A-bú
|
阿母 |
|---|---|
| Gân Sìn-seng | 顏信星 |
|
A-bú! Sī lí ê siang-chhiú, kam-goān pàng hē sè-kan ê hióng-siū; tī bû-ti ê sòe-goa̍t, chhōa goán keng-kòe jîn-seng têng-têng ê àm-liû. |
阿母！是你ê雙手， 甘願放下世間ê享受； Tī無知ê歲月， Chhōa阮經過人生層層ê暗流。 |
|
A-bú! Sī lí ê chheng-chhun, kam-goān ōaⁿ lâi móa-bīn ê jiâu-hûn; tī sûn-bāng ê lō͘-tiong, chān goán pèng-chhut ná hông chhit-chhái ê pin-hun. |
阿母！是你ê青春， 甘願換來滿面ê皺痕； Tī尋夢ê路中， 贊阮迸出若虹七彩ê繽紛。 |
|
Ji̍t-chí kóaⁿ ji̍t-chí, lōa-chōe hoaⁿ-hí, kòe-gán hûn-ian. Teng-lêng koh teng-lêng, lōa-chōe iu-khó͘, chhim bâi sim-tiân. |
日子趕日子， 偌濟歡喜，過眼雲煙。 叮嚀koh叮嚀， 偌濟憂苦，深埋心田。 |
|
Seng-oa̍h chhin-chhiūⁿ chi̍t-tiâu bû-hêng ê só-liān, chiong lí ê ba̍k-sái kap goán ê sêng-chiū kat sio-liân. A-bú! Goán bô la̍t thang chiong kong-im se̍h tò-tńg, têng-sin ūi lí phah-khui sòe-goa̍t ê tōa-mn̂g. |
生活親像一條無形ê鎖鍊， 將你ê目屎kap阮ê成就結相連。 阿母！阮無力thang將光陰se̍h倒轉， 重新為你扑開歲月ê大門。 |
|
Chí-ū khún-kiû Siōng-tè, hō͘ lí ê thiàⁿ, chhin-chhiūⁿ chèng-chí iā tò thó͘-tē; chi̍t-lō͘ lâi khui-hoe. |
只有懇求上帝， Hō͘你ê疼， 親像種子iā倒土地； 一路來開花。 |
|
(Tâi-oân Kàu-hōe Kong-pò tē 2097 kî, 1992 nî, 5 goe̍h)
|
（台灣教會公報第2097期，1992年5月） |
|
(Gân Sìn-seng Tâi-gí Bûn-ha̍k soán, 2002 nî Chin-pêng Khì-gia̍p Chhut-pán)
|
（顏信星台語文學選，2002年真平企業出版） |
