Gín-á hō͘ pē-bú ê 10-tiâu kài
|
囡仔hō͘父母ê 10條誡 |
| Tân Gī-jîn |
陳義仁 |
|
e̍k
|
譯 |
|
Bí-kok chi̍t-ê kàu-io̍k choan-ka kóng, “Gín-á jīn-chin chhu--kòe ê chhn̂g-kin, bô-lūn sī m̄-sī chhu liáu ū chéng-chê, ma-ma chhian-bān m̄-thang koh ka têng chhu.”
|
美國一個教育專家講：「囡仔認真chhu--過 ê床巾，無論是m̄是chhu了有整齊，媽媽千萬m̄-thang koh kā重chhu。」 |
|
Koh ū chi̍t-ê phok-sū bat siá chi̍t-phiⁿ 〈Gín-á hō͘ pē-bú ê 10 tiâu kài>, Chin chheng-chhó hō͘ lán khòaⁿ-chhut gín-á ê siūⁿ-hoat kah kám-kak.
|
Koh有一個博士bat寫一篇〈囡仔 hō͘父母ê 10條誡〉，真清楚hō͘咱看出囡仔ê想法kah [kap]感覺。 |
|
1. Pa-pa ma-ma, góa-ê chhiú sè-ki, só͘-í m̄-thang tùi góa chhu ê chhn̂g-kin, góa ōe ê tô͘, hiat ê kiû iàu-kiû hiah-n̍i̍h oân-bí, góa-ê kha khah té, chhiáⁿ lí kiâⁿ khah-bān leh, góa chiah tòe ē-tio̍h.
|
1.爸爸媽媽，我ê手細支，所以m̄-thang 對我chhu ê床巾，我畫ê圖，hiat ê球要求hiah-n̍i̍h完美，我ê腳較短，請你行較慢--leh，我chiah tòe會著。 |
|
2. Góa lâi-kàu chit-ê sè-kan iáu bô-gōa-kú, chhiáⁿ mài kòe-thâu kā góa hān-chè, iông-ún góa ho͘N3-kî chi̍t-ē, mi̍h-kiāⁿ sió chiān khòaⁿ-māi--leh.
|
2.我來到這個世間iáu無外久，請mài過頭kā我限制，容允我好奇--一下，物件小chiān看māi--leh。 |
|
3. Chhù-lāi ê tāi-chì sī éng-oán lóng chò bōe-liáu--ê, ma-ma, chhiáⁿ lí sió hioh chi̍t-ē, ēng sî-kan, hôe-tap góa-ê būn-tôe.
|
3.厝內ê代誌是永遠攏做bōe了--ê,媽媽，請你小歇一下，用時間，回答我ê問題。 |
|
4. Góa-ê kám-chêng chin nńg-chiáⁿ, kap tōa-lâng kāng-khoán, bē-ài hō͘ lâng lô-so cha̍p-liām.
|
4.我ê感情真軟chiáⁿ，kap大人共款，bē愛 hō͘人囉嗦雜唸。 |
|
5. Góa sī Siōng-tè siúⁿ-sù hō͘ lí ê te̍k-pia̍t ê lé-mi̍h, chhiáⁿ pó-sioh góa, chun-tiōng góa, ín-chhōa góa koh iōng thiàⁿ koán-kà góa.
|
5.我是上帝賞賜hō͘你ê特別ê禮物，請保惜我、尊重我、引chhōa我koh用疼管教我。 |
|
6. Góa su-iàu kó͘-lē, chiah ē tōa-hàn, m̄-thang o͘-pe̍h mā góa. Chhian-bān ē-kì-tit, lí ē-sái phoe-phêng góa só͘ chò ê tāi-chì, tān-sī mài siong-hāi góa-ê kám-chêng.
|
6.我需要鼓勵，才會大漢，m̄-thang烏白罵我。千萬會記--得，你會使批評我所做ê代誌，但是mài傷害我ê感情。 |
|
7. Chhiáⁿ hō͘ góa ū ka-tī chò koat-tēng ê ki-hōe, iông-ún góa ū sit-chhò, án-ni góa chiah ē-tàng tùi chhò-gō͘ tiong ha̍k-si̍p, kàu góa tōa-hàn, chiah ū lêng-le̍k chò tiōng-tāi ê koat-tēng.
|
7.請hō͘我有家己做決定ê機會，容允我有失錯，án-ni我才會當tùi錯誤中學習，到我大漢，才有能力做重大ê決定。 |
|
8. Chhiáⁿ m̄-thang ta̍k-hāng tāi-chì lóng beh thè góa chò, ná-chhiūⁿ góa ta̍k-hāng bô-pòaⁿ-phiat kāng-khoán; iā chhiáⁿ lín mài lia̍h góa kah ko-ko ti-ti che-che me-me sio-pí.
|
8.請m̄-thang逐項代誌攏beh替我做，若像我逐項無半撇共款；也請lín mài掠我kah哥哥、弟弟、姊姊、妹妹相比。 |
|
9. Pa-pa ma-ma, chhiáⁿ m̄-thang kiaⁿ lī-khui góa, nn̄g-ê lâng chhut-khì tō͘ chi̍t-ē-á ká leh! Gín-á su-iàu tú-tio̍h--á lī-khui pē-bú, chhin-chhiūⁿ pē-bú tú-tio̍h--á su-iàu bô-siū gín-á kiáu-jiáu, kāng-khoán, koh, án-ne iā-sī hō͘ lín-ê gín-á chai-iáⁿ lín hun-in bí-boán ê hó hong-hoat.
|
9.爸爸媽媽，請m̄-thang驚離開我，兩個人出去渡一下仔假--leh！囡仔需要tú著--仔離開父母，親像父母tú著--仔需要無受囡仔攪擾共款，koh án-ne也是hō͘ lín ê囡仔知影lín婚姻美滿ê好方法。 |
|
10. Chhiáⁿ chhōa góa khì Chú-ji̍t-o̍h á-sī lé-pài-tn̂g. Góa ài Siōng-tè.
|
10.請chhōa我去主日學抑是禮拜堂。我愛上帝。 |
|
(Hong-hiòng Tē 10 kî, 1991 nî 5 goe̍h)
|
（風向第10期，1991.年5月） |
