Lú-sèng m̄-sī jio̍k-chiá
|
女性m̄是弱者 |
| Tân Gī-jîn |
陳義仁 |
|
Lâng, sī kiông á-sī jio̍k, nā ēng jio̍k-thé ê khùi-la̍t chò phiau-chún, tong-jiân lú-sèng chiū-sī jio̍k-chiá, tān-sī, Siōng-tè siúⁿ-sù hō͘ lâng ê, m̄-nā sī jio̍k-thé ê khùi-la̍t, koh ū chin-chōe hong-bīn ê châi-tiāu kap te̍k-tiám. Iû-kî sī, bûn-bêng hoat-tián kàu chit-chūn, ūn-iōng thé-la̍t ê kang í-keng chin-chió, kap lâm-sèng sio pí, tû liáu thé-la̍t í-gōa, lú-sèng si̍t-chāi m̄-sī jio̍k-chiá.
|
人，是強抑是弱，若用肉體ê氣力做標準，當然女性就是弱者。但是，上帝賞賜hō͘人--ê,m̄若是肉體ê氣力，koh有真濟方面ê才調kap特點。尤其是，文明發展到這陣，運用體力ê工已經真少，kap男性相比，除了體力以外，女性實在m̄是弱者。 |
|
Lâm-sèng hô͘-lú-bóng hō͘ lâm-sèng ê jio̍k-thé khah hoat-ta̍t, tān-sī iā hō͘ sim-chōng kap hoeh-kńg ê hū-tam khah tāng, cha-po͘-lâng khah chá sí.
|
男性hô͘-lú-bóng hō͘男性ê肉體較發達，但是也hō͘心臟kap血管ê負擔較重，查甫人較早死。 |
|
Lú-sèng ê keng-kî hō͘ lú-sèng chin-chōe bô hong-piān, tān-sī, tī lú-sèng thêng keng chìn-chêng, hoān-tio̍h sim-chōng-pīⁿ--ê, chí-ū lâm-sèng ê 4 hūn chi 1, kàu 7 hūn chi 1.
|
女性ê經期 hō͘女性真濟無方便。但是，tī女性停經進前，患著心臟病--ê,只有男性ê 4份之1，到7份之1。 |
|
Lán lóng siūⁿ kóng, cha-po͘-lâng khah ióng-kám, m̄-thang sió-khóa tāi-chì tō lâu ba̍k-sái, tān-sī, in-ūi bô lâu ba̍k-sái, chiū lâu hoeh, ap-chè kám-chêng ê lâng siōng-gâu ūi-chhut-hoeh, lâm-sèng khah gâu ūi-chhut-hoeh, che kap siong-sim ê sî kiông-chè ka-kī m̄-khéng lâu ba̍k-sái ū koan-hē, koh in iōng lim-chiú hoat-sia̍p kám-chêng. Chin-chōe cha-po͘-lâng lim-chiú liáu chiah ē khàu.
|
咱攏想講：查甫人較勇敢，m̄-thang小可代誌tō流目屎。但是，因為無流目屎，就流血，壓制感情ê人上gâu胃出血。男性較gâu胃出血，che kap傷心ê時強制家己m̄肯流目屎有關係。Koh in用lim酒發洩感情，真濟查甫人lim酒了才會哭。 |
|
Hui-ki sit-sū kap chhia-hō, lâm-sèng khah gâu sí.
|
飛機失事kap車禍，男性較gâu死。 |
|
Hū-jîn-lâng ē-tàng hō͘ chi̍t-ê bí-biāu ê oa̍h-miā tī in ê pak-tó͘-lāi hêng-sêng, seng-tióng, chit-ê tiōng-iàu ê kang-chok, sī lâm-sèng chò-bōe-kàu--ê.
|
婦人人會當hō͘一個美妙ê活命tī in ê腹肚內形成、生長，這個重要ê工作，是男性做bōe到--ê。 |
|
Tùi jîn-sèng lâi kóng, lú-sèng ū chin-chōe chin-súi ê te̍k-chit, chhin-chhiūⁿ un-jiû, chû-pi, tông-chêng, thé-thiap, koan-hoâi, jīn-chōe ê sim téng, chiah-ê lóng-sī Iâ-so͘ só͘ kiông-tiau chin tiōng-iàu ê te̍k-chit. Tān-sī, tāi-pō͘-hūn ê cha-po͘-lâng gō͘-kái kóng, “He sī loán-jio̍k--ê cha-bó͘-lâng kò-sèng.” Só͘-í, cha-po͘-lâng ê kò-sèng pìⁿ-chòe khah ui-giâm, m̄-káⁿ piáu-lō͘ kám-chêng, m̄-khéng jīn-chōe, bōe-hiáu an-ùi lâng, sit-khì chhōa-gín-á kap gín-á chiap-chhio̍k ê khoài-lo̍k.
|
對人性來講：女性有真濟真súi ê特質，親像溫柔、慈悲、同情、體貼、關懷、認罪ê心等。Chiah-ê攏是耶穌所強調真重要ê特質。但是，大部份ê查甫人誤解講：「He是軟弱--ê查某人個性。」所以，查甫人ê個性變做較威嚴，m̄敢表露感情，m̄肯認罪，bōe曉安慰人，失去chhōa囡仔kap囡仔接觸ê快樂。 |
|
Tùi le̍k-sú lâi khòaⁿ kò-jîn ê lêng-le̍k, lâm-sèng khah ū sêng-chiū, che sī in-ūi lán hō͘ lú-chú khah-chió ê kàu-io̍k, koh hān-tiāⁿ in kan-na ē-sái chò chhù-lāi ê kang.
|
Tùi歷史來看個人ê能力，男性較有成就，che是因為咱hō͘女子較少ê教育，koh限定in kan-na會使做厝內ê工。 |
|
Lâm-lú tong-jiân ū bô-kāng-khoán ê iu-tiám, lán bōe-sái kóng lú-sèng it-tēng pí lâm-sèng khah iu-siù, tān-sī, chì-chió lán iā bōe-sái kóng, “Lú-sèng sī jio̍k-chiá.”
|
男女當然有無共款ê優點，咱bōe使講女性一定比男性較優秀，但是，至少咱也bōe使講：「女性是弱者。」 |
|
(Hong-hiòng Tē 9 kî, 1991 nî 3 goe̍h)
|
（風向第9期，1991年3月） |
