Thiàⁿ Lêng-hûn Ê Jia̍t-cheng_01
|
疼靈魂Ê熱情_01 |
|---|---|
| Sú-bi̍t-su | Sú-bi̍t-su |
|
Tē 1 Cuiuⁿ Sat-tàn Ê Sit-pāi |
第1章 Sat-tàn Ê失敗 |
|
Sat-tàn ēng tiāu-cha ê piáu-chêng, gia̍h-thâu khí-lâi mn̄g kóng: “Óe! Ū sím-mi̍h siau-sit ê bô?”
|
Sat-tàn用調查ê表情，gia̍h頭起來問講：「Óe！有sím-mi̍h消息無？」 |
|
Tú chiah ji̍p-lâi ê A-la̍h-su-ka ê chhin-ông ìn kóng: “A̍i̍h! Chin hó!”
|
Tú chiah入來ê阿拉斯加ê親王應講：「A̍i̍h！真好！」 |
|
Jia̍t-sim ê thâu-ba̍k, chù-ì khòaⁿ chit ê tūi-lo̍h ê thiⁿ-sài mn̄g kóng: “Kiám ū sím-mi̍h Ai-su-ki-mô͘ lâng thiaⁿ-tio̍h Hok-im?”
|
熱心ê頭目，注意看chit ê墮落ê天使問講：「Kiám有sím-mi̍h愛斯基摩人聽tio̍h福音？」 |
|
Chhin-ông chhim-chhim kiâⁿ-lé ìn kóng: “Bô! Liân chi̍t ê iā bô thiaⁿ-tio̍h Hok-im”, i chhin-chhiūⁿ teh khoa-kháu chòe-kīn ê sèng-lī koh kóng: “Góa lóng m̄-bat khòaⁿ-kìⁿ ū lâng thiaⁿ-tio̍h Hok-im.”
|
親王深深行禮應講：「無！連chi̍t ê也無聽tio̍h福音」，i親像teh誇口最近ê勝利koh講：「我lóng m̄-bat看見有人聽tio̍h福音。」 |
|
I ê chú-lâng ēng ū koân-le̍k ê siaⁿ-tiāu koh chi̍t piàn chim-chiok mn̄g kóng: “Kòe-khì kiám ū lâng kè-e̍k beh chiong Hok-im tòa ji̍p lí ê khu-he̍k mah?”
|
I ê主人用有權力ê聲調koh chi̍t遍chim-chiok問講：「過去kiám有人計劃beh將福音帶入你ê區域mah？」 |
|
Chhin-ông ēng tek-sèng ê kháu-khì ìn kóng: “Ū, chóng-sī in ê ló͘-le̍k tī iáu bōe khai-sí í-chêng chiū sit-pāi.”
|
親王用得勝ê口氣應講：「有，總是in ê努力tī iáu bōe開始以前就失敗。」 |
|
Hiān-chāi Sat-tàn chin chù-ì kóng: “Sím-mi̍h? Kā góa kóng, tàu-tí sī sím-mi̍h tāi-chì?”
|
現在Sat-tàn真注意講：「Sím-mi̍h？Kā我講，到底是sím-mi̍h tāi-chì？」 |
|
Chhin-ông chiū khai-sí kóng: “Ah! Góa tī góa léng-thó͘ lāi kiâⁿ lâi kiâⁿ khì ê sî, ū kiâⁿ kàu pak-ke̍k hit pêng khì hóng-būn chit ê chin ko͘-toaⁿ ê chng-siā, hit sî hut-jiân-kan ū thiaⁿ-kìⁿ 2 ê soan-kàu-su tùi hái hit pêng lâi, in í-keng chiūⁿlio̍k koh chē káu teh thoa ê seh-chhia lâi, chìn-ji̍p góa ông-kok ê sim-chōng tōe-tài, chiū-sī A-la̍h-su-ka ê pak-ke̍k tōe-tài Ai-su-ki-mô͘ lâng hia, góa thiaⁿ liáu hui-siōng tio̍h kiaⁿ.”
|
親王就開始講：「Ah！我tī我領土內行來行去ê時，有行到北極hit pêng去訪問chit ê真孤單ê庄社，hit時忽然間有聽見2 ê宣教師tùi海hit pêng來，in已經chiūⁿ陸koh坐狗teh拖ê雪車來，進入我王國ê心臟地帶，就是阿拉斯加ê北極地帶愛斯基摩人hia，我聽了非常tio̍h驚。」 |
|
Hit sî Sat-tàn chin ài chai hit ê kiat-kio̍k chiū chhap-chhùi kóng: “Ū iáⁿ, nā sī án-ni lí cháiⁿ-iūⁿ siat-hoat?”
|
Hit時Sat-tàn真愛知hit ê結局就chhap嘴講：「有影，若是án-ni你cháiⁿ樣設法？」 |
|
“Tāi-seng, góa chiū chū-chi̍p lóng-chóng o͘-àm ê kun-tūi lâi, tī góa ê bēng-lēng, lâi khui hōe-gī, hit sî ū tit-tio̍h chin chōe ê kiàn-gī, chóng-sī kàu bóe tāi-ke lóng chàn-sêng chi̍t ê chòe kán-tan ê hong-hoat, chiū-sī chiong in tàng-sí tī peng-seh tiong, tùi án-ni goán chiū khai-sí.”
|
「Tāi先，我就聚集lóng總烏暗ê軍隊來，tī我ê命令，來開會議，hit時有得tio̍h真chōe ê建議，總是到尾tāi-ke lóng贊成chi̍t ê最簡單ê方法，就是將in凍死tī冰雪中，tùi án-ni goán就開始。」 |
|
“Goán thiaⁿ-kìⁿ tùi in chhut-hoat ê só͘-chāi beh kàu tī in ê bo̍k-tek-tōe, tio̍h su-iàu chi̍t-kò-ge̍h ê sî-kan, in-ūi sī chin hn̄g ê chng-siā, tī chit-kò-ge̍h tiong in tio̍h keng-kòe chi̍t ê peng-tàng ê khòng-iá chiah ōe thang kàu bo̍k-tek-tōe.”
|
「Goán聽見tùi in出發ê所在beh到tī in ê目的地，tio̍h需要chi̍t個月ê時間，因為是真hn̄g ê庄社，tī chit個月中in tio̍h經過chi̍t ê冰凍ê曠野chiah ōe thang到目的地。」 |
|
“Tòa thoân Hok-im ê sim-chì, in chhut-hoat lah, chin ióng-kám chē tī seh-chhia chhut-hoat, chóng-sī chi̍t lé-pài kòe-khì liáu-āu, ū chi̍t ji̍t hut-jiân-kan, hit tiuⁿ chài chia̍h-mi̍h ê seh-chhia tī chin po̍h ê peng ê téng-bīn péng-kòe, in-ūi chài chia̍h-mi̍h ê chhia kòe-thâu tāng, po̍h-po̍h ê peng sòa teh phòa, só͘-í chha-put-to só͘ ū ê chia̍h-mi̍h tī chi̍t ba̍k-ni̍h-kú lóng bô khì.”
|
「帶傳福音ê心志，in出發lah，真勇敢坐tī雪車出發，總是chi̍t禮拜過去了後，有chi̍t日忽然間，hit張載chia̍h-mi̍h ê雪車tī真薄ê冰ê頂面péng過，因為載chia̍h-mi̍h ê車過頭重，薄薄ê冰sòa teh破，所以差不多所有ê chia̍h-mi̍h tī chi̍t目ni̍h久lóng無去。」 |
|
“Hit sî in loán-jio̍k koh ià-siān, chóng-sī chin ióng-kám koh hùn-hoat chìn-chêng kiâⁿ, in chai thâu-chêng iáu ū 3 lé-pài ê lō͘-thêng, in tùi tōe-hng chin chheⁿ-so͘, koh chài in ê sin-thé bô sek-ha̍p tī chit khoán ê chōng-hóng, só͘-í in chin bêng-pe̍k in sī tī bô ǹg-bāng ê chêng-hêng.”
|
「Hit時in軟弱koh ià-siān，總是真勇敢koh奮發進前行，in知頭前iáu有3禮拜ê路程，in對地方真chheⁿ-so͘，koh再in ê身體無適合tī chit款ê狀況，所以in真明白in是tī無ǹg望ê情形。」 |
|
“Chòe-āu, in ê chia̍h-mi̍h lóng bô lah, sin-thé loán-jio̍k koh ià-siān, kàu bô hoat-tō͘ thang kiâⁿ ê sî, góa chiū hoat bēng-lēng, tī chin té ê sî-kan-tiong, hoat-seng chi̍t ê hong-thai, seh lo̍h kàu hō͘ lâng ê ba̍k-chiu m̄-káⁿ thí-khui, koh ū tōa-hong thàu lo̍h--lâi, kàu tī thiⁿ beh kng ê sî, oh! Góa ê chú, chin kám-siā, lí sī khong-tiong chòe ū le̍k-liōng ê ông, in lóng tàng-sí lah.”
|
「最後，in ê chia̍h-mi̍h lóng無lah，身體軟弱ko̍k koh ià-siān，到無法度thang行ê時，我就發命令，tī真短ê時間中，發生chi̍t ê風thai，雪落到hō͘人ê目chiu m̄敢thí開，koh有大風thàu落--來，到tī天beh光ê時，oh！我ê主，真感謝，你是空中最有力量ê王，in lóng凍死lah。」 |
|
Tūi-lo̍h ê Ki-lō͘-peng thiaⁿ liáu chin hoaⁿ-hí, i ê bīn móa-chiok kóng: “Chin gâu! Chin kong-êng! Lí ho̍k-sāi góa si̍t-chāi chin hó.”
|
墮落ê Ki-lō͘-peng聽了真歡喜，i ê面滿足講：「真gâu！真光榮！你服侍我實在真好。」 |
|
I kè-sio̍k tùi tī hia teh thiaⁿ ōe Se-chōng ê chhin-ông kóng: “Taⁿ lí ū sím-mi̍h thang pò-kò mah?”
|
I繼續對tī hia teh聽話西藏ê親王講：「Taⁿ你有sím-mi̍h thang報告mah？」 |
|
Se-chōng chhin-ông èng-siaⁿ chhut-lâi kóng: “Oh! Góa iá ū chi̍t ê kò͘-sū thang hō͘ góa ê ông hoaⁿ-hí.”
|
西藏親王應聲出來講：「Oh！我也有chi̍t ê故事thang hō͘我ê王歡喜 。」 |
|
Sat-tàn chin hoaⁿ-hí, mn̄g kóng: “Hā! Góa ê chhin-ông, in iā ū chi̍t ê kè-e̍k, beh chhim-hoān lí ê ông-kok mah?”
|
Sat-tàn真歡喜，問講：「Hā！我ê親王，in也有chi̍t ê計劃，beh侵犯你ê王國mah？」 |
|
Chhin-ông ìn- kóng: “Sī, ū chi̍t ê kò͘-sū.”
|
親王應講：「是，有chi̍t ê故事。」 |
|
Sat-tàn liâm-piⁿ bēng-lēng kóng: “Cháiⁿ-iūⁿ, kín kā góa kóng hit chân sū.”
|
Sat-tàn liâm-piⁿ命令講：「Cháiⁿ樣，緊kā我講 hit chân事。」 |
|
Chhin-ông chiū khai-sí kóng: “Góa tī Se-chōng ê tiong-sim tōe-tài ho̍k-bū, hit sî góa ū thiaⁿ-tio̍h siau-sit kóng, ū chi̍t ê thoân-thé beh chiong Hok-im thoân-ji̍p góa ê ông-kok, góa ê chú, lí tāi-khài í-keng chai, góa chiū kóaⁿ-kín chhái-chhú hêng-tōng, góa tiàu-chi̍p só͘ ū ê kun-tūi, thó-lūn só͘ ū ê chêng-hêng, jiân-āu goán chin kín, chiū chàn-sêng chi̍t ê kè-e̍k.”
|
親王就開始講：「我tī西藏ê中心地帶服務，hit時我有聽tio̍h消息講，有chi̍t ê團體beh將福音傳入我ê王國，我ê主，你大概已經知，我就趕緊採取行動，我召集所有ê軍隊，討論所有ê情形，然後goán真緊，就贊成chi̍t ê計劃。」 |
|
“Hit ê thoân-thé phài 2 ê lâng lâi Tiong-kok, in chin tōa-táⁿ pôaⁿ kòe kéng, chìn-ji̍p tī siū kìm-chí ê tōe, goán ún-chún in kè-sio̍k kiâⁿ 3 ji̍t ê lō͘-thêng, jiân-āu kàu tī hông-hun-àm, chiū ū chin chōe chhâi-lông lâi, kî-tiong ê 2 chiah óa-lâi kong-kek, in piàⁿ-miā beh pó-hō͘ in ê oa̍h-miā, chóng-sī kàu chòe-āu, kî-tiong ê chi̍t ê sòa hō͘ chhâi-lông kā-sí, lēng-gōa chi̍t ê siū tio̍h lâng bô khòaⁿ-kìⁿ ê kun-tūi pó-hō͘ tiâu-tiâu, goán bô hoat-tō͘ thang iâⁿ-kòe, sòa hō͘ i cháu-khì.”
|
「Hit ê團體派ê人來中國，in真大膽盤過境，進入tī受禁止ê地，goán允准in繼續行3日ê路程，然後到tī黃昏暗，就有真chōe豺狼來，其中ê 2隻óa來攻擊，in拚命beh保護in ê活命，總是到最後，其中ê chi̍t ê sòa hō͘豺狼咬死，另外chi̍t ê受tio̍h人無看見ê軍隊保護tiâu-tiâu，goán無法度thang贏過，sòa hō͘ i走去。」 |
|
Sat-tàn chòe thang kiaⁿ ê piáu-chêng kóng: “Thau-cháu! Thau-cháu! I ū chiong Hok-im thoân tī Se-chōng á-bô?”
|
Sat-tàn做thang驚ê表情講：「偷走！偷走！I有將福音傳tī西藏á無？」 |
|
Se-chōng ê chhin-ông ēng choa̍t-tūi ê siaⁿ-tiāu ìn kóng: “Bô, góa ê chú, tī i iáu bōe o̍h chi̍t-kù Se-chōng ōe í-chêng, goán ê kun-tūi chiū kiò thó͘-lâng chiong i lia̍h khí-lâi, tong-jiân i chiū siū soan-kò sí-hêng. Oh! Hit-sî ê chêng-hêng it-tēng ōe hō͘ tāi-ông chhiong-móa hoaⁿ-hí chiah tio̍h. In chiong i thīⁿ tī tâm ê gû-phôe n̍i̍h, jiân-āu chiong i hē tī ji̍t-thâu tiong hō͘ ji̍t-thâu pōe, pha̍k, 3 ji̍t kú liáu-āu, i iáu teh oa̍h, chóng-sī gû-phôe teh kiu ê sî, i ê kut-thâu bān-bān siū phah-chhùi, kàu chòe-āu oa̍h-miā chiū kiat-sok lah.”
|
西藏ê親王用絕對ê聲調應講：「無，我ê主，tī i iáu bōe o̍h chi̍t句西藏話以前，goán ê軍隊就叫土人將i lia̍h起來，當然i就受宣告死刑。Oh！Hit時ê情形一定ōe hō͘大王充滿歡喜chiah tio̍h。In將i填tī tâm ê牛皮n̍i̍h，然後將i hē tī日頭中hō͘日頭pōe，pha̍k，3日久了後，i iáu teh活，總是牛皮teh kiu ê時，i ê骨頭慢慢受phah碎，到最後活命就結束lah。」 |
|
Se-chōng ê chhin-ông teh kóng-ōe ê sî-chūn, pâng-keng lāi-bīn chin kín chiū chhiong-móa Sat-tàn ê pō͘-hā, kàu i pò-kò kiat-sok ê sî, chi̍t ê tōa hoaⁿ-hí ê siaⁿ tùi choân-thé ê hōe-gī tiong hoah chhut-lâi.”
|
西藏ê親王teh講話ê時chūn，房間內面真緊就充滿Sat-tàn ê部下，到i報告結束ê時，chi̍t ê大歡喜ê聲tùi全體ê會議中hoah出來。」 |
|
Tāi-ke kiâⁿ-lé teh kèng-pài Sat-tàn ê sî, Sat-tàn ê bīn sui-jiân sī siū chōe thún-ta̍h, iáu-kú sī chin chiàⁿ súi. Keng-kòe tiap-á-kú, Sat-tàn gia̍h chhiú iô chi̍t-ē, hiah ê hoaⁿ-hí ê siaⁿ chek-sî bô khì, pìⁿ chòe chin an-chēng.
|
Tāi-ke行禮teh敬拜Sat-tàn ê時，Sat-tàn ê面雖然是受罪thún-ta̍h，iáu-kú是真正súi。經過tiap-á久，Sat-tàn gia̍h手搖chi̍t-ē，hiah ê歡喜ê聲即時無去，pìⁿ做真安靜。 |
|
Sat-tàn koh chài tùi lēng-gōa chi̍t ê tūi-lo̍h ê thiⁿ-sài kóng: “Góa ê chhin-ông, lí iû-goân sī A-hù-hān kok ê chú mah? Lí ū sím-mi̍h pò-kò bô?”
|
Sat-tàn koh再對另外chi̍t ê墮落ê天使講：「我ê親王，你iû-goân是阿富汗國ê主mah？你有sím-mi̍h報告無？」 |
|
Siū mn̄g ê hit ê ìn kóng: “Tāi-ông, ū, sui-jiân góa ê pò-kò put-pí góa ê tâng-phōaⁿ, chóng-sī iā ū tām-po̍h thang pò-kò.”
|
受問ê hit ê應講：「大王，有，雖然我ê報告不比我ê同伴，總是也有tām-po̍h thang報告。」 |
|
“Ah! Tī lí ê tōe-kài iā ū siāng khoán ê kè-e̍k mah?”
|
「Ah！Tī你ê地界也有siāng款ê計劃 mah？」 |
|
Chhin-ông ìn kóng: “Sī, góa ê chú, chhiáⁿ thiaⁿ, góa beh chiong kò͘-sū kā lí kóng”, i iô-chhiú kiò tāi-ke an-chēng, jiân-āu chiū khai-sí kóng: “Goán khòaⁿ-kìⁿ ū 4 ê jia̍t-sim ūi Siōng-tè chòe kang ê kang-lâng kiâⁿ óa lâi, góa ê chú, chiàu lí só͘ chai, tng in kiâⁿ óa lâi ê sî, in ū khòaⁿ-kìⁿ, khiā tī góa ê kok-thó͘ sì-ûi ê kò-sī-pâi, siá kóng, ‘Choa̍t-tùi kìm-chí lâng pôaⁿ-kòe chit ê kéng-kài chìn-ji̍p A-hù-hān’, in khòaⁿ-tio̍h, chiū kiū tī hia kî-tó. Sui-jiân sī án-ni góa ióng-kám ê kun-tūi iáu-kú sī chiàm tī khah hó tē-ūi. Lī kò-sī-pâi 50 chhioh ê só͘-chāi, ū chi̍t ê A-hù-hān ê ōe-peng, chhiú kia̍h chhèng chē tī hia. In kî-tó liáu chiū tōa-táⁿ kiâⁿ kòe kéng-kài chìn-ji̍p kìm-chí ê tōe. Ōe-peng iông-ún in kè-sio̍k kiâⁿ 20 pō͘, jiân-āu chhin-chhiūⁿ ge̍h-kng siám chi̍t-ē. 3 lia̍p chhèng-chí phah chhut-lâi, 3 lâng èng-siaⁿ tó lo̍h-khì. Kî-tiong 2 lâng chek-sî sí khì, koh chi̍t ê siū tāng-siong, i ê tâng-phōaⁿ kóaⁿ-kín chiong hit ê siū-siong ê lâng hû-chhah kàu pian-kài ê só͘-chāi. Chóng-sī bô kú hit ê siū tāng-siong ê iā sí-khì, só͘ chhun ê hit ūi kiaⁿ tio̍h chiū cháu khì lah.”
|
親王應 講：「是，我ê主，請聽，我beh將故事kā你講」，i搖手叫tāi-ke安靜，然後就開始講：「Goán看見有4 ê熱心為上帝做工ê工人行óa來，我ê主，照你所知，tng in行óa來ê時，in有看見，khiā tī我ê國土四圍ê告示牌，寫講，『絕對禁止人盤過chit ê境界進入阿富汗』，in看tio̍h，就跪tī hia祈禱。雖然是án-ni我勇敢ê軍隊iáu-kú是佔tī khah好地位。離告示牌50尺ê所在，有chi̍t ê阿富汗ê衛兵，手kia̍h chhèng坐tī hia。In祈禱了就大膽行過境界進入禁止ê地。衛兵容允in繼續行20步，然後親像月光閃chi̍t-ē。3粒chhèng-chí phah出來，3人應聲倒落去。其中2人即時死去，koh chi̍t ê受重傷，i ê同伴趕緊將hit ê受傷ê人扶chhah到邊界ê所在。總是無久hit ê受重傷ê也死去，所chhun ê hit位驚tio̍h就走去lah。」 |
|
Hoaⁿ-hí ê siaⁿ koh chài hoat-chhut-lâi, kàu kú-kú, tōa hoaⁿ-hí chhiong-móa tī chāi-chō múi chi̍t lâng ê sim, Sat-tàn ê hoaⁿ-hí iû-kî-sī oh-tit piáu-bêng, in-ūi iáu ū chin-chōe ê só͘-chāi Hok-im bô hoat-tō͘ thang thoân ji̍p-khì, koh teh chó͘-tòng Hok-im lóng tit-tio̍h tek-sèng, i chin kám-siā hiah ê bû-sò͘ ê kun-chiòng, in-ūi Hok-im iáu-kú siū chó͘-tòng, hit ê thang kiaⁿ ê miâ-jī iáu bōe kàu tī sè-kài ta̍k só͘-chāi.”
|
歡喜ê聲koh再hoat出來，到久久，大歡喜充滿tī在座每chi̍t人ê心，Sat-tàn ê歡喜尤其是oh得表明，因為iáu有真chōe ê所在福音無法度thang傳入去，koh teh阻擋福音lóng得tio̍h得勝，i真感謝hiah ê無數ê群眾，因為福音iáu-kú受阻擋，hit ê thang驚ê名字iáu bōe到tī世界ta̍k所在。」 |
|
“Oh! Tōa khùi-la̍t ê, chhiáⁿ lí kā goán kóng, lí siáⁿ-sū hiah ni̍h7 khòa-lū lán ê kok-ka tit-tio̍h Hok-im ê tì-sek ni̍h? Lí kiám m̄ chai, Ìn-tō͘ chhin-ông, Tiong-kok chhin-ông, A-hui-lī-ka chhin-ôngê kok-ka í-keng siū chin kiông ê kun-tūi chhim-ji̍p, iā ta̍k-ji̍t ū chin-chōe lâng teh sìn Ki-tok mah?”
|
「Oh！大氣力ê，請你kā goán講，你siáⁿ事hiah ni̍h7掛慮lán ê國家得tio̍h福音ê智勢ni̍h？你kiám m̄知，印度親王，中國親王，阿非利加親王ê國家已經受真強ê軍隊侵入，也ta̍k日有真chōe人teh信基督mah？」 |
|
Sat-tàn ìn kóng: “Ah! Sī, góa chin-chai-iáⁿ, chhiáⁿ lín thiaⁿ góa soat-bêng, góa siáⁿ-sū hiah-n̍i̍h jia̍t-sim tī hiah ê Hok-im iáu bô thoân-ji̍p ê tē-hng.” Hit sî tāi-ke lóng chin an-chēng beh thiaⁿ Sat-tàn kóng.
|
Sat-tàn應講：「Ah！是，我真知影，請lín聽我說明，我siáⁿ事hiah-n̍i̍h熱心tī hiah ê福音iáu無傳入ê地方。」 Hit時tāi-ke lóng真安靜beh聽Sat-tàn講。 |
|
“Ū kúi-nā hāng ê chàm-gú, kiám-chhái ōe thang chong-ha̍p chòe chi̍t ê lâi kóng.” Chiū khai-sí kóng: “Chit ê chàm-gú chiū-sī án-ni, ‘Chit ê thian-kok ê Hok-im beh thoân kàu thong thiⁿ-ē, chò kan-chèng tī bān-pang; hit sî boa̍t-kî chiū kàu.’ (Má-thài 24:14).” I kè-sio̍k ēng khah kē ê siaⁿ-tiāu kóng: “Hiān-chāi chin hián-jiân, Siōng-tè teh hóng-būn gōa-pang ‘tùi in tiong-kan chhú peh-sìⁿ lâi kui tī I ê miâ’ jiân-āukóng: ‘Í-āu Góa beh tńg-lâi’ (Sù-tô͘ Hêng-toān 15:14-16), chia ū àm-sī úi-tāi ê tāi-chì, chiū-sī beh hō͘ bān peh-sìⁿ chòe ha̍k-seng.”
|
「有幾nā項ê讚語，kiám-chhái ōe thang綜合做chi̍t ê來講。」 就開始講：「Chit ê讚語就是án-ni，『Chit ê天國ê福音beh傳到thong天下，做kan證tī萬邦；hit時末期就到。』 (馬太24：14)。」 I繼續用khah低ê聲調講：「現在真顯然，上帝teh訪問外邦 『tùi in中間取百姓來歸tī I ê名』 然後講：『以後我beh tńg來』 (使徒行傳15：14-16)，chia有暗示偉大ê tāi-chì，就是beh hō͘萬百姓做學生。」 |
|
Sat-tàn chin siū-khì tōa-siaⁿ kóng: “Hiān-sî, Iâ-so͘ Ki-tok nā bô kàu bān-kok lóng thiaⁿ-tio̍h Hok-im, i sī bōe-ōe koh tńg-lâi tōe-chiūⁿ chiáng-koân, in-ūi Sèng-keng kóng: ‘Góa khòaⁿ ū kui tōa tīn ê lâng, bô lâng ōe sǹg i ê siàu-gia̍h, chhut tī ta̍k-kok, ta̍k-cho̍k, ta̍k-hō peh-sìⁿ, ta̍k-iūⁿ khiuⁿ-kháu ê’. (Khé-sī-lio̍k 7:9) Só͘-í bô-lūn jōa chōe ê soan-kàu-su siū phài kàu ta̍k só͘-chāi thoân Hok-im, á-sī í-keng tit-tio̍h jōa-chōe hoán-hóe ê lâng, Hok-im nā bô thoân kàu A-la̍h-su-ka, Se-chōng, A-hù-hān, á-sī só͘ sio̍k tī lán ê kî-thaⁿ iáu-bōe ū Hok-im ê só͘-chāi, I chiū bōe-ōe koh tò-tńg-lâi chiáng-koân ê.”
|
Sat-tàn真siū-khì大聲講：「現時，耶穌基督若無到萬國lóng聽tio̍h福音，i是bōe-ōe koh tńg來地chiūⁿ掌權，因為聖經講：『我看有kui大陣ê人，無人ōe算i ê siàu額，出tī ta̍k國，ta̍k族，ta̍k-hō百姓，ta̍k樣腔口ê』。(啟示錄7：9) 所以無論jōa chōe ê宣教師受派到ta̍k所在傳福音，á是已經得tio̍h jōa-chōe反悔ê人，福音若無傳到阿拉斯加，西藏，阿富汗，á是所屬tī lán ê其他iáu-bōe有福音ê所在，I就bōe-ōe koh tò-tńg來掌權ê。」 |
|
Oa̍t-lâm ê chhin-ông chhah-chhùi kóng: “In-ūi án-ni, siat-sú lán nā ōe-thang kò͘ lán ê só͘-chāi bô hō͘ soan-kàu-su ji̍p-lâi, án-ni lán chiū ōe thang chó͘-tòng I tńg-lâi thóng-tī tōe-chiūⁿ, iā chiū-sī ōe tàng phò-hoāi chì-koân ê kè-e̍k lah.”
|
越南ê親王chhah嘴講：「因為án-ni，設使lán若ōe-thang顧lán ê所在無hō͘宣教師入來，án-ni lán就ōe thang阻擋I tńg來統治地chiūⁿ，也就是ōe tàng破壞至koân ê計劃lah。」 |
|
Kàn-po͘-chē chhin-ông hoah kóng: “Goán goān-ì án-ni lâi chòe, tit-kàu ū chi̍t-ji̍t hiah ê soan-kàu-su ka-kī siá kóng: ‘Tī chit sî goán bōe tàng khòaⁿ-tio̍h chi̍t ê Kàn-po͘-chē lâng jīn-bat goán ê Kiù-chú Iâ-so͘ Ki-tok chín-kiù ê tì-sek’ goán ê tāi-ông, goán tek-khak beh chīn-la̍t lâi chòe, it-tēng lóng bōe sit-pāi.”
|
柬埔寨親王hoah講：「Goán願意án-ni來做，直到有chi̍t日hiah ê宣教師ka-kī寫講：『Tī chit時goán bōe tàng看tio̍h chi̍t ê柬埔寨人認bat goán ê救主耶穌基督拯救ê智識』 goán ê大王，goán的確beh盡力來做，一定lóng bōe失敗。」 |
|
Sat-tàn kóng: “Án-ni chin hó, lán tio̍h koh khah tì-ì, lâi phò-hoāi só͘ ū ê kè-e̍k, hō͘ Hok-im bô chìn-ji̍p iáu bōe thoân ê só͘-chāi.”
|
Sat-tàn講：「Án-ni真好，lán tio̍h koh khah致意，來破壞所有ê計劃，hō͘福音無進入iáu bōe傳ê所在。」 |
|
In bêng-pe̍k úi-tāi ê kè-e̍k liáu-āu, chiū tōa hoaⁿ-hí hán-hoah, kóaⁿ-kín tò-tńg kàu in ka-kī ê kok-ka, pí í-chêng koh khah giâm-bi̍t kò͘-siú, bô hō͘ chi̍t lâng ê lêng-hûn tô-thoat in ê chhiú-tiong.
|
In明白偉大ê計劃了後，就帶歡喜喊hoah，趕緊tò-tńg到in ka-kī ê國家，比以前koh khah嚴密顧守，無hō͘ chi̍t人ê靈魂逃脫in ê手中。 |
|
Keng-kòe 50 nî, Sat-tàn bô thêng-hioh teh kiâⁿ-lâi kiâⁿ-khì, i ê bīn ū o͘-àm, chin chōe liap-kéng, ū pháiⁿ-tāi ê piáu-chêng, i ka-kī chai-iáⁿ, lâng iā khòaⁿ ōe chhut, ū chin bô pêng-siông ê sū hō͘ i kám-kak chin kan-khó͘.
|
經過50年，Sat-tàn無停hioh teh行來行去，i ê面有烏暗，真chōe liap-kéng，有pháiⁿ-tāi ê表情，i ka-kī知影，人也看ōe出，有真無平常ê事hō͘ i感覺真艱苦。 |
|
I ka-kī tùi ka-kī kóng: “Bô khó-lêng, iā bô lō͘-ēng”, i kè-sio̍k ēng chho͘ tōa ê siaⁿ-im kóng: “Sī, múi chi̍t ê kè-e̍k, in chhin-chhiūⁿ ū chi̍t ê koàn-thiat kàu bóe ê īⁿ-siōng. Chiū-sī ‘Thoân hok-im’, góa bô ài thiaⁿ chia hê ōe, in iā siá seng-bêng-su kóng: ‘Pún-hōe ê bo̍k-tek sī tī chit ê sî-tāi ho̍k-chiông Chú, thoân hok-im kàu tī choân sè-kài koh tio̍h tùi bān-kok chòe kan-chèng, chiàu I só͘ kóng, “Tùi in tiong-kan chhú peh-sìⁿ lâi kui tī I ê miâ”. Koh chhin-chhiūⁿ I só͘ kóng, “Lín tio̍h khì phó͘ thiⁿ-ē thoân hok-im hō͘ bān peh-sìⁿ thiaⁿ”. Bo̍k-tek sī ài beh ū hūn tī sè-kài pò͘-tō ê kang. Soan-kàu-su ê chèng-chhek sī thoân-tō tī iáu bōe sìn Ki-tok ê kok-ka á-sī peh-sìⁿ ê tiong-kan, lâi ho̍k-bū.”
|
I ka-kī對ka-kī講：「無可能，也無lō͘用」，i繼續用粗大ê聲音講：「是，每chi̍t ê計劃，in親像有chi̍t ê貫徹到尾ê異象。就是『傳福音』，我無愛聽chiah ê話，in也寫聲明書講：『本會ê目的是tī chit ê時代服從主，傳福音到tī全世界koh tio̍h對萬國做kan證，照I所講，「Tùi in中間取百姓來歸tī I ê名」。Koh親像I所講，「Lín tio̍h去普天下傳福音hō͘萬百姓聽」。目的是愛beh有份tī世界佈道ê工。宣教師ê政策是傳道tī iáu bōe信基督ê國家á是百姓ê中間，來服務。」 |
|
“Chhiau-oa̍t khu-he̍k” tī bī-sìn ê kok-ka kap peh-sìⁿ tiong chòe khai-thok ê kang-chok kap tī chit ê sî-tāi, ho̍k-chiông I ê kè-e̍k, “chhiok-chìn lán ê Chú kóaⁿ-kín tńg-lâi”, iā phiau-gú sī “Chhiáⁿ Ông kín lâi” “Ông!” “Ông!”, sī put-khó-lêng ê sū, góa tek-khak phò-hoāi in ê bo̍k-tek!” “Ông!” Nā ū lâi ê sî, góa m̄-chai beh tú-tio̍h sím-mi̍h? Góa tek-khak tio̍h liâm-pīⁿ tiàu-chi̍p hōe-gī.”
|
「超越區域」 tī迷信ê國家kap百姓中做開拓ê工作kap tī chit ê時代，服從I ê計劃，「促進lán ê主趕緊tńg來」，iā標語是「請王緊來」 「王！」 「王！」，是不可能ê事，我的確破壞in ê目的！「王！」 若有來ê時，我m̄知beh tú-tio̍h sím-mi̍h？我的確tio̍h liâm-pīⁿ召集會議。」 |
|
Kúi hun-cheng liáu-āu in chiū lóng kàu, sī tùi tē-ke̍k lâi ê ----tūi-lo̍h ê thiⁿ-sài, ko-kip sîn-bêng, chhin-ông, thâu-ba̍k, chit sè-tāi o͘-àm ê thóng-tī-chiá, ----in ū sǹg bōe liáu ê sò͘-bo̍k chū-chi̍p tī in ê chú ê chiu-ûi. Sat-tàn ê sim-lāi chin siū-khì khiā tī in ê tiong-kan, hit sî ê khong-khì sī chēng-chēng. Chhin-chhiūⁿ sí ê khoán-sit, hiān-chāi i khai-sí kóng-ōe lah.
|
幾分鐘了後in就lóng到，是tùi地極來ê ---- 墮落ê天使，高級神明，親王，頭目，chit世代烏暗ê統治者，---- in有算bōe了ê數目聚集tī in ê主ê周圍。Sat-tàn ê心內真siū-khì khiā tī in ê中間，hit時ê空氣是靜靜。親像死ê款sit，現在i開始講話lah。 |
|
“A-la̍h-su-ka chhin-ông khiā chìn-chêng lâi!”
|
「阿拉斯加親王行進前來！」 |
|
I phi̍h-phi̍h-chhoah, kiaⁿ-hiâⁿ koh lún-neh, kap 50 nî chêng ê bīn-māu oân-choân bô saⁿ-tâng, kiâⁿ kūn i thang kiⁿ ê kun-ông bīn-chêng.
|
I phi̍h-phi̍h-chhoah，驚惶koh lún-neh，kap 50年前ê面貌完全無saⁿ同，行近i thang驚ê君王面前。 |
|
Sat-tàn mn̄g kóng: “A-la̍h-su-ka chhin-ông, in ū chìn-ji̍p lí hia bô?
|
Sat-tàn問講：「阿拉斯加親王，in有進入你hia無？」 |
|
“Sī, góa ê chú, in ū kàu góa hia”, chhin-ông bān-bān ìn-tap, kiaⁿ-hiâⁿ ê ba̍k-chiu khòaⁿ ē-bīn, m̄ káⁿ kia̍h khí-lâi.
|
「是，我ê主，in有到我hia」，親王慢慢應答，驚惶ê目chiu看下面，m̄敢kia̍h起來。 |
|
Sat-tàn tōa siū-khì, bōe thang khòng-chè ka-kī kóng: “Sím-mi̍h! Sím-mi̍h! Siaⁿ-sū lí bô hó-hó lâi pó-siú góa ê kok-ka?”
|
Sat-tàn大siū-khì，bōe thang控制ka-kī講：「Sím-mi̍h！Sím-mi̍h！Siáⁿ事你無好好來保守我ê國家？」 |
|
“Goán í-keng chīn goán só͘ ōe lah, tāi-ông, chóng-sī lóng bô hāu-kó. Ōe koh kóng tò-tńg--lâi; tāi-seng hit 2 lâng ê sin-si hō͘ lâng hoat-kiàn tio̍h, án-ni choân-thé ê kàu-hōe sòa jia̍t-sim khí-lâi. Kî-thaⁿ ê lâng chiū kè-sio̍k lâi lah, goán phò-hoāi kúi-nā pái, chóng-sī in jú-lâi jú-ióng-kám, jîn-sò͘ jú chōe. Chòe-āu, sui-jiân chīn goán só͘ ū lâi chó͘-tòng, chóng-sī bô pān-hoat, lóng ji̍p-lâi lah. In tit-tio̍h thiⁿ-sài ê pó-hō͘, ji̍p-lâi koh tiàm tī lāi-bīn, goán iā bô pān-hoat thang khóaⁿ in chhut-khì. Só͘-í hiān-chāi ū kúi-nā pah miâ ê Ai-sū-ki-mô͘ lâng í-keng chìn-ji̍p Siōng-tè kok, koh ū kúi-nā chheng lâng í-keng thiaⁿ-tio̍h hok-im lah.”
|
「Goán已經盡goán所ōe lah，大王，總是lóng無效果。話koh講tò-tńg--來；tāi先hit 2人ê新詩hō͘人發見tio̍h，án-ni全體ê教會sòa熱心起來。其他ê人就繼續來lah，goán破壞幾nā pái，總是in愈來愈勇敢，人數愈chōe。最後，雖然盡goán所有來阻擋，總是無辦法，lóng入來lah。In得tio̍h天使ê保護，入來koh tiàm tī餒內面，goán也無辦法thang趕in出去。所以現在有幾nā百名ê愛斯基摩人已經進入上帝國，koh有幾nā千人已經聽tio̍h福音 lah。」 |
|
Koh lo̍h-khì ê kong-kéng sī chin oh-tit siá chhut lâi. Sat-tàn hui-siông siū-khì, oân-choân piáu-hiān i ê siū-khì, tōa siaⁿ jióng khí-lâi, i ê chhin-ông tī i ê bīn-chêng kiaⁿ-hiâⁿ ngia̍uh-ngia̍uh-chhoah, siūⁿ ài lī-khui i thang kiaⁿ ê ba̍k-chiu.
|
Koh落去ê光景是真oh得寫出來。Sat-tàn非常siū-khì，完全表現i ê siū-khì，大聲嚷起來，i ê親王tī i ê面前驚惶ngia̍uh-ngia̍uh-chhoah，想愛離開i thang驚ê目chiu。 |
|
Thêng chi̍t-sî-á, hoat siū-khì ê Mô͘-ông tōa-siaⁿ jióng kóng: “Se-chōng chhin-ông, khiā chìn-chêng lâi! Góa ǹg-bāng ōe thang tùi lí tit-tio̍h khah hó ê pò-kò.” Hit ê siū kiò ê léng-siū kiâⁿ chìn-chêng lâi.
|
停chi̍t時á，發siū-khì ê魔王大聲嚷講：「西藏親王，khiā進前來！我ǹg望ōe thang tùi你得tio̍h khah好ê報告。」 Hit ê受叫ê領袖行進前來。 |
|
Chhin-ông an-chēng kóng: “Bô, góa ê chú, góa í-keng sit-pāi kàu liân chi̍t-sut-á iā bô.”
|
親王安靜講：「無，我ê主，我已經失敗到連chi̍t-sut-á也無。」 |
|
Sat-tàn tōa siū-khì kóng: “Sím-mi̍h! Oh, chhin-ông, tī lí ê léng-thó͘ lāi iā ū lâng í-keng thiaⁿ-tio̍h I ê miâ?”
|
Sat-tàn大siū-khì講：「Sím-mi̍h！Oh，親王，tī你ê領土內也有人已經聽tio̍h I ê名？」 |
|
Chhin-ông ìn kóng: “Tī góa só͘ ū ê koân-le̍k lāi sī bô ū pān-hoat thang chó͘-chí, goán í-keng chīn só͘ ōe lah. Só͘ ū ê kun-tūi ji̍t-mê ló͘-le̍k siūⁿ beh iâⁿ kòe in. In ū hoat-khí chi̍t ê ūn-tōng, bo̍k-tek chiū-sī beh kàu tī bô lâng bat thoân hok-im ê só͘-chāi. Tiong-kok chhin-ông, ēng i ê kun-tūi ló͘-le̍k beh phò-hoāi in, nā sī it-chhè ê ló͘-le̍k lóng bô lō͘-ēng lah, in-ūi in tit-tio̍h thiⁿ-sài ê kun-tūi pó-hō͘ tiâu-tiâu. Goán kiò só͘ ū ê chhâi-lông lâi kong-kek in, goán iā chiong tōa ê oàn-hīn khǹg tī hiah ê hôe-siūⁿ lâi oàn-hīn in, tī ta̍k só͘-chāi siat hām-chéⁿ beh hām-hāi in, iā ū ēng iau-gō phòa-pēⁿ kong-kek in. Na-sī chiah ê lóng bô hāu-kó, in ti̍t-ti̍t chìn-hêng in só͘ beh chòe ê sū, kàu kin-ná-ji̍t, chin chōe ê Se-chōng lâng éng-oán lī-khui lán lah, koh ū kúi-nā chheng ê Se-chōng lâng thiⁿ-tio̍h hok-im, in ê kiàn-chèng thoân kàu chin hn̄g koh khoah ê só͘-chāi.”
|
親王應講：「Tī我所有ê權力內是無有辦法thang阻止，goán已經盡所ōe lah。所有ê軍隊日暝努力想beh贏過in。In有發起chi̍t ê運動，目的就是beh到tī無人bat傳福音ê所在。中國親王，用i ê軍隊努力beh破壞in，若是一切ê努力lóng無lō͘用lah，因為in得tio̍h天使ê軍隊保護tiâu-tiâu。Goán叫所有ê豺狼來攻擊in，goán也將大ê怨恨khǹg tī hiah ê和尚來怨恨in，tī ta̍k所在設陷阱beh陷害in，也有用iau餓phòa病攻擊in。若是chiah ê lóng無效果，in直直進行in所beh做ê事，到今ná日，真chōe ê西藏人永遠離開lán lah，koh有幾nā千ê西藏人聽tio̍h福音，in ê見證傳到真hn̄g koh闊ê所在。」 |
|
Hit-sî Sat-tàn ê siū-khì thang kóng sī bô-hān ê, lóng bô iân-chhiân, i oa̍t-kòe lâi hoat-chhut chòe-āu ê bēng-lēng.
|
Hit時Sat-tàn ê siū-khì thang講是無限ê，lóng無延chhiân，i oa̍t過來發出最後ê命令。 |
|
“A-hù-hān chhin-ông, khiā chìn-chêng lâi!”
|
「阿富汗親王，khiā進前來！」 |
|
Tiap-á-kú ê tiu-tû, siū kiò ê bān-bān kiâⁿ chìn-chêng lâi, khiā tī tāi-ông ê bīn-chêng kiaⁿ-hiâⁿ ngia̍uh-ngia̍uh-chhoah.
|
Tiap-á久ê tiu-tû，受叫ê慢慢行進前來，khiā tī大王ê面前驚惶ngia̍uh-ngia̍uh-chhoah。 |
|
Sat-tàn khai-sí kóng: “A-hù-hān chhin-ông, lí tàu-tí ū hó-hó teh kò͘-siú góa ê léng-thó͘, á-sī iû-goân ko͘-hū góa nah? Góa chai, í-keng bô só͘-chāi thang tńg-se̍h lah.”
|
Sat-tàn開始講：「阿富汗親王，你到底有好好teh顧守我ê領土，á是iû-goân辜負我ni̍h？我知，已經無所在thang tńg-se̍h lah。」 |
|
I bô tit-tio̍h hôe-tap, só͘ ū thiaⁿ-chiòng chhin-chhiūⁿ hō͘ lâng liām-chiù sò bōe kóng-ōe êkhoán, chin an-chēng.
|
I無得tio̍h回答，所有聽眾親像hō͘人念咒sòa bōe講話ê款，真安靜。 |
|
“Óe! Kóng mah! In ū chìn-ji̍p lí ê só͘-chāi bô?”
|
「Óe！講mah！In有進入你ê所在無？」 |
|
“Góa ê chú, in í-keng chìn-ji̍p góa ê só͘-chāi.”
|
「我ê主，in已經進入我ê所在。」 |
|
Mô͘-ông tōa siū-khì, thiàu chìn-chêng lâi tōa-siaⁿ hoah kóng: “A-hù-hān chhin-ông, lí tùi góa ū tiong-si̍t á-bô?”
|
魔王大siū-khì，跳進前來大聲hoah講：「阿富汗親王，你對我有忠實á無？」 |
|
“Sī, góa ê chú, góa ū, chóng-sī bô pān-hoat, goán í-keng chīn só͘ ōe lah, kàu tī chi̍t-nî-chêng, goán hia iáu bô ū chi̍t ê lêng-hûn thiaⁿ-tio̍h hok-im, chóng-sī ū 2 ê chheng-liân-lâng siū phài lâi.”
|
「是，我ê主，我有，總是無辦法，goán已經盡所ōe lah，到tī chi̍t年前，goán hia iáu無有chi̍t ê靈魂聽tio̍h福音，總是有2 ê青年人受派來。」 |
|
Sat-tàn chhah-chhùi kóng: “In eng-kai tio̍h siū chiù-chó͘.”
|
Sat-tàn chhah嘴講：「In應該tio̍h受咒阻。」 |
|
Chhin-ông kè-sio̍k kóng: “Só͘ ū ê kàu-hōe lóng teh ūi in kî-tó, in lóng chai-iáⁿ, hok-im nā bô thoân-kàu múi chi̍t ê só͘-chāi, múi chi̍t chióng giân-gú ê lâng, Iâ-so͘ sī bōe ōe tńg-lâi, m̄ nā án-ni in ū thiⁿ-sài teh pó-hō͘, oh! sī, goán ū heng-chiàn, chóng-sī tī in ê bīn-chêng khiā bōe-taiû. In lâi liáu-āu, lemg-kòe chi̍t lé-pài chiū ū chi̍t lâng chiap-la̍p Ki-tok, iáu ū kî-thaⁿ chin chōe lâng thiaⁿ-tio̍h hok-im lah!”
|
親王繼續講：「所有ê教會lóng teh為in祈禱，in lóng知影，福音若無傳到每chi̍t ê所在，每chi̍t種言語ê人，耶穌是bōe ōe tńg來，m̄ nā án-ni in有天使teh保護，oh！是，goán有興戰，總是tī in ê面前khiā bōe-taiû。In來了後，經過chi̍t禮拜就有chi̍t人接納基督，iáu有其他真chōe人聽tio̍h福音 lah！」 |
|
Sat-tàn tōa-siaⁿ jióng, “Hiān-chāi, só͘ ū ê lóng sit-pāi lah, tī Tiong-kok kap Ìn-tō͘ í-keng ū kúi-nā-chheng lâng tit-kiù lah, chóng-sī tú-chiah só͘ thiaⁿ tio̍h ê siau-sit sī tē-it bái, Ki-tok taⁿ chin khó-lêng hiān-chāi chiū ōe lâi, chì-chió I lâi ê sî-kan bōe-ōe iân-chhiân lah, hiah ê lâng í-keng koat-sim tio̍h kàu só͘ ū ê bîn-cho̍k, só͘ ū kok-chióng giân-gú ê só͘-chāi, iā kàu tī múi chi̍t ê kok-ka thoân hok-im. Ah! Taⁿ ū chai-ē, góa ū chai-ē!”
|
Sat-tàn大聲嚷，「現在，所有ê lóng失敗lah，tī中國kap印度已經有幾nā千人得救lah，總是tú-chiah所聽tio̍h ê消息是第it bái，基督taⁿ真可能現在就ōe來，至少I來ê時間bōe-ōe延chhiân lah，hiah ê人已經決心tio̍h到所有ê民族，所有各種言語ê所在，也到tī每chi̍t ê國家傳福音。Ah！Taⁿ有災厄，我有災厄！」 |
