Lūn Song-sū_02
|
論喪事_02 |
| Lâu Bō͘-chheng |
劉茂青 |
|
Lūn Pán-lāi ê Mi̍h-kiāⁿ
|
論板內ê物件 |
|
Sè-sio̍k bé án, iā tio̍h pān pán-lāi-pê liāu; ū nn̄g-sian chóa-ang-á it-lâm it-lí hō-chò koan-kán, ì-sù káⁿ-sī beh hō͘ sí- lâng chhe-ēng, bián-tit i léng-chēng. Koh ū chhâ-se chháu-chhio̍h beh hō͘ i thang ēng. Ū gia̍h lâng koh chò chi̍t- tè chhit-chheⁿ-pang lâi khòa tī pán-lāi ê ē-té, jiân-āu sin-si hē tī pang-téng-bīn. Chit-phìⁿ-pang chha̍k chhit-khang, chiū hō-chò Chhit-chheⁿ-pang. Sìn Chú lâng ēng chhit-chheⁿ-pang, nā kan-ta ēng chò khòa sin-si ê lō͘-ēng sī thang; î-chiá chóa-ang-á kap kúi-nā-hāng pa̍t-mi̍h tek-khak m̄-thang.
|
世俗買案，也著辦板內陪料；有兩仙紙尪仔一男一女號做「棺kàn」，意思敢是beh hō͘死人差用，免得伊冷靜。Koh有柴梳、草蓆beh hō͘伊thang用。有額人koh做一塊七星枋來掛tī板內ê下底，然後身屍下tī板頂面。這片枋chha̍k七孔，就號做「七星枋」。信主人用七星枋，若kan-ta用做掛身屍ê路用是thang；餘者紙尪仔kap幾若項別物的確m̄-thang。 |
|
Ū lâng mn̄g kóng, Lâng sí, ēng Sèng- chheh kap Ióng-sim-si kap sin-si khì tâi thang mah? Ìn i kóng, Kiaⁿ-liáu jú-kú chiū jú pìⁿ īⁿ-toan. Tit-kiù ê lâng sui-jiân ū gîm-si o-ló Siōng-tè, tek-khak m̄- sī sè-kan teh ēng chit-hō si. Be̍k 5:8- 10, 14:23.
|
有人問講：人死，用聖冊kap養心詩kap身屍去埋thang嗎？ 應伊講：驚了愈久就愈變異端。得救ê人雖然有吟詩o-ló上帝，的確m̄是世間teh用這號詩。默5：810，14:23。 |
|
Lūn Chi̍h-pán, iā kóng Chi̍h tōa-chhù
|
論接板，也講接大厝 |
|
Pán beh kàu chhù ê sî, song-ka ê lâm-lí lóng tio̍h chhēng song-ho̍k, phè gîn- chóa,chò káu pê khì chi̍h, hō-chò chi̍h-pán iā kóng Chi̍h chhù. Pán kng kàu tiâⁿ-ni̍h hē-teh, chi̍h pán ê lâng chiong gîn-chóa tò tī pán ê lióng-pêng-piⁿ, jiân-āu koh pê kàu sì piⁿ lâi khàu. Iā ēng chi̍t-táu-bí, chi̍t chheng chîⁿ, ū lâng iā ēng chi̍t chiah pe̍h-ke, chò-hóe khòa tī pán-téng.
|
板beh到厝ê時，喪家ê男女攏著穿喪服，配銀紙，做狗爬去接號做接，也講「接厝」。板扛到埕裡下teh，接板ê人將銀紙倒tī板ê兩爿邊，然後koh爬到四邊來哭。也用一斗米、一千錢，有人也用一隻白雞，做伙掛tī板頂。 |
|
Sui-jiân bô chīn chai ta̍k-hāng ê ì-sù, nā-sī oa̍h lâng pê khì chi̍h sí-sí ê koaⁿ- chhâ, chiū-sī put-thong bû lí. Nā kóng hit-khū-pán sī pē-bó ê chhù, tio̍h chun- kèng kūi--i, siáⁿ-sū m̄ kūi pē-bó só͘ khí ê sin-chhù? Lâi kūi chhâ chò ê sí-pán, kiám m̄-sī gōng mah?
|
雖然無盡知逐項ê意思，若是活人爬去接死死ê棺柴，就是不通無理。若講hit具板是父母ê厝，著尊敬跪--伊，啥事m̄跪父母所起ê新厝？來跪柴做ê死板，敢 m̄是憨嗎？ |
|
Chit hō lé m̄-bián lâng kóng; sìn Chú lâng chū-jiân m̄-thàn.
|
這號禮m̄免人講；信主人自然m̄趁。 |
|
Lūn Ji̍p-bo̍k ê só͘-chò, só͘ ēng ê mi̍h, só͘ kóng ê ōe
|
論入木ê所做、所用ê物、所講ê話 |
|
Kéng hó sî lâi siu sin-si lo̍h-chhâ hō-chò Ji̍p-bo̍k. Ji̍p-bo̍k hit-sî nā ū lâng seⁿ-siùⁿ kap sí-lâng sio-chhiong, put-lūn chhin-se tio̍h kiâⁿ-khui, m̄-thang óa khì khòaⁿ. Tio̍h ēng tāu-pô͘, chio̍h-thâu kap sí-lâng hē tī pán-lāi, chhut-soaⁿ kā i kóng, Tio̍h chio̍h-thâu nōa, tāu-sīⁿ chhut-gê, chiàⁿ thang kap kiáⁿ-sun sio- kìⁿ. Ì-sù sī kiaⁿ i sí-liáu ē lâi chhōa kiáⁿ-sun khì. Iā kiû i tio̍h pó-pì kiáⁿ- sun heng-ōng, hoat-ta̍t, pêng-an, sūn-sū.
|
揀好時來收身屍落柴號做「入木」。入木hit時若有人生相kap死人相沖，不論親疏著行開，m̄-thang倚去看。著用豆pô͘、石頭kap死人下tī板內，出山kā伊講：著石頭爛，豆豉出芽，才thangkap子孫相見。意思是驚伊死了會來chhōa子孫去。也求伊著保庇子孫興旺，發達、平安、順序。 |
|
Nā-sī hō͘ lâng hāi-sí--ê, á-sī kap lâng ū oan-siû jiá-hō tì-kàu sí--ê, chiū hō͘ i kia̍h kiàm kap thô-ki, thâu-mn̂g phah- sòaⁿ, kha chhēng chháu-ê, thâu seh n̂g- chóa-liân. Chhut siaⁿ kā i kóng, Hāi lí, kap lí ū oan-siû ê lâng, lí tio̍h hián- hián khì chhōe i. Che chiū-sī īⁿ-toan. Siōng-tè kóng, Sin-oan tō Góa, Góa tek- khak pò--i. Lô. 12:19, Sin. 32:35. Sí-lâng tek-khak bē ē ka-tī sin-oan, Siōng-tè chiàⁿ ē. Chhòng 4:9-11.
|
若是hō͘人害死--ê,抑是kap人有冤仇惹禍致到死--ê,就hō͘伊舉劍kap桃枝，頭毛扑散，腳穿草鞋，頭塞黃紙聯。出聲kā伊講：害你，kap你有冤仇ê人，你著顯顯去chhōe伊。Che就是異端。上帝講：申冤道我，我的確報--伊。羅。12:19，申。32:35。死人的確bē會家己申冤，上帝才會。創4:9-11。 |
|
Iā tio̍h chi̍t hù sió-seng-lé tī koan-piⁿ lâi hàu, ū lâng iā pān chi̍t phiⁿ chiok- bûn lâi tha̍k. Chhiáⁿ pē-bó chiâu-chn̂g ê lâng lâi tèng teng, tèng teng ê sî tio̍h kóng hó ōe. Teng-thâu tio̍h hiòng- chhut, chhú chhut-teng ê ì-sù. Sí-lâng ê kiáⁿ-sun lâm-lí, ta̍k lâng kia̍h chi̍t ki âng-teng, tiám chek-á, se̍h koan lâi khàu; chiàⁿ kiâⁿ saⁿ-lìn, tò kiâⁿ saⁿ-lìn.
|
也著一副小牲禮tī棺邊來孝，有人也辦一篇祝文來讀。請父母齊全ê人來釘丁，釘丁ê時著講好話。丁頭著向出，取出丁ê意思。死人ê子孫男女，逐人舉一枝紅燈，點燭仔，se̍h棺來哭；正行三lìn,倒行三lìn。 |
|
Chit téng-bīn kok-hāng só͘ chò, m̄ bián ta̍k-hāng kóng hit ê ì-sù; lán iā chai sī īⁿ-toan, chū-jiân m̄ thàn.
|
這頂面各項所做，m̄免逐項講hit ê意思；咱也知是異端，自然m̄趁。 |
|
Lūn beh chhut-chòng ê sî só͘ chò
|
論beh出葬ê時所做 |
|
Ji̍p-bo̍k liáu, koan hû chhut gōa-bīn khòa tī í-téng. Tō-sū ēng pe̍h-pò͘ lâi ōe chi̍t-sian siōng, khòaⁿ sí-lâng sī lâm á-sī lí, só͘ ōe ê siōng iā tio̍h hun lâm lí. Siōng ōe hó, the̍h cha-bó͘-kiáⁿ ê chîⁿ ēng pò͘ pau, ùn o͘ ba̍k lâi tǹg tī só͘ ōe ê siōng; hō-chò Ìn chîⁿ hoan. Siá sí-lâng ê seⁿ-sî ji̍t goe̍h, nî-hòe, hûn-bōng, chó͘- che̍k chiūⁿ sîn-chú. Sîn-chú siá hó, chhāi tī toh-téng; pâi seng-lé lâi hàu, hō-chò Khí-bé; lēng pān chi̍t hù seng- lé khì soaⁿ-n̍i̍h, koan lo̍h khòng iám-thó͘ liáu lâi hàu, hō-chò Lo̍h-bé.
|
入木了，棺扶出外面掛tī椅頂。道士用白布來畫一仙像，看死人是男抑是女，所畫ê像也著分男女。像畫好，提查某子ê錢用布包，搵烏墨來當tī所畫ê像；號做「印錢幡」。寫死人ê生時日月、年歲、墳墓、祖籍上神主。神主寫好，chhāi tī桌頂；排牲禮來孝，號做「起馬」；另辦一副牲禮去山--n̍i̍h,棺落壙掩土了來孝，號做「落馬」。 |
|
Khí-bé liáu beh sàng-chòng ê lâng, put-lūn chhin-se, lâm lí, tio̍h chhēng song-ho̍k, tī toh-chêng sio hiuⁿ lâi pài; pài liáu kūi lo̍h khì kha̍p-thâu, chhiú phâng chi̍t poe chiú, chiong chiú tò lo̍h thô͘, chhut-siaⁿ ai, hō-chò Tiān-chiú.
|
起馬了beh送葬ê人，不論親疏、男女，著穿喪服，tī桌前燒香來拜；拜了跪落去磕頭，手捧一杯酒，將酒倒落塗，出聲哀，號做「奠酒」。 |
|
Tiān-chiú liáu, hàu-lâm cha-bó͘-kiáⁿ, sim-pū tio̍h chò káu pê kàu koan-piⁿ kūi-teh khàu. Tō-sū chhēng ho̍k, phah nâ-poa̍h, liām keng, se̍h koan kúi-nā-lìn chiū khí kiâⁿ, chò chêng chhōa lō͘. Hàu-lâm hàu-hū tio̍h óa koan-piⁿ lióng-pêng lâi kiâⁿ, hō-chò Khîⁿ-koan. Kî-î chhin- se, lâm kiâⁿ koan-chêng, lí tòe koan-āu.
|
奠酒了，孝男查某囝，新婦著做狗爬到棺邊跪teh哭。道士穿服，扑鐃跋、念經，se̍h棺幾若lìn就起行，做前chhōa路。孝男孝婦著倚棺邊兩爿來行，號做「khîⁿ棺」。其餘親疏，男行棺前，女tòe棺後。 |
|
Lūn Chhut-chòng ê sî só͘ ēng ê mi̍h-kiāⁿ
|
論出葬ê時所用ê物件 |
|
Sè-sio̍k ū sîn-chú kap tōng-hoan; sîn-chú chhāi tī bí-táu-lāi, tōa-kiáⁿ phō táu, chhiú kia̍h tōng-hoan. Ū gia̍h lâng ū tōa-sun kiō, chiū sîn-chú tōa-sun phō. Siáⁿ-sū tiōng tōa-sun? Kó͘-lé beh chè chó͘-chong, tio̍h hō͘ tōa-sun chhēng chó͘- chong ê i-chiûⁿ chē teh siū-chè, hō-chò Si-chú. Taⁿ bô ēng si-chú, iáu teh tiōng tōa-sun, sī sêng-chiap kó͘-lé ê liû- thoân.
|
世俗有神主kap幢旛；神主chhāi tī米斗內，大子抱斗，手舉幢旛。有額人有大孫轎，就神主大孫抱。啥事重大孫？ 古禮beh祭祖宗，著hō͘大孫穿祖宗ê衣裳坐teh受祭，號做「尸主」。今無用尸主，iáu teh重大孫，是承接古禮ê流傳。 |
|
Hûn-pe̍h. Ēng pò͘, á-sī kìn, lâi ji̍p tek- pán, á-sī pang-á, tiong-ng siá sí-lâng ê miâ-sèⁿ hòe-siū, lióng-pêng siá seⁿ-sî ji̍t- goe̍h, chiū hō-chò Hûn-pe̍h. Ì-sù sī beh hō͘ sîn-hûn i-óa. Che sī īⁿ-toan. Hó-lâng sí, hûn chek-sî kàu thian-tông, pháiⁿ-lâng sí, hûn liâm-piⁿ lo̍h tē-ge̍k; thái-thó ū sîn-hûn thang tiàm tī hûn- pe̍h?
|
魂帛。用布，抑是絹，來入竹板，抑是枋仔，中央寫死人ê名姓歲壽，兩爿寫生時日月，就號做「魂帛」。意思是beh hō͘神魂依倚。Che是異端。好人死，魂即時到天堂，歹人死，魂liâm-piⁿ落地獄；thái- thó有神魂thang tiàm tī魂帛？ |
|
Bêng-seng, sio̍k kóng, Lêng-cheng. Ēng âng-tiû siá pe̍h-jī. Chit hō mi̍h tû-khì koaⁿ-ke pù-lâng í-gōa chió lâng ēng. Chò Bêng-seng ê tn̂g-té, chiàu koaⁿ-chit phín-kip ê tōa-sè lâi hun. Ì- sù sī sí-lâng put-jím lī-pia̍t, só͘-í siá i-ê chiok-ūi tek-hēng lâi hián-bêng i.
|
明旌，俗講：「靈旌」。用紅綢寫白字。這號物除去官家富人以外少人用。做明旌ê長短，照官職品級ê大細來分。意思是死人不忍離別，所以寫伊ê爵位德行來顯明伊。 |
|
Âng-teng. Ai-tiōng, sio̍k kóng Hàu- thn̄g, Hà-thn̄g. Lé-kì Būn-song kap Song-ho̍k sù-chè kóng, Hàu-lâm pi- siong pē-bó sí, iu-būn bô chia̍h, sin-khu soe-lám; tio̍h koái-á hō͘ i kia̍h chiàⁿ ē kiâⁿ. Siat ai-tiōng ê ì-sù sī án-ni. Pē sí, ai-tiōng tio̍h ēng tek, tek ê chat tī gōa-bīn; piáu-bêng pē ê kiàn-kong li̍p-gia̍p chāi gōa-thâu. Bó sí, hà-thn̄g tio̍h ēng tông-chhiū, sio̍k ēng khó͘-lēng, chhâ sī cha̍t-pak, piáu-bêng bó ê kiàn- kong li̍p-gia̍p tī lāi-bīn. Pē ê hà-thn̄g tio̍h îⁿ-îⁿ, pí i chhin-chhiūⁿ thiⁿ; bó ê hàu-thn̄g tio̍h sì-liām, pí i chhin- chhiūⁿ tē. Sàng-chòng ê lâm lí kok lâng tio̍h kia̍h chi̍t ki âng-teng-á tiám- chek. Ì-sù sī kā sí-lâng chhiō kng, hō͘ i hó-kiâⁿ-lō͘. Tùi se̍h-koan kia̍h khí, kàu oân-soaⁿ liáu kùi tī lêng-toh-ē; kàu tû-lêng hit ji̍t chiàⁿ sio--khì. Ū lâng hiat tī lō͘-piⁿ. Hiān-sî hà-thn̄g ēng chiâⁿ-chhioh tn̂g, thái-thó ē hō͘ hàu-lâm chò-la̍t-tit. Sí-lâng bē khòaⁿ- kng, tiám teng-á sím-mi̍h lō͘-ēng? Só͘-í chit nn̄g-hāng sìn Chú lâng bián ēng.
|
紅燈。哀杖，俗講「孝堂」，孝堂。禮記聞喪kap喪服賜祭講，孝男悲傷父母死，憂悶無食，身軀衰lám;著拐仔hō͘伊舉才會行。設哀重ê意思是án-ni。父死，哀杖著用竹，竹ê紮tī外面；表明父ê建功立業在外頭。母死，孝堂著用桐樹，俗用「苦苓」，柴是實腹，表明母ê建功立業tī內面。父ê孝杖著圓圓，比伊親像天；母ê孝杖著四liām,比伊親像地。送葬ê男女各人著舉一枝紅燈仔點燭。意思是kā死人chhiō 光，hō͘伊好行路。Tùi se̍h棺舉起，到完山了掛tī靈桌下；到除靈hit日才燒--去。有人hiat tī路邊。現時孝杖用成尺長，thái-thó會hō͘孝男做力tit。死人bē看光，點燈仔甚mi̍h路用？所以這兩項信主人免用。 |
|
Kè-siū-têng. Ū lâng ōe sí lâng ê hêng-tô͘, hō-chò Khioh siáu-éng, iā kóng, Khioh tāi-siū. Chhut-chòng ê sî hit pak siáu-éng hē tī chhâ-kiō, kng tī koan chêng; hit téng- kiō chiū hō-chò Kè-siū-têng. Chòng liáu tò--lâi hit pak siū kùi tī An-lêng ê só͘-chāi.
|
過壽亭。有人畫死人ê形圖，號做「Khioh小影」，也講：Khioh大壽。出葬ê時hit幅小影下tī柴轎，扛tī棺前；hit頂轎就號做「過壽亭」。葬了倒-- 來hit幅壽掛tī安靈ê所在。 |
|
Khioh tāi-siū thang hō͘ kiáⁿ-sun khòaⁿ chó͘-kong ê hêng-siōng, khiok m̄- sī īⁿ-toan, chóng bē-pí-tit hip-siōng khah tio̍h-hoat.
|
Khioh大壽thang hō͘子孫看祖公ê形象，卻m̄是異端，總bē比tit翕像較著法。 |
|
Khai-lō͘-sîn, iā kóng Khóng-kèng
|
開路神，也講：孔敬。 |
|
Ēng chóa kô͘ chi̍t sian lò-lò ê chóa-lâng, bīn-māu hiong-ok thang kiaⁿ, chhiú kia̍h lāi-khì, hō-chò Khai-lō͘-sîn. Nn̄g lâng ōe bīn, thâu-mn̂g phah-sòaⁿ, hû chóa-lâng lâi kiâⁿ. Ì-sù sī beh kóaⁿ-tio̍k hiong-sîn ok-soah, hō͘ bông-hûn bián kiaⁿ. Ū só͘-chāi bô ēng. Che sī īⁿ-toan. Kî-î môa-teng, âng-chhái, pe̍h- chhái kì-jiân m̄-sī īⁿ-toan, ēng iā bô hông, m̄ ēng iā ē chò--tit, m̄-bián khu- chip kòe-thâu.
|
用紙糊一先lò-lò ê紙人，面貌兇惡thang驚，手舉利器，號做「開路神」。兩人畫面，頭毛扑散，扶紙人來行。意思是beh趕逐兇神惡煞，hō͘亡魂免驚。有所在無用。Che是異端。其餘麻燈、紅綵、白綵既然m̄是異端，用也無防，m̄用也會做--tit，m̄免拘執過頭。 |
|
Bán-liân, sio̍k kóng Liân-te̍k, Kó͘-ga̍k
|
輓聯，俗講：聯軸，古樂。 |
|
Ū ke-sū ê lâng kòe-sin ū chhin-chiâⁿ pêng-iú, ēng tiû siá jī lâi chēng song- ka, hō-chò Liân-te̍k. Só͘ siá ê jī tāi- khài sī chheng-ho͘ o-ló kòe-sì ê lâng. Chhut-chòng ê sī song-ka pâi hiah-ê liân-te̍k tī koan-chêng chò êng-hián. Āu-lâi tiàu tī thiaⁿ-thâu. Che m̄-sī īⁿ- toan.
|
有家事ê人過身有親情朋友，用綢寫字來贈喪家，號做「聯軸」。所寫ê字大概是稱呼o-ló過世ê人。出葬ê是喪家排hiah-ê 聯軸tī棺前做榮顯。後來吊tī廳頭。Che m̄是異端。 |
|
Ū lâng mn̄g kóng, Ū só͘-chāi ê kàu- hōe ū kong ê liân-te̍k, liân-te̍k--n̍i̍h só͘ siá, khah chē sī piáu-bêng tō-lí, thang koh ēng mah? Ìn i kóng, Ū hit-hō mi̍h piān, beh ēng iā bô hông; bô hit-hō mi̍h iā bián tiâu-kang lâi chò. Sè-sio̍k só͘ hiâm put-chāi liân-te̍k.
|
有人問講，有所在ê教會有公ê聯軸，聯軸--n̍i̍h所寫，較濟是表明道理，thang koh用嗎？應伊講：有hit號物便，beh用也無防；無hit號物也免刁工來做。世俗所嫌不在聯軸。 |
|
Kó͘-ga̍k chiū-sī ta̍k hō ê ga̍k-khì, chhin-chhiūⁿ Kó͘-chhoe tōa lô hit-hō. Sè-sio̍k song-sū put-lī ga̍k-khì; chiàu in kóng, ū iu-būn ê phó͘, iā ū hoaⁿ-hí ê phó͘. Nā bô kó͘-chhoe sàng-chòng, chiū-sī ke̍k-sàn ê lâng. Chit-hāng sìn Chú ê lâng bián chip-it cheng-lūn. Song-ka nā chhim-chai tō-lí, bián ēng sī hó; siat-sú kian-chip beh ēng, chiū bián-kióng ap-chè i, iā sī kiáu-jiáu ê sū. Khó-í iû-chāi lâng phah-sǹg, hiān-sî bián li̍p tēng-kui.
|
古樂就是逐號ê樂器，親像鼓吹大鑼hit號。世俗喪事不離樂器；照in講，有憂悶ê譜，也有歡喜ê譜。若無鼓吹送葬，就是極散ê人。這項信主ê人免執一爭論。喪家若深知道理，免用是好；設使堅執beh用，就勉強壓制伊，也是攪擾ê事。可以由在人扑算，現時免立定規。 |
|
Pàng-chóa
|
放紙 |
|
Chi̍t lâng the̍h gîn-chóa tī koan-chêng, thiah gîn-chóa hiat lo̍h thô͘, hō- chò Pàng-chóa. Khah siông sī kiáⁿ-sài teh pàng. Ì-sù sī beh hō͘ bông-hûn ū kì-jīn thang tò--lâi chhù--n̍i̍h. Ū lâng kóng, Sī kā soaⁿ-sîn bé lō͘ kòe.
|
一人提銀紙tī棺前，拆銀紙hiat落塗，號做「放紙」。較常是子婿teh放。意思是beh hō͘亡魂有記認thang倒--來厝--n̍i̍h。有人講，是kā山神買路過。 |
|
Chit-hō ê só͘-chāi sī put-thong bû lí. Nā sîn-hûn tio̍h jīn hit ê chóa chò kì- jīn, chiū ún-tàng ē kiâⁿ chhò lō͘. In-ūi hong chi̍t-ē chhoe, gîn-chóa chiū sì-kè poe, sì-sàn khì; kiám m̄-sī hāi bông- hûn bô soaⁿ bô sū mah? Nā kóng tio̍h bé lō͘ chiàⁿ ē-tit kòe, chiū bōe ū chóa ê sî, bông-hûn m̄-chai thái ū lō͘ thang kòe?
|
這號ê所在是不通無理。若神魂著認hit 個紙做記認，就穩當會行錯路。因為風一下吹，銀紙就四界飛、四散去；敢 m̄是害亡魂無soaⁿ無sū嗎？若講著買路正會得過，就bōe有紙ê時，亡魂m̄知thái有路thang過？ |
|
Lūn Phòa-thó͘ khui-khòng
|
論破土開壙。 |
|
Tio̍h kéng hó sî ji̍t chiàⁿ bián-kiaⁿ siong soah. Chi̍t-ê chhin-lâng chhēng sò͘-i pau pe̍h, pān chi̍t-hù seng-lé kap tē-lí-su khì, pâi seng-lé sio hiuⁿ, kūi teh kā Thó-tī-kong khit tē, sòa kiû i pó-iū. Kiû liáu ku̍t thô͘, hō-chò Phòa-thó͘. Tē-lí-su keh keⁿ pí jī-hiòng, hō͘ thó͘-kong khui-chò, hō-chò Khui-khòng. Sè- sio̍k nā bô tē-lí-su chhōe tē kah keⁿ, chiū kiaⁿ siong soah, kiáⁿ-sun bē heng-ōng. Che chiū-sī īⁿ-toan. Sèng-keng kóng, Bān-hāng hó ê siúⁿ-sù tùi Siōng-tè chhut (Ngá-kok 1:17) Tek-khak m̄-sī tùi hûn-bōng lâi.
|
著揀好時日才免驚相煞。一個親人穿素衣包白，辦一副牲禮kap地理師去，排牲禮燒香，跪teh kā土地公乞地，續求伊保祐。求了掘土，號做「破土」。地理師隔庚比字向，hō͘土公開作，號做「開炕」。世俗若無地理師chhōe地kah庚，就驚相煞，子孫bē興旺。che就是異端。聖經講：萬項好ê賞賜tùi上帝出（雅各1:17）的確m̄是tùi墳墓來。 |
|
Nā beh ū tē-lêng ē tì-ìm lâng, tē-lí- su ē chhōe hó-hia̍t, chiū sàn-hiong pi- chiān ê lâng, éng bô chhut-thâu ê ji̍t- chí, in-ūi bô chîⁿ thang chhiáⁿ sian-seⁿ chhōe tē; Thian-chú, Chu-hô͘, Kheng- siòng ē kú-tn̂g heng-ōng, tāi-tāi êng- hián; in-ūi ū koân ū sè thang kéng hó tē-lí. Chóaⁿ-iūⁿ tiâu-tē ē piàn-ōaⁿ, Kong, Hô͘, Kheng-siòng bô tiāⁿ-tio̍h lâng?
|
若beh有地靈會致蔭人，地理師會chhōe好穴，就散hiong卑賤ê人，永無出頭ê日子，因為無錢thang請先生chhōe地；天子、諸侯、卿相會久長興旺，代代榮顯；因為有權有勢thang揀好地理。怎樣朝代會變換，公、侯、卿相無定著人？ |
|
Lūn sé-chēng
|
論洗淨。 |
|
Bâi-chòng liáu tò--lâi, chhāi chi̍t- tháng chúi tī tiâⁿ--n̍i̍h, tō-sū sio hû hō͘ lóng-chóng tàu kha-chhiú ê lâng lâi sé, hō-chò Sé-chēng; ì-sù sī sé liáu chiū m̄-sī chheⁿ-ba̍k, chiàⁿ bē chhek--tio̍h lâng. Iā tio̍h kàu chó-iū-lîn mn̂g-kháu, tō-sū liām chiù iô giang-á, ēng tek-se hiù chúi; iā sī sé chheng ê ì-sù.
|
埋葬了倒--來，chhāi 一桶水tī埕--n̍i̍h,道士燒符hō͘攏總鬥跤手ê人來洗，號做「洗淨」；意思是洗了就m̄是青目，才bē chhek 著人。也著到左右鄰門口，道士念咒搖giang仔 ，用竹梳hiù水；也是洗清ê意思。 |
|
Lūn An-lêng, iā kóng Khiā-lêng
|
論安靈，也講企靈。 |
|
Saⁿ-ji̍t kô͘ chi̍t-chō chóa-chhù chhāi tī thiaⁿ-thâu, hō-chò Lêng-chhù; chhù- lāi ū hûn-sin, iā ū lâm-tông lí-pī kin-sûi tī bīn-chêng; ì-sù sī beh su-hāu bông-hûn. Lêng-chhù ê lióng-pêng ū só͘-chāi pâi sí-lâng ê i-chiûⁿ, ê, bō, kap i pêng-ji̍t teh iōng iàu-kín ê mi̍h-kiāⁿ. Lêng-chhù chêng pâi chi̍t-tè toh, chhāi bo̍k-chú hiuⁿ-lô͘, hō-chò Lêng-toh. Chá-àm tio̍h sio-hiuⁿ tiám-chek, ta̍k-ji̍t nn̄g-pái thiⁿ-pn̄g lâi kháu,hō-chò hàu-pn̄g. Ū só͘-chāi ê hong-sio̍k kìⁿ saⁿ-tǹg thiⁿ chi̍t-óaⁿ pn̄g chhāi tī sí-lâng pêng-sî só͘ chē ê ūi. Hit ūi pa̍t-lâng m̄-thang chē.
|
三日糊一座紙厝chhait7?廳頭，號做「靈厝」；厝內有魂身，也有男童女婢跟隨tī面前；意思是beh侍候亡魂。靈厝ê兩爿有所在排死人ê衣裳、鞋、帽kap伊平日teh用要緊ê物件。靈厝前排一塊桌，chhāi木主香爐，號做「靈桌」。早暗著燒香點燭，逐日2擺添飯來哭，號做「孝飯」。有所在ê風俗見三頓添一碗飯chhāi tī死人平時所坐ê位。Hit位別人m̄-thang坐。 |
|
Thàu-chá thàu-àm tī khiā-lêng ê só͘- chāi lâi khàu, hō-chò Kiò khí Kiò khùn. Nā ū chhin-chiâⁿ pêng-iú lâi bāi-song, chú-lâng tio̍h ī-pī ta̍k-hāng hó-sè, chiàⁿ chhōa i kàu lêng-chêng lâi sio-hiuⁿ, kìⁿ ū lâng lâi bāi-song, ta̍k pái tio̍h thî- khàu, bô án-ni chiū m̄-sī lé, lâng chiū hiâm i put-hàu.
|
透早透暗tī企靈ê所在來哭，號做「叫起叫睏」。若有親情朋友來覓喪，主人著預備逐項好勢，才chhōa伊到靈前來燒香，見有人來覓喪，逐擺著啼哭，無án-ni就m̄是禮，人就嫌伊不孝。 |
|
Sí liáu chhit-ji̍t tio̍h cheng-chî chò kóe pān tōa seng-lé lâi hàu, hō-chò Chò thâu chhit; chhit-ji̍t tio̍h chò chi̍t-pái sûn, chhe-it cha̍p-gō͘ tio̍h khah kang-hu lâi hàu. Ta̍k-pái chò sûn ê mi̍h-kiāⁿ kok ū koh-iūⁿ. Ēng mi̍h lâi chè bông-hûn, hō-chò Chò-sûn.
|
死了七日著蒸薯做粿辦大牲禮來孝，號做「做頭七」；七日著做一擺巡，初一、十五著較功夫來孝。逐擺做巡ê物件各有各樣。用物來祭亡魂，號做「做巡」。 |
|
Lūn Oân-soaⁿ, Siā-thó͘, Ín-hûn
|
論完山，謝土，引魂。 |
|
Tâi liáu saⁿ-ji̍t kiáⁿ-sun tio̍h chhēng song-ho̍k, pān nn̄g hù seng-lé, chi̍t hù chè bōng, se̍h bōng lâi khàu, hō-chò Oân-soaⁿ; chi̍t hù pâi tī thó-tī bōng-á chêng lâi hàu, hō-chò Siā-thó͘. Hàu-liáu the̍h chi̍t-tè bōng-thâu thô͘ tò-khì hē tī hiuⁿ-lô͘, hō-chò Ín-hûn.
|
埋了3日子孫著穿喪服，辦兩副牲禮，一副祭墓，se̍h墓來哭，號做「完山」；一副排tī土地墓仔前來孝，號做「謝土」。孝了提一塊墓頭塗倒去下tī香爐，號做「引魂」。 |
|
Ū só͘-chāi sī kàu chhit-ji̍t chiàⁿ pān seng-lé khì hàu, sòa ín-hûn tò--lâi, ì-sù sī kóng, sí-lâng chhit-ji̍t chiàⁿ chai i sí lah, lâi mn̄g Thó-tī-kong ê lō͘-kèⁿ; só͘-í song-ka iā tio̍h chi̍t hù seng-lé chè thó- tī, kiû i chí-tiám bông-hûn.
|
有所在是到7日才辦牲禮去孝，續引魂倒--來，意思是講，死人7日才知伊死lah，來問土地公ê路徑；所以喪家也著一副牲禮祭土地，求伊指點亡魂。 |
|
Thâu chhit hit mê-hng, Lêng-chhù, Lêng-toh ê ē-kha tio̍h thai hoe-hún, á- sī hóe-hu, thiⁿ-kng thang giām bông- hûn hôe-ka ê kha-jiah.
|
頭七hit暝昏，靈厝，靈桌ê下腳著篩花粉，抑是火灰，天光thang驗亡魂回家ê腳跡。 |
|
Nā ū beh chò Kong-kó, Ín-hûn tio̍h chhiáⁿ Hôe-siūⁿ, á-sī Tō-sū chiàⁿ ē ēng-- tit. Nā chhiáⁿ i ín-hûn, iā tio̍h chhiáⁿ i chò sū. Chit téng-bīn ta̍k-hāng lóng bô ha̍p chin-lí ê kà-sī.
|
若有beh做功果，引魂著請和尚，抑是道士才會用tit。若請伊引魂，也著請伊做事。這頂面逐項攏無合真理ê教示。 |
