In-ūi góa bô chiap-siū
|
因為我無接受 |
| Bô Chù-bêng |
無注明 |
|
Í-chêng tī Bí-kok ū chi̍t ê siàu-liân lâng, in-ūi thâi lâng, siū phòaⁿ sí-hêng, in kò͘-hiong ê lâng, lóng thè i kám-kak bô chhái, iáu hiah ni̍h siàu-liân, chiū hō͘ lâng phòaⁿ sí-hêng, só͘-í ū lâng thê-gī tio̍h pó i chhut lâi.
|
以前tī美國有一個少年人，因為thâi人，受判死刑，in故鄉ê人，攏替伊感覺無采，iáu hiah-ni̍h少年，就hō͘人判死刑，所以有人提議著保伊出來。 |
|
Chhī-tiúⁿ the̍h siâⁿ-lāi ê lâng só͘ chhiam ê miâ-phō͘, kàu kaⁿ-ga̍k khì kìⁿ chit ê siàu-liân lâng, kiò i tǹg ìn-á, piáu-sī chiap-siū in ê pó-chèng, pó-chèng chhut-lâi í-āu bô beh koh chòe pháiⁿ tāi-chì, nā-sī chit ê siàu-liân lâng bô beh kìⁿ i, m̄ chai-iáⁿ i chiū-sī chhī-tiúⁿ, sī beh lâi kiù i ê. Só͘-í tōa-siaⁿ jióng kóng: “Kā góa chhut khì”.
|
市長提城內ê人所簽ê名簿，到監獄去見這個少年人，叫伊tǹg印仔，表示接受in ê保證，保證出來以後無beh koh做歹代誌。但[tān]是這個少年人無beh見伊，m̄知影伊就是市長，是beh來救伊--ê。所以大聲嚷講：「Kā我出去」。 |
|
Chhī-tiúⁿ jím-nāi koh kā i kóng: “Góa ū chi̍t-hāng hó mi̍h beh hō͘ lí khòaⁿ, chhiáⁿ lí khòaⁿ māi leh.”
|
市長忍耐koh kā伊講：「我有一項好物beh hō͘你看，請你看māi--leh。」 |
|
“Góa bô ài khòaⁿ.” Siàu-liân lâng kū-choa̍t chhī-tiúⁿ ê hó ì, chhī-tiúⁿ chiū tńg-khì.
|
「我無ài看。」少年人拒絕市長ê好意，市長就轉--去。 |
|
Āu-lâi koán-lí-oân lâi kā siàu-liân lâng kóng: “Tú-chiah hit ê sī chhī-tiúⁿ, i beh lâi pó lí chhut khì, lí ū tǹg ìn-á bô?” Thiaⁿ chit kù ōe, siàu-liân lâng chin siong-sim pài-thok koán-lí-oân koh chhiáⁿ chhī-tiúⁿ lâi, nā-sī chhī-tiúⁿ bô ài chhap i lah.
|
後來管理員來kā少年人講：「Tú-chiah hit個是市長，伊beh來保你出去，你有tǹg印仔--無？」聽這句話，少年人真傷心拜託管理員koh請市長來，但是市長無ài chhap伊--lah。 |
|
(“Iâ-so͘ ê giân-hêng”, 1969, ia̍h 93 )
|
(《耶穌ê言行》1969，頁93) |
