Sat-thâng-che sī phang-chúi pau-chong ê lông-io̍h
|
殺虫劑是芳水包裝ê農藥 |
| Tân Gī-jîn |
陳義仁 |
|
e̍k
|
譯 |
|
Kóng tio̍h lông-io̍h, lán lóng chin kiaⁿ, tān-sī, chin chió lâng chai-iáⁿ, sat-thâng-che put-kò sī ū kòa phang-chúi pau-chong ê lông-io̍h, kèng-jiân ta̍k-ê ka-têng lóng tāi-liōng teh sú-iōng.
|
講著農藥，咱攏真驚。但是，真少人知影，殺蟲劑不過是有掛芳水包裝ê農藥，竟然逐個家庭攏大量teh使用。 |
|
Nā-sī chhù-lāi-bīn kap hù-kīn ê khoân-kéng chin chheng-khì, iā bô khǹg chin-kú ê lò-sò-tui (Múi chi̍t ê ka-têng lóng ài chin ha̍p-chok, tī chí-tēng ê sî-kan chiah the̍h pau chin-ân ê lò-sò chhut--lâi). Chiū ē kiám-chió báng-á hô͘-sîn ka-choa̍h kap niáu-chhí.
|
若是厝內面kap附近ê環境真清氣，也無囥真久ê【lò-sò】 堆（每一個家庭攏ài真合作，tī指定ê時間才提包真ân ê【lò-sò】出--來）。就會減少蚊仔、胡蠅、ka-choa̍h kap老鼠。 |
|
Chhù-lāi keng-siông pó-chhî chheng-khì, bô sí-chúi bi̍h báng-á hô͘-sîn, bô sí-kak bi̍h niáu-chhí, bô kū-pò-chóa kū-ê mi̍h-kiāⁿ tún kui-tui bi̍h ka-choa̍h, chiū ē kiám-chió chiah-ê thâng-hāi.
|
厝內經常保持清氣，無死水bi̍h蚊仔、胡蠅；無死角bi̍h老鼠；無舊報紙、舊ê物件tún 歸堆bi̍h ka-choa̍h,就會減少chiah-ê蟲害。 |
|
Ka-tī ê chhù-lāi chheng-khì, chhù-piⁿ ê khoân-kéng nā bô chheng-khì, in ê hāi-thâng iā ē cháu-kòe--lâi, lán ē-sái ēng ē-bīn chit kúi-chióng pí-kàu khah an-choân koh chū-jiân ê hong-hoat lâi èng-hù:
|
家己ê厝內清氣，厝邊ê環境若無清氣，in ê害蟲也會走--過-來。咱會使用下面這幾種比較khah安全koh自然ê方法來應付： |
|
1.Sat-bûn-chúi ē-tàng thâi-sí ka-choa̍h. Chiong chi̍t poe ê sat-bûn-si phàu 4 kong-seng ê sio-chúi, hē tòa chúi-kau-á, piah-kak, chin ū-hāu.
|
1. Sat-bûn 水會當thâi死 ka-choa̍h。將一杯ê Sat-bûn絲泡4公升ê燒水，下tòa水溝仔、壁角、真有效。 |
|
2.Tùi-hù káu-hiā, ē-sái tī chhù-lāi ê chi̍t-kóa kak-lo̍h, iā chi̍t-kóa hô͘-chio-hún, á-sī chèng kú-phûn po̍h-hô-hio̍h lâi kóaⁿ-tio̍k.
|
2. 對付káu蟻，會使tī厝內ê一寡角落，iā一寡胡椒粉，抑是種幾盆薄荷葉來趕逐。 |
|
3. Hông-chí bí-tháng, mī-hún-koàn kap piáⁿ-koàn seⁿ-thâng, ē-sái khǹg chi̍t-kóa ta ê jio̍k-kùi-hio̍h tòa lāi-bīn.
|
3. 防止米桶、麵粉罐kap餅罐生蟲，會使囥一寡礁ê肉桂葉tòa內面。 |
|
4.Hông-chí hô͘-sîn, ē-sái ēng bāng-á-mn̂g bāng-á-thang, pùn-sò-tháng ài khàm-kòa, lēng-gōa ē-sái ka-tī ēng thn̂g-chiuⁿ kap chúi hūn-ha̍p chò hô͘-sîn-liâm. Kāng-khoán, niáu-chhí-tauh iā pí niáu-chhí-io̍h koh khah an-choân ū-hāu.
|
4. 防止胡蠅，會使用網仔門、網仔窗。糞埽桶ài khàm蓋。另外會使家己用糖漿kap水份混合做胡蠅黏（捕蠅紙）。共款，老鼠tauh 也比老鼠藥koh 較安全有效。 |
|
5.Tû-pâng pó-chhî chheng-khì, iû-kî sī tû-pâng thô͘-kha pó-chhî chheng-khì, sī koh khah tiōng-iàu. Chiong pêng-sng-hún iā tòa tû-pâng ê phāng--ni̍h kap chhù-kak, ē-tàng chiong ka-choa̍h kap chi̍t-kóa thâng kóaⁿ-cháu.
|
廚房保持清氣，尤其是廚房塗腳保持清氣，是koh較重要。將硼酸粉（硼酸）iā tòa廚房ê縫--ni̍h kap厝角，會當將ka-choa̍h kap一寡蟲趕走。 |
|
Jû-kó lí sat-thâng-che ēng liáu koàn-sì, iā bô-ài thiaⁿ góa ê kiàn-gī, iā m̄-kiaⁿ sat-thâng-che ín-khí koaⁿ-chōng, phôe-hu kap ho͘-khip hē-thóng ê pīⁿ-chèng, chì-chió chhiáⁿ lí, phùn sat-thâng-che í-āu, lâng kap cheng-seⁿ lóng èng-kai lī-khui chi̍t-tōaⁿ sî-kan. Sat ka-choa̍h ê io̍h-á kan-na ē-sái phùn thô͘-kha, choa̍t-tùi bē-sái chhin-chhiūⁿ phang-chúi án-ni loān-phùn, put-tān bô-hāu, koh giâm-tiōng gûi-hāi kiān-khong.
|
如果你殺蟲劑用了慣勢，也無愛聽我ê建議，也m̄驚殺蟲劑引起肝臟，皮膚kap呼吸系統ê病症，至少請你噴殺蟲劑以後，人kap精牲攏應該離開一段時間。殺ka-choa̍h ê藥仔kan-na會使噴塗腳，絕對bē使親像芳水án-ni亂噴，不但無效，koh嚴重危險健康。 |
|
(Hong-hiòng Tē 2 kî, 1990 nî 1 goe̍h)
|
（風向第2期，1990年1月） |
