Siōng-tè Só͘ Beh Ēng Ê Lâng_04
|
上帝所Beh用Ê人_04 |
| Sú-bi̍t-su |
Sú-bi̍t-su |
|
Tē 4 Chiuⁿ
|
第4章 |
|
Siōng-tè Cháiⁿ-iūⁿ Khòaⁿ-góa?
|
上帝Cháiⁿ樣看我？ |
|
Si-phian ê chok-chiá án-ni kóng, “Siōng-tè ah, kiû Lí kàm-chhat góa, chai góa ê sim-su; Chhì-giām góa, chai góa ê ì-sù. Khòaⁿ góa ū sím-mi̍h pháiⁿ só͘-kiâⁿ bô, Chhōa góa kiâⁿ éng-oa̍h ê lō͘.” (Si-phian 139:23~24). Che iā sī lán ê kî-tó. Goān Sèng Sîn ê kng chiò lán, hō͘ lán ōe bêng-pe̍k ka-kī, chhin-chhiūⁿ I só͘ khòaⁿ tio̍h lán chi̍t-poaⁿ-iūⁿ.
|
詩篇ê作者án-ni講，「上帝ah，求你監察我，知我ê心思；試驗我，知我ê意思。看我有sím-mi̍h pháiⁿ素行無，Chhōa我行永活ê路。」(詩篇139：23~24)。Che也是lán ê祈禱。願聖神ê光照lán，hō͘ lán ōe明白ka-kī，親像I所看tio̍h lán chi̍t般樣。 |
|
Lán m̄-bián khòa-lū sè-kan tùi lán ê khòaⁿ-hoat. Pò-chóa, chia̍p-chì kap êng-á-ōe tùi lán ê phêng-lūn, kiám-chhái kap Siōng-tè só͘ khòaⁿ ê tú-tú tùi-hoán; Siōng-tè beh chek-pī--ê, in beh o-ló, Siōng-tè khòaⁿ chòe tio̍h o-ló--ê, in kiám-chhái beh húi-pòng. Lán iā m̄-bián khòaⁿ tāng chhin-chiâⁿ, pêng-iú ê ì-kiàn, in-ūi in iā ōe hō͘ lán phiàn-khì. “lâng khòaⁿ gōa-māu, Siōng-tè sī khòaⁿ sim-lāi.” Lán chí-ū ài chai-iáⁿ Siōng-tè cháiⁿ-iūⁿ teh khòaⁿ lán.
|
Lán m̄免掛慮世間對lán ê看法。報紙、雜誌kap閒á話對lán ê評論，kiám-chhái kap上帝所看ê tú-tú對反；上帝beh責備--ê，in beh o-ló，上帝看做tio̍h o-ló--ê，in kiám-chhái beh誹謗。Lán也m̄免看重親chiâⁿ、朋友ê意見，因為in也ōe hō͘ lán騙去。「人看外貌，上帝是看心內。」Lán只有ài知影上帝cháiⁿ樣teh看lán。 |
|
Ū chi̍t ji̍t lán beh khiā tī Siōng-tè ê bīn-chêng siū I sím-phòaⁿ, kàu sî I beh hian-khui lán ê phè, chiū-sī tī sim-lāi ún-ba̍t ê, ia̍h tio̍h lō͘-hiān. lâng ê gōa-māu sui-jiân ōe jia-khàm pa̍t-lâng ê ba̍k-chiu, chóng-sī choa̍t-tùi bōe jia-khàm Siōng-tè ê ba̍k-chiu. Siat-sú lán chá chiū chai-iáⁿ I cháiⁿ-iūⁿ khòaⁿ lán, chiū-sī lán siū chhìn tī thian-phêng, hián-bêng lán ê bô kàu-gia̍h, lán kiám bô beh kín-kín pó͘-chhiong lán só͘ khiàm-kheh--ê, kap I ū chèng-siông ê koan-hē mah?
|
有chi̍t日lán beh khiā tī上帝ê面前受I審判，到時I beh hian開lán ê phè，就是tī心內隱瞞ê，ia̍h tio̍h露現。人ê外貌雖然ōe jia-khàm別人ê目chiu，總是絕對bōe jia-khàm上帝ê目chiu。設使lán早就知影I cháiⁿ樣看lán，就是lán受chhìn tī天phêng，顯明lán ê無夠額，lán kiám無beh緊緊補充lán所欠kheh--ê，kap I有正常ê關係mah？ |
|
Siōng-tè cháiⁿ-iūⁿ teh khòaⁿ lán? Kàm-chhat lâng lāi-sim ê Siōng-tè , tī góa sim-lāi só͘ khòaⁿ tio̍h ê sī sím-mi̍h? Góa ê it-chhè ōe hō͘ I hoaⁿ-hí mah?
|
上帝cháiⁿ樣teh看lán？監察人內心ê上帝，tī我心內所看tio̍h ê是sím-mi̍h？我ê一切ōe hō͘ I歡喜mah？ |
|
1. Siōng-tè Khòaⁿ Góa Ê Kang-chok Cháiⁿ-iūⁿ?
|
1. 上帝看我Ê工作Cháiⁿ樣？ |
|
Siōng-tè tī góa ê lāi-bīn ū khòaⁿ-chhut sêng-sim si̍t-ì, bô khúi-chà, bô chòe ké-hó ê tāi-chì á-bô? Bô-lūn góa ū jōa-chōe kè-sit, che lóng m̄-sī iàu-kín, chú-iàu ê būn-tôe sī chāi tī góa ê tōng-ki ū chīn-tiong, sêng-si̍t á-bô? Nā ū, I beh sià-bián góa ê kè-sit. Góa ê kang-chok ū tham-tio̍h kò-jîn ê lī-ek, á-sī ūi-tio̍h chit-gia̍p chiah teh chòe á-bô?
|
上帝tī我ê內面有看出誠心實意、無詭詐、無做假好ê tāi-chì á無？無論我有jōa-chōe過失，che lóng m̄是要緊，主要ê問題是在tī我ê動機有盡忠、誠實á無？若有，I beh赦免我ê過失。我ê工作有貪tio̍h個人ê利益，á是為tio̍h職業chiah teh做á無？ |
|
Góa ê kang-chok ū tùi Siōng-tè hū-chek á-bô? Góa ê seng-oa̍h ū teh kan-chèng Iâ-so͘ á-bô? Góa kiám ōe ín-chhōa pa̍t-lâng lâi kè tek-sèng koh ū khùi-la̍t ê seng-oa̍h á-bōe? Góa kiám ū ín-chhōa lâng lâi sìn Chú? Tī kè-khì ê ji̍t-chí góa kiám bat tùi pa̍t-lâng kóng-khí in lêng-hûn tit-kiù ê tāi-chì? Góa ū tō-lí thang thoân á-bô? Á-sī góa ka-kī ê thé-giām chin chhián, tùi pa̍t-lâng bô sím-mi̍h chok-iōng?
|
我ê工作有對上帝負責á無？我ê生活有teh kan證耶穌á無？我kiám ōe引chhōa別人來過得勝 koh有氣力ê生活á-bōe？我kiám有引chhōa人來信主？Tī過去ê日子我kiám bat對別人講起in靈魂得救ê tāi-chì？我有道理thang傳á無？Á是我ka-kī ê體驗真淺，對別人無sím-mi̍h作用？ |
|
2. Siōng-tè Khòaⁿ Góa Ê Siā-kau Seng-oa̍h Cháiⁿ-iūⁿ?
|
2. 上帝看我Ê社交生活Cháiⁿ樣？ |
|
Siōng-tè bat bēng-lēng kóng, “Lín tio̍h tùi in tiong-kan chhut-lâi, ka-kī hun-pia̍t,” “Bo̍h-tit kap m̄ sìn ê lâng chòe phōaⁿ.” Góa kiám ū sūn-thàn I ê bēng-lēng? Góa só͘ chòe ê kiám ū hō͘ I hoaⁿ-hí? Ū sím-mi̍h khoài-lo̍k tì-kàu chiong Chú Iâ-so͘ kóaⁿ-chhut góa ê sim-lāi, hō͘ I bô kap góa saⁿ-kap tī-teh? Góa teh chòe tāi-chì, kóng-ōe, kiâⁿ-ta̍h ê sî, góa ê liông-sim kiám ū pêng-an? Tī choân sè-kan ê bīn-chêng góa ū kam-goān pàng-sak só͘ ū ê, kan-ta kéng beh ti̍h Chú Iâ-so͘ mah? Góa teh siūⁿ beh hō͘ I hoaⁿ-hí, á-sī sî-siông siūⁿ beh kap I piān-lūn? Góa ū chiong sio̍k tī Chú ê sî-kan the̍h-khì chòe hiah-ê bô chèng-tong ê siā-kau oa̍h-tāng á-bô?
|
上帝bat命令講，「Lín tio̍h tùi in中間出來，ka-kī分別，」「莫得kap m̄信ê人做伴。」我kiám有順嘆I ê命令？我所做ê kiám有hō͘ I歡喜？有sím-mi̍h快樂致到將主耶穌趕出我ê心內，hō͘ I無kap我saⁿ-kap tī-teh？我teh做tāi-chì、講話、行踏ê時，我ê良心kiám有平安？Tī全世間ê面前我有甘願放sak所有ê，kan-ta kéng beh ti̍h主耶穌mah？我teh想beh hō͘ I歡喜，á是時常想beh kap I辯論？我有將屬tī主ê時間the̍h去做hiah-ê無正當ê社交活動á無？ |
|
3. Siōng-tè Khòaⁿ Góa Ê Lêng-siu Seng-oa̍h Cháiⁿ-iūⁿ?
|
3. 上帝看我Ê靈修生活CHAIⁿN2樣？ |
|
Góa kiám ū ēng kàu-gia̍h ê sî-kan tī ba̍t-pâng kap I kau-pôe? Kap Chú Iâ-so͘ kau-pôe ê sî góa ū kám-kak--tio̍h tiⁿ-bi̍t á-bô? Iâ-so͘ ū oân-choân boán-chiok góa ê sim á-bô?
|
我kiám有用夠額ê時間tī ba̍t-pâng kap I交陪？Kap主耶穌交陪ê時我有感覺--tio̍h甜蜜á無？耶穌有完全滿足我ê心á無？ |
|
Góa ū teh gián-kiù Siōng-tè ê Ōe á-bô? Tī ba̍t-pâng ni̍h, á-sī chí-ū tī kàu-hōe ê chá-keng-hōe? Chú ū chiong I ê ò-biāu khé-sī góa á-bô? Góa m̄-chai ū khak-si̍t khîⁿ-tiâu I ê èng-ún chòe góa ê hok-khì á-bô?
|
我有teh研究上帝ê話á無？Tī ba̍t-pâng ni̍h，á是只有tī教會ê早經會？主有將I ê奧妙啟示我á無？我m̄知有確實khîⁿ-tiâu I ê應允做我ê福氣á無？ |
|
Tī góa seng-oa̍h ū put-sî teh kî-tó á-bô? Góa ê kî-tó ū tit-tio̍h I ê èng-ún mah? Góa kiám ū teh ha̍k-si̍p tio̍h cháiⁿ-iūⁿ kî-tó? Góa ū ēng chin-si̍t ê sim kî-tó á-bô? Góa ê kî-tó ū kong-hāu mah? Tùi góa lâi kóng, kî-tó sī chi̍t-hāng chin-si̍t koh tiōng-iàu ê tāi-chì mah?
|
Tī我生活有不時teh祈禱á無？我ê祈禱有得tio̍h I ê應允mah？我kiám有teh學習tio̍h cháiⁿ樣祈禱？我有用真實ê心祈禱á無？我ê祈禱有功效mah？對我來講，祈禱是chi̍t項真實koh重要ê tāi-chì mah？ |
|
4. Siōng-tè Khòaⁿ Góa Ê Lêng-sèng Chìn-pō͘ Cháiⁿ-iūⁿ?
|
4. 上帝看我Ê靈性進步Cháiⁿ樣？ |
|
Tùi sio̍k-lêng ê sū, góa kiám ū pí kū-nî khah chìn-pō͘ mah? Góa sī chi̍t ê tióng-tōa ê Ki-tok-tô͘ mah? Góa kin-nî ê chêng-hêng kiám ū pí kū-nî koh-khah hó? Tùi góa lâi kóng, Iâ-so͘ ū koh-khah chin-si̍t? Pêng-iú kiám ōe khòaⁿ-chhut góa kap í-chêng bô kāng ê só͘-chāi? Góa loán-jio̍k sio̍k hiat-khì ê sit-pāi, kiám ū teh siau-bô͘, hō͘ Sèng Sîn só͘ kiat ê ké-chí tī góa ê sin-chiūⁿ teh ke-thiⁿ á-bô?
|
對贖靈ê事，我kiám有比舊年khah進步mah？我是chi̍t ê長大ê基督徒mah？我今年ê情形kiám有比舊年koh-khah好？對我來講，耶穌有koh-khah真實？朋友kiám ōe看出我kap以前無kāng ê所在？我軟弱贖hiat去ê失敗，kiám有teh消磨，hō͘聖神所結ê果子tī我ê身chiūⁿ teh加添á無？ |
|
Teh tí-tng chōe-ok, te̍k-pia̍t sī khah-ōe tîⁿ-pòaⁿ góa ê chōe, tī chit hāng sū góa ū teh chìn-pō͘ á-bô? Í-chêng bat khah-iâⁿ góa ê chōe, taⁿ tī hiān-kim góa ū khah-iâⁿ á-bô? Góa kiám ū teh siūⁿ beh tùi hit ê chōe-ok tit-tio̍h tháu-pàng? Iáu ū sím-mi̍h sim só͘ ì-ài ê ngó͘-siōng tì-kàu chiong Chú ê koân-lêng, pêng-an, thiàⁿ-thàng, kap tông-chāi lóng kū-choa̍t tī sim-gōa á-bô?
|
Teh tí-tng罪惡，特別是khah-ōe纏絆我ê罪，tī chit項事我有teh進步á無？以前bat khah贏我ê罪，taⁿ tī現今我有khah贏á無？我kiám有teh想beh對hit ê罪惡得tio̍h tháu放？Iáu有sím-mi̍h心所意愛ê偶像致到將主ê權能、平安、疼thàng，kap同在lóng拒絕tī心外á無？ |
|
Lán siông-siông chòe kan-chèng kóng, Chú Iâ-so͘ si̍t-chāi hō͘ góa boán-chiok. Chóng-sī lán kiám ōe thang hoán-tńg lâi mn̄g kóng: Chú ū khòaⁿ góa chòe boán-chiok á-bô? Tē-it iàu-kín ê, chiū-sī Chú tùi lán ê khòaⁿ-hoat. Lán ū hō͘ I kám-kak tio̍h sit-bāng? Á-sī lán sî-siông hō͘ I hoaⁿ-hí?
|
Lán常常做kan證講，主耶穌實在hō͘我滿足。總是lán kiám ōe thang反tńg來問講：主有看我最滿足á無？第一要緊ê，就是主對lán ê看法。Lán有hō͘ I感覺tio̍h失望？Á是lán時常hō͘ I歡喜？ |
|
Tàu-tí Siōng-tè Khòaⁿ Góa Cháiⁿ-iūⁿ?
|
到底上帝看我Cháiⁿ樣？ |
