Soán-te̍k khah tiōng-iàu--ê
|
選擇較重要--ê |
| Tân Gī-jîn |
陳義仁 |
|
Ū lâng sî-siông kóng lán-ê pháiⁿ-ōe, lán kám-kak chin tiōng-iàu, só͘-í, lán chin siū-khì, khì kah ū chi̍t-kang sim-chōng-pīⁿ, ko-hiat-ap, lán chiū chai, kî-si̍t lâng kóng lán-ê pháiⁿ-ōe, bô gōa tiōng-iàu.
|
有人時常講咱ê歹話，咱感覺真重要，所以，咱真受氣，氣kah有一工心臟病、高血壓，咱就知，其實人講咱ê歹話，無偌重要。 |
|
Gín-á piàⁿ seng-ha̍k, lán kám-kak chin tiōng-iàu, tán kah ū chi̍t-kang, lán-ê gín-á piàⁿ kah cheng-sîn sit-siông, sim-lí koh-iūⁿ, lán chiū chai-iáⁿ, tha̍k seng-ha̍k-lu̍t siōng-koân ê ha̍k-hāu, mā bô hiah-n̍i̍h tiōng-iàu.
|
囡仔拚升學，咱感覺真重要，等kah有一工，咱ê囡仔拚kah精神失常，心理各樣，咱就知影，讀升學率上懸ê學校，mā無hiah-n̍i̍h重要。 |
|
Lán kám-kak gín-á o̍h kóa châi-gē chin tiōng-iàu, lé-pài-ji̍t bô khì tha̍k chú-ji̍t-o̍h, khì chham-ka chok-bûn-pan, bí-su̍t-pan, tiān-náu-pan; tán kàu ū chi̍t-kang, lán-ê gín-á pìⁿ-chòe bô Sìn-gióng ê lâng, hit-chūn lán chiū chai, châi-gē mā bô gōa tiōng-iàu.
|
咱感覺囡仔學寡才藝真重要，禮拜日無去讀主日學，去參加作文班、美術班、電腦班；等到有一工，咱ê囡仔變做無信仰ê人，hit陣咱就知，才藝mā無外重要。 |
|
Lá kám-kak chîⁿ-châi chin tiōng-iàu, só͘-í lán piàⁿ-miā thàn-chîⁿ, piàⁿ kah phah-pháiⁿ seng-khu, lī-khui Siōng-tè hn̄g-hn̄g, lán chiū chai, kim-chîⁿ iā bô hiah-n̍i̍h tiōng-iàu.
|
咱感覺錢財真重要，所以咱拚命趁錢，拚kah扑歹身軀，離開上帝遠遠，咱就知，金錢也無hiah-n̍i̍h重要。 |
|
Lán kám-kak miâ-siaⁿ, tē-ūi, koân-le̍k, sêng-kong, ha̍k-būn. . . . chin-chōe mi̍h-kiāⁿ lóng chin tiōng-iàu, tān-sī kàu ū chi̍t-kang, lán khó-lêng iā ē hoat-kak, chin-chōe lán só͘ lia̍h-chòe tiōng-iàu--ê, kî-si̍t sī bô siáⁿ-mi̍h tiōng-iàu.
|
咱感覺名聲、地位、權力、成功、學問……真濟物件攏真重要，但是到有一工，咱可能也會發覺，真濟咱所掠做重要--ê,其實是無啥mi̍h重要。 |
|
Ū-iáⁿ, tû-liáu Siōng-tè ê chí-ì, Siōng-tè ài lán khì tui-kiû ê thiàⁿ, kong-gī, chèng-ti̍t, liông-siān. . . í-ki̍p Siōng-tè só͘ sù ê oa̍h-miā, kî-thaⁿ--ê, si̍t-chāi lóng-sī chhù-iàu--ê.
|
有影，除了上帝ê旨意，上帝ài咱去追求ê疼、公義、正直、良善……以及上帝所賜ê活命，其他--ê,實在攏是次要--ê。 |
|
Kim-chîⁿ, miâ-siaⁿ, tē-ūi, ha̍k-būn...... chún-kóng chiah-ê tùi jîn-seng sī tiōng-iàu, iā kan-ta ē-tàng pâi tī Siōng-tè, thiàⁿ, kong-gī, liông-siān, chhin-chêng, oa̍h-miā ê āu-piah āu-piah nā-tiāⁿ.
|
金錢、名聲、地位、學問……準講 chiah-ê對人生是重要，也kan-ta會當排tī上帝、疼、公義、良善、親情、活命ê後壁後壁nā-tiāⁿ。 |
|
Ū sî-kan ê sî, lán ē-hiáu soán-te̍k khah-chia̍p (khah-ài) kap Siōng-tè kau-pôe, thàm-hóng phòa-pīⁿ ê lâng, chhōe su-iàu an-ùi ê pêng-iú khai-káng, chham-ka ta̍k-chióng ê chō-chiū-hōe......, khah-chió khì khòaⁿ phah-kiû pí-sài, khòaⁿ tiān-iáⁿ tiān-sī, se̍h pah-hòe kong-si, phah tiān-tōng oân-khū. . . án-ni, Siōng-tè ē tùi lán kóng, “Lí ū soán-te̍k tio̍h khah tiōng-iàu--ê.”
|
有時間ê時，咱會曉選擇較捷（較愛）kap上帝交陪、探訪破病ê人；chhōe需要安慰ê朋友開講、參加逐種ê造就會…，較少去看扑球比賽，看電影、電視，se̍h百歲公司，扑電動玩具。Án-ni,上帝會對咱講：「你有選擇著較重要--ê。」 |
|
(Hong-hiòng Tē 5 kî, 1990 nî 7 goe̍h)
|
（風向第5期，1990年7月） |
