Lōe-chāi I-tī
|
內在醫治 |
| Liāu Ài-hôa |
廖愛華 |
|
Ū chin-chōe Siōng-tè ê jî-lú, sin-thé bô chin kiān-khong, lêng-hûn bô chin ióng-chòng.
|
有真濟上帝ê兒女，身體無真健康，靈魂無真勇壯。 |
|
Sī án-chóaⁿ sin-thé bōe kiān-khong? Sī in-ūi in-ê lêng-hûn bô-kàu ióng-kiāⁿ. Ki-pún-te̍k lâi kóng, Siōng-tè ê jî-lú, lêng-hûn nā ióng-kiāⁿ, chū-jiân in ê khoân-kéng, seng-khu lóng ē lú lâi lú hó.
|
是án-chóaⁿ身體bōe健康？是因為in ê靈魂無夠勇健。基本的來講：上帝ê兒女，靈魂若勇健，自然in ê環境，身軀攏會愈來愈好。 |
|
Hō͘ lêng-hûn ióng-kiāⁿ, chiū-sī lōe-chāi ê i-tī. Chin-chōe Ki-tok-tô͘ ê i-seng án-ni kóng, “Lâng pah hun chi 80 ê pīⁿ sī tùi sim-lêng lâi--ê, m̄-sī seng-khu chin-chiàⁿ ū pīⁿ. Lâng ê seng-khu ū būn-tê lâi chhōe góa, ài góa thè i kî-tó, tān-sī góa m̄-sī i-seng, iā m̄-chai i ê pīⁿ sī seng-khu ín-khí á-sī sim-lêng só͘ tì. Nā-sī seng-khu ê pīⁿ, góa ài i khì chhōe i-seng, góa bōe kap i-seng chhiúⁿ seng-lí. Nā-sī i chhōe-kòe chin-chōe bêng-i, khai-hùi chin-chōe chîⁿ, būn-tê iáu-bōe kái-koat, nā i bat chiap-siū Iâ-so͘ chò i ê Kiù-chú, án-ni i su-iàu lōe-chāi i-tī, i ê lêng-hûn ū koh-iūⁿ, tio̍h niá-siū Siōng-tè ê i-tī.
|
Hō͘靈魂勇健，就是內在ê醫治。真濟基督徒ê醫生án-ni講：「人百分之80個病是tùi心靈來--ê,m̄是身軀真正有病。」人ê身軀有問題來chhōe我，ài我替伊祈禱，但是我m̄是醫生，也m̄知伊ê病是身軀引起抑是心靈所致。若是身軀ê病，我ài伊去chhōe醫生，我bōe kap醫生搶生理。若是伊chhōe過真濟名醫，開費真濟錢，問題iáu-bōe解決，若伊bat接接受耶穌做伊ê救主，án-ni伊需要內在醫治，伊ê靈魂有各樣，著領受上帝ê醫治。 |
|
Chiap-siū Siōng-tè ê i-tī í-chêng, lán seng ài liáu-kái Siōng-tè ê thiàⁿ. Sèng-keng kóng-khí 3 chióng ê thiàⁿ. Tē 1 chióng sī lióng-sèng ê thiàⁿ, lâm-lú ê loân-bō͘, chhin-chhiūⁿ Ngá-kok ài Lia̍p-kiat. Tē 2 chióng sī chhin-chhiūⁿ A-pek-lah-hán thiàⁿ Í-sat. Tē 3 chióng sī iú-chêng. Chit 3 chióng lóng-sī lâng ê thiàⁿ, lâng ê thiàⁿ ū i úi-tāi ê só͘-chāi. Lâm ūi lú lâi sí, pē-bú ūi jî-lú sí. Lâng ūi-tio̍h pêng-iú hiàn sìⁿ-miā, thiàⁿ bô pí chit-ê khah tōa--ê (Iok-hān 15:13). Tān-sī lâng ê thiàⁿ ū i ê hān-chè, lióng-sèng ê thiàⁿ iā bô oân-choân. Sī án-chóaⁿ lâng ê thiàⁿ bô oân-choân neh? Iok-hān it su 4:18 kóng, “Tī thiàⁿ ê lāi-bīn bô kiaⁿ-hiâⁿ.” Ū chin-chōe pē-bú chin thiàⁿ kiáⁿ, chiong gín-á ióng-io̍k liáu chin hó-sè, in-ūi in kiaⁿ-á chiong-lâi jî-lú put-hàu. In ióng-jî thāi-ló. Sim-lāi ū kiaⁿ-hiâⁿ, in ê thiàⁿ bô oân-choân, in-ūi ū kiaⁿ-hiâⁿ. Góa tú kiat-hun bô gōa-kú, góa ê chhin-chiâⁿ chiū kā góa kóng: “Lín sian-siⁿ sī iân-tâu-á sàng, thiaⁿ kóng chò hui-hêng-oân ē siū-tio̍h chin-chōe cha-bó͘ gín-á ê ín-iú, tng lán lú lâi lú lāu, lí tio̍h chù-ì, ài ē-hiáu khiām kóa sai-khia, í-bián chiong-lâi jîn châi lióng sit.” Ū chin-chōe lâng lóng teh ǹg lâng chò chit-khoán ê kiàn-gī, goân-in chiū-sī kiaⁿ.
|
接受上帝ê醫治以前，咱先ài了解上帝ê疼。聖經講起3種ê疼。第1種是兩性ê疼，男女ê戀慕，親像雅各愛拉結。第2種是親像亞伯拉罕疼以撒。第3種是友情。這3種攏是人ê疼，人ê疼有伊偉大ê所在。男為女來死，父母為兒女死。人為著朋友獻生命，疼無比這個較大--ê(約翰15:13）。但是人ê疼有伊ê限制，兩性 ê疼也無完全。是án-chóaⁿ人ê疼無完全--neh？約翰一書 4:18講：「Tī疼ê內面無驚惶。」有真濟父母真疼子，將囡仔養育了真好勢，因為in驚仔將來兒女不孝，in養兒待老。心內有驚惶，in ê疼無完全，因為有驚惶。我tú結婚無外久，我ê親情就kā我講：「Lín先生是緣投仔sàng,聽講做飛行員會受著真濟查某囡仔ê引誘，當咱愈來愈老，你著注意，ài會曉儉寡sai-khia,以免將來人財兩失。」有真濟人攏teh向人做這款ê建議，原因就是驚。 |
|
Ū chin-chōe pē-bú ūi-tio̍h jî-lú ê hun-in lâi chhōe góa hia̍p-tâm, góa hoat-hiān in sī ēng chhin-chêng teh thiàⁿ kiáⁿ, m̄-sī ēng Siōng-tè ê thiàⁿ. Nā bô Siōng-tè ê thiàⁿ chìn-ji̍p hun-in, lán ê hun-in ē chin gûi-hiám.
|
有真濟父母為著兒女ê婚姻來chhōe我協談，我發現in是用親情teh疼子，m̄是用上帝ê疼。若無上帝ê疼進入婚姻，咱ê婚姻會真危險。 |
|
Beh án-chóaⁿ ēng Siōng-tè ê thiàⁿ lâi kòe hun-in, ka-têng, kang-chok ê seng-oa̍h neh? Beh án-chóaⁿ chiap-siū Siōng-tè ê thiàⁿ lâi i-tī lán neh? Chin tiōng-iàu--ê, chiū-sī chiap-siū Iâ-so͘ chòe lí-ê Kiù-chú, ha̍k-si̍p óa-khò Siōng-tè, án-ni thiàⁿ ê goân-chôaⁿ chiū tī lí ê lāi-bīn, lán chiū ū thiàⁿ-sim chhin-chhiūⁿ kang-hô put-toān chhèng--chhut-lâi. Sī án-chóaⁿ tāi-pō͘-hūn ê Ki-tok-tô͘ bô keng-giām tio̍h thiàⁿ ê chhèng-chhut? Tī Bí-kok Ka-chiu ū chi̍t-tè ta-sò khòng-hān ê soaⁿ-kok, goân-pún sī bô-hoat-tō͘ seng-sán ê só͘-chāi, bô chúi-chôaⁿ, āu-lâi chio̍h-iû kong-si lâi khai-chhái chio̍h-iû, ū chi̍t-kang, chúi-chôaⁿ tùi tōa chio̍h-thâu phùn-chhut, tōa-chio̍h-thâu ē-bīn sī chi̍t-ê chúi-chôaⁿ, āu-lâi kè-sio̍k khai-hoat chin-chōe chúi-lō͘, ta-tē tit-tio̍h koàn-ak, chit-ê soaⁿ-kok chiâⁿ-chòe Ka-chiu siōng-kùi ê thó͘-tē. Ki-tok-tô͘ iā-sī án-ni, lí ê lāi-bīn ū chi̍t-tè tōa chio̍h-thâu teh--leh, thiàⁿ ê chúi-chôaⁿ chhèng bōe-chhut--lâi, lâng kap lí chhin-kūn, khòaⁿ bōe tio̍h Iâ-so͘ ê thiàⁿ, chhùi kóng Iâ-so͘, tān-sī bô Iâ-so͘ ê hí-lo̍k, chio̍h-thâu kā lí tòng tiâu leh. Chiap-siū Iâ-so͘ iáu bô-kàu, tio̍h tû-khì chio̍h-thâu ê chó͘-tòng. Siōng-tè èng-ún kóng, Góa beh ēng sin--ê sim siúⁿ-sù lín; iā beh ēng sin--ê Sîn hē tī lín ê lāi-bīn; koh beh tùi lín ê jio̍k-thé tiong tû-khì chhin-chhiūⁿ chio̍h ê sim....” (I-se-kiat 36: 26) hō͘ lán ū khùi-la̍t kiâⁿ I ê kà-sī.
|
Beh án-chóaⁿ用上帝ê疼來過婚姻、家庭、工作ê生活-- neh？Beh án-chóaⁿ接受上帝ê疼來醫治咱--neh？真重要--ê,就是接受耶穌做你ê救主，學習倚靠上帝，án-ni疼ê源泉就tī你ê內面，咱就有疼心親像江河不斷沖--出-來。是án-chóaⁿ大部份ê基督徒無經驗著疼ê沖出？Tī美國加州有一塊礁燥曠旱ê山谷，原本是無法度生產ê所在，無水泉，後--來石油公司來開採石油，有一工，水泉tùi大石頭噴出，大石頭下面是一個水泉，後--來繼續開發真濟水路，礁地得著灌沃，這個山谷成做加州上貴 ê土地。基督徒也是án-ni,你ê內面有一塊大石頭teh--leh，疼ê水泉沖bōe出-來，人kap你親近，看bōe著耶穌ê疼，嘴講耶穌，但是無耶穌ê喜樂，石頭kā你擋tiâu--leh。接受耶穌iáu無夠，著除去石頭ê阻擋。上帝應允講：「我beh用新--ê心賞賜lín;也beh用新--ê神下tī lín ê內面；koh beh tùi lín ê肉體中除去親像石ê心…」（以西結 36：26）hō͘咱有氣力行伊ê教示。 |
|
Beh án-chóaⁿ tû-khì sim-lāi chit-tè chio̍h-thâu? Chiū-sī ài jīn-chōe. Jīn-chōe sī siōng ki-pún ê chin-lí, tān-sī chin-chōe Ki-tok-tô͘ tī chit hong-bīn chò liáu bô-kàu-gia̍h. In kóng, “Siōng-tè --ah! Sià-bián góa, góa ū hoān-chōe, ēng Pó-hoeh sé-chheng góa.” Kî-kiû tāi-chì chin kū-thé, tān-sī jīn-chōe bô-kàu kū-thé, bêng-pe̍k, lán hoān-chōe chiū tio̍h kū-thé sêng-jīn. Bô-kú í-chêng, ū chi̍t-ê lâng chham-ka Mô͘-lí-su bo̍k-su ê pò͘-tō-hōe, chit-ê lâng ū siu-chông Bi̍t-chong ê Sià-lī-chú, bōe sìn Chú í-chêng tī chit hong-bīn khai chin-chōe chîⁿ. I sî-siông ē thâu-khak thiàⁿ, sim-lāi chhiong-móa kiaⁿ-hiâⁿ, thiaⁿ bo̍k-su káng-tō liáu āu, i beh chiap-siū Iâ-so͘ Ki-tok. Pò͘-tō-hōe liáu, i ài góa ūi i kî-tó. Góa kám-kak ná-chhiūⁿ ū sím-mi̍h teh chó͘-tòng Siōng-tè tùi i ê i-tī, góa chiū mn̄g i kóng, “Ū chiong hiah-ê īⁿ-kàu ê mi̍h-kiāⁿ sio-tiāu á bô?” Āu-lâi goán tī Tâi-tang, chiong i só͘ siu-chông hiah-ê īⁿ-kàu ê mi̍h-kiāⁿ sio-tiāu, i ê thâu chū-jiân chiū bōe-koh thiàⁿ. Nā kā mô͘-kúi lâu tē-pō͘, tio̍h khò Iâ-so͘ ê Pó-hoeh kā sé-chheng.
|
Beh án-chóaⁿ除去心內這塊石頭？就是ài認罪。認罪是上基本ê真理，但是真濟基督徒tī這方面做了無夠額。In講：「上帝--ah！赦免我，我有犯罪，用寶血洗清我。」祈求代誌真具體，但是認罪無夠具體、明白，咱犯罪就著具體承認。無久以前，有一個人參加毛里斯牧師ê佈道會，這個人有收藏密宗ê舍利子，bōe信主以前tī這方面開真濟錢。伊時常會頭頭殼疼，心內充滿驚惶，聽牧師講道了後，伊beh接受耶穌基督。佈道會了，伊ài我為伊祈禱。我感覺若像有甚mi̍h teh阻擋上帝對伊ê醫治，我就問伊講：「有將hiah ê異教ê物件燒掉抑無？」後來阮tī台東，將伊所收藏hiah ê異教ê物件燒掉，伊ê頭自然就bōe koh疼。若kā魔鬼留地步，著靠耶穌ê寶血kā洗清。 |
|
Ū chi̍t-ê tē jī tāi Ki-tok-tô͘ chí-moāi, cha̍p-kúi-hòe ê sî lī-khui kàu-hōe. Āu-lâi kè hō͘ chi̍t-ê Thian-chú-kàu-tô͘, kiat-hun liáu-āu chiah hoat-hiān i ê sian-siⁿ ū tông-sèng-loân siū môa-pohiàn chiah-kú, i chin siū-khì, i khai-sí ēng pháiⁿ pò phiáⁿ, kau chin-chōe cha-po͘ pêng-iú, i tham-tô͘ lī-sek, chham-ka pio-hōe-á, chò hōe-thâu, pa̍t-lâng tó i ê hōe-á, i iā tó pa̍t-lâng ê hōe-á, hū-chè 60-kúi-bān. I ū chi̍t-ê pêng-iú sí--khì, i chin kiaⁿ, chiū chhiáⁿ lâng siu-kiaⁿ, sui-jiân i í-chêng sī Ki-tok-tô͘, tān-sī, i kā mô͘-kúi lâu tē-pō͘, hō͘ mô͘-kúi cheng-ho̍k--khì tōa-tōa kong-kek i, hō͘ i 19 ji̍t bōe-khùn--tit. Lâng 19 ji̍t bōe-khùn, ē khí-siáu, i ê lāu-bú sī Ki-tok-tô͘, chiū kā i kóng, ” Lí èng-kai tio̍h tńg-lâi chhōe Iâ-so͘, m̄-thang koh óa-khò tang óa-khò sai. I tńg-khì ka-kī ê bú-hōe, bo̍k-su ūi i kî-tó, āu-lâi i poaⁿ-chhù, poaⁿ lâi goán-tau hū-kīn, bo̍k-su khà tiān-ōe kā góa kóng, iā kà i tio̍h kap góa liân-lo̍k. I hō͘ mô͘-kúi ū phāng thang ji̍p, chin-chōe chōe-ok lúi-chek khí-lâi chhin-chhiūⁿ tōa chio̍h-thâu, chiong goân-chôaⁿ teh-tiâu--leh. Góa chhōa i kî-tó, kiû Sèng Sîn sù hō͘ i hóe-kái chai-chōe ê sim, tē it pái kap góa kóng-ōe, sī ūi-tio̍h chè-chú kā i thó-chîⁿ, i lâi kā góa chioh-chîⁿ, bô kóng chin-chōe ōe, góa ūi i kî-tó.
|
有一個第二代基督徒姊妹，十幾歲ê時離開教會。後--來嫁hō͘一個天主教徒，結婚了後才發現伊ê先生有同性戀受瞞騙chiah久，伊真受氣，伊開始用歹報歹，交真濟查甫朋友，伊貪圖利息，參加標會仔，做會頭，別人倒伊ê會仔，伊也倒別人ê會仔，負債60幾萬。伊有一個朋友死--去，伊真驚，就請人收驚，雖然伊以前是基督徒，但是，伊kā魔鬼留地步，hō͘魔鬼征服--去大大攻擊伊，hō͘伊19日bōe睏--tit。人19日bōe睏，會起痟，伊ê老母是基督徒，就kā伊講：「你應該著轉來chhōe耶穌，m̄-thang koh倚靠東倚靠西。」伊轉去家己ê母會，牧師為伊祈禱，後--來伊搬厝，搬來阮兜附近，牧師khà電話kā我講：也教伊著kap我聯絡。伊hō͘魔鬼有縫thang入，真濟罪惡累積起來親像大石頭，將源泉teh-tiâu--leh。我chhōa伊祈禱，求聖神賜hō͘伊悔改知罪ê心，第一擺kap我講話，是為著債主kā伊討錢，伊來kā我借錢，無講真濟話，我為伊祈禱。 |
|
Ū chi̍t-ji̍t pòaⁿ-mî, i khà tiān-ōe lâi, it-ti̍t kháu kóng, “Góa teh beh jím-siū bōe-tiâu ah, góa ê chōe chin-tāng....」 góa chai-iáⁿ i ê sim khai-sí chai thang iu-siong thòng-hóe, góa kóaⁿ-kín kòe--khì, i it-it jīn-chōe. I ū hoān chin-chōe chōe, sit-khì sìn-sim,m̄ chai-iáⁿ Iâ-so͘ ē sià-bián i.
|
有一日半暝，伊khà電話來，一直口講：「我teh beh忍受bōe-tiâu ah，我ê罪真重。」我知影伊e心開始知thang憂傷痛悔，我趕緊過--去，伊一一認罪。伊有犯真濟罪，失去信心，m̄知影耶穌會赦免--伊。 |
|
Tng lán keng-le̍k Siōng-tè ê i-tī, Siōng-tè beh chiong oân-choân ê thiàⁿ koàn-ak lí. Tng lí chion chio̍h-thâu sak-khui, thiàⁿ chiū bān-bān chhiong-móa sim-lāi, chúi-chôaⁿ chiū chhèng--chhut-lâi. Hiān-chāi, chit-ê chí-mōe í-keng choân-ke sìn Chú.
|
當咱經歷上帝ê醫治，上帝beh將完全ê疼灌沃你。當你將石頭sak開，疼就慢慢充滿心內，水泉就沖--出-來。現在，這個姊妹已經全家信主。 |
|
Koh lâi, lâi kóng sèng ê hoān-chōe ê i-tī, ū chi̍t-pái, góa kap chi̍t-kóa lâng chò-hóe kî-tó, Sú Bûn-sim su-bió khòaⁿ-kìⁿ ū tham-sim kap îm-loān ê siâ-sîn chò-hóe kong-kek Tâi-oân. Goán khòaⁿ-kìⁿ Lio̍k-ha̍p-chhái kap ta̍k-chióng sek-chêng ê hâng-gia̍p, che sī ù-òe ê siâ-sîn teh chò-kang. Tī Tâi-oân múi chi̍t-ê Ki-tok-tô͘, lóng ē siū tio̍h siâ-sîn ê kong-kek.
|
Koh來，來講性ê犯罪ê醫治，有一擺，我kap一寡人做伙祈禱，史文心師母看見有貪心kap淫亂ê邪神做伙攻擊台灣。阮看見六合彩kap逐種色情ê行業，che是污穢ê邪神teh做工。Tī台灣每一個基督徒，攏會受著邪神ê攻擊。 |
|
Ū chi̍t-ūi chí-mōe, i pún-lâi ū chi̍t-ê chho͘-loân ê chêng-jîn, m̄-chai siáⁿ goân-in, āu-lâi bián góa oàn-hūn ma-ma ê chōe. tû-khì sim-lāi oàn-hūn ê chio̍h-thâu, góa keng-giām tio̍h Siōng-tè ê thiàⁿ, hiān-chāi góa kap ma-ma ū kiān-khong ê koan-hē.
|
有一位姊妹，伊本來有一個初戀ê情人，m̄知啥原因，後--來免我怨恨媽媽ê罪。除去心內怨恨ê石頭，我經驗著上帝ê疼，現在我kap媽媽有健康ê關係。 |
|
Beh tû-khì chio̍h-thâu, tāi-seng ài jīn-chōe, kî-chhù, ài jiâu-sià pa̍t-lâng, tē-san, ài jiâu-sià ka-kī, tng lán jīn-chōe, Siōng-tè chiū sià-bián lán, chit-sî, lán tio̍h chiap-siū Siōng-tè ê sià-bián, m̄-thang koh chek-pī ka-kī, khòng-kò ka-kī. Lí ê chōe beh tit-tio̍h sià-bián, pīⁿ tit-tio̍h i-tī.
|
Beh除去石頭，代先ài認罪，其次，ài饒赦別人，第三ài饒赦家己，當咱認罪，上帝就赦免咱，這時，咱著接受上帝ê赦免，m̄-thang koh責備家己，控告家己。你ê罪beh得著赦免，病得著醫治。 |
|
(Hong-hiòng siang-goe̍h-khan tē 11 kî, 1991 nî 7 goe̍h)
|
(方向雙月刊第11期，1991年7月) |
