Chit-gia̍p kap Ka-têng_01
|
職業kap家庭_01 |
|---|---|
| Iû Chèng-gī | 尤正義 |
|
Pe̍h-ōe-jī ê Si-koa (Occupation and Home) Rev. Jonah Yu |
白話字詩歌 (Occupation and Home) Rev. Jonah Yu |
|
Sū-giân
|
序言 |
|
Chòe-kūn khòaⁿ-tio̍h chi̍t-pún teh beh chhut-pán ê chheh, “Chit-gia̍p kap Ka-têng”, sim hoaⁿ-hí lâi siá kúi-kù ê sū-giân chòe kài-siāu ê ì-sù. Chit-pún chheh ê chok-chiá sī chheng-liân iú-ûi ê Iû Chèng-gī Bo̍k-su, i ê lāu-pē Iû Chìn-lâi Sian-siⁿ chòe i-seng, tī Hēng-chhun khai-gia̍p kúi-nā cha̍p-nî kú, ū tōa lī-ek hit tōe-hng ê peh-sìⁿ kap kàu-hōe. I ê lāu-bú Hâu Pêng-an lú-sū sī Hâu Choân-sêng Sian-siⁿ ê tōa-chí, Iû Bo̍k-su chhut-sì tī chit khoán hó ê ka-têng, keng-kòe Tióng-êng tiong-ha̍k kap Tâi-oân tāi-ha̍k, chiah ji̍p Tâi-lâm Sîn-ha̍k-īⁿ pī-pān chòe Chú ê kang. Góa tī Tâi-lâm Sîn-ha̍k-īⁿ chip-kàu ê sî, ū kúi-nā nî kú tī kàu-sek-lāi kap Chèng-gī kun gián-kiù Sîn-ha̍k. I te̍k-pia̍t chhù-bī tī kàu-hōe le̍k-sú, chong-kàu kàu-io̍k kap Pe̍h-ōe-jī ê būn-tê. I pi̍t-gia̍p liáu bat tòa Jîn-bú kap Gî-lân ê kàu-hōe bo̍k-hōe, āu-lâi iā ū khì Ji̍t-pún gián-kiù Lông-chhoan thoân-tō ê būn-tôe, chòe-kūn i tùi Bí-kok gián-kiù “Kàu-hōe kap Siā-hōe” ê būn-tôe tò-lâi, ǹg-bāng i ōe thang chiong i só͘ ha̍k-si̍p ê lâi kòng-hiàn tī lán Tâi-oân ê kàu-hōe. Taⁿ i ū ūi-tio̍h lông-chhoan ê sìn-tô͘ kap Ki-tok-tô͘ ê ka-têng siá chit pún chheh, i ēng Pe̍h-ōe-jī siá, tàu-kù koh hó tha̍k hō͘ lâng tùi Pe̍h-ōe-jī ōe seⁿ-khí chhù-bī, tha̍k liáu khin-sang koh ū kàu-hùn, m̄ nā án-ni i iā ū hoan-e̍k chòe Tiong-bûn, hō͘ lán khòaⁿ liáu ì-sù koh khah chheng-chhó.
|
最近看著一本teh beh出版ê書「職業與家庭」，心歡喜來寫序言作介紹ê意思。這本冊ê作者是年青有為ê尤正義牧師，伊ê父親尤進來醫師tī 恆春開業幾若十年，對當地kap教會有極大ê貢獻。伊ê母親侯平安女士為侯全成先生ê大姊，尤牧師生世tī 這款好ê家庭中，經過長榮中學kap台灣大學，才入台南神學院備辦做主ê工。我tī台南神學院執教ê時，有幾若年久tī 教室內kap正義君研究神學。他特別趣味tī教會歷史、宗教教育kap白話字ê問題。伊畢業了bat tòa仁武kap宜蘭ê教會牧會，後來也有去日本研究農村傳道ê問題，最近伊tùi美國研究「教會kap社會」ê問題倒來，向望他會thang將伊所學習ê來貢獻tī 咱台灣ê教會。今他有為著農村信徒kap基督徒ê家庭寫這本冊，伊用白話字寫，tàu句koh好讀，hō͘人對白話字生起趣味，讀了輕鬆koh有教訓，m̄ 但án-ni伊也有翻譯做中文，hō͘ 咱看了意思koh較清楚。 |
|
Taⁿ ǹg-bāng chit pún chheh ōe lī-ek kok hong-bīn ê sìn-tô͘ ê ka-têng seng-oa̍h. Siá chiah ê lâi kài-siāu chit pún chheh ê lâi-goân.
|
今向望這本冊會利益各方面ê信徒ê家庭生活。寫chiah ê來介紹這本冊ê來源。 |
|
1965 nî Sèng-tàn-cheh Tâi-lâm Iûⁿ Sū-ióng siá (Tâi-lâm Sîn-ha̍k-īⁿ chiân-jīm kàu-siū) |
1965年聖誕節 台南 楊士養 寫 (台南神學院前任教授) |
|
Kài-siāu Ê Ōe
|
介紹ê話 |
|
Tē-jī sè-kí lán kàu-hōe ēng hok-im thoân-piàn ūn-tōng chò bo̍k-phiau, m̄-nā thoân-kàu-chiá tio̍h thoân, múi chi̍t ê sìn-tô͘ tī siā-hōe kok hong-bīn ê kang-chok kap tē-ūi iā tio̍h chīn sú-bēng, o̍h Chú lâi ūi lán chiu-ûi ê pêng-iú hōng-sū, saⁿ-kap ū hūn tī chit ê thoân-tō kiù lâng ê sū-kang.
|
第二世紀咱教會用福音傳遍做目標，m̄ 但傳教者著傳，每一位信徒tī 社會各方面ê工作kap地位也著盡使命，學主來為咱周遊奉事，相kap有份tī 這個傳道救人ê事工。 |
|
Chit pún chheh thâu chi̍t-pō͘ ê bo̍k-tek, chiū-sī beh pang-chān; choh-sit ê, thó-hî ê, chò kang lâng, pîn-bîn, hù-ong, i-seng, thâu-ke, téng chiah ê khah bêng-pe̍k tio̍h cháiⁿ-iūⁿ oân-sêng Siōng-tè só͘ thok-tiōng tiōng-tāi ê jīm-bū lâi êng-kng Chú.
|
這本冊頭一部ê目的，就是beh幫贊做穡ê、討魚ê、做工人、貧民、富翁、醫生、頭家等chiah ê,明白著怎樣完成上帝所託重重大ê任務來榮光主。 |
|
Tē-jī pō͘ sī koan-hē ka-têng, lán chai kàu-hōe sī tùi ka-têng lâi kò͘-sêng ê, só͘-í ū kiān-choân ê ka-têng chiah ū kiān-choân ê kàu-hōe, chóng-sī beh khí-chō chit khoán ê ka-têng kap kàu-hōe sī tùi múi chi̍t ê Ki-tok-tô͘ ū piáu-hiān Ki-tok ê seng-oa̍h: Sī-tōa thiàⁿ sī-sè, sī-sè kèng sī-tōa, lāi-bīn hô-khì ái-ái, ū sio̍k thiⁿ ê khì-hun, chá-àm ū lêng-siu kap ka-têng-lé-pài, só͘-í chò tiong-hu ê, á-sī chò hū-jîn-lâng ê, lāu-pē, lāu-bú, a-kong, hiaⁿ-tī, tāng-sāi, ta-ke, sim-pū téng kok lâng tio̍h chīn pún-hūn saⁿ-thiàⁿ-thàng saⁿ pang-chān saⁿ bián-lē lâi kiâⁿ thiⁿ-lō͘ kiàn-siat Siōng-tè ê kok tī tōe-n̍i̍h chhin-chhiūⁿ tī thiⁿ-n̍i̍h, chò kng chò iâm hō͘ chhù-piⁿ chá chi̍t-ji̍t kui Chú.
|
第二部是關係家庭，咱知教會是tùi家庭來構成--ê,所以有健全ê家庭才有健全ê教會，總是beh起造這款ê家庭kap教會是tùi每一個基督徒有表現基督ê生活。序大疼序細，序細敬序大，內面和氣靄靄，有屬天ê氣氛，早暗有靈修kap家庭禮拜，所以做丈夫--ê,抑是做婦人人ê,老父、老母、阿公、弟兄、同sāi、ta-ke、新婦等各人著盡本份，相疼痛、相幫贊、相勉勵來行天路建設上帝ê國tī地--n̍i̍h親像tī天--n̍i̍h,做光做鹽hō͘ 厝邊早日歸主。 |
|
Ǹg-bāng chit pún ê chok-phín si̍t-chāi ē chò tāi-ke chin tōa ê pang-chān.
|
向望這本ê作品實在會做大家真大ê幫贊。 |
|
Lú Soan Goe̍h-khan Chóng Phian-chhip Tâi-lâm Sîn-ha̍k-īⁿ Seng-oa̍h Chú-jīm Gô͘ Lâi-hó kèng-pit |
女宣月刊總編輯 台南神學院生活主任 吳來好 敬筆 |
|
Chū-sū
|
自序 |
|
1. Chiah ê si, sī góa tùi Bí-kok chē-chûn beh tò lâi Tâi-oân ê sî, tī chûn lāi só͘ siá ê.
|
1. Chiah ê詩，是我tùi美國坐船beh倒來台灣ê時，tī船內所寫--ê。 |
|
2. Góa ōe ēng Pe̍h-ōe-jī lâi siá ê lí-iû sī in-ūi ēng Pe̍h-ōe-jī lâi siá chin tàu-kù, koh hó thiaⁿ, hó tha̍k hó kì, bô-lūn ū siū kàu-io̍k bô siū kàu-io̍k hoān-nā bat Pe̍h-ōe-jī ê lâng lóng ōe-hiáu tha̍k.
|
2. 我會用白話字來寫ê理由是因為用白話字來寫真tàu句，koh好聽好記，無論有受教育無受教育凡若bat白話字ê人攏會曉讀。 |
|
3. Góa kám-kak Pe̍h-ōe-jī ê si-koa chin hó, in-ūi ēng Tiong bûn, Ji̍t-bûn, Eng-bûn lâi gîm sèng-si lóng m̄ ta̍t-tio̍h ēng Pe̍h-ōe-jī ê sèng-si lâi gîm ê sî, khah ōe thang piáu-ta̍t lán ê sim-chêng.
|
3. 我感覺白話字ê詩歌真好，因為用中文、日文、英文來吟聖詩攏m̄ ta̍t著用白話字ê聖詩來吟ê時，較會thang表達咱ê心情。 |
|
4. Tē it pō͘ chit-gia̍p ê pō͘-hūn, sī ūi-tio̍h thê-chhiòng chit-he̍k thoân-tō, ǹg-bāng bô-lūn choh-sit lâng, thó-hái lâng, á-sī kang-lâng tāi-ke lóng ōe thang bêng-pe̍k lán ê chit hūn, lán kap Iâ-so͘, kap Sèng-keng ê koan-hē, thang tī lán ê chit-tiûⁿ êng-iāu Chú ê miâ chòe Chú oa̍h-oa̍h ê kan-chèng.
|
4. 第一部職業ê部份，是為著提倡職域傳道，向望無論做穡人、討魚人抑是工人大家攏會thang明白咱ê職份，咱kap耶穌，kap聖經ê關係，thang tī 咱ê職場榮耀主ê名，做主活活ê見証。 |
|
5. Tē jī pō͘ ka-têng ê pō͘-hūn sī ūi-tio̍h thê-chhiòng “Ka-têng Ki-tok hòa”, ǹg-bāng lán múi chi̍t ê chòe pē-hú, chòe ang-bó͘ ê koh chi̍t-pái tī Chú ê bīn-chêng lâi hoán-séng lán tī ka-têng ê pún-hūn.
|
5. 第二部家庭ê部份是為著提倡「家庭基督化」，向望咱每一個做父母、夫婦--ê koh一擺tī主ê面前來反省咱tī家庭ê本份。 |
|
6. Só͘-í, siá chit pún si-koa sī chòe góa pún-sin ê hoán-séng, iā ǹg-bāng ōe lī-ek tâng sìn Chú ê hiaⁿ-ché, hō͘ lán tī lán ê chit-tiûⁿ kap ka-têng ōe thang chòe Chú bí-hó ê kiàn-chèng.
|
6. 所以，寫這本詩歌是做咱本身ê反省，也向望會利益同信主ê兄姊，hō͘咱tī咱ê職場kap家庭會thang做主美好ê見證。 |
|
7. Hàn-bûn e̍k-im ê pō͘-hūn sī ūi-tio̍h pak-pō͘ ê sìn-tô͘ ê iàu-kiû lâi ke-thiⁿ ê, in-ūi tī pak-pō͘ ê kàu-hōe chōe-chōe sìn-tô͘ bōe hiáu tha̍k Pe̍h-ōe-jī ê iân-kò͘.
|
7.「漢文譯音」ê部份是為著北部信徒ê要求來加添--ê,因為tī北部ê教會濟濟信徒bōe曉讀白話字ê緣故。 |
|
8. Tiong-bûn e̍k-ì ê pō͘-hūn sī ūi-tio̍h kheh-chng ê sìn-tô͘ kap soaⁿ-tōe ê sìn-tô͘ ê iàu-kiû lâi ke-thiⁿ ê, in-ūi in chí ū khòaⁿ Hàn-bûn e̍k-im bōe thang lí-kái si-koa ê ì-sù, in-ūi in ê khiuⁿ-kháu bô saⁿ-tâng.
|
8.「中文譯意」ê部份是為著客庄ê信徒，kap山地ê信徒ê要求來加添--ê,因為他們只有看「漢文譯音」bōe thang理解詩歌ê意思，因為in ê腔口無相同。 |
|
9. Só͘-í ke-thiⁿ Hàn-bûn e̍k-im kap Tiong-bûn e̍k-ì ê bo̍k-tek, sī ūi-tio̍h ài hō͘ choân-séng ê sìn-tô͘, bô-lūn tòa tī pîⁿ-tōe, kheh-chng, soaⁿ-tōe lóng pêⁿ-pêⁿ ōe thang tit-tio̍h lī-ek.
|
9. 所以加添「漢文譯音」kap「中文譯意」ê目的，是為著ài hō͘全省ê信徒，無論tòa tī平地、客庄、山地攏平平會thang得著利益。 |
|
10. In-ūi chit pún-si-koa ū Pe̍h-ōe-jī, “Hàn-bûn e̍k-im” kap “Tiong-bûn e̍k-ì”, só͘-í ōe thang pang-chān ài o̍h Pe̍h-ōe-jī ê gín-ná, á-sī tōa lâng thang bat Pe̍h-ōe-jī iā thang pang-chān ài o̍h Hàn-bûn ê lâng lâi bat Hàn-bûn.
|
10. 因為這本詩歌有「白話字」，「漢文譯音」kap「中文譯意」，所以會thang幫贊ài學白話字ê囡仔，抑是大人thang bat白話字也thang 幫贊ài學漢文ê人來bat漢文。 |
|
11. Sui-jiân gín-ná m̄ bat Pe̍h-ōe-jī, pē-bú iā thang liām hō͘ gín-ná tòe, gín-ná ê kì-ek-le̍k chin hó, thang hō͘ gín-ná liām chheh koa, iā thang tī Chú-ji̍t-o̍h chòe kà Pe̍h-ōe-jī ê pó͘-chhiong kàu-chhâi. Tùi tī chhiⁿ-mî ê lâng, lán iā thang tha̍k hō͘ i thiaⁿ, kà i lâi liām.
|
11. 雖然囡仔 m̄ bat白話字，父母也thang唸hō͘ 囡仔tòe,囡仔ê 記憶力真好，thāng hō͘囡仔唸冊歌，也thang tī主日學做教白話字ê補充教材。Tùi tī青瞑ê人，咱也thang讀hō͘伊聽，教伊來唸。 |
|
12. Chiah ê si-koa nā ū pang-chān lán tāi-ke, ǹg-bāng ōe thang siū tāi-ke ê kó͘-lē, hō͘ góa kè-sio̍k koh lâi siá, nā sī ū chōe-chōe lâng hi-bōng, iā ǹg-bāng ōe thang chhut-pán chhiùⁿ-phìⁿ.
|
12. Chiah ê詩歌若有幫贊咱大家，向望會thang受大家ê鼓勵，hō͘我繼續koh來寫，若是有濟濟人希望，也向望會thang出版唱片。 |
|
Khún-chhéng chu-ūi Chú-lāi hiaⁿ-ché ê phoe-phêng kap chí-chèng.
|
懇請諸位主內兄姊ê批評kap指正！ |
|
Kàu-boa̍t Iû Chèng-gī
|
教末 尤正義 |
|
Bo̍k-lio̍k Sū-giân Kài-siāu ê ōe Chū-sû |
目錄 序言 介紹ê話 自序 |
|
Tē 1 Pō͘ Chit-gia̍p 1. Chò-sit lâng 2. Thó-hái lâng 3. Chòe-kang lâng 4. Kan-khó͘ lâng 5. Hó-gia̍h lâng 6. I-seng 7. Thâu-ke, thâu-ke-niû |
第一部 職業 1.做穡人 2.討海人 3.做工人 4.艱苦人 5.好額人 6.醫生 7.頭家，頭家娘 |
|
Tē 2 Pō͘ Ka-têng 1. Ka-têng 2. Tiōng-hu 3. Chú-hū 4. Lāu-pē 5. Lāu-bú 6. A-kong 7. Hiaⁿ-tī 8.. Tang-sāi 9. Ta-ke 10. Sim-pū |
第二部 家庭 1.家庭 2.丈夫 3.主婦 4.老父 5.老母 6.阿公 7.兄弟 8.同sāi 9.Ta-ke 10.新婦 |
