Góa m̄ bé put-hôe-siu iông-khì ê ím-liāu
|
我m̄買不回收容器ê飲料 |
| Tân Gī-jîn |
陳義仁 |
|
e̍k
|
譯 |
|
Bí-kok bat chò kòe iú-koan lò-sò būn-tê ê tiau-cha, hoat-hiān lò-sò chiàm siōng chōe ê, kèng-jiân sī bōe-tàng siu-hôe chài-sú-iōng ê ím-liāu iông-khì (Té ím-liāu ê mi̍h-kiāⁿ), chiū chè-tēng hoat-lu̍t kui-tēng só͘-ū ê ím-liāu iông-khì lóng ài siu hôe, á-sī kui-tēng ài sú-iōng ē-tàng ēng liáu koh ēng ê po-lê-koàn.
|
美國bat做過有關糞圾問題ê調查，發現糞圾佔上濟--ê,竟然是bōe當收回再使用ê飲料容器（té飲料ê物件）。就制定法律規定所有ê飲料容器攏ài收回，抑是規定ài使用會當用了koh用ê 玻璃罐。 |
|
Kok lāi chū chiông gōa-kok ê lū-po̍h-pau (Gōa-bīn sī chóa-pau, lāi-bīn sī chi̍t-têng ê lū-po̍h) kap Pó-te̍k-koàn (Chi̍t-chióng sok-ka-koàn-á, phó͘-thong té khì-chúi) chiūⁿ-chhī liáu āu, in-ūi chin lī-piān, chiū chin chōe lâng ài ēng. Bó͘ chi̍t keng si̍t-phín kong-si kong-khai kóng, in í-keng bē-chhut 10 ek ê lī-po̍h-pau, koh kun-kù thong-kè, kok-lāi múi nî ēng tiāu chi̍t-ek nn̄g-chheng-bān ki Pó-te̍k-koàn. M̄-nā chin lōng-hùi, koh, hiah-nī chōe bē-nōa ê pùn-sò, beh án-chóaⁿ?
|
國內自從外國ê鋁箔包（外面是紙包，內面是一層ê鋁箔）kap保特罐（寶特瓶，一種塑膠仔，普通té汽水）上市了後，因為真利便，就真濟人ài用。某一間食品公司公開講：in已經賣出10億個鋁箔包，koh根據統計，國內每年用掉一億兩千萬支保特罐。M̄若真浪費，koh，hiah-nī濟bē爛ê糞圾，beh án-chóaⁿ？ |
|
Bo̍k-chiân lán lò-sò ê chhú-lí, tāi-pō͘-hūn kan-nā ē-tàng ēng tâi--ê, chiàm só͘-chāi, koh bōe-nōa. Chún-kóng ēng sio--ê, sio sok-ka-lūi ê mi̍h-kiāⁿ ē sán-seng chin to̍k ê to̍k-khì. Lū-po̍h-pau sio bōe tiāu, koh bô-hoat-tō͘ siu hôe sú-iōng, sī chin lōng-hùi chu-goân.
|
目前咱糞圾ê處理，大部份kan-nā會當用埋--ê,佔所在、koh bōe爛。準講用燒--ê,燒塑膠類ê物件會產生真毒ê毒氣。鋁箔包燒bōe掉，koh無法度收回使用，是真浪費資源。 |
|
Sīm-chì, chin chōe lâng chiong lū-po̍h-pau kap Pó-te̍k-koàn o͘-pe̍h-tàn, tī chúi-kau, lō͘-piⁿ, chúi-khò͘, hong-kéng-khu, chhim-soaⁿ......phò-hoāi lán ê chū-jiân khoân-kéng, koh, sì-kòe-lâu, that tòa chúi-kau, hā-chúi-tō, ji̍p-chúi-kháu téng téng, chō-sêng chúi-chai, kap chúi-goân chhú-lí siōng chin tōa ê khùn-jiáu.
|
甚至，真濟人將鋁箔包kap保特罐烏白tàn,tī水溝、路邊、水庫、風景區、深山.....破壞咱ê 自然環境。Koh，四界流，塞tòa水溝、下水道、入水口等等，造成水災，kap水源處理上真大ê困擾。 |
|
Bo̍k-chiân iú-koan si̍t-phín pau-chong ê hoat-lēng, kin-pún bô khó-lū kàu chit chióng pau-chong só͘ tòa lâi ê hiō-hoān, só͘-í, siūⁿ beh khò li̍p-hoat lâi kìm-chí chit lūi ê sán-phín chha-put-to sī bô khó-lêng. Nā-sī ài seng-sán-chiá hòng-khì lī-ek mài koh ēng hit chióng pau-chong, sī koh khah bô khó-lêng. Î-it ê ǹg-bāng sī, siau-hùi-chiá liân-ha̍p khí lâi, tí-chè chit lūi gûi-hāi khoân-kéng phín-chit ê sán-phín, lán ê bī-lâi chiah ū ǹg-bāng.
|
目前有關食品包裝ê法令，根本無考慮到這種包裝所tòa來ê後患。所以，想beh靠立法來禁止這類ê產品差不多是無可能。若是ài生產者放棄利益mài koh用hit種包裝，是koh較無可能。唯一ê向望是，消費者聯合起來，抵制這類危害環境品質ê產品，咱ê未來才有向望。 |
|
(Hong-hiòng Tē 1 kî, 1989 nî 11 goe̍h)
|
（風向第1期，1989年11月） |
