Chīn-tiong kàu sí
|
盡忠到死 |
| Phian-chip-sek |
編輯室 |
|
Chiông-chêng tī A-bí-lī-ka hit chiu ê peh-sèⁿ put-chí pháiⁿ hong-sio̍k, chiū-sī in bat bé lâng chò lô͘-châi. Chiah-ê lô͘- châi ū-ê chin kan-khó͘, in-ūi in chú-lâng ok-sim pháiⁿ khoán-thāi in.
|
從前tī 亞美利加hit 州ê百姓不止歹風俗，就是in bat買人做奴才。Chiah ê 奴才有ê 真艱苦，因為in 主人惡心歹款待in。 |
|
Taⁿ tī bó͘-só͘-chāi ū chi̍t-ê cha-po͘ gín- ná hō͘ lâng chò lô͘-châi. Ū chi̍t ji̍t i ū thiaⁿ-kìⁿ chi̍t-ūi Bo̍k-su teh kóng khí Iâ-so͘ ê tō-lí; sim liâm-piⁿ siuⁿ kám-kek, him-soān ì-ài chit-ê Iâ-so͘ chò i-ê Kiù- chú. I bô sím-mi̍h bêng-pe̍k tō-lí ê ì-sù; put-kò ū siū Bo̍k-su ê khó͘-khǹg, chiū- sī kóng tio̍h thiàⁿ Iâ-so͘, ta̍uh-ta̍uh kî- tó Siōng-tè, kiû i pang-chān. Thiaⁿ-liáu hit-ê gín-ná sim-lāi teh siūⁿ beh chiàu án-ni kiâⁿ, sim chiū tit-tio̍h an-ùi, in-ūi chai tī Thiⁿ--n̍i̍h ū chi̍t ūi pêng-iú ē thé- thiap i-ê kan-khó͘
|
今tī 某所在有一個查甫囡仔hō͘ 人做奴才。有一日伊有聽見一位牧師teh 講起耶穌ê 道理；心liâm-piⁿ 受感激，欣羨意愛這個耶穌做伊ê救主。伊無甚mi̍h明白道理ê 意思；不過有受牧師ê 苦勸，就是講著疼耶穌，ta̍uh-ta̍uh 祈禱上帝，求伊幫贊。聽了hit 個囡仔心內teh 想beh照án-ni 行，心就得著安慰，因為知tī 天--裡有一位朋友會體貼伊ê 艱苦。 |
|
Tùi hit-tia̍p í-āu hit-ê gín-ná gâu kî- tó, ná-kú ná thiàⁿ Iâ-so͘, siông-siông siàu-liām i, kap i kau-pôe. Chóng-sī i-ê chú-lâng put-chí m̄ hoaⁿ-hí, m̄-chún i lâi thàn tō-lí, pàng-tiau pàng-tńg kóng, “Lí nā khì kî-tó, góa chiū beh phah lí ”
|
Tùi hit-tia̍p以後hit個囡仔gâu祈禱，那久那疼耶穌，常常數念伊，kap伊交陪。總--是伊ê 主人不止m̄ 歡喜，m̄ 准伊來趁道理，放刁放轉講：「你若去祈禱，我就beh扑--你。」 |
|
Tùi án-ni-siⁿ gín-ná sui-jiân sī lóe-chí, m̄-kú m̄-káⁿ pàng-sak kî-tó; hoán-tńg sī ná jia̍t-sim thiàⁿ Iâ-so͘. Ta̍k ji̍t chia̍h ē-tàu liáu, i chiū khì phian-phiah só͘- chāi àm-chēⁿ khì kî-tó, kiû Siōng-tè pang-chān i.
|
Tùi án-ni-siⁿ 囡仔雖然是餒志，m̄-kú m̄ 敢放sak 祈禱；反轉是那熱心疼耶穌。逐日食下晝了，伊就去偏僻所在暗靜去祈禱，求上帝幫贊伊。 |
|
Ū chi̍t ji̍t teh kî-tó ê tiong-kan i-ê chú-lâng tùi hit tah kòe, ū thiaⁿ-kìⁿ hit- ê gín-ná koh-chài teh kî-tó, chiū chīn siū-khì, kīn-óa lâi hoah i, lâi mē, sòa kóng,” Lí m̄-thang kî-tó, góa kiám bô kìm lí ? Lí nā koh kî-tó , góa beh phah kàu hō͘ lí sí. “
|
有一日teh 祈禱ê 中間伊ê主人對hit-tah過，有聽見hit個囡仔koh再teh 祈禱，就真受氣，近倚來喝--伊，來罵，續講：「你m̄-thang祈禱，我敢無禁--你？你若koh祈禱，我beh扑到hō͘ 你死。」 |
|
Hit-ê gín-ná thiaⁿ-kìⁿ,sim iû-goân sī chip-koat,tek-khak beh thiàⁿ Iâ-so͘, beh chò i ê ha̍k-seng, ka-tī siūⁿ nā phoe sèⁿ- miā ia̍h káⁿ, chóng-sī bô beh pàng-sak Iâ-so͘.
|
Hit 個囡仔聽--見，心猶原是執訣，的確beh疼耶穌，beh做伊ê學生，家己想若phoe生命亦敢，總--是無beh 放sak 耶穌。 |
|
Só͘-í ta̍k ji̍t chiàu kū ê khoán-sit khì hit só͘-chāi kî-tó; iū-koh hō͘ chú-lâng thiaⁿ-kìⁿ, hō͘ i phah kàu put-chí siong- tiōng. Hit-ê lâng sòa ki-chhì i kóng, “ Iâ-so͘ thài-ē bô lâi pang-chān lí, m̄- thang hō͘ góa phah? Che sī àn-cháiⁿ-iūⁿ leh? ”
|
所以逐日照舊ê 款式去hit 所在祈禱；又koh hō͘ 主人聽--見，hō͘ 伊扑到不止傷重。Hit個人續譏刺伊講：「耶穌thái 會無來幫贊你，m̄-thang hō͘ 我扑？Che是àn-cháiⁿ-iūⁿ--leh ?」 |
|
Gín-ná ìn kóng, “ Thâu-ke ah ! góa thang chhut-chāi lí phah. Góa chiū hō͘ lí phah kàu sí; kah góa m̄-thang tòe Iâ-so͘, góa ia̍h sī bē-chò-tit; góa si̍t-chāi beh thiàⁿ Iâ-so͘, si̍t-chāi beh thiàⁿ Iâ-so͘. Hit kù liân-liân kóng nn̄g kòe.
|
囡仔應講：「頭家--ah ! 我thang出在 你扑。我就hō͘你扑到死，教我 m̄-thang tòe耶穌，我亦是bē做--tit；我實在beh 疼耶穌，實在beh疼耶穌。」Hit句連連講兩過 。 |
|
Chú-lâng thiaⁿ-kìⁿ che ōe koh khah tōa siū-khì, phah khah siong-tiōng; koh lâu-hoeh, gín-ná poa̍h-tó tī thô͘-kha chhin-chhiūⁿ teh-beh sí ê khoán-sit. Chú-lâng koh ki-chhì kóng, “ Iâ-so͘ thài ē bô lâi pang-chān lí, m̄-thang hō͘ góa phah, che sī àn-cháiⁿ-iūⁿah? ”
|
主人聽見che話koh較大受氣，扑較傷重；koh流血，囡仔跋倒tī 塗腳，親像teh beh死ê款式。主人koh譏刺：「耶穌thài會無來幫贊你，m̄-thang hō͘ 我扑，che是àn-cháiⁿ-iūⁿ-- ah ?」 |
|
Hit-tia̍p gín-ná hūn--khì, liân-chún bē kóng-ōe, kan-ta ēng sè-á-siaⁿ ìn kóng, “ Thâu-ke ah ! góa iáu-kú beh thiàⁿ Iâ- so͘, iáu-kú beh thiàⁿ Iâ-so͘. ” Kóng-liáu, tùi hit-tia̍p chiū sí--khì.
|
Hit-tia̍p 囡仔暈--去，liân-chún bē講話，kan-ta用細仔聲應講：「頭家--ah ! 我iáu-kú beh 疼耶穌，iáu-kú beh疼耶穌。」講了，對hit-tia̍p 就死--去。 |
|
Taⁿ mn̄g-khòaⁿ tī kàu-hōe-lāi ū sím- mi̍h gín-ná, á-sī tōa-lâng thiàⁿ Iâ-so͘ kàu án-ni mah ?
|
今問看tī 教會內有甚mi̍h囡仔，抑是大人疼耶穌到án-ni--mah ?」 |
|
Lán ê Chú Iâ-so͘ ū bat kóng, “ Hoān- nā ài kiù sèⁿ-miā--ê, chiū tek-khak ē sit-lo̍h; in-ūi góa, lâi sit-lo̍h sèⁿ-miā--ê, tek-khah ē kiù i. ” Lō͘-ka 9:24. Iū-koh kóng, “Nā-sī lín sui-bóng siū kan-khó͘, bo̍h-tit kiaⁿ-hiâⁿ, tio̍h chīn-tiong phoe- sí; góa tek-khah beh hō͘ lí éng-oa̍h ê pò-siúⁿ, chhin-chhiūⁿ tì bián-liû. ” Be̍k- sī-lio̍k 2:10
|
咱ê主耶穌有bat講：「凡若ài 救生命--ê,就的確會失落；因為我，來失落生命--ê,的確會救--伊。」路加 9: 24 又koh講:「若是lín雖罔受艱苦，莫tit驚惶，著盡忠批死；我的確beh hō͘ 你永活ê報賞，親像戴冕旒。」默示錄2: 10。 |
|
Chiàu án-ni khòaⁿ chit-ê chò lô͘-châi ê gín-ná, i ūi-tio̍h Iâ-so͘ sit-lo̍h i-ê sèⁿ- miā, só͘-í ún-tàng tit-tio̍h pò-siúⁿ, chhin- chhiūⁿ tì bián-liû ê khoán-sit. Bāng Siōng-tè pang-chān lán tāi-ke chò chīn- tiong chhin-chhiūⁿ án-ni-siⁿ.
|
照án-ni 看，這個做奴才ê囡仔，伊為著失落伊ê生命，所以穩當得著報賞，親像戴冕旒之ê款式。望上帝幫贊咱逐家做盡忠親像án-ni-siⁿ。 |
|
(Tâi-lâm-hú Kàu-hōe-pò, tē 66 koàn, 1890 nî 10 ge̍h)
|
(台灣府城教會報第66號，1890年10月) |
