h góa khiā--khí-lâi, i ē má-siōng chhiúⁿ góa-ê ūi chē--lo̍h-khì.”
|
上帝應講：「Che你m̄-bat--lah。蔣介石這箍小子，若看著我企--起-來，伊會馬上搶我ê位坐--落-去。」 |
|
Tī chi̍t-tâi kheh kah bōe-tín bōe-tāng ê chhī-lāi kong-chhia ê lāi-bīn.
|
Tī一台kheh kah bōe振bōe動ê市內公車ê內面。 |
|
“Lí sī m̄-sī kéng-chóng á-sī Tiau-cha-kio̍k ê kang-chok jîn-oân ?”
|
「你是m̄是警總抑是調查局ê工作人員？」 |
|
“M̄-sī lah!”
|
「M̄是--lah！」 |
|
“Nā án-ni, sī m̄-sī ū chhin-chiâⁿ tī hia teh kang-chok ? ”
|
「若án-ni,是m̄是有親情tī hia teh工作？」 |
|
“Bô leh! ”
|
「無--leh！」 |
|
“Á-sī lí ū pêng-iú tī hia teh siōng-pan ?”
|
「抑是你有朋友tī hia teh上班？」 |
|
“Mā bô ah!”
|
「Mā無--ah！」 |
|
“Nā án-ni sī án-chóaⁿ lí-ê kha káⁿ kā góa-ê kha ta̍h-tiâu--leh ?”
|
「若án-ni是án-chóaⁿ你ê腳敢kā我ê腳踏tiâu--leh？」 |
|
Tiong-hôa bîn-kok ê i-su̍t í-keng sè-kài tē-it, khí-kho i-seng bán chhùi-khí sī tùi hoān-chiá ê phīⁿ-khang bán-chhut-lâi-ê. In-ūi Tiong-hôa bîn-kok ê jîn-bîn bô lâng káⁿ sûi-piān khui-chhùi.
|
中華民國ê醫術已經世界第一，齒科醫生挽嘴齒是tùi患者ê鼻空挽出來--ê。因為中華民國ê人民無人敢隨便開嘴。 |
|
(Hong-hiòng Tē 18 kî, 1992 nî 9 goe̍h)
|
（風向第18期，1992年9月） |
