In-ūi lán bô hó ê kiàn-chèng
|
因為咱無好ê見證 |
| Chiu Kim-choân |
周金全 |
|
Ū chi̍t pái, chi̍t ê Ki-tok-tô͘ kiat-hun chhiáⁿ-kheh, kap chin-chōe Tâi-oân ê kiat-hun chhiáⁿ-kheh kāng-khoán, chú-lâng iā chhiàⁿ khong-lo̍k-tūi lâi chhiùⁿ-koa, thiàu-bú, nāu-jia̍t kún-kún. Khong-lo̍k-tūi ê sió-chiá khí-thâu chhēng chin-chōe saⁿ, āu-lâi, sòa jú-chhēng jú-chió, chhun saⁿ-tiám-sek ê iû-éng-saⁿ. Ū 3 ê bo̍k-su chē kāng chi̍t tè toh, it-ti̍t hàiⁿ-thâu, m̄-káⁿ kóng sím-mi̍h, āu-lâi chi̍t ūi kàu-hōe ê lú chheng-liân khòaⁿ kah bōe-chò--tit chiah kā chú-ka kóng. Chú-ka chiah kiò khong-lo̍k-tūi ê sió-chiá, saⁿ tha̍h--leh. Kong-lo̍k-tūi ê sió-chiá thiaⁿ-tio̍h chú-lâng kiò i chhēng saⁿ chiū kî-koài kóng, “Háⁿ? m̄-bián thǹg o͘h? bô khah-chá kóng leh!....” Khó-kiàn chit-ê sió-chiá bô kám-kak Ki-tok-tô͘ ū sím-mi̍h bô kāng-khoán.
|
有一擺，一個基督徒結婚請，kap真濟台灣ê結婚請客仝款，主人也倩康樂隊來唱歌，跳舞，鬧熱滾滾。康樂隊ê小姐起頭穿真濟衫，後來，續愈穿愈少，chhun三點式ê游泳衫。有3個牧師坐仝一塊桌，一直hàiⁿ頭，m̄敢講甚mi̍h，後--來一位教會ê女青年看kah bōe做--tit才kā主家講。主家才叫康樂隊ê小姐，衫tha̍h--leh。康樂隊ê小姐聽著主人叫伊穿衫就奇怪講：「Háⁿ？m̄免褪--o͘h？無較早講--leh！...。」可見這個小姐無感覺基督徒有甚mi̍h無共款。 |
|
Téng nî 2 goe̍h, góa lâi kàu tiong-pō͘ chi̍t keng kàu-hōe bo̍k-hōe. Tē-it pái khì sûn chi̍t ê lú hōe-iú, i chin chū-jiân bô kám-kak pháiⁿ-sè kā góa kóng, i teh chò ”Tá. chia. ló.” ê “thiāu-á-kha”. Kóng tio̍h chiah-n̍i̍h chū-jiân, khó-kiàn, i bô kám-kak chò chit-khoán ê kang-chok ū siáⁿ-mi̍h m̄-tio̍h.
|
頂年2月，我來到中部一間教會牧會。第一擺去巡一個女會友，伊真自然無感覺歹勢kā我講：「伊teh做『Tá. Chia. Ló』 ê 柱仔腳」。講著chiah-n̍i̍h自然，可見，伊無感覺做這款ê工作有啥mi̍h m̄著。 |
|
Koh thiaⁿ-kóng, ū chin-chōe Ki-tok-tô͘ iā chin-ài chhiam “Tá. chia. ló.”, koh tò-chhù kiû bêng-pâi. iā ū kàu-hōe tióng-chip teh chhiam, sīm-chì tiúⁿ-ló chò cho͘-thâu. Iā ū Ki-tok-tô͘ chhù-lāi tiàu kui-chhù-keng ê âng-chóa, teh bē Bêng-pâi. Khó-lêng, in iā bô kám-kak ū siáⁿ-mi̍h m̄-tio̍h.
|
Koh聽講，有真濟基督徒也真愛簽「Tá. Chia. Ló」，koh到處求明牌。也有教會長執teh簽，甚至長老做組頭。也有基督徒厝內吊歸厝間 ê紅紙，teh賣明牌。可能，in也無感覺有啥mi̍h m̄著。 |
|
Soán-kí ê sî, chin-chōe Ki-tok-tô͘ iā bé-phiò bē-phiò, thè lâng bé-phiò. In tāi-khài iā bô kám-kak ū chōe.
|
選舉ê時，真濟基督徒也買票賣票，替人買票。In大概也無感覺有罪。 |
|
Chi̍t ê siā-hōe, tāi-pō͘-hūn lâng lóng teh chò ê phàiⁿ-tāi, hit-ê siā-hōe ê lâng chiū chha-put-to bōe kám-kak tio̍h án-ni chò ū siáⁿ-mi̍h bô thò-tòng, in-ūi “ta̍k-ê lâng lóng án-ni mah! “ Só͘-í, bé-phiò bē-phiò, chhiam “Tá. chia. ló.”, chē-chhia bián pâi-tūi, pùn-sò chhìn-chhái tò, khí-chhù thau-kang kiám-liāu, chò tāi-chì ài sàng âng-pau ……téng- téng, lóng bô siáⁿ-mi̍h chōe-ok-kám. Ki-tok-tô͘ tī chit-chióng siā-hōe hong-khì ē-bīn, nā tō-lí thiaⁿ bô ji̍p-ní, chin-lí sìn bô ji̍p-sim, chiū ē kap siā-hōe-chiūⁿ tāi-pō͘-hūn ê lâng kāng-khoán tùi chiah-ê pháiⁿ bô chōe-ok-kám, kāng-khoán chū-jiân teh chò chiah-ê tāi-chì.
|
一個社會，大部份人攏teh做ê歹代，hit個社會ê人就差不多 bōe感覺著án-ni做有啥mi̍h無妥當，因為「逐個人攏án-ni --mah！」所以，買票賣票，簽「Tá. chia. Ló」坐車免排隊，糞圾chhìn-chhái倒，起厝偷工減料，做代誌ài送紅包…等等，攏無啥mi̍h罪惡感。基督徒tī這種社會風氣下面，若道理聽無入耳，真理信無入心，就會kap社會上大部份ê人共款對 chiah-ê歹無罪惡感，共款自然teh做chiah-ê代誌。 |
|
Bo̍k-koài hit-ê saⁿ jú-chhēng jú-chió ê sió-chiá ē ēng kî-koài ê sim mn̄g kóng, “ Háⁿ? m̄-bián thǹg o͘h? ” bo̍k-koài lâng ē mn̄g lán, “Lín Ki-tok-kàu kám ū teh chhut Bêng-pâi? ” Bo̍k-koài ē lâi kā lán bé-phiò... in-ūi lán ū hiah-n̍i̍h chōe ê Ki-tok-tô͘ bô hó--ê kiàn-chèng, bô piáu-hiān chhut lán khì-sak pháiⁿ--ê hong-khì.
|
莫怪hit-ê衫愈穿愈少ê小姐會用奇怪ê心問講：「Háⁿ？m̄免褪--o͘h？」莫怪人會問咱：「Lín基督教kám有teh出明牌？」莫怪會來kā咱買票…因為咱有hiah-n̍i̍h濟ê基督徒無好--ê見證，無表現出咱棄sak歹--ê風氣。 |
|
Sin ūi bo̍k-su, góa mā kám-kak chin pháiⁿ-sè, chin khui-khiàm Siōng-tè. Ū hiah-n̍i̍h chōe ê pháiⁿ, hōe-iú bô kám-kak he sī chōe-ok, khó-kiàn goán chòe bo̍k-su ê lâng bô chīn-chit hō͘ hōe-iú chai hó, pháiⁿ.
|
身為牧師，我mā感覺真歹勢，真虧欠上帝。有hiah-n̍i̍h濟ê歹，會友無感覺he是罪惡，可見阮做牧師ê人無盡職hō͘會友知好、歹。 |
|
(Hong-hiòng siang-ge̍h-khan tē 3 kî, 1990 nî 3 ge̍h)
|
(風向雙月刊第3期，1990年3月) |
