Ū thiàⁿ-sim ê o͘-a
|
有疼心ê烏鴉 |
| Âng Ngá-hūi |
洪雅惠 |
|
Tī chi̍t châng tōa châng chhiū téng-bīn chi̍t chiah o͘-a, i kap ma-ma tòa tī in só͘ chòe ê siū ê lāi-bīn.
|
Tī一欉大欉樹頂面一隻烏鴉，伊kap媽媽tòa tī in所做ê siū ê內面。 |
|
Ū chi̍t ji̍t sòe chiah o͘-a chhut-khì thit-thô kàu thiⁿ beh àm chiah tńg-khì, kàu pòaⁿ-lō͘ i siūⁿ kóng, góa tio̍h ài the̍h chi̍t lia̍p ê phōng-kó hō͘ ma-ma chia̍h, i tio̍h khì chhē, sì-kòe khì chhē. Āu-lâi chhē tio̍h chi̍t lia̍p chin âng, chin súi ê phōng-kó, chin hoaⁿ-hí pe tńg-khì in tau.
|
有一日細隻烏鴉出去thit-thô到天beh暗才轉去，到半路伊想講，我著ài提一粒ê蘋果hō͘媽媽食，伊著去chhē,四界去chhē。後--來chhē著一粒真紅，真súi ê蘋果，真歡喜飛轉去in兜。 |
|
Kàu in tau í-keng chin àm, ge̍h-kiû iā chhut-lâi lah! Ma-ma khòaⁿ i hiah àm chiah tńg-lâi, sī in-ūi chhē phōng-kó beh hō͘ i, sim chin hoaⁿ-hí, in nn̄g chiah chiáu-á chiū chē tī chhiū-téng chhiùⁿ-koa khòaⁿ ge̍h. Tú tī hit sî, tī chhiū-á kha ū siaⁿ teh háu “me, me, me...” sòe chiah o͘-a thiaⁿ-kìⁿ, kā ma-ma kóng, “Góa beh lo̍h-khì khòaⁿ.” Chiū pe lo̍h-khì, khòaⁿ tio̍h chi̍t chiah iûⁿ-á-kiáⁿ tī hia chhē bô in tau, sòa khui siaⁿ háu. O͘-a chiū mn̄g iûⁿ-á kóng, “Lín tiàm tī tó-ūi?”
|
到in兜已經真暗，月球也出--來lah！媽媽看伊hiah暗才轉--來，是因為chhē蘋果beh hō͘伊，心真歡喜，in兩隻鳥仔就坐tī 樹頂唱歌看月。Tú tī hit時，tī 樹仔腳有聲teh哮「me,me,me」，細隻烏鴉聽--見，kā媽媽講：「我 beh落去看。」就飛--落去，看著一隻羊仔子tī hia chhē無in兜，續開聲哮。烏鴉就問羊仔講：「Lín tiàm tī tó位？」 |
|
Iûⁿ-á-kiáⁿ kóng, “Góa bōe jīn-tit lō͘ thang tńg-khì, chóng-sī góa chai, goán tiàm tī chi̍t keng lé-pài-tn̂g ê piⁿ-á.”
|
羊仔子講：「我bōe認得路thang轉--去，總--是我知阮tiàm tī一間禮拜堂ê 邊仔。」 |
|
O͘-a an-ùi kóng, “Hó! Lí m̄-thang háu, koai-koai tī chia, góa lâi mn̄g góa ê ma-ma khòaⁿ tio̍h cháiⁿ-iūⁿ?” Chiū pe khì chhiū-téng kā ma-ma kóng, “Ū chi̍t chiah iûⁿ-á-kiáⁿ chhē bô in tau.”
|
烏鴉安慰講：「好！你m̄-thang哮，乖乖tī chia,我來問我ê媽媽看著cháiⁿ-iuⁿ？」就飛去樹頂kā媽媽講：「有一隻羊仔子chhē無in兜。」 |
|
Ma-ma kóng, “Lí kiò i tiàm lán ê chhiū-kha hioh mî, bîn-á chá-khí chiah khì chhē chi̍t lia̍p phōng-kó sòa the̍h khì hō͘ i chia̍h.” Sòe chiah o͘-a chiū pe lo̍h-khì, chiàu án-ni kóng, iûⁿ-á-kiáⁿ the̍h phōng-kó chin hoaⁿ-hí, koh ū chi̍t keng chin hó-sè tiàm ê chhù thang tī hia hioh mî, chiū bô háu, o͘-a chiū pe tńg-khì chhiū-téng khùn.
|
媽媽講：「你叫伊tiàm咱ê樹腳歇暝，明仔早起才去chhē一粒蘋果續提去hō͘伊食。」細隻烏鴉就飛--落去，照án-ni講，羊仔子提蘋果真歡喜，koh有一間真好勢tiàm ê厝thang tī hia歇暝，就無哮，烏鴉就飛轉去樹頂睏。 |
|
Keh chá-khí chin chá, sòe chiah o͘-a chiū khí-lâi, pe chin hn̄g ê lō͘ thòe iûⁿ-á chhē in tau, pe kè sòe tiâu khoe koh kè soaⁿ, chi̍t-keng chi̍t-keng ê chhù. Āu-lâi khòaⁿ tio̍h ū chi̍t keng lé-pài-tn̂g, lé-pài-tn̂g ê piⁿ-á ū chi̍t chiah iûⁿ ê ma-ma khiā tī hia teh chhē mi̍h ê khoán, o͘-a chiū pe lo̍h-khì mn̄g, “Lí ū iûⁿ-á-kiáⁿ phah-m̄-kìⁿ bô?”
|
隔早起真早，細隻烏鴉就起--來，飛真遠ê路替羊仔chhē in兜，飛過細條溪koh過山，一間一間ê厝。後--來看著有一間禮拜堂，禮拜堂ê邊仔有一隻羊仔 ê媽媽企tī hia teh chhē物ê款，烏鴉飛落去問：「你有羊仔子扑m̄見--無？」 |
|
“Ū, lí chai mah?”
|
「有，你知--mah？」 |
|
“Cha-àm tī goán tau hioh mî, in-ūi chhē bô lō͘ thang tńg-lâi, án-ni hó, góa kóaⁿ-kín lâi-khì chhōa i tò-tńg-lâi.”
|
「昨暗tī阮兜歇暝，因為chhē無路thang轉--來，án-ni好，我趕緊來去chhōa伊轉--來。」 |
|
Iûⁿ-á ma-ma kóng, “Pài-thok leh.”
|
羊仔媽媽講：「拜託--leh。」 |
|
O͘-a pe tńg-khì, chiū kā iûⁿ-á-kiáⁿ kóng beh chhōa i tńg-khì, koh kóng lí tè góa cháu, góa pe kàu hia, lí tio̍h cháu kàu hia, sòe chiah o͘-a chiū koh pe-khì, iûⁿ-á-kiáⁿ iā tè o͘-a cháu.
|
烏鴉飛--轉去，就kā羊仔子講 beh chhōa伊轉--去，koh講：「你tè我走，我飛到hia,你著走到hia。」細隻烏鴉就koh飛--去，羊仔子也 tè烏鴉走。 |
|
Chhōa kàu ūi, iûⁿ-á ê ma-ma chin hoaⁿ-hí, ōe thang khòaⁿ tio̍h kó͘-chui ê iûⁿ-á-kiáⁿ, in chiū lóng kā sòe-chiah o͘-a to-siā, í-āu o͘-a iā siông-siông pe lâi chia kap in thit-thô.
|
Chhōa到位，羊仔ê媽媽真歡喜，會thang看著古錐ê羊仔子，in就攏kā細隻烏鴉多謝，以後烏鴉也常常飛來chia kap in thit-thô。 |
|
（Lú-soan Ge̍h-khan Tē 64 kî, 1965 nî 4 ge̍h)
|
（女宣月刊第64期，1965年4月） |
