An-lo̍k ke_06
|
安樂街_06 |
|---|---|
| Bô chù-bêng | 無注明 |
|
Tē la̍k Chiuⁿ
|
第六章 |
|
Chit-ê lé-pài, Lī-su-tē kap Tok-hui chai chit-ê sî-ji̍t put-chí tn̂g. Tok-hui m̄-ài kóng-ōe, hóng- hut-kan tùi Lī-su-tē kóng, "Put-lūn tó-ūi to bô góa ê ke, góa ia̍h bô hoat-i-tā-ôa."
|
這個禮拜，Lī-su-tē 佮 Tok-hui知這個時日不止長。Tok-hui m̄愛講話，彷彿間對Lī-su-tē 講：「不論佗位都無我ê 街，我亦無法伊 tā-ôa。」 |
|
Lī-su-tē kan-ta sī ji̍t--sî chiūⁿ ke choān-khîm, àm tò--lâi, Tok-hui bô chhin-chhiūⁿ chá-chêng chiong khîm lâi pìⁿ-lāng.
|
Lī-su-tē kan-ta 是日--時上街轉琴，暗倒--來，Tok-hui無親像早前 將琴來 pìⁿ弄。 |
|
Thâu-chi̍t-ji̍t ê-hng, Lī-su-tē choān kòe saⁿ tè ê khek-tiāu, tò-tńg-lâi kàu lâu-téng, chiū ài choān An-lo̍k-ke ê tiāu, Tok-hui kóng, "Góa ê koai gín 37 ná, lí bo̍h-tit choān hit-ê khek-tiāu, góa m̄-ài thiaⁿ, in-ūi éng-oán bē-tit-tio̍h An-lo̍k-ke.”
|
頭一日e昏，Lī-su-tē 轉過3塊 ê 曲調，倒轉來到樓頂，就愛轉安樂街 ê 調，Tok-hui 講：「我ê 乖囝仔，你莫得轉hit個曲調，我m̄愛聽，因為永遠bē得著安樂街。」 |
|
Taⁿ lūn Tok-hui chiông-chêng khîm sī i sim- koaⁿ ì-ài, kàu chit-tia̍p tian-tò jiá i iu-būn. Lī-su-tē khòaⁿ-kì, chit-ê chêng-hêng, sī bô mi̍h thang an-ùi ilah. Khí-thâu khòaⁿ i-ê pē N ê i-seng chiàu i só͘ èng-ún ê ōe, tē-jī pái iū-koh lâi kā Tok-hui kóng, "M-bián tek-khak chia̍h io̍h, che pēⁿ bô hoat-tō͘ thang i-tī, kàu chit-ê tē-pō͘ si̍t- chāi put-chí oh lah."
|
今論Tok-hui 從前琴是伊心肝意愛，到這tia̍p 顛倒惹伊憂悶。 Lī-su-tē 看見，這個情形，是無物 thang安慰依lah。起頭看伊 ê病ê醫 照伊所應允 ê 話，第2擺又koh來kā Tok-hui 講：「M̄免的確食藥，che 病無法度thang醫治，到這個地步實在不止oh--lah。」 |
|
Tok-hui khòaⁿ i-ê sèⁿ-miā ná gûi-hiám, chhin- chhiūⁿ soh-á chi̍t-ji̍t chi̍t-ji̍t lēng chi̍t-ji̍t lám, m̄- chai beh tùi tó-lo̍h-khì. I kap Lī-su-tē hīn bē- tit-thang An-hioh-ji̍t khoài-khoài kàu, ài thiaⁿ tē- jī-chat ê si àn-cháiⁿ-iūⁿ kóng, kiám-chhái ū thang ǹg-bāng; ē hō͘ Tok-hui ū chōe ê sîn-hûn kàu An- lo̍k-ke ia̍h kú-káⁿ.
|
Tok-hui 看伊 ê性命那危險，親像索仔一日一日lēng一日lám，m̄ 知beh對佗落去。伊佮 Lī-su-tē 恨bē 得thang安息日快快到，愛聽第2節ê 詩àn- cháiⁿ-iūⁿ講，kiám-chhái有thang 向望；會hō͘ Tok-hui有罪 ê 身份到安樂街亦 kú-káⁿ。 |
|
Í-keng kàu lé-pài-ji̍t, hong-hō͘ chò chi̍t-ē kàu, tī lé-pài-tn̂g chū-chi̍p ê lâng pí pêng-ji̍t khah chió. Sian-siⁿ ji̍p tn̂g-lâi khòaⁿ-kìⁿ lâng sui-jiân sī chió. khiok ū put-chí ì-ài hoaⁿ-hí thiaⁿ i'; i thè thiaⁿ tō-lí ê lâng pek-chhiat kiû Chú, hō͘ in tāi-ke ê-hng ē-tit-tio̍h éng-oán ê hok-khì.
|
已經到禮拜日，風雨做一下到，tī 禮拜堂聚集 ê 人比平日較 少。先生入堂來看見人雖然是少。卻有不止意愛歡喜聽依；伊替聽道理 ê 人迫切求主，hō͘ in大家 e昏會tit著永遠 ê福氣。 |
|
I teh kóng tê-ba̍k ê sî, tn̂g-lāi chēng-chēng bô chò siaⁿ, lóng siông-sè teh thiaⁿ. Lī-su-tē khòaⁿ kàu ba̍k-chiu bô ni̍h, ia̍h put-chí choan-sim ài-beh 38 thiaⁿ,chhin-chhiūⁿ chhùi iau chhùi khoah chi̍t- poaⁿ-iūⁿ.
|
伊teh 講題目 ê 時，堂內靜靜無做聲，攏詳細teh 聽。Lī-su-tē 看 到目珠無ni̍h，亦不止全心愛beh 聽，親像嘴枵嘴闊一般樣。 |
|
Só͘ kóng che tê-ba̍k sī sím-mi̍h? Chiū-sī "Siōng-tè ê Kiáⁿ Iâ-so͘ Ki-tok ê hoeh, tek-khak ē sé-chheng lán chiah-ê it-khài ê chōe."
|
所講che題目是啥物？ 就是「上帝 ê 子耶穌基督 ê血，的確會洗清咱 chiah-ê 一概ê 罪。」 |
|
Sian-siⁿ hō͘ in tāi-ke siūⁿ--tio̍h chêng lé-pài-ji̍t só͘ kóng ê chheh, jiân-āu chiap-sòa ē-té kóng, chiū-sī kóng, "Hit-ê êng-kng ê siâⁿ-chhiûⁿ, n̂g-kim ê ke-lō͘, tāi-ke kam-goān ì-ài kàu hit tah? Nā-sī ū chōe ê lâng bē-tit-ji̍p; hiān-chāi chit lé-pài- tn̂g-lāi ê lâng, chiông-tiong ū lâng ka-tī chai i sī chi̍t-ê chōe-jîn, ài chai khòaⁿ àn-chái-iūⁿ chiah ē- tit ji̍p Thiⁿ-siâⁿ, tiâu-kò͘-ì lâi thiaⁿ chit-hō tō-lí. ū hit-hō ê lâng á-bô?"
|
先生hō͘ in 大家想--著前禮拜日 所講 ê 冊，然後接續下底講，就是講：「Hit個榮光 ê 城牆，黃金 ê 街路，大家甘願意愛到hit tah？若是有罪 ê 人bē得入；現在這禮拜堂內 ê人，從中有人家己知伊是一個罪人，愛知看àn- cháiⁿ-iūⁿ才會得入天城，刁故意來聽這號道理。有 hit號 ê人抑無？」 |
|
Lī-su-tē sè-á-siaⁿ teh ìn kóng, "Ū, chiū-sī góa lah."
|
Lī-su-tē 細仔聲 teh應講：「有，就是我--lah。」 |
|
Sian-siⁿ kóng, "Góa khò Chú pang-chān, chí-sī lín tāi-ke chi̍t-ê hoat-tō͘. Lín kap góa pún-jiân sī ū chōe ê lâng; nā ū chi̍t-hāng chōe, chiū tì-kàu hō͘ Thian-tông ê mn̂g koaiⁿ-teh; hòng-kiam lán tāi-ke só͘ chò ê chōe sī chheng-chheng bān-bān, m̄-nā chi̍t-hāng niā-niā, sim-koaⁿ lóng hō͘ chōe bak kàu kiaⁿ-lâng.
|
先生講：「我靠主幫贊，指示 lín大家一個法度。Lín 佮我本然是有罪ê 人；若有一項罪，就致到 hō͘ 天堂 ê 門關teh；hòng-kiam 咱 大家所做 ê 罪是千千萬萬，m̄若一項niā-niā，心肝攏hō͘ 罪 bak到驚人。 |
|
Sui-jiân sī án-ni, khiok ū chi̍t-hāng pó-pòe ê mi̍h, ē chiong lán ê sim-koaⁿ sé kàu chheng-khì, ke̍k pe̍h chhin-chhiūⁿ seh, tû chit-hāng í-gōa, bô pa̍t-mi̍h hoat-tō͘ lah. Taⁿ hit-ê pó-pòe ê mi̍h, chiū- sī góa che tê-ba̍k só͘ kóng, "Iâ-so͘ Ki-tok ê hoeh."
|
雖然是án-ni，卻有一項寶貝ê 物，會將咱ê 心肝洗到清氣，極白親像雪，除這項以外，無別物法度lah。今hit個寶貝ê 物，就是我che題目所講：「耶穌基督 ê血。」 |
|
Tī ē-té ū kóng-khí kàu bêng-bêng pe̍k-pe̍k, Iâ- so͘ ê hoeh àn-cháiⁿ-iūⁿ ē sé-chheng lâng ê chōe. I tī Kok-kok-thaⁿ hō͘ lâng tèng sí tī si̍p-jī-kè, hóng-hut chhin-chhiūⁿ khui chi̍t-tiâu sé-sim ê chheng-chôaⁿ. Iâ-so͘ goân-pún sī Siōng-tè to̍k- seⁿ ê Kiáⁿ; i-ê seng-khu lâu-chhut pó-hoeh, ū bô kiông-chīn ê kong-lô, ē sio̍k lâng ê chōe. Tùi chêng Iâ-so͘ i só͘ khui ê chúi-goân, chiong chōe sé chheng-khì: sé-chheng ê lâng kàu Thiⁿ-siâⁿ ê chin-chu mn̂g, mn̂g lóng khui-teh, in-ūi in tāi-ke sim-lāi bô chi̍t-tiám ê kiaⁿ-lâng, lóng sī chheng-chheng khì-khì ê.
|
Tī 下底有講起到明明白白，耶穌 ê血àn- cháiⁿ-iūⁿ會洗清人 ê 罪。伊tī 各各他 hō͘ 人釘死tī 十字架，彷彿親像開一條洗心 ê 清泉。耶穌原本是上帝獨生 ê 子；伊 ê身軀流出寶血，有無窮盡 ê 功勞，會贖人 ê 罪。對前耶穌伊所開 ê 水源，將罪洗清氣: 洗清ê 人到天城 ê 真珠門，門攏開teh，因為in大家心內無一點 ê 驚人，攏是清清氣氣--ê。 |
|
Taⁿ kin-á-ji̍t pek-chhiat khún-kiû khó͘-khǹg bián-lē lé-pài-tn̂g-lāi ê lâng, ài-beh Kiù-chú ēng pó-hoeh sé-chheng lín tāi-ke ê sim, thang chiong chit chhiú si tē-jī-chat só͘ kóng ê, chiū-sī kóng:
|
今今仔日迫切懇求苦勸勉勵禮拜堂內 ê人，愛beh 救主用寶血洗清 lín 大家 ê 心，thang將這首詩第2節所講--ê，就是講: |
|
Kiù-chú Siōng-tè Iûⁿ-ko, Góa lâi khún-kiû sià-chōe, Chheng-khì góa pháiⁿ-sim, Chheng-khì góa pháiⁿ-sim, Só͘ kiâⁿ lóng bô khiàm-khoeh. |
救主上帝羊羔， 我來懇求赦罪， 清氣我歹心， 清氣我歹心， 所行攏無欠缺。 |
|
Chiong chit chhiú si lâi chò kî-tó-bûn ēng sim khún-kiû. Góa tī tê-ba̍k-lâi ū nn̄g ê jī put-chí thang an-ùi lâng ê sim, chiū-sī it-khài, lóng sī hit nn̄g jī.
|
將這首詩來做祈禱文用心懇求。我tī題目來有2個字不止thang安慰人ê心，就是一概，攏是hit二字。 |
|
Pháiⁿ-ōe, Pháiⁿ ê só͘ kiâⁿ, pháiⁿ ê liām-thâu,nā ū chit-hō ê sió pan-tiám, kap tōa phiàn ê hûn- jiah, o͘-àm, ù-òe, chìm-chū tī kiaⁿ-lâng, lóng pau- hâm chāi-lāi; bô lūn sím-mi̍h tōa sū, lóng ē iám- khàm; bô lūn sím-mi̍h o͘-àm lóng ē sé-tû. Hiān- chāi tī lé-pài-tn̂g-lāi ê lâng, chōe ū tit-tio̍h sé- khì á-bô? Ū tit-tio̍h sià-bián á-bô? Koh mn̄g ta̍k-lâng chi̍t-kù-ōe, chit-tia̍p tī lín tāi-ke sim-lāi ū-ê bak--tio̍h Iâ-so͘ ê hoeh,ū-ê tòa ka-tī ê chōe nn̄g-iūⁿ tek-khak tiāⁿ-tio̍h ū chi̍t-iūⁿ; lín tāi-ke tàu-tí ū tó-lo̍h chi̍t-iūⁿ leh?”
|
歹話，歹ê 所行，歹ê 念頭，若有這號 ê 小斑點，佮大遍 ê 痕跡，黑暗、污穢，浸chū tī 驚人，攏包含在內；無論啥物大事，攏會iám-khàm；無論啥物黑暗攏會洗除。現在tī 禮拜堂內 ê人，罪有得著洗去抑無？有得著赦免抑無？Koh問逐人一句話，這tia̍p tī lín大家心內有ê bak--著耶穌ê血，有ê tòa 家己ê 罪二樣的確tiāⁿ著有一樣；lín大家到底有佗落一樣leh？」 |
|
Kóng-liáu thêng chi̍t-sî-á kú, ài lâng chhâ-khó ka-tī ê sim; tn̂g-lāi tiām-tiām bô siaⁿ. Lī-su-tē sim-lāi teh khún-kiû, àm-àm teh liām:
|
講了停一時仔久，ài 人查考家己 ê心；堂內tiām-tiām無聲。Lī-su-tē心內 teh懇求，暗暗teh念: |
|
Chheng-khì góa pháiⁿ-sim, Chheng-khì góa pháiⁿ-sim, Só͘ kiâⁿ lóng bô khiàm-khoeh. |
清氣我歹心， 清氣我歹心， 所行攏無欠缺。 |
|
Chit-nn̄g kù-si.
|
這二句詩。 |
|
Sian-siⁿ koh khǹg in kóng, “Ê-hng tek-khak tio̍h iàu-kín khì chiū-kīn chúi ê goân-thâu, m̄- thang iân-tî; lín tāi-ke ta̍k-lâng tò-khì, koh iàu- kín tī chhù-lāi tio̍h kūi-teh, sìn Iâ-so͘ chin-chiàⁿ chhin-chhiūⁿ kap lán siāng chi̍t só͘-chāi; hit-tia̍p chiah sǹg sī kàu i-ê bīn-chêng. Iū-koh khǹg lín tāi-ke chiong ka-tī ê chōe thok-tiōng kau-tāi Iâ- so͘, kiû i ēng pó-hoeh sé-chheng, hō͘ lín tāi-ke ê sim pí seh khah pe̍h; koh mn̄g lín, Ài chit-ê khoán-sit á m̄-ài, khéng án-ni á m̄-khéng?”
|
先生 koh 勸in講：「E昏的確著要緊去就近水 ê源頭，m̄-thang延遲；lín大家逐人倒--去，koh 要緊tī 厝內著跪teh，信耶穌真正親像佮咱像一所在；hit-tia̍p才算是到伊ê面前。Iū-koh 勸lín大家將家己ê 罪託重交代耶穌，求伊用寶血洗清，hō͘ lín大家ê心比雪較白；koh問lín，愛這個款式抑m̄愛，肯án-ni抑m̄肯？ |
|
Lī-su-tē sim-lāi teh in “Góa ài.”
|
Lī-su-tē心內teh應：「我ài。」 |
|
Beh chhut-khì ê sî-chūn, sian-siⁿ tī lé-pài-tn̂g mn̂g-kháu teh khiā, mn̄g sio-bat ê lâng hó mah. Hit chi̍t-sî Úi sian-siⁿ ê bīn-māu ū ià-lán ê khoán- sit. I àn-cháiⁿ-iūⁿ khún-kiû pek-chhiat khǹg--lâng, sī ǹg-bāng ū lâng thiaⁿ chit-ê ōe chhim-sìn ji̍p sim-lāi. I nā khòaⁿ-chhut ū lâng khǹg chit-ê ì-sù tī sim-koaⁿ, tùi i bīn-chêng kiâⁿ-kòe, tek-khak thè i kî-tó Kiù-chú, chiong chéng-chí iā tī i ê sim-lāi hoat-siⁿ--khí-lâi, tī i sim--n̍i̍h kiat hó kóe- chí. Tiong-kan ia̍h ū lâng tī-hia, tī-chia teh kóng-ōe, sian-siⁿ khòaⁿ in tāi-ke iu-chhiû, sim-lāi kò͘-ì kóng, "Chú ê chéng-chí lóng ka-la̍uh tī khang-khang mah?"
|
Beh出去ê時陣，先生tī禮拜堂門口 teh企，問sio-bat ê人好mah。Hit一時Úi--先生ê面貌有厭lán ê 款式。伊àn- cháiⁿ-iūⁿ懇求迫切勸--人，是向望有人聽這個話深信入心內。伊若看出有人勸這個意思tī 心肝，對伊面前行過，的確替伊祈禱救主，將種子掖 tī 伊ê心內發生--起來，tī伊心--n̍i̍h 結好果子。中間亦有人tī-hia，tī-chia teh講話，先生看in大家憂愁，心內故意講：「主ê 種子攏ka落 tī 空空mah？」 |
|
Sian-siⁿ kóng tō-lí ê sî, khòaⁿ-kìⁿ Lī-su-tē ba̍k- chiu bô ni̍h teh khòaⁿ i, siông-sè teh thiaⁿ tō-lí; só͘-í chit-ê gín-ná kàu beh chhut-khì ê sî-chūn, sian-siⁿ kiò i lâi kap i kóng-ōe, ài mn̄g i só͘ thiaⁿ ê, ē-hiáu-tit á-bē; chhiú hōaⁿ tī i-ê keng-thâu- téng kóng, "Góa ê gín-ná, lí ē-kì-tit góa tú-á só͘ kóng ê tê-ba̍k mah?" Lī-su-tē ìn-tap lóng bô chhò.
|
先生講道理 ê時，看見Lī-su-tē 目珠無ni̍h teh 看伊，詳細teh聽道理；所在這個囡仔到beh出去ê時陣，先生叫伊來佮伊講話，愛問伊所聽ê，會曉得抑bē；手hōaⁿ tī伊ê肩頭頂講：「我ê 囡仔，你會記得我抵仔所講 ê題目mah？」 Lī-su-tē 應答攏無錯。 |
|
Sian-siⁿ chiū hoaⁿ-hí, iū-koh kóng,"Lí ē-kì-tit góa ké-soeh tê-ba̍k ê ōe á-bē?" Koh mn̄g i ke- lāi ê sū-chêng.
|
先生就歡喜，又koh講：「你會記得我解說題目 ê 話抑bē?」Koh問伊街內 ê 事情。 |
|
Lī-su-tē kóng-khí Tok-hui phòa-pēⁿ ê tāi-chì, chí-ū chhun chi̍t-goe̍h-ji̍t ê sèⁿ-miāⁿ tiāⁿ-tiāⁿ; i kam-goān chai àn-cháiⁿ-iūⁿ thang kàu An-lo̍k-ke.
|
Lī-su-tē 講起Tok-hui破病 ê 事誌，只有偆一月日ê 性命tiāⁿ-tiāⁿ；伊甘願知àn- cháiⁿ-iūⁿ thang到安樂街。 |
|
Sian-siⁿ kóng, "Góa ài khì khòaⁿ i." Chiū chiong Tok-hui khiā-khí ê só͘-chāi kì tī sè-pún- chheh; í-āu kap Lī-su-tē kūi tī lé-pài-tn̂g-lāi kiû Iâ-so͘ sé-chheng i ê chōe.
|
先生講：「我ài 去看伊。」就將Tok-hui企起 ê 所在記tī 細本冊；以後佮 Lī-su-tē 跪tī 禮拜堂內求耶穌洗清伊ê 罪。 |
|
Kî-tó liáu Lī-su-tē tò-khì, sim-lāi hoaⁿ-hí, in-ūi ê-hng ū hó ê siau-sit thang kā Tok-hui kóng.
|
祈禱了Lī-su-tē倒--去，心內歡喜，因為e昏有好ê 消息thang kā Tok-hui 講。 |
|
I kiâⁿ teh-beh kàu lâu-thui ê só͘-chāi, koh-khah kín cháu, siūⁿ beh chiong só͘ thiaⁿ ê lóng-chóng kā Tok-hui kóng; kìⁿ-tio̍h bīn chiū kóng, "Lāu- peh ah! góa kin-á-ji̍t ū tit-tio̍h hó ki-hōe, thiaⁿ- kìⁿ ke̍k hó ê siau-sit, thoân-tō ê sian-siⁿ kap góa kóng-ōe, ia̍h ū kóng ài lâi khòaⁿ lí."
|
伊行teh-beh 到樓梯 ê 所在，koh較緊走，想beh 將所聽ê 攏總kā Tok-hui 講；見著面就講：「老伯--ah！我今仔日有得著好機會，聽見極好ê 消息，傳道ê 先生佮我講話，亦有講ài來看你。」 |
|
Tok-hui chiū mn̄g i kóng, "Kàu An-lo̍k-ke, tàu- tí sī àn-cháiⁿ-iūⁿ?"
|
Tok-hui 就問伊講：「到安樂街，到底是àn- cháiⁿ-iūⁿ？」 |
|
Ìn-kóng, "Lí kap góa lóng bē sái-tit tòa chōe ji̍p-khì, to̍k-to̍k ū chi̍t-ê hoat-tō͘, chiū-sī Siōng-tè ê Kiáⁿ Iâ-to͘ Ki-tok ê hoeh ē sé-chheng lán tāi-ke ê chōe, chit-kù-ōe kì tī Sèng-chheh, sī sian-siⁿ só͘ kóng ê tê-ba̍k."
|
應講：「你佮我攏bē sái 得tòa 罪入去，獨獨有一個法度，就是上帝ê 子耶穌基督 ê血會洗清咱大家ê 罪，這句話記tī 聖冊，是先生所講 ê題目。」 |
|
Tok-hui kóng, "Lí chiong chit-ê tāi-chì siông- sè kā góa kóng."
|
Tok-hui 講：「你將這個事誌詳細kā 我講。」 |
|
Lī-su-tē kóng, "Nā tû-khì Iâ-so͘ ê hoeh, chōe chiū bē-ē sé-chheng-khì; lí kap góa só͘ eng-kai- tio̍h chò ê, chiū-sī kàu i-ê bīn-chêng khì kiû i, i kin-mê chiū ē ín lán : chit-kúi-kù-ōe lóng sī sian- siⁿ kóng ê."
|
Lī-su-tē 講：「若除去耶穌 ê血，罪就bē會洗清氣；你佮我所應該著做ê，就是到伊 ê面前去求伊，伊今暝就會允咱：這幾句話攏是先生講 ê。」 |
|
Lī-su-tē kóng, "Góa ê-hng koh o̍h chi̍t-chat-si;" tùi hit-tia̍p sòa kap Tok-hui kūi-teh, bān-bān teh liām hit-ê si, chiū-sī kóng: Kiù-chú Siōng-tè Iûⁿ-ko, Góa lâi khún-kiû sià-chōe, Chheng-khì góa pháiⁿ-sim, Chheng-khì góa pháiⁿ-sim, Só͘ kiâⁿ lóng bô khiàm-khoeh.
|
Lī-su-tē講：「我e昏 koh學一節詩；」對hit-tia̍p sòa 佮 Tok-hui 跪teh，慢慢teh念hit個詩，就是講:救主上帝羊羔，我來懇求赦罪，清氣我歹心，清氣我歹心，所行攏無欠缺。 |
|
Tok-hui ia̍h o̍h i án-ni liām, siaⁿ-im sè-á-siaⁿ teh kóng, "Góa kam-goān hō͘ Iâ-so͘ sé-chheng góa ê chōe."
|
Tok-hui亦學伊 án-ni 念，聲音細仔聲teh講：「我甘願hō͘ 耶穌洗清我ê 罪。」 |
|
Lī-su-tē kóng, "I khéng ín lán, lâng kàu Iâ-so͘ hit-tah, tek-khak bē hō͘ i sak--chhut-lâi."
|
Lī-su-tē 講：「伊肯允咱，人到耶穌hit tah，的確bē hō͘伊sak--出來。」 |
|
Tok-hui kóng, "Góa sī lāu-lâng, hoān--tio̍h ê chōe chin tāng, chiông-chêng lóng m̄-bat siūⁿ; chit-ê lé-pài kèng-jiân teh siūⁿ--tio̍h chōe sī put- chí tōa, m̄-chai i ia̍h khéng beh kā góa sé--khì- lâi bô?"
|
Tok-hui 講：「我是老人，犯--著ê罪真重，從前攏m̄-bat 想；這個禮拜竟然teh想--著罪是不只大，m̄知伊亦肯beh kā我洗--去 來無？」 |
|
Lī-su-tē kín-kín ìn i kóng, "I sī koat-toàn khéng--ê, thoân-tō-ê ū kóng, tê-ba̍k-lāi ia̍h ū chit hō ōe, Iâ-so͘ Ki-tok ê hoeh tek-khak sé-khì 44 it-khài ê chōe. It-khài ê chōe, kiám m̄-sī liân lí ê ia̍h sǹg-chāi lāi nah?"
|
Lī-su-tē 緊緊應伊講：「伊是決斷肯--ê，傳道ê 有講，題目內亦有這號話，耶穌基督ê血的確洗去一概ê 罪。一概ê 罪，敢 m̄是連你 ê亦算在內nah？」 |
|
Tok-hui chiū sè-siaⁿ pek-chhiat kóng, "It-khài ê chōe, it-khài ê chōe, chit-kù-ōe chin-chiàⁿ sī liân góa ê chōe ia̍h kóng chāi-lāi."
|
Tok-hui 就細聲迫切講：「一概 ê 罪，一概ê 罪，這句話真正是連我ê 罪亦講在內。」 |
|
Āu-lâi in tāi-ke nn̄g ê lâng lóng bô kóng-ōe, kok lâng ka-tī siūⁿ chi̍t-ê lìn-tńg.
|
後來in大家2個人攏無講話，各人家己想一個lìn轉。 |
|
Lī-su-tē kóng,"Lán nn̄g lâng put-jû thàn-chá lâi khì kiû i." Tok-hui kóng, "Kiû sím-mi̍h lâng leh, sī beh khì kiû thoân-tō-ê mah?"
|
Lī-su-tē 講：「咱二人不如趁早來去求伊。」 Tok-hui講：「求啥物人leh，是beh 去求傳道--ê mah？」 |
|
Lī-su-tē kóng, "M̄-sī kiû i, eng-kai-tio̍h kiû Chú Iâ-so͘; Chú chit-tia̍p tiàm tī chhù-lāi, thoân- tō-ê sī án-ni kóng, lán nn̄g lâng ha̍p-kai tio̍h kiû i sé-khì chōe-ok." Tok-hui kóng, "Chek-khek lâi kiû i khah hó."
|
Lī-su-tē講：「M̄是求伊，應該著求主耶穌；主這tia̍p tiàm tī厝內，傳道--ê是án-ni 講，咱二人ha̍p-kai著求伊洗去罪惡。」Tok-hui 講：「即刻來求伊較好。」 |
|
Hit-tia̍p gín-ná lāu-lâng lóng kūi-teh. Lī-su- tē chai Chú lī i bô hn̄g, chiū kî-tó kóng, "Chú Iâ- so͘ ah! Tok -hui kap góa lâi kàu lí bīn-chêng, goán tāi-ke ū lōa-chē ê chōe, sī eng-kai tio̍h sé- khì, thoân-tō-ê ia̍h ū kóng, lí bô beh chiong goán tāi-ke kóaⁿ--chhut-khì; tê-ba̍k só͘ kóng, sī it-khài ê chōe; taⁿ siūⁿ góa kap Tok-hui ê chōe, ia̍h sǹg chāi-lāi. Kiû Chú ēng pó-hoeh sé goán ê sim, sé kàu pe̍h-pe̍h, goán kam-goān hoaⁿ-hí kàu An-lo̍k- ke, sī sim só͘ goān."
|
Hit-tia̍p 囡仔老人攏跪teh。Lī-su- tē知主離伊無遠，就祈禱講：「主耶 穌ah! Tok-hui 佮我來到你面前，阮大家有偌濟ê 罪，是應該著洗 去，傳道--ê亦有講，你無beh將阮大家趕--出去；題目所講，是一概 ê 罪；今想我佮 Tok-hui ê 罪，亦算在內。求主用寶血洗阮 ê 心，洗到白白，阮甘願歡喜到安樂街，是心所願。」 |
|
Tok-hui tòe Lī-su-tē kóng, "Kiû Chú sé goán nn̄g ê lâng, pìⁿ-chiâⁿ pe̍h-pe̍h ê seh, chhiáⁿ lí khan--goán, kiù--goán, sim só͘ goān."
|
Tok-hui tòe Lī-su-tē 講：「求主洗阮二個人，變成白白ê 雪，請你 牽--阮，救--阮，心所願。」 |
|
Tùi hit-tia̍p nn̄g lâng khiā--khí-lâi. Lī-su-tē tùi Tok-hui kóng, "Lán lâi khì khùn, só͘ kî-kiû-ê Chú í-keng thiaⁿ-kìⁿ lah."
|
對hit-tia̍p二人企--起來。Lī-su-tē 對Tok-hui講：「咱來去睏，所祈求--ê主已經聽見lah。」 |
|
Chiàu chit-ê chêng-hêng lâi khòaⁿ, lán tāi-ke thang chai kò͘-mn̂g-ê koat-toàn chún lāu-tōa-lâng kap gín-ná ji̍p-khì, ki̍p-chì in tāi-ke mn̂g-lāi, thiaⁿ-kìⁿ ū siaⁿ kóng, "Lín tāi-ke thang pàng-sim, chōe lóng sià-bián lah."
|
照這個情形來看，咱大家 thang知顧門--ê 決斷准老大人佮囡仔入去，ki̍p-chì in大家門內，聽見有聲講：「Lín大家thang放心，罪攏赦免--lah。」 |
