Pîn-tōaⁿ ê chháu-meh
|
貧憚ê 草蜢 |
| Bô Chù-bêng |
無注明 |
|
(Chháu-nî kong)
|
（草泥公） |
|
Chháu-meh kap káu-hiā-á sī hó pêng-iú, chhun-thiⁿ ê sî, in siông-siông chòe-hóe tī chháu-po͘, tī hoe-hn̂g ni̍h thit-thô, thiàu-bú.
|
草猛kap káu蟻仔是好朋友，春天ê時，in常常做伙tī草埔，tī花園--ni̍h thit-thô、跳舞。 |
|
Ū chi̍t-ji̍t, in thit-thô kah chin sim-sek ê sî, chi̍t chiah Káu-hiā kong lâi kā in kóng: “Chím-má sī joa̍h thiⁿ, lín thang chīn-liōng thit-thô, m̄-kú tio̍h ē-kì-tit, kàu chhiu-thiⁿ tio̍h ài chòe kang oh.”
|
有一日，in thit-thô kah真心適ê時，一隻káu蟻公來kā in講：「Chím-má是熱天，lín thang盡量thit-thô,m̄-kú著會記--得，到秋天著ài做工oh。」 |
|
Chháu-meh thiaⁿ liáu kóng: “Góa chiah bô beh khì chòe kang leh, lí khòaⁿ, choân tē-bīn chiūⁿ lóng sī chia̍h-mi̍h, sī án-chóaⁿ tio̍h ài chòe kang?”
|
草猛聽了講：「我才無beh去做工--leh，你看，全地面上攏是食物，是án-chóaⁿ著ài做工？」 |
|
Joa̍h-thiⁿ kè-khì, thiⁿ-khì chiām-chiām liâng-léng, káu-hiā-á chai-iáⁿ tang-thiⁿ teh beh kàu, chiū kā chháu-meh kóng: “Pêng-iú ah, hiān-chāi sī chhiu-thiⁿ lah, choh-sit lâng lóng teh siu-koah, thô͘-kha la̍k chin chōe ngó͘-kok, lán khah kín lâi khì khioh tńg-lâi khǹg tòa thô͘-khang, thang chún-pī kè chit ê tang-thiⁿ.”
|
熱天過--去，天氣漸漸涼冷，káu蟻仔知影冬天teh beh到，就kā草猛講：「朋友--ah！現在是秋天--lah！作穡人攏teh收割，塗腳落真濟五穀，咱較緊來去拾轉來囥tòa塗空，thang準備過這個冬天。」 |
|
Chháu-meh iô thâu, koh cháu khì thit-thô. Káu-hiā-á chiū ka-kī khì chòe kang, thong-ji̍t bô hioh-khùn, poaⁿ mi̍h-kiāⁿ.
|
草猛搖頭，koh走去thit-thô。Káu蟻--仔就家己去做工，通日無歇睏，搬物件。 |
|
Tang-thiⁿ kàu lah, chhiū-ba̍k lóng ko͘-ta khì, chháu-meh-á kiâⁿ-lâi kiâⁿ-khì lóng chhē bô chia̍h-mi̍h, kôaⁿ koh iau, i siūⁿ beh khì chhē káu-hiā-á thó chi̍t-kóa chia̍h-mi̍h, nā-sī káu-hiā ê khang-chhùi hō͘ tōa hong-seh khàm-ba̍t lah, hit àm, chháu-meh kôaⁿ sí lah.
|
冬天到--lah，樹木攏枯礁去，草猛仔行來行去攏chhē無食物，寒koh枵，伊想beh去chhē狗蟻仔討一寡食物。但是káu蟻ê空嘴hō͘大風雪蓋密--lah，hit暗，草猛寒死--lah。 |
|
(“Iâ-so͘ ê giân-hêng”, 1969, ia̍h 12-13 )
|
(《耶穌ê言行》1969，頁12-13) |
