M̄ thiaⁿ ōe ê thò͘-á
|
M̄聽話ê兔仔 |
| Lîm Êng-kiat |
林榮吉 |
|
Tī chá-chêng ū chi̍t chiah m̄ thiaⁿ ōe ê thò͘-á, i ê miâ kiò-chòe Pí-tek. I kap i ê ma-ma, saⁿ ê hiaⁿ-ko tòa tī chi̍t ê chhiū-nâ-lāi. Ū chi̍t ji̍t thò͘-á ma-ma kā i kap i saⁿ ê hiaⁿ-ko kóng, “Ma-ma beh khì bóe mi̍h, lín tio̍h koai-koai tiàm chhù, m̄-thang cháu chhut-khì gōa-bīn thit-thô, iā m̄-thang khì chhài-hn̂g-á, lín ê pa-pa, chiū-sī cháu-khì chhài-hn̂g, chiah hō͘ chèng chhài ê a-peh lia̍h khì chòe bah-piáⁿ, só͘-í lín lóng m̄-thang khì,” thò͘-á ma-ma kóng liáu, chiū the̍h nâ-á chhut-khì.
|
Tī早前有一隻m̄聽話ê兔仔，伊ê名叫做彼得。伊kap伊ê媽媽、3個兄哥tòa tī一個樹林內。有一日兔仔媽媽kā伊kap伊三個兄哥講：「媽媽beh去買物，lín著乖乖tiàm厝，m̄-thang 走出去外面thit-thô,也m̄-thang去菜園仔，lín ê爸爸，就是走去菜園，才hō͘種菜ê阿伯掠去做肉餅，所以lín攏m̄-thang去。」兔仔媽媽講了，就提籃仔出--去。 |
|
Pí-tek ê saⁿ ê hiaⁿ-ko, lóng chin gâu thiaⁿ ma-ma ê ōe, tī chhù-ni̍h thit-thô, chí-ū Pí-tek, i khòaⁿ-kìⁿ ma-ma chhut-khì, i chiū tùi āu-bīn ê mn̂g cháu chhut-khì, tùi lî-pa-piⁿ cháu khì chhài-hn̂g ni̍h. I tī chhài-hn̂g ni̍h khòaⁿ-kìⁿ chin-chōe hó chia̍h ê tāu-á, chhài-thâu, chhài, i chin hoaⁿ-hí, chiū bán tāu-á chia̍h, chia̍h liáu chiū koh bán chhài-thâu, tng i beh koh bán chhài lâi chia̍h ê sî, tú-hó hō͘ chèng chhài ê a-peh-ah khòaⁿ-kìⁿ. Hit ê a-peh-ah chin siū-khì, chiū chi̍t chhiú the̍h pê-á, chi̍t bīn tōa siaⁿ hoah, koh cháu chin kín beh lia̍h Pí-tek. Pí-tek khòaⁿ chi̍t-ē chin kiaⁿ, kóaⁿ-kín ti̍t-ti̍t cháu, m̄-kú cháu-lâi cháu-khì khah cháu to cháu bô lō͘, iā chhē bô chhut mn̂g, cháu chi̍t-ē liân i ê sin ôe-á, iā cháu kàu bô khì. I koh cháu chin kín. A-peh-ah iā tùi āu-bīn ti̍t-ti̍t jip--lâi, bô phah-sǹg, Pí-tek sòa khì lòng tio̍h chi̍t ê thi̍h-bāng-á. I hit niá sin ê saⁿ sòa hō͘ thi̍h-bāng-á kê-tiâu lah! Pí-tek chin kiaⁿ, in-ūi a-peh-ah tùi āu-bīn jip-lâi lah! I chiū tōa siaⁿ háu.
|
彼得ê 3個兄哥，攏真gâu聽媽媽ê話，tī厝--ni̍h thit-thô,只有彼得，伊看見媽媽出--去，伊就tùi後面ê門走--出去，tùi籬笆邊走去菜園--ni̍h。伊tī菜園--ni̍h看見真濟好食ê豆仔、菜頭、菜，伊真歡喜，就挽豆仔食，食了就koh挽菜頭，當伊beh koh挽菜來食ê時，tú好hō͘種菜ê阿伯--ah看見。Hit個阿伯--ah真受氣，就一手提耙仔，一面大聲喝，koh走真緊beh掠彼得。彼得看一下真驚，趕緊直直走，m̄-kú走來走去khah走都走無路，也chhē無出門，走一下連伊ê新鞋仔，也走到無--去。伊koh走真緊。阿伯--ah也tùi後面直直jip--來，無扑算，彼得續去lòng著一個鐵網仔。伊hit領新ê衫續hō͘鐵網仔kê-tiâu-- lah！彼得真驚，因為阿伯--ah tùi後面 jip--來--lah！伊就大聲哮。 |
|
I háu ê siaⁿ hō͘ saⁿ chiah chiáu-á thiaⁿ tio̍h, hit saⁿ chiah chiáu-á chiū pe lâi kā i kóng, “M̄-thang háu, lí khah tōa la̍t chi̍t-ē, saⁿ chiū ōe giú khí-lâi lah.”
|
伊哮ê聲hō͘ 三隻鳥仔聽著，hit三隻鳥仔就飛來kā伊講：「M̄-thang哮，你較大力一下，衫就會giú--起來--lah。」 |
|
Pí-tek chiū kóaⁿ-kín khah tōa la̍t giú chi̍t-ē, tú-hó a-peh-ah cháu kàu ūi ê sî, Pí-tek giú i ê saⁿ khí-lâi lah! M̄-kú i ê sin saⁿ, giú chi̍t-ē sòa phòa-phòa khì.
|
彼得就趕緊較大力giú--一下，tú-hó阿伯--ah走到位ê時，彼得giú伊ê衫起--來-lah！M̄-kú伊ê新衫，giú一下煞破破去。 |
|
A-peh-ah lia̍h i bô tio̍h, chin siū-khì chiū beh koh lia̍h, chóng-sī Pí-tek í-keng cháu chin hn̄g lah! I khòaⁿ-kìⁿ chit ê tháng-á, hit ê tháng-á lāi-bīn ū tóe chúi, in-ūi a-peh-ah tùi āu-bīn jip-lâi lah! Bô hoat-tō͘. I chiū thiàu ji̍p-khì tháng-á lāi-bīn bi̍h, hit ê a-peh-ah oa̍t chi̍t-ē thâu, sòa m̄-chai Pí-tek cháu khì sím-mi̍h só͘-chāi. I chiū sì-kòe chhē, chhē-lâi chhē-khì lóng chhē bô, kè chi̍t-ē-á, a-peh-ah thiaⁿ-kìⁿ ha-chhiùⁿ, ha-chhiùⁿ ê siaⁿ, in-ūi Pí-tek tī tháng-á-lāi hō͘ chúi chìm chin kú lah! I chin kôaⁿ.
|
阿伯--ah掠伊無著，真受氣就beh koh掠，總--是彼得已經走真遠--lah！伊看見一個桶仔，hit個桶仔內面有té水，因為阿伯--ah tùi後面jip--來-lah！無法度。伊就跳入去桶仔內面bi̍h。Hit個阿伯--ah 越一下頭，煞m̄知彼得走去甚mi̍h所在。伊就四界chhē,chhē來chhē去攏chhē無，過一下仔，阿伯--ah聽見「ha-chhiùⁿ ha-chhiùⁿ」ê 聲，因為彼得tī桶仔內hō͘水浸真久--lah！伊真寒。 |
|
A-peh-ah thiaⁿ-tio̍h ha-chhiùⁿ ê siaⁿ, chai-iáⁿ i bi̍h tī tháng-á lāi-bīn, chiū oa̍t-tńg-sin beh lia̍h i, chóng-sī Pí-tek í-keng thiàu-cháu lah! A-peh-ah lia̍h bô tio̍h. I í-keng chin siān, i chiū bô ài koh jip Pí-tek, Pí-tek chiū-sī koh cháu chin kín, nā-sī i lóng chhē bô chhut lō͘.
|
阿伯--ah聽著ha-chhiùⁿ ê聲，知影伊bi̍h tī桶仔內面，就越轉身beh掠--伊，總--是彼得已經跳走--lah！阿伯--ah掠無著。伊已經真siān,伊就無ài koh jip彼得，彼得就是koh走真緊，但是伊攏chhē無出路。 |
|
Āu-lâi i tú-tio̍h chi̍t chiah niáu-chhú-á, i chiū mn̄g i, mn̂g tī sím-mi̍h só͘-chāi.
|
後--來伊tú著一隻老鼠仔，伊就問伊，門tī甚mi̍h所在？ |
|
Niáu-chhú iô-thâu kóng, “M̄-chai.”
|
老鼠搖頭講：「M̄知。」 |
|
I koh tú-tio̍h chi̍t chiah niau-á, niau-á iā kóng m̄-chai, Pí-tek thiaⁿ chi̍t-ē sòa háu chhut-lâi.
|
伊koh tú著一隻貓仔，貓仔也講m̄知，彼得聽一下續哮--出來。 |
|
I m̄-chai án-chóaⁿ tńg-khì i ê chhù, āu-lâi chiah chhē tio̍h chi̍t ê lî-pa khang, i chiū tùi hit ê lî-pa khang Ǹg kè-khì, kiâⁿ tńg-khì i ê chhù, i chin siān, chhin-chhiūⁿ bô la̍t thang kiâⁿ lah! I tńg-khì kàu chhù, ma-ma khòaⁿ tio̍h Pí-tek bô chhēng ôe-á, koh hit niá sin ê saⁿ iā phòa-phòa khì lah. Ma-ma chin siū-khì, in-ūi Pí-tek í-keng bô khì chin-chōe ê saⁿ kap ôe lah!
|
伊m̄知án-chóaⁿ轉去伊ê厝，後--來才chhē著一個籬笆空，伊就tùi hit 個籬笆空Ǹg--過去，行轉去伊ê厝，伊真siān,親像無力thang行--lah！伊轉去到厝，媽媽看著彼得無穿鞋仔，koh hit領新ê衫也破破去--lah。媽媽真受氣，因為彼得已經無去真濟ê衫kap鞋--lah！ |
|
Hit ê-hng Pí-tek sòa phòa-pīⁿ, koh hoat sio, ma-ma chiū hō͘ i tó tī chhn̂g-ni̍h hioh-khùn, koh ēng io̍h-á hō͘ i chia̍h. Tng Pí-tek teh chia̍h io̍h-á ê sî, i saⁿ ê hiaⁿ-ko tú-tú teh chia̍h ma-ma bóe ê hó-chia̍h mi̍h, in lóng chia̍h kàu chin hoaⁿ-hí, chí-ū Pí-tek bô chia̍h. Pí-tek chai i sī bô thiaⁿ ma-ma ê ōe chiah ōe án-ni, tùi hit pái khí, Pí-tek chiū m̄-káⁿ koh bô thiaⁿ ma-ma ê ōe, i chiū chòe chi̍t ê chin koai koh thiaⁿ ōe ê lah.
|
Hit e昏彼得煞破病，koh發燒，媽媽就hō͘伊倒tī床--ni̍h歇睏，koh用藥仔hō͘ 伊食。當彼得teh食藥仔ê時，伊3個兄哥tú-tú teh食媽媽買ê好食物，in攏食到真歡喜，只有彼得無食。彼得知伊是無聽媽媽ê話才會án-ni,tùi hit擺起，彼得就m̄敢koh無聽媽媽ê話，伊就做一個真乖koh聽話--ê lah。 |
|
（Lú-soan Ge̍h-khan Tē 78 kî, 1966 nî 6 ge̍h)
|
（女宣月刊第78期，1966年6月） |
