Góa soán-ēng pe̍h-se̍k ê ōe-seng-chóa
|
我選用白色ê衛生紙 |
| Tân Gī-jîn |
陳義仁 |
|
e̍k
|
譯 |
|
Ha̍h tī seng-thài goân-chek ê seng-oa̍h, Pēng m̄-sī ài lí tio̍h hòng-khì só͘-ū bí-lē ê mi̍h-kiāⁿ, sī kóng, tio̍h ài ū soán-te̍k-sèng. Tī bóe saⁿ-á-khò͘, bóe bí-su̍t-teng á-sī lim-chia̍h ê hûi-khì, poe-á, téng chiah ê ōe-tàng sú-iōng khah kú, koh ōe-tàng ēng liáu koh chài ēng ê mi̍h-kiāⁿ, bû-hông khó-í khah káng-kiù chi̍t-tiám-á, chù-tiōng in ê sek-chhái khoán-sit téng téng.
|
合tī生態原則ê生活，並m̄是ài你著放棄所有美麗ê物件。是講：著ài有選擇性。Tī買衫仔褲，買美術燈抑是lim食ê瓷器、杯仔等chiah-ê會當使用較久，koh 會當用了koh再用ê物件，無妨可以較講究一點仔，注重in ê色彩款式等等。 |
|
Ōe-seng-chóa oân-choân sī chi̍t chióng bîn-seng pit-su-phín, jî-chhiáⁿ ēng chi̍t pái chiū tàn tiāu, nā soán-ēng ū sek-chhái ū hoe-iūⁿ--ê, oân-choân sī chū-ngó͘ hi-êng-sim ê koan-hē, bô jīm-hô si̍t-chit ê ì-gī, sīm-chì tùi khoân-kéng iú hāi.
|
衛生紙完全是一種民生必需品，而且用一擺就tàn掉。若選用有色彩有花樣--ê,完全是自我虛榮心ê關係，無任何實質ê意義，甚至tùi環境有害。 |
|
Pe̍h-sek í-gōa ê ōe-seng-chóa, bô-lūn ap-hoe ìn-hoe á-sī ní-sek, lóng su-iàu ke chi̍t ê chhiú-sio̍k, it-tēng ài ēng chi̍t-kóa lêng-goân lâi oân-sêng chit ê chhiú-sio̍k, koh ēng tiāu ní-liāu, phang-cheng, put lūn in sī jîn-kang ha̍p-sêng á-sī thian-jiân--ê, lóng sī bô ì-gī ê chu-goân lōng-hùi.
|
白色以外ê衛生紙，無論壓花印花抑是染色，攏需要加一個手續，一定ài用一寡能源來完成這個手續。Koh用掉染料、芳精，不論in是人工合成抑是天然--ê,攏是無意義ê資源浪費。 |
|
Pe̍h-sek ê ōe-seng-chóa chún-kóng piàn sêng lò-sò liáu āu, in sī ē-thang chū-jiân hun-kái kap hiú-nōa ê lò-sò, jû-kó in ê téng-bīn ū ní-liāu á-sī phang-cheng, chiah-ê hòa-ha̍k bu̍t-phín chiū ē ù-jiám thô͘-jióng á-sī chúi-goân.
|
白色ê衛生紙準講變成糞圾了後，in是會thang自然分解kap朽爛ê糞圾。如果in ê頂面有染料抑是芳精，chiah-ê化學物品就會污染塗壤抑是水源。 |
|
Hô-hóng, ū sek ê ōe-seng-chóa khah kùi, tān-sī, in-ūi ōe-seng-chóa ê kè-siàu bōe-tàng bē kah chin koân. Só͘-í chiū bô khó-lêng ēng ko-kip ê thian-jiân ní-liāu á-sī phang-cheng, mài kóng chiah-ê hòa-ha̍k bu̍t-phín tùi jîn-thé sī m̄-sī iú hāi, chì-chió in ê sek-chhái kap phang-bī lóng sī hui-siông chho͘-sio̍k, put-jû soán ēng pe̍h-sek ê ōe-seng-chóa, keng-chè, koh an-choân, koh tùi khoân-kéng iú ek.
|
何況，有色ê衛生紙較貴。但是，因為衛生紙ê價數bōe當賣kah真懸。所以就無可能用高級ê天然染料抑是芳精。Mài講chiah-ê化學物品對人體是m̄是有害；至少in ê色彩kap芳味攏是非常粗俗，不如選用白色ê衛生紙，經濟，koh安全，koh tùi環境有益。 |
|
(Hong-hiòng Tē 1 kî, 1989 nî 11 goe̍h)
|
（風向第1期，1989年11月） |
