Liu chhut-khì hù kî-tó-hōe
|
溜出去赴祈禱會 |
| Khu Sìn-tián |
邱信典 |
|
Hut-chì-tek sī 19 sè-kí, Eng-kok ê tōa kho-ha̍k-ka. I ê êng-ū bô kái-piàn; sī in-ūi i tī bu̍t-lí-ha̍k, hòa-ha̍k kap tiān-chú-ha̍k, lóng-ū ke̍k tiōng-iàu úi-tāi ê hoat-bêng. Kàu tī hiān-chāi; tī bu̍t-lí-ha̍k ê khò-pún, iáu ōe-thang khòaⁿ-tio̍h i ê siòng-phìⁿ kap sió-toān. Siat-sú nā-bô i chiah-ê hoat-bêng, kin-á-ji̍t ê sè-kài iáu-bô hiān-chāi ê khoán-sit.
|
Hut-chì-tek是19世紀，英國ê大科學家。伊ê榮譽無改變；是因為伊tī物理學、化學kap電子學，攏有極重要偉大ê發明。到tī現在；tī物理學ê課本，iáu會thang看著伊ê相片kap小傳。設使若無伊chiah-ê發明，今仔日ê世界iáu無現在ê款式。 |
|
Ū chi̍t-pái, Eng-kok Hông-ka-chhì-giām-só͘ ê tōa-lé-tn̂g, chē-móa chhut-miâ ê kho-ha̍k-ka; liân Eng-kok Hông-thài-chú iā tī-hia teh-chē. In í-keng chēng-chēng thiaⁿ Hut-chì-tek chi̍t-tiám-cheng kú ê kho-ha̍k ián-káng.
|
有一擺，英國皇家試驗所ê大禮堂，座滿出名ê科學家；連英國皇太子也tī-hia teh座。In已經靜靜聽Hut-chì-tek一點鐘久ê科學演講。 |
|
Tng ián-káng teh-beh kiat-sok ê sî, Hut-chì-tek chòe-chhut chi̍t-hāng, sîn-kî te̍k-pia̍t ê chû-tiān chhì-giām. Hit-sî tāi-ke khòaⁿ-kàu chhut-sîn; kòe chi̍t-chūn sî-kan liáu-āu, chiah tōa-siaⁿ phah-phok-á, piáu-sī khim-phòe him-sióng. Tng-sî ê Hông-thài-chú, chiū-sī āu-lâi ê Ài-tek-hôa chhit-sè; khiā-khí-lâi kiàn-gī, beh khèng-chiok Hut-chì-tek kàu-siū ê sêng-kong. Tāi-ke koh tōa-siaⁿ phah-phok-á, pí tē-it-pái koh-khah jia̍t-lia̍t.
|
當演講teh-beh結束ê時，弗志德做出一項，神奇特別ê磁電試驗。Hit時大家看到出神；過一陣時間了後，才大聲扑phok仔，表示欽佩欣賞。當時ê皇太子，就是後來ê愛德華七世；企起來建議，beh慶祝Hut-chì-tek教授ê成功。大家koh大聲扑phok仔，比第一擺koh較熱烈。 |
|
Hut-jiân-kan tāi-ke lóng thêng-chí, tōa-lé-tn̂g lóng chēng-chēng bô-siaⁿ; teh tán-hāu chit-ūi kho-ha̍k-ka, koh khí-lâi tâi-téng kóng tap-siā ê ōe. Bô phah-sǹg, tán chin-kú, chit-ê lāu-kàu-siū lóng-bô koh chhut-lâi. In-ūi Hut-chì-tek ián-káng liáu, chá chiū liu-chhut-khì. I sī liu-khì tó-ūi? Goân-lâi i sī kèng-khiân ê ki-tok-tô͘; i kèng-jiân liu-khì chi̍t-keng sè-keng lé-pài-tn̂g; khì hù i kàu-taⁿ m̄-bat khiàm-se̍k ê kî-tó-hōe.
|
忽然間大家攏停止，大禮堂攏靜靜無聲；teh等候這位科學家，koh起來台頂講答謝ê話。無打算，等真久，這個老教授攏無koh出來。因為Hut-chì-tek演講了，早就溜出去。伊是溜去tó位？原來伊是敬虔ê基督徒；伊竟然溜去一間細間禮拜堂；去赴伊到今 m̄-bat欠席ê祈禱會。 |
|
(Tâi-oân Kàu-hōe Kong-pò tē 2092 kî, 1992 nî 4 goe̍h)
|
（台灣教會公報第2092期，1992年4月） |
