Góa m̄-ēng sok-ka-tē-á
|
我m̄用塑膠袋仔 |
| Tân Gī-jîn |
陳義仁 |
|
e̍k
|
譯 |
|
Ì-tāi-lī tēng chi̍t ê bo̍k-phiau, kàu 1990 nî ê sî, chiū choân-kok m̄ seng-sán iā m̄ sú-iōng sok-ka-tē-á, sī sè-kài siōng tē-it-ê kong-khai piáu-sī kū-choa̍t sok-ka-tē-á ê kok-ka.
|
意大利定一個目標，到1990年ê時，就全國m̄生產也 m̄使用塑膠袋仔，是世界上第一個公開表示拒絕塑膠袋仔ê國家。 |
|
Sok-ka-tē-á ū sok-ka só͘-ū ê būn-tê, chè-chō ê kòe-thêng giâm-tiōng ù-jiám, sú-iōng āu, chiâⁿ-chò siōng giâm-tiōng ê lò-sò.
|
塑膠袋仔有塑膠所有ê問題，製造ê過程嚴重污染，使用後，成做上嚴重ê糞圾。 |
|
Kiám-chió sú-iōng sok-ka-tē-á, ū chi̍t-kóa hong-hoat:
|
減少使用塑膠袋仔，有一寡方法： |
|
1.Bé mi̍h-kiāⁿ, ka-kī chah ē-té--tit ê mi̍h-kiāⁿ, sīm-chì chhài-nâ-á. Chīn-liōng kiám-chió bô-pit-iàu ê sok-ka-tē-á, iā khó͘-khǹg tiàm-thâu-ke khah-chió hō͘ kò͘-kheh sok-ka-tē-á.
|
1、買物件，家己chah會té--tit ê物件，甚至菜籃仔。盡量減少無必要ê塑膠袋仔，也苦勸店頭家較少hō͘顧客塑膠袋仔。 |
|
2.Soán-te̍k sú-iōng-chóa-tē ê siong-tiàm, kiàn-gī sú-iōng-sok-ka-tē-á ê siong-tiàm kái-ēng chóa-tē-á.
|
2、選擇使用紙袋ê商店，建議使用紙袋仔ê 商店改用紙袋仔。 |
|
3. M̄-thang ēng sok-ka-tē-á té chia̍h-mi̍h, iû-kî sī té sio-thǹg-thǹg--ê, ē cháu to̍k chhut--lâi.
|
3、M̄-thang用塑膠袋仔té食物，尤其是té燒燙燙--ê,會走毒出--來。 |
|
4.Chi̍t ê sok-ka-tē-á, èng-kai ke ēng kúi-pái.
|
4、一個塑膠袋仔，應該加用幾擺。 |
|
5. Chheng-khì ê sok-ka-tē-á siu khí--lâi, ē-tàng sàng hō͘ bē bó͘ chi̍t-kóa mi̍h-kiāⁿ ê seng-lí-lâng, chhin-chhiūⁿ té ē-tàng pak phôe ê chúi-kó, á-sī the̍h tńg--lâi ài koh sé ê chhài-se, iā m̄-thang kū-choa̍t seng-lí-lâng hō͘ lí m̄-sī choân sin, tān-sī chheng-khì ê sok-ka-tē-á.
|
5、清氣ê塑膠袋仔收起--來，會當送hō͘賣某一寡物件ê生理人。親像té會當剝皮ê水果，抑是提轉--來ài koh洗ê菜蔬，也m̄-thang拒絕生理人hō͘你m̄是全新，但是清氣ê塑膠袋仔。 |
|
6. Pó-sián-mo̍͘h iā sǹg sī sok-ka-tē-á, Beh lok tòa peng-siuⁿ ê chia̍h-mi̍h, chīn-liōng ēng ū a̍p-á-kòa ê mi̍h-kiāⁿ té--lè.
|
6、保鮮膜也算是塑膠袋仔。Beh lok tòa冰箱ê食物，盡量用有盒仔蓋ê物件té--lè。 |
|
7. Pó-sián-mo̍͘h iā chīn-liōng m̄-thang khàm sio, ū-to̍k.
|
7、保鮮膜也盡量m̄-thang khàm燒，有毒。 |
|
8. Bē-tàng koh ēng ê sok-ka-tē-á, chún-kóng beh hiat-ka̍k, iā ka lok chò kui tē, hō͘ siu hôe chài-chè ê lâng ē-tàng kui-ê the̍h--khì.
|
8、Bē當koh用ê塑膠袋仔，準講beh hiat-ka̍k,也kā lok做歸袋，hō͘收回再製ê人會當歸ê提--去。 |
|
Chit-chūn kiò lán kiám-chió sú-iōng sok-ka-tē-á chū-jiân sī chin thòng-khó͘ ê tāi-chì, tān-sī, lán khòaⁿ-kìⁿ sok-ka-tē-á lò-sò hiah-nī chōe, that tòa pâi-chúi kháu, chō-sêng chúi-chai, kap kî-thaⁿ ta̍k-chióng ê chai-hāi, bōe-sái-tit bô koan-sim.
|
這陣叫咱減少使用塑膠袋仔自然是真痛苦ê 代誌。但是，咱看見塑膠袋仔糞圾hiah-nī濟，塞tòa排水口，造成水災，kap其他逐種ê災害，bōe使tit無關心。 |
|
Tong-jiân, siōng thiat-té ê hong-hoat, iû-goân sī chèng-hú èng-kai li̍p-hoat, tēng kî-hān, kìm-chí seng-sán kap hoàn-bē sok-ka-tē-á, chīn-liōng ēng kî-thaⁿ ê mi̍h-kiāⁿ tāi-thè, iā kiám-chió bô-pit-iàu ê pau-chong.
|
當然，上徹底ê方法，猶原是政府應該立法，定期限，禁止生產kap販賣塑膠袋仔，盡量用其他ê 物件代替，也減少無必要ê包裝。 |
|
(Hong-hiòng Tē 1 kî, 1989 nî 11 goe̍h)
|
（風向第1期，1989年11月） |
