Se-lô-a ê tî_01
|
西羅亞ê池_01 |
|---|---|
| Phian-chip-sek | 編輯室 |
|
（Ōe ke̍k)
|
（話劇） |
|
Jîn-bu̍t :
|
人物： |
|
Chhiⁿ-mî lâng.
|
青瞑人。 |
|
Kè-lō͘ lâng A, B, C, D, E.
|
過路人A，B，C，D， E。 |
|
Hoat-lī-sài lâng 1, 2, 3.
|
法利賽人1，2，3。 |
|
Chhiⁿ-mî lâng ê lāu-pē.
|
青瞑人ê老父。 |
|
Kî-thaⁿ kûn-chiòng.
|
其他群眾。 |
|
Sî-kan :Iâ-so͘ chāi sè tiong.
|
時間：耶穌在世中。 |
|
Só͘-chāi :Iâ-lō͘-sat-léng siâⁿ-gōa, Se-lô-a tî piⁿ. Keh chi̍t tiâu nāu-jia̍t ê lō͘ ê hit pêng, ū chin chheng ê Se-lô-a tî. Tī tî piⁿ ū hoat chi̍t jiah chi̍t jiah ê lô͘-úi. Tùi chia khòaⁿ kè-khì ū Iâ-lō͘-sat-léng ê sèng-tiān, hit ê pe̍h-sek chiò tio̍h thài-iông ōe hoán-siā. Sī chēng-chēng chhun-thīⁿ ê chá-khí-sî.
|
所在：耶路撒冷城外，西羅亞池邊。隔一條鬧熱ê路ê hit爿，有真清ê西羅亞池。Tī池邊有發一跡一跡ê蘆葦。Tùi chia看--過去有耶路撒冷ê聖殿，hit 個白色照著太陽會反射。是靜靜春天ê早起時。 |
|
Bō͘ khui
|
幕 開 |
|
Chhiⁿ-mî lâng koáiⁿ-á tok-leh tok-leh, tùi chiàⁿ-pêng teng-tiûⁿ.
|
青瞑人枴仔tok--leh tok--leh。tùi正爿登場。 |
|
Chhiⁿ : O͘h ! Kàu lah, kàu lah, ū phīⁿ-tio̍h chin chēng ê chúi hiàn, (koáiⁿ-á tuh-leh kiâⁿ 2 ,3 pō͘) sòe-jī leh, m̄-thang chhū-tó. Chhiⁿ-mî lâng ēng koáiⁿ-á ûn-á tuh-leh tuh-leh kiâⁿ-óa tî piⁿ. Kè-lō͘ lâng tùi tò-pêng kóaⁿ kín khí-lâi.
|
青：O͘h！到--lah，到--lah，有鼻著真靜ê水hiàn,（枴仔tuh--leh行2，3步）細膩--leh，m̄ thang chhū--倒 。青瞑人用枴仔勻仔tuh--leh tuh--leh 行倚池邊。過路人tùi倒爿趕緊起--來。 |
|
Kè-lō͘ A : Lia̍h-chún sī siáⁿ lâng leh, tō sī pêng-sî tī sèng-tiān ê mn̂g-kháu teh kiû siá-sì ê khit-chia̍h. Tiàm chit ê tî piⁿ sô-lâi sô-khì, nā poa̍h lo̍h-khì leh.
|
過路A：掠準是啥人--leh，tō是平時tī聖殿ê門口teh求捨施ê乞食。Tiàm這個池邊sô來sô去，若跋--落去leh。 |
|
Chhiⁿ : To-siā, chin tùi put-chū, chhiáⁿ chhōa góa khah óa chúi-piⁿ leh, hó m̄?
|
青：多謝，真對不住，請chhōa我較倚水邊--leh，好--m̄? |
|
Kè-lō͘ B: Sī beh chhòng sím-mi̍h? Ba̍k-chiu chi̍t-ē bô khòaⁿ-kìⁿ, m̄-káⁿ teh siūⁿ beh chū-sat leh?
|
過路B：是beh創甚mi̍h？目珠一下無看見，m̄-káⁿ teh想beh自殺--leh？ |
|
Chhiⁿ : Chū-sat .... si̍t-chāi iā bat siūⁿ beh sí, chhin-chhiūⁿ chiah-ni̍h bô chū-iû, put5-jû sí-sí leh..... iā bat kúi-nā pái án-ni siūⁿ. Chóng-sī.
|
青：自殺……實在也bat想beh死，親像chiah-n̍i̍h無自由，不如死死--leh…也bat幾若擺án-ni想。總--是 |
|
Kè-lō͘ C: Iā taⁿ koat-tēng beh sí no͘h, iā sòa siūⁿ beh kiò goán kā lí an-pâi siān-āu ni̍h.
|
過路C：也今決定beh死--no͘h，也續想beh叫阮kā你安排善後--n̍i̍h。 |
|
Chhiⁿ : M̄-sī, m̄-sī, kin-á-ji̍t ê góa sī móa ū ǹg-bāng ê, chhiáⁿ lín khòaⁿ góa ê ba̍k-chiu leh.
|
青：M̄是，m̄ 是，今仔日ê我是滿有向望--ê,請lín看我ê 目珠--leh。 |
|
Kè-lō͘ A: (Kap B, C, saⁿ khòaⁿ, chhiò-chhiò kóng) án-choaⁿ, goán khòaⁿ leh.
|
過路A：（Kap B，C，相看，笑笑講）án-chióaⁿ，阮看--leh。 |
|
Kê-lō͘ C : Hǹg, he ba̍k-chiū m̄-chai kô͘ sím-mi̍h mi̍h?
|
過路C：Hǹg,he目珠m̄ 知糊甚mi̍h物？ |
|
Kè-lō͘ A : Ho͘N3, lō͘-kô͘-bê lah.
|
過路A：Ho͘N3，lō͘-kô͘糜--lah。 |
|
Chhiⁿ : Che sī Ná-sat-le̍k ê Iâ-so͘ kā góa kô͘ ê. Iā Iâ-so͘ kiò góa lâi Se-lô-a tî sóe, só͘-í kóaⁿ-kín ài sóe-sóe leh. Chhiáⁿ khah kín chhōa góa óa-khì chúi-piⁿ leh, pài-thok.
|
青：Che是那撒勒ê耶穌kā我糊--ê。也耶穌叫我來西羅亞池洗，所以趕緊愛洗洗--leh。請較緊chhōa我倚去水邊--leh，拜託。 |
|
Kè-lō͘ A: Hǹg, hō͘ Iâ-so͘8 kā lí kô͘ ê ò͘. M̄-kú Iâ-so͘ kiám ōe i-tī chhut-sì chiū bô khòaⁿ-kìⁿ ê chhiⁿ-mî lâng leh, ún-tàng sī teh an káu-sim no͘h!
|
過路A：Hǹg,hō͘耶穌kā你糊--ê ò͘。M̄-kú耶穌kiám會醫治出世就無看見ê青瞑人--leh，穩當是teh安狗心no͘h！ |
|
Kê-lō͘ C: Sī lah, ún-tàng sī án-ni lah. Iâ-so͘ sī siūⁿ kóng lí che bô hoat-tō͘ thang khòaⁿ-kìⁿ, só͘-í o͘-pe̍h kā lí kóng. Chin-chiàⁿ bô hoat-tō͘.
|
過路C：是--lah，穩當是án-ni--lah。耶穌是想講你che無法度thang看見，所以烏白kā你講。真正無法度。 |
|
Chhiⁿ: Chhiáⁿ lín m̄-thang án-ni kóng, góa chai Iâ-so͘ m̄-sī hit khoán pián-sian-á, chū-kàu-taⁿ I só͘ chòe ê sū lóng bô ū hit khoán bô iáⁿ chiah ê.
|
青：請lín m̄ thang án-ni講，我知耶穌m̄ 是hit款pián仙仔，自到今伊所做ê事攏無有hit款無影跡--ê。 |
|
Kè-lō͘ C: Òa--ah, lí ê ba̍k-chiu nā ōe khui, góa kam-goān tò-thâu-chai peh sèng-tiān ê gîm-á hō͘ lí khòaⁿ.
|
過路C：Òa--ah，你ê目珠若會開，我甘願倒頭栽peh聖殿ê gîm仔 hō͘你看。 |
|
Kè-lō͘ B: Bô tāi bô chì pìⁿ chit khoán pá-hì, lí nā bô jîn-khì, chòe khit-chiah chiū m̄-bián siūⁿ beh pun ū.
|
過路B：無代無誌變這款把戲，你若無人氣，做乞食就m̄ 免想beh分有。 |
|
Chhiⁿ : (Seng-khu chhoah chi̍t-ē). Bô iàu-kín, góa bô bōe kì-tit Iâ-so͘ só͘ kóng ê ōe (kha chhip-leh chhip-leh, sòa àⁿ lo̍h-khì ēng 4 kha chhip óa khì chúi-piⁿ).
|
青：（身軀chhoah一下）。無要緊，我無bōe記得耶穌講ê話（腳chhip--leh chhip--leh ，續àⁿ落去用4腳chhip倚去水邊）。 |
|
Kè-lō͘ A: Hà ! Sòa teh khí khong.
|
過路A：Hà!續teh起khong。 |
|
Kê-lō͘ B: Sí sîn teh chhē i.
|
過路B：死神teh chhē伊。 |
|
Kê-lō͘ C: Ah ! ah ! ōe chhū lo̍h-khì chúi lāi. Chhiⁿ-mî lâng hò͘ chúi sóe ba̍k-chiu.
|
過路C：Ah ! ah ! 會chhū--落去水內。青瞑人hò͘水洗目珠。 |
|
Kê-lō͘ B: Chin chhut-la̍t teh sóe.
|
過路B：真出力teh洗。 |
|
Kê-lō͘ C: Hà, bô hoat-tō͘. Chhiⁿ-mî lâng hiông-hiông peh khí-lâi, chhut hoaⁿ-hí ê siaⁿ.
|
過路C：Hà,無法度。青瞑人雄雄peh--起來，出歡喜ê聲。 |
|
Chhiⁿ: Ah! ū khòaⁿ-kìⁿ, ū khòaⁿ-kìⁿ, ba̍k-chiu ū khòaⁿ-kìⁿ (peh khí-lâi thiàu, cháu kàu tī tiong-ng, kha thí-khui, chhiú kia̍h koâiⁿ, khòaⁿ thiⁿ, kî-û ê lâng lóng gông-ngia̍h). Hò͘! chiah ni̍h súi, he chiū-sī thiⁿ ò͘ (kí chêng-āu, chó-iū) he chiū-sī chháu-po͘ ò͘ ! Hiah-ni̍h súi ê sek, hit ê koâiⁿ-koâiⁿ ê só͘-chāi chiū-sī soaⁿ! Ū khòaⁿ-kìⁿ, ū khòaⁿ-kìⁿ, (hiông-hiông hoat-kiàn ka-kī, khòaⁿ ka-kī ê chhiú),che sī sím-mi̍h! o͘h, sī chhiú (mn̄g kè-lō͘ lâng), sī m̄? Che sī chńg-thâu-á, 1,2, 3 ,4....ū 10 ki (kha kia̍h koâiⁿ) che sī kha, án-ni chi̍t-pō͘ thang kiâⁿ (chhiú hìⁿ-leh, hìⁿ-leh kiâⁿ-lâi kiâⁿ-khì).
|
青：Ah ! 有看--見，有看--見，目珠有看--見（peh起來跳，走到tī中央，腳thí 開，手kia̍h懸，看天，其餘ê人攏gông-ngia̍h ）Hò͘!chiah n̍i̍h súi,he就是天ò͘(kí前後，左右）he就是草埔ò͘!Hiah-n̍i̍h súi ê色，hit ê 懸懸ê所在就是山！有看--見，有看--見，（雄雄發見家己，看家己ê手），che是甚mi̍h！o͘h，是手（問過路人），是--m̄?Che是chńg頭仔，1，2，3，4…有10支（腳kia̍k懸）che是腳，án-ni一步thang行（手hìⁿ --leh，hìⁿ--leh行來行去）… |
|
Hoat-lī-sài 3 lâng tùi chiàⁿ-pêng khí-lâi, khiā teh khòaⁿ hit ê chhiⁿ-mî lâng.
|
法利賽3人tùi正爿起--來，企teh看hit ê青瞑人。 |
|
Hoat 1 : (Hiông-hiông kiâⁿ óa-khì, tùi chhiú lia̍h--teh). Tiām-tiām, lí sī siáⁿ-lâng. Kin-á-si̍t sī an-hioh-ji̍t, tòa chit lō͘-ni̍h tiô-lâi tiô-khì, chin bô kín-sīn.
|
法1：（雄雄行倚--去，對手掠--teh）。恬恬，你是啥人。今仔日是安歇日，tòa chit路--n̍i̍h tiô來tiô去 ，真無謹慎。 |
|
Chhiⁿ : (Hō͘ lâng hoah chi̍t-ē, sòa pháiⁿ-sè pháiⁿ-sè, chóng-sī chin hoaⁿ-hí). Sian-siⁿ, góa in-ūi chin hoaⁿ-hí, hoaⁿ-hí kàu bōe kò͘-tit.
|
青：（Hō͘人喝一下，續歹勢歹勢，總--是真歡喜）。先生，我因為真歡喜，歡喜到bōe顧--tit。 |
|
Hoat 2 : Sī teh hoaⁿ-hí sím-mi̍h, tī an-hioh-ji̍t án-ni chòe sī hoān lu̍t-hoat ê.
|
法2：是teh歡喜甚mi̍h，tī安歇日án-ni做是犯律法--ê。 |
|
Hoat3: Ōe hông-hāi kau-thong.
|
法3：會妨害交通。 |
|
Chhiⁿ : Góa m̄-sī teh tiô-thiàu, sī ba̍k-chiu tit khòa-kìⁿ teh hoaⁿ-hí.
|
青：我m̄ 是teh tiô跳，是目珠得看--見teh歡喜。 |
|
Hoat 2 : O͘-pe̍h kóng, thiⁿ-kng ba̍k-chiu chiū khòaⁿ-kìⁿ sī eng-kai ê, hoān lu̍t-hoat chiū-sī hoān-chōe, beh kò tī gī-hōe ô͘.
|
法2：烏白講，天光目珠就看--見是應該--ê,犯律法就是犯罪，beh告tī議會ô͘。 |
|
Chhiⁿ: Góa kàu thâu-tú-á sī chhiⁿ-mî lâng , iā hiān-kim tit-tio̍h khòaⁿ-kìⁿ.
|
青：我到頭tú仔是青瞑人，也現今得著看見。 |
|
Hoat 2 : Sím-mi̍h, kóng hit hō bô ê (tùi chèng-lâng) lín tāi-ke, chit ê kiám chin-chiàⁿ ū chhiⁿ-mî?
|
法2：甚mi̍h，講hit號無--ê(對眾人）lín逐家，這個 kiám真正有青瞑？ |
|
Kè-lō͘ A: (Ta̍h chi̍t pō͘ chìn-chêng). Sī, kàu tú-á i si̍t-chāi sī chhiⁿ-mî.
|
過路A：（踏一步進前）。是，到tú仔實在是青瞑。 |
|
Kè-lō͘ B : Cha-hng iáu chē tī sèng-tiān ê mn̂g teh kiû-khit.
|
過路B：昨昏iáu 坐tī聖殿ê門teh求乞。 |
|
Hoat 3 : Nā kóng án-ni, ná chhin-chhiūⁿ bat khòaⁿ-kìⁿ. (Tùi chhiⁿ-mî lâng)iā sī thài ōe liâm-piⁿ pìⁿ ū khòaⁿ-kìⁿ?
|
法3：若講án-ni，那親像bat看見。（對青瞑人）也是thài會liâm-piⁿ變有看--見？ |
|
Hoat 1 : Siông-sè kóng khòaⁿ-māi.
|
法1：詳細講看māi。 |
|
Chhiⁿ : Ū chi̍t ê kiò Iâ-so͘ ê, I chiong thô͘-bê kô͘ tī góa ê ba̍k-chiu, kiò góa lâi Se-lô-a ê tî khì sóe, só͘-í góa chiū án-ni chòe, iā chiū tit-tio̍h khòaⁿ-kìⁿ. Hoat-lī-sài lâng tāi-ke saⁿ khòaⁿ, tiām-tiām. Chhiⁿ-mî lâng m̄-kam m̄-kam khioh koáiⁿ-á khí-lâi, siūⁿ beh-thè tiûⁿ.
|
青：有一個叫耶穌--ê,伊將塗糜kô͘ tī我ê 目珠，叫我來西羅亞ê池去洗，所以我就án-ni做，也就得著看見。法利賽人逐家相看，恬恬。青瞑人m̄ 甘m̄ 甘拾枴仔起--來，想beh退場。 |
|
Hoat 1: Bān-chiah-sī, hit ê Iâ-so͘ tī tó-ūi?
|
法1：慢chiah是，hit 個耶穌tī tó位？ |
|
Chhiⁿ: Góa m̄-chai.
|
青：我m̄ 知。 |
|
Hoat 2: Nā bô láu-si̍t kóng, sī tùi lí put-lī ô͘.
|
法2：若無老實講，是對你不利ô͘。 |
|
Hoat 3: Lí sī kap Iâ-so͘ kiat-tóng teh phiàn lâng m̄!
|
法3：你是kap耶穌結黨teh騙--人m̄! |
|
Chhiⁿ : I sī tōa sian-ti, sian-ti lâng thái ōe phiàn lâng.
|
青：伊是大先知，先知人thái會騙--人。 |
|
Hoat 2: Hǹg, lí ū tùi Iâ-so͘ tit-tio̍h chîⁿ ho͘N3 ?
|
法2：Hǹg,你有tùi耶穌得著錢ho͘N3？ |
|
Chhiⁿ : Tit-tio̍h pí kim-chíⁿ khah hó ê.
|
青：得著比金錢較好--ê。 |
|
Hoat 2: Tit-tio̍h sím-mi̍h?
|
法2：得著甚mi̍h？ |
|
Chhiⁿ: Siáⁿ-sū góa chhin-chhiūⁿ chōe-jîn teh siū sím-mn̄g? Pí kim-chîⁿ khah hó ê chiū-sī khui góa ê ba̍k-chiu.
|
青：啥事我親像罪人teh受審問？比金錢較好--ê就是開我ê 目珠。 |
|
Hoat 3: Hit ê Iâ-so͘ sī bô siú lu̍t-hoat--ê, hit khoán lâng m̄-sī sian-ti.
|
法3：Hit個耶穌無守律法--ê,hit款人m̄是先知。 |
|
Chhiⁿ: Iâ-so͘ kiám án-ni. Kiám-chhái án-ni kóng sī sit-lé, góa khòaⁿ lín sī chin chū-ko ê. Iâ-so͘ tek-khak m̄-sī hit khoán lâng. I chin jîn-chû, chhin-chhiūⁿ góa chit khoán khit-chia̍h, lâng I iā ēng chhiú kiáu thô͘ kā góa kô͘.
|
青：耶穌kiám án-ni。Kiám-chhái án-ni講是失禮，我看lín是真自高--ê,耶穌的確m̄是hit款人。伊真仁慈，親像我這款乞食，人伊也用手攪塗kā我kô͘。 |
|
Hoat 2: Lí sī tùi goán Hoat-lī-sài tóng beh hoán-khòng m̄?
|
法2：你是對阮法利賽黨beh反抗--m̄? |
|
Chhiⁿ: M̄-sī, m̄-sī, sī chiàu só͘ siūⁿ án-ni kóng nā-tiāⁿ. Tùi chiàⁿ-pêng í-keng ū hè ê chhiⁿ-mî lâng ê pē-bú saⁿ khan chhiú chhut-lâi, lóng sī chhēng bái-bái.
|
青：M̄是，m̄是，是照所想án-ni講nā-tiāⁿ。Tùi正爿已經有歲ê青瞑人ê父母相牽手出--來，攏是穿bái-bái。 |
|
Pē : O͘h ! lí thái ōe tī chia.
|
父：O͘h！你thái會tī chia。 |
|
Bú : Cha-mî lí sī khì tó-ūi? Iā bô tńg-lâi chhù-ni̍h, lín pa-pa kap góa thong mî bô khùn hoân-ló lí.
|
母：昨暝你是去tó位？也無轉來厝--ni̍h，lín爸爸kap我通暝無睏煩惱你。 |
|
Chhiⁿ: Ah, pa-pa, ma-ma, chhiáⁿ lín hoaⁿ-hí, góa ê ba̍k-chiu í-keng khòaⁿ-kìⁿ lah, chhut-sì kàu taⁿ thâu chi̍t pái khòaⁿ-tio̍h lín ê bīn. Bô ū pí chit ê khah hoaⁿ-hí ê.
|
青：Ah，爸爸，媽媽，請lín歡喜，我ê目珠已經看--見lah，出世到今頭一擺看著lín ê面，無有比這ê較歡喜--ê。 |
|
Pē: Sím-mi̍h, (khòaⁿ chhiⁿ-mî lâng ê bīn). O͘h! lí ê ba̍k-chiu tit-tio̍h khui, che chin kî-biāu!
|
父：甚mi̍h，（看青瞑人ê面）。O͘h！你ê目珠得著開，che真奇妙！ |
|
Bú: (Phō chhiⁿ-mī lâng) ba̍k-chiu tit-tio̍h khui (háu).
|
母：（抱青瞑人）目珠得著開（哮）。 |
