Siong-hûn
|
傷痕 |
|---|---|
| Gân Sìn-seng | 顏信星 |
|
Gín-á o̍h kiâⁿ, loān chông. Ū chheh m̄ tha̍k, thàn kòng. Chia̍h pháiⁿ pak-tó͘, phú-thong. To-kong chi̍t siám, kiàn hông. |
囡仔學行，亂chông。 有冊m̄讀，趁摃。 食歹腹肚，phú-thong。 刀光一閃，見紅。 |
|
Lōa-chōe jîn-seng lō͘, chhin-chhiūⁿ kòe hong-po͘; Chia chi̍t-khang, hia chi̍t-khang, M̄-bat poa̍h-tó ê m̄-sī lâng. |
偌濟人生路，親像過荒埔； Chia一空，hia一空， M̄-bat跋倒--ê m̄是人。 |
|
Sat-chhia sit lêng, bô tòng. Ūi chêng ūi ài, siong-hong. Liû giân sì siā, loān kóng. Chheng-thian-pe̍h-ji̍t, tah bông. |
煞車失靈，無擋。 為情為愛，傷風。 流言四射，亂講。 青天白日，罩濛。 |
|
Lōa-chōe jîn-seng lō͘, chhin-chhiūⁿ lo̍h làm-thô͘ ; Chia chi̍t-phiàn, hia chi̍t phiàn, Khah tōa-kho͘-pé--ê mā pìⁿ bô lián. |
偌濟人生路，親像落làm塗； Chia一片，hia一片， 較大箍把--ê mā變無lián。 |
|
Lō͘ nā beh kiâⁿ, chá-bān ōe poa̍h-tó, pn̄g nā beh chia̍h, ke-kiám lóng ōe pháiⁿ pak-tó͘. Chò-lâng m̄-kiaⁿ ū siong lâi tòa hûn, Siōng-kiaⁿ hit--lo̍h siong-tio̍h bô hûn ê tò tāng-pún. |
路若beh行，早慢會跋倒， 飯若beh食，加減攏會歹腹肚。 做人m̄驚有傷來帶痕， 上驚hit落傷--著無痕--ê,倒重本。 |
|
Han-chî ah, han-chî ! Lí kiám chai-iáⁿ sì-pah gōa tang lâi, Lí siong-tio̍h siōng lī-hāi ê sī tó chi̍t-ê pō͘-ūi ? |
蕃薯--ah，蕃薯！ 你kiám知影四百外冬來， 你傷著上厲害ê是tó一個部位？ |
|
( Tâi-oân Kàu-hōe Kong-pò tē 2070 kî, 1991 nî, 11 goe̍h )
|
（台灣教會公報第2070期，1991年11月） |
|
(Gân Sìn-seng Tâi-gí Bûn-ha̍k soán, 2002 nî Chin-pêng Khì-gia̍p Chhut-pán)
|
（顏信星台語文學選，2002年真平企業出版） |
