Ông Bêng-tia̍t
|
王明哲 |
| Gân Sìn-seng |
顏信星 |
|
Tī Tâi-oân ê bîn-chú ūn-tōng tīn-iông tiong-kan, ū chi̍t-ūi chin kia̍t-chhut ê koa-chhiú kiam chok-khek-ka, i chiū-sī “Hi-seng ōaⁿ-lâi kak-chhíⁿ” ê chok-chiá——Ông Bêng-tia̍t sian-siⁿ. Kú-kú thiaⁿ-tio̍h i ê miâ, kú-kú teh chhiùⁿ i ê koa, siūⁿ kóng ē-tàng siá-chhut chiah ni̍h ū bī, chiah ni̍h ū kám-chêng ê koa-khek, èng-kai sī siⁿ chòe bûn-chit pin-pin, to-chhiû-siān-kám ê khoán-sit, bô phah-sǹg, kin-nî gō͘-goe̍h té, tī Sêng-kong Tāi-ha̍k ê chi̍t-tiûⁿ si-hōe tiong siōng-gū, kèng-jiân sī chit-hù ūn-tōng-ka ê thé-keh. Koh khah chán ê sī i teh chhiùⁿ-koa ê sî, chhiong-móa lo̍k-koan, chū-sìn, oân-choân pâi-thoat lán tī Tâi-oân koa ê tiong-kan siông-siông phīⁿ-tio̍h ê chū-ai, chū-oàn, á-sī chhin-chhiūⁿ siáu-thiú-á sit ê lo̍k-chhiòng. Hit-mê si-hōe liáu-āu, goán chòe-hóe khì chia̍h siau-iā, chia̍h liáu chi̍t-ē sóng, chí-thah the̍h lâi, khai-sí gîm-si, chhiùⁿ-koa, tī si-koa ê siaⁿ tiong, góa thiaⁿ tio̍h Tâi-oân ê ǹg-bāng, góa kap Hok-tō tī pòaⁿ-mî chi̍t tiám seng lī-khui, lī-khui ê sî, in iáu teh gîm, iáu teh chhiùⁿ.........
|
Tī台灣ê民主運動陣容中間，有一位真傑出ê歌手兼作曲家，伊就是〈犧牲換來覺醒〉ê作者---王明哲先生。久久聽著伊ê名，久久teh唱伊ê歌，想講會當寫出chiah-ni̍h有味，chiah-ni̍h有感情ê歌曲，應該是生做文質彬彬，多愁善感ê款式。無扑算，今年五月底，tī成功大學ê一場詩會中相遇，竟然是這副運動家ê體格。Koh較chán--ê是伊teh唱歌ê時，充滿樂觀、自信，完全排脫咱tī台灣歌ê中間常常鼻著ê自哀、自怨，抑是親像小丑仔式ê樂暢。Hit暝詩會了後，阮做伙去食宵夜，食了一下爽，吉他提來，開始吟詩、唱歌。Tī詩歌ê聲中，我聽著台灣ê向望，我kap福道tī半暝一點先離開，離開ê時，in iauteh2吟，iáu teh唱....... |
|
(Tâi-oân Kàu-hōe Kong-pò tē 2108 kî, 1992 nî 7 goe̍h)
|
（台灣教會公報第2108期，1992年7月） |
