Mo͘dy èng-hù thó-ià ê sū
|
Mo͘dy應付討厭ê事 |
| Khu Sìn-tián |
邱信典 |
|
Bí-kok chhut-miâ ê pò͘-tō-ka, Mo͘dy (Dwight Lyman Mo͘dy, 1837-1899) ū chi̍t-pái siū-chhiáⁿ khì bó͘ kàu-hōe káng-tō. Hit-keng kàu-hōe ê lâng kā i kóng; hit kàu-hōe ê hōe-iú, ū-ê tī lé-pài iáu-bōe kiat-sok ê sî, ē tāi-seng liu chhut-khì; án-ni chòe sī ōe jiáu-loān káng-tō-chiá ê cheng-sîn, si̍t-chāi hō͘ lâng chin thó-ià. In-ūi án-ni, tāi-seng kā Mo͘dy kóng-bêng; m̄-bián hō͘ i khòaⁿ-liáu kan-khó͘. Mo͘dy te̍k thiaⁿ-liáu chí-ū chhiò-chhiò, bô ìn chi̍t-kù ōe.
|
美國出名ê佈道家，Mo͘dy（Dwight Lyman Mo͘dy，1837-1899）有一擺受請去某教會講道。Hit間教會ê人kā伊講；hit教會ê會友，有--ê tī禮拜iáu-bōe結束ê時，會代先溜出出去；án-ni做是會擾亂講道者ê精神，實在hō͘人真討厭。因為án-ni,代先kā Mo͘dy講明；m̄免hō͘伊看了艱苦。Mo͘dy聽了只有笑笑，無應一句話。 |
|
Kàu káng-tō ê sî, Mo͘dy kóng: “ Góa kin-á-ji̍t ê káng-tō, sī tùi N̄g-khoán lâng kóng--ê; Tāi-seng sī tùi iáu-bōe hóe-kái ê chōe-jîn kóng--ê, āu-lâi chiah tùi í-keng hóe-kái ê sèng-tô͘ kóng--ê. “Án-ni Mo͘dy tāi-seng kóng Hok-im liáu-āu, hut-jiân thêng-chí, soan-pò kóng, “Hiān-chāi tùi chōe-jîn kóng ê tō-lí, í-keng kóng-liáu; kok-ūi ê tiong-kan nā-ū siūⁿ-beh liu-chhut-khì--ê, thang tāi-seng tńg-khì; tán-hāu in tńg-khì liáu-āu, góa chiah koh tùi sèng-tô͘ kóng chiâⁿ-sèng ê tō-lí.
|
到講道ê時，Mo͘dy講：「我今仔日ê講道，是tùi兩款人講--ê;代先是tùi iáu-bōe悔改ê罪人講--ê,後來chiah tùi已經悔改ê聖徒講--ê。」Án-ni Mo͘dy代先講福音了後，忽然停止，宣布講：「現在tùi罪人講ê道理，已經講了；各位ê中間若有想beh溜出去--ê,thang代先轉去；等候in轉去了後，我chiah koh tùi聖徒講誠聖ê道理。」 |
|
“Mo͘dy kóng chiah-ê ōe liáu-āu, lóng bô chi̍t-lâng káⁿ liu-soan, cha̍p-gōa nî lâi, thâu chi̍t-pái tī lé-pài iáu-bōe soah í-chêng, bô lâng tāi-seng liu chhut-khì.
|
Mo͘dy講chiah-ê話了後，攏無一人敢溜soan,十外年來，頭一擺tī禮拜iáu-bōe煞以前，無人代先溜出去。 |
|
(Tâi-oân Kàu-hōe Kong-pò tē 2075 kî, 1991 nî 12 goe̍h)
|
（台灣教會公報第2075期，1991年12月） |
