Siū niú-khiok ê Tâi-oân bîn-cho̍k-sèng
|
受扭曲ê台灣民族性 |
| Tân Gī-jîn |
陳義仁 |
|
e̍k
|
譯 |
|
Niú-khiok ê ì-sù sī: “Choān kah oai-ko chhī-chhoa̍h.”
|
扭曲ê意思是：「Choān kah歪膏chhī-chhoa̍h。」 |
|
Tāi-thé-siōng lâi kóng, Tâi-oân-lâng sī î-bîn, só͘-í, Tâi-oân-lâng ê bîn-cho̍k-sèng ū chi̍t-kóa kap goân-lâi ê Hàn-jîn bô-kāng-khoán ê só͘-chāi.
|
大體上來講，台灣人是移民。所以，台灣人ê民族性有一寡kap原來ê漢人無共款ê所在。 |
|
Î-bîn cheng-sîn ê te̍k-tiám sī---lú-ài, hō͘-siong pang-chō͘, jia̍t-chêng, lōng-bān, mō͘-hiám, ióng-kám, í-ki̍p siōng kài lân-tit--ê chiū-sī, lí-sióng-chú-gī ê kheng-hiòng téng.
|
移民精神ê特點是：友愛，互相幫助、熱情、浪漫、冒險、勇敢，以及上kài難得--ê就是，理想主義ê傾向等。 |
|
Lēng-gōa chi̍t hong-bīn, Ji̍t-pún-lâng thóng-tī Tâi-oân 50 nî, tû liáu ū lâu lo̍h keng-chè kiàn-siat ê kui-bô͘ í-gōa, iā ūi Tâi-oân-lâng phah hó hoat-tī ê ki-chhó͘.
|
另外一方面，日本人統治台灣50年，除了有留落經濟建設ê規模以外，也為台灣人扑好法治ê基礎。 |
|
Āu-lâi 228 sū-kiāⁿ, í-ki̍p kok-bîn chèng-hú chhú-lí chit-ê sū-kiāⁿ ê hong-sek---iû-kî sī chân-sat, sit-chong, sió-khóa ū khan-liân á-sī bû-ko͘ ê lâng iā chóng thâi, téng téng, tì-sú-kàu Tâi-oân-lâng piàn-sêng:
|
後來228事件，以及國民政府處理這個事件ê方式——尤其是殘殺、失蹤，小可有牽連抑是無辜ê人也總thâi,等等，致使到台灣人變成： |
|
(1) Put-kek-put ēng chhai-gî ê thāi-tō͘ tùi-thāi gōa-séng-lâng, sīm-chì Tâi-oân-lâng pún-sin iā m̄-káⁿ hō͘-siong sìn-jīm.
|
（1）不得不用猜疑ê態度對待外省人，甚至台灣人本身也m̄敢互相信任。 |
|
(2) “Bô chò pháiⁿ, chiū m̄-kiaⁿ koaⁿ-hú.” ê koan-liām pìⁿ-chò sī bô-iáⁿ bô-chiah pe̍h-chha̍t pe̍h-koat, hoat-tī ê koan-liām chiū lóng pàng--khì.
|
（2）「無做歹，就m̄驚官府」ê觀念變做是無影無跡白賊白koat，法治ê觀念就攏放--去。 |
|
(3) Sí-thé thia̍p kah ná soan, hoeh lâu kah ná khe-chúi, si̍t-chāi chin khióng-pò͘, chū-pó chi tō chiū-sī léng-tām, bô koan-sim, chū-su chū-lī, bô-ài chhap chèng-tī, bô kong-tek-sim. Tùi án-ni, kò-sèng loán-jio̍k bô-táⁿ chiū chiâⁿ-chò sī chi̍t-khoán bí-tek: “Bô hoán khòng.” Chò sūn-bîn chiah ē hù-kùi tn̂g hòe-siū.
|
（3）屍體疊kah若山，血流kah若溪水，實在真恐怖。自保之道就是冷淡，無關心，自私自利，無愛chhap政治，無公德心。Tùi án-ni，個性軟弱無膽就成做是一款美德。「無反抗」，做順民才會富貴、長歲壽。 |
|
Koh án-ni lo̍h-khì, Tâi-oân-lâng chiū pìⁿ-sêng bâ-pì, bô chū-kak, bô chū-chun ê cho̍k-lūi, kûn-cho̍k ê kiōng-tông lí-sióng, kap lí-sióng ê tì-ì tui-kiû, tong-jiân sī koh khah bián kóng ah!
|
Koh án-ni落去，台灣人就變成痲痺，無自覺、無自尊ê族類。群族ê共同理想，kap理想ê致意追求，當然是koh khah免講--ah！ |
|
“228” ê to̍k-bū àm-iáⁿ it-ti̍t lóng tà tī Tâi-oân-lâng ê sim-lêng-siōng, chó͘-tòng tio̍h khah ko-chân-chhù ê sim-lêng oa̍h-tāng, só͘ teh kóng ê sèⁿ-miā chêng-tiāu ê thê-seng, sim-lêng sè-kài ê chhòng-chō, chiū pìⁿ-chòe chin khùn-lân.
|
「228」ê毒霧暗影一直攏罩 tī台灣人ê心靈上，阻擋著較高層次ê心靈活動。所teh講ê生命徵兆 ê提昇，心靈世界ê創造，就變做真困難。 |
|
Só͘-í lán su-iàu sàu-tû chiah-ê sim-lêng-siōng ê àm-iáⁿ, chū-chú lâi chhòng-chō bí-hó ê chiong-lâi.
|
所以咱需要掃除chiah-ê心靈上ê暗影，自主來創造美好ê將來。 |
|
(Hong-hiòng Tē 7 kî, 1990 nî 11 goe̍h)
|
（風向第7期，1990年11月） |
