Ōe-Ke̍k Chia̍h Iûⁿ-Kàu_01
|
話劇--食洋教_01 |
|---|---|
| Ông Chhái-kí | 王彩芑 |
|
e̍k
|
譯 |
|
Tī 64 nî chêng ê Kiⁿ-chú nî, sī Tiong-kok in-ūi Gī-hô-thâng ê poān-loān tú-tio̍h chòe chhiⁿ-chhám ê chai-lān ê nî, hit sî Se-iûⁿ lâng lóng siū chheng-ho͘ chòe”Ta-mau-chu”(大毛子), sìn Chú el5ang á-sī chia̍h se-iûⁿ thâu-lō͘ ê lâng, lóng siū chheng-ho͘ “Er-mau-chu,”(二毛子), nā m̄-sī siū thâi, chiū-sī siū lia̍h, siū khún-tio̍k. Tiong-kan ū lâng lāu-bú kap sió-tī, sió-bē lóng siū thâi-sí sûn-kàu, só͘ chhun i pún-sin, kèng-jiân sī kin-á-ji̍t lán Tiong-kok chi̍t ê chòe ū seng-bōng ê lāu bo̍k-su.
|
Tī 64年前ê庚子年，是中國因為義和團ê叛亂tú著最悽慘ê災難ê年，hit時西洋人攏受稱呼做【大毛子】，信主ê人抑是食西洋頭路ê人，攏受稱呼【二毛子】，若m̄是受thâi,就是受掠，受窘逐，中間有人老母kap小弟，小妹攏受thâi死殉教，所chhun伊本身，竟然是今仔日咱中國一個最有聲望ê老牧師。 |
|
Chit phiⁿ sī”生命之道”Ge̍h-khan chioh i ê keng-kè phian chòe ōa-ke̍k. Ông lú-sū kā hoan-e̍k kè-lâi ê. Tī chia kā”生命之道” Ge̍h-khan soeh-siā.
|
這篇是「生命之道」月刊借伊ê經過編做話劇。王女士kā翻譯--過來--ê。Tī chia kā「生命之道」月刊說謝。 |
|
Lāu bo̍k-su tī lo̍h lâm hé-chhia tiong, ū chi̍t ê lú-kheh ki-chhì i “Chia̍h iûⁿ-kàu,” ”hoat iûⁿ-châi.” Lāu bo̍k-su tùi án-ni ūi i sū-su̍t 64 nî chêng Kiⁿ-chú kûn-húi chi loān ê chi̍t tōaⁿ óng sū. Kûn-húi lia̍h tio̍h lāu bo̍k-su ê sió-tī, sió-bē kap lāu-bú, pek in tio̍h ǹg ngó͘-siōng kūi-pai; pàng-sak Iâ-so͘. Chóng-sī in khiok lēng-khó͘ sí m̄ hâng-ho̍k, kiat-kó sió-tī hō͘ to thâi-sí, lāu-bú kap sió-bē hō͘ tn̂g-chhiuⁿ chha̍k sí, chhù iā tú-tio̍h hé-sio. Lāu bo̍k-su kám-kak lāu-bú, sió-tī, sió bē ūi-tio̍h Chú lâi sí, chiū sî-khì chin hó thāi-gū ê thâu-lō͘, chiū-sī chia̍h se-iûⁿ ê bō͘-e̍k-siong ê thâu-lō͘, hiàn-sin thoân-tō, tāi-seng khì bú-chhin, sió-tī, sió-bē tú-tio̍h hoān-lān ê sió chng-siā soan-iông hok-im, khí-thâu chhoan-bîn lia̍h chòe i sī beh pò-ho̍k, āu-lâi khòaⁿ-kìⁿ i thiàⁿ Chú, thiàⁿ lâng, khiân-sêng ê kiàn-chèng, chiām-chiām hó kám, chiū lâi chiap-siū Iâ-so͘ phó͘-piàn kàu choân chng-siā.
|
老牧師tī落南火車中，有一個旅客譏刺 伊「食洋教」，「發洋財」。老牧師tùi án-ni為伊敘述64年前庚子拳匪之亂ê一段往事。拳匪掠著老牧師ê小弟，小妹kap老母，迫in著向偶像跪拜；放sak耶穌。總--是in卻寧可死m̄降服，結果小弟hō͘刀thâi--死，老母kap小妹hō͘長鎗chha̍k--死，厝也tú著火燒。老牧師感覺老母，小弟，小妹為著主來死，就辭去真好待遇ê頭路，就是食西洋ê貿易商ê頭路，獻身傳道，代先去母親，小弟，小妹tú著患難ê小庄社宣揚福音，起頭村民掠做伊是beh報復，後--來看見伊疼主，疼人，虔誠ê見證，漸漸好感，就來接受耶穌普遍到全庄社。 |
|
Jîn-bu̍t
|
人物 |
|
Tân lāu Bo̍k-su 84 hè
|
陳老牧師 84歲 |
|
Lāu Tiuⁿ (lú-kheh) Tiong-liân
|
老張（旅客） 中年 |
|
Lāu Ông (lú-kheh) Tiong-liân
|
老王（旅客） 中年 |
|
Má Tōa-thâu(Kûn-húi sió thâu-ba̍k) iok 35 hè
|
馬大頭 ( 拳匪小頭目 ) 約35歲 |
|
Lāu-io (Kûn-húi Keh Chú-siú) iok 25 hè
|
老么 （拳匪郭主守） 約25歲 |
|
Tân Su-bú ( lāu bo̍k-su bú-chhin) iok 45 hè
|
陳師母（老牧師母親） 約45歲 |
|
Sió-tī (lāu bo̍k-su sió-tī) 17 hè
|
小弟 （老牧師小弟） 17歲 |
|
Sió-bē(lāu bo̍k-su sió-bē) 12 hè
|
小妹 （老牧師小妹） 12歲 |
|
(Im-ga̍k: Hé-chhia khui ê siaⁿ).
|
（音樂：火車開ê聲）。 |
|
Ông: Lāu Sian-siⁿ, lí beh khì tó-ūi?
|
王：老先生，你beh去tó位？ |
|
Bo̍k: Tâi-lâm, lín nn̄g ê leh?
|
牧：台南，lín兩個--leh？ |
|
Tiuⁿ: Iā sī Tâi-lâm.
|
張：也是台南。 |
|
Ông: Lāu Sian-siⁿ, lí kùi sìⁿ?
|
王：老先生，你貴姓？ |
|
Bo̍k: Pè sìⁿ Tân, lín nn̄g-ūi leh?
|
牧：敝姓陳，lín兩位--leh？ |
|
Tiuⁿ: Sió sìⁿ Tiuⁿ, chit ūi sìⁿ Ông.(Hé-chhia kiâⁿ ê siaⁿ sió-khóa thêng).
|
張：小姓張，這位姓王。（火車行ê聲小可停。） |
|
Ông: Lí lāu-lâng ê ba̍k-chiu chin hó͘, hiah sòe-jī ê Eng-bûn iā khòaⁿ hiah chheng-chhó.
|
王：你老人ê目珠真好，hiah細字ê英文也看hiah清楚。 |
|
Bo̍k: Iáu khó-í, put-kò the̍h ba̍k-kiàⁿ khí--lâi he tong-jiân chiū bōe sái-tit lah!
|
牧：Iáu可以，不過提目鏡起--來he當然就bōe使--tit lah！ |
|
Tiuⁿ: Lāu sian-siⁿ, hia chi̍t pún kāu-kāu ê sī sím-mi̍h chheh?
|
張：老先生，hia一本厚厚ê是甚mi̍h冊？ |
|
Bo̍k: Eng-bûn ê Sèng-keng.
|
牧：英文ê聖經。 |
|
Tiuⁿ: O͘h.........
|
張：O͘h… |
|
Bo̍k: Jī-ūi thiaⁿ-kè Iâ-so͘ Ki-tok ê hok-im mah?
|
牧：二位聽過耶穌基督ê福音--mah？ |
|
Ông: Thiaⁿ-tio̍h, ū thiaⁿ lâng kóng kè. kan-ta bô sî-kan khì lé-pài-tn̂g.
|
王：聽--著，有聽人講--過。Kan-ta無時間去禮拜堂。 |
|
Bo̍k: Kî-si̍t, khì lé-pài-tn̂g iā m̄-bián hùi jōa-chōe sî-kan, Tiuⁿ Sian-siⁿ, lí thiaⁿ kè hok-im bô?
|
牧：其實，去禮拜堂也m̄免費偌濟時間，張--先生，你聽過福音--無？ |
|
Tiuⁿ: Góa kap Ông Sian-siⁿ sī tông-hiong, tông-sū, sòe-hàn ê sî, siông-siông khì lé-pài-tn̂g chham-ka sím-mi̍h Chú-ji̍t-o̍h, iā pun sím-mi̍h khah-phìⁿ.
|
張：我kap王--先生是同鄉，同事，細漢ê時，常常去禮拜堂參加甚mi̍h主日學，也分甚mi̍h卡片。 |
|
Ông: (Lī-khui pún-tôe). Lāu sian-siⁿ, lí tòa tī Tâi-lâm sī bô?
|
王：（離開本題）。老先生，你tòa tī台南是--無？ |
|
Bo̍k: M̄-sī, góa tòa Tâi-pak, chit pái khì Tâi-lâm, sī kàu chi̍t keng lé-pài-tn̂g chú-niá pò͘-tō-hōe.
|
牧：M̄是，我tòa台北，這擺去台南，是到一間禮拜堂主領佈道會。 |
|
Tiuⁿ: Lí kùi-hú iáu ū lâng bô?
|
張：你貴府iáu有人--無？ |
|
Bo̍k: Ū nn̄g ê kiáⁿ, chi̍t ê cha-bó͘-kiáⁿ, iáu ū sun-jî, sun-lú, put-kò chha-put-to lóng bô tī sin-piⁿ.
|
牧：有兩個子，一個查某子，iáu有孫兒，孫女，不過差不多攏無tī身邊。 |
|
Ông: Tī Tāi-lio̍k sī bô?
|
王：Tī大陸是--無？ |
|
Bo̍k: M̄-sī, tī kok-gōa, ū ê tha̍k-chheh,ū ê kang-chok. (Hé-chhia khui esiâⁿ chi̍t-sî-á chēng-chēng).
|
牧：M̄是，tī國外，有ê讀冊，有ê工作。（火車開ê聲一時仔靜靜）。 |
|
Ông: (Óa hī-kang kóng), Úe-eh; lāu Tiuⁿ, goân-lâi chit ūi lāu sian-siⁿ sī chia̍h iûⁿ-kàu, hoat-iûⁿ-châi ê iûⁿ hê-siūⁿ .
|
王：( 倚耳空講)，Óe--eh；老張，原來這位老先生是食洋教，發洋財ê洋和尚。 |
|
Tiuⁿ: (Àⁿ tī hī-á sòe-siaⁿ kóng), Lāu Ông; bo̍h-tit án-ni kóng, chiah ê ōe su-siúⁿ thài lo̍k-ngó͘ lah.
|
張：( Àⁿ tī耳仔細聲講 )，老王；莫得án-ni講，chiah ê話思想太落伍--lah。 |
|
Ông: (Bî-siaⁿ). Lo̍k-ngó͘? Hah- iò,hah-iò.
|
王：(微聲)。落伍？Hah-iò,hah-iò。 |
|
Bo̍k: (Ná chhin-chhiūⁿ thiaⁿ-tio̍h in teh tùi-ōa). Bô chhò, nn̄g ūi m̄-thang lia̍h chòe kî-koài, góa chia̍h 60 kúi-nî ê iûⁿ-kàu lah, kàu tī hoat iûⁿ-châi, he khiok tú-tú siong-hoán.
|
牧：（那親像聽著in teh對話）。無錯，兩位m̄-thang掠做奇怪，我食60幾年ê洋教--lah，到tī發洋財，he卻tú-tú相反。 |
|
Tiuⁿ: Lí lāu-lâng m̄-thang lia̍h chòe sím-mi̍h, góa sī teh kóng chhiò--ê.
|
張：你老人m̄ thang掠做甚mi̍h，我是teh講笑--ê。 |
|
Ông: (Pháiⁿ-sè ê khoán). Lāu sian-siⁿ, sit-lé.
|
王：（歹勢ê款）。老先生，失禮。 |
|
Bo̍k: Lán ê chhia chē kàu tó-ūi lah?
|
牧：咱ê車坐到tó位--lah？ |
|
Ông: Sin-tek tú-chiah kè-khì.
|
王：新竹tú才過--去。 |
|
Bo̍k : Nā-sī lín bōe mâ-hoân, góa chiū chiong góa chia̍h iûⁿ-kàu chòe iûⁿ hê-siûⁿ ê keng-kè kóng hō͘ lín thiaⁿ.
|
牧：若是lín bōe麻煩，我就將我食洋教做洋和尚ê經過講hō͘ lín聽。 |
|
Tiuⁿ: Hoan-gêng, hoan-gêng.
|
張：歡迎，歡迎。 |
|
Bo̍k : Che sī 64 nî chêng ê tāi-chì lah, hit-sit5 góa chiah 20 hè, tī Thian-tin Iông-ha̍k-tông tha̍k-chheh, góa ê lāu-pē sī chi̍t ūi thoân-kàu ê bo̍k-su, goán chhù chí-ū lāu-bú, sió-tī, sió-bē tòa tī chháu-tōe, hit nî tú-hó sī Kiⁿ-chú nî.
|
牧：Che是64年前ê代誌--lah。hit時我才20歲，tī天津洋學堂讀冊，我ê老父是一位傳教ê牧師，阮厝只有老母，小弟，小妹tòa tī草地，hit年tú好是庚子年。 |
|
Ông: Se-le̍k 1900 nî, Kûn-húi chi loān.
|
王：西曆1900年，拳匪之亂。 |
|
Bo̍k: Loān, loān chhau-chhau, Gī-hô-thoân só͘ thâi ê, phah ê sī ūi-tio̍h beh hû-khí Chheng-tiâu ê kok-kî, lâi bia̍t-bô se-iûⁿ ê kok-kî, só͘ chòe ê khiok sī thâi-lâng pàng-hé, kiat kui tóng chhiúⁿ-kiap, hiàng-tang-sî só͘ ū se-iûⁿ-lâng, Gī-hô-thoân chheng-ho͘ in Ta-mau-chu, hoān-nā kap se-iûⁿ-lâng lâi-óng ê, eng-kai choân-pō͘ thâi, sìn iûⁿ-kàu ê Tiong-kok lâng, Gī-hô-thoân kiò in Er-mau-chu, iā eng-kai thâi (phàu siaⁿ chi̍t hiáng, hoah thâi ê siaⁿ, tōa háu ê siaⁿ, chiàn-cheng hāu-kó).
|
牧：亂，亂chhau-chhau，義和團所thâi--ê,扑--ê是為著beh扶起清朝ê國旗，來滅無西洋ê國旗，所做--ê卻是thâi人放火，結歸黨搶劫，hiàng當時所有西洋人，義和團稱呼in【大毛子】，凡若kap西洋人來往--ê,應該全部thâi,信洋教ê中國人，義和團叫in【二毛子】，也應該thâi(炮聲一響，喝thâi ê聲，大哮ê聲，戰爭效果）。 |
|
.............................................................................................................
|
.......................................................... |
|
(Choán tiûⁿ: Kín-kip kiaⁿ-hiâⁿ im-ga̍k, lâng-siaⁿ chô-cha̍p, kiâⁿ ê siaⁿ).
|
（轉場：緊急驚惶音樂，人聲，嘈雜，行ê聲）。 |
|
Má: Kiâⁿ, lán lâi-khì Sam-ka-kau lia̍h lâng.
|
馬：行，lán來去三家溝掠人。 |
|
Io: Lāu-tōa, beh lia̍h sím-mi̍h lâng?
|
么：老大，beh掠甚mi̍h人？ |
|
Má: Thiaⁿ kóng Tân--ka ê lâng bi̍h kàu Sam-ka-kau kū-chhù khì lah.
|
馬：聽講陳--家ê人bi̍h到三家溝舊厝去--lah。 |
|
Io: Tân--ka pē-kiáⁿ kiám sī bô tò-lâi?
|
么：陳--家父子kiám是無倒--來？ |
|
Má: Iáu ū leh, chhut-chāi i, khòaⁿ-tio̍h chi̍t ê, lia̍h chi̍t ê.
|
馬：Iáu有--leh，出在伊，看著一個，掠一個。 |
|
Io: Sī, thâi chīn chiah ê pōe chó͘ bông chong ê Er-mau-chu (kiâⁿ ê siaⁿ, im-ga̍k sió-khóa thêng).
|
么：是，thâi盡chiah ê背祖忘宗ê【二毛子】（行ê聲，音樂小可停）。 |
|
Má: Bîn-á-chài khui sím ê só͘-chāi pò͘-tì hó á bē?
|
馬：明仔再開審ê所在佈置好抑bē? |
|
Io: Tāi-khài chha-put-to, tī chng-n̍i̍h ê Sêng-hông-biō mn̂g-kháu. (Kha-pō͘-siaⁿ chiām-chiām hn̄g, choán tiûⁿ im-ga̍k put-an).
|
么：大概差不多，tī 庄--n̍i̍h ê城隍廟門口。（腳步聲漸漸遠，轉場音樂不安）。 |
|
Sió-tī: Mah-mah, chit nn̄g ji̍t gōa-bīn ê hong-siaⁿ m̄ hó, Gī-hô-thoân sì-kòe thâi-lâng pàng-hé, góa chin tam-sim pa-pa kap ko-ko ê an-choân.
|
小弟：Mah-mah，這兩日外面ê風聲m̄好，義和團四界thâi人放火，我真擔心爸爸kap哥哥ê安全。 |
|
Lāu-bú: M̄-bián khòa-lū, Thiⁿ-pē ōe khòaⁿ-kò͘ in.
|
老母：M̄免掛慮，天父會看顧--in。 |
|
Sió-bē: Hūn-bōe-tàng pa-pa kap ko-ko ōe tàng chím-á tò-lâi chiū chin hó.
|
小妹：恨bōe-tàng爸爸kap哥哥會tàng chím-á倒--來就真好。 |
|
Sió-tī: Ū sím-mi̍h hó, lán chit pêng koh-khah gûi-hiám.
|
小弟：有甚mi̍h好，咱這爿koh較危險。 |
|
Lāu-bú: Í-keng bô chá lah, chún-pī thang lâi khùn, lán kūi-teh saⁿ-kap kî-tó, kiû Thiⁿ-pē khòaⁿ-kò͘ pa-pa kap ko-ko, iā pó-siú Chú lāi só͘ ū ê hiaⁿ-tī chí-bē in pêng-an, m̄-bián tú-tio̍h gûi-hiám kan-khó͘ sū, khah iàu-kín,kiû Thiⁿ-pē kám-tōng Gī-hô-thoân ê tông-pau in, m̄ thang thâi-lâng, pàng-hóe, chhiúⁿ-kiap, hō͘ in ōe hóe-kái, ū chû-pi ê sim (im-ga̍k tùi un-hô choán kiaⁿ-hiâⁿ). (Kha-pō͘ siaⁿ, to̍k, to̍k, tio̍h-kip phah-mn̄g siaⁿ).
|
老母：已經無早--lah，準備thang來睏，咱跪teh相kap祈禱，求天父看顧爸爸kap哥哥，也保守主內所有ê兄弟姊妹in平安，m̄免tú著危險艱苦事，較要緊，求天父感動義和團ê同胞in，m̄ thang thâi人，放火，搶劫，hō͘ in會悔改，有慈悲ê心（音樂tùi溫和轉驚惶）。（腳步聲，to̍k,to̍k,著急扑門聲）。 |
|
Lāu-bú: Sī sím-mi̍h lâng?
|
老母：是甚mi̍h人？ |
|
Má: Sī góa, Tân Bo̍k-su-niû, góa sī Má Tōa-thâu, chhiáⁿ lí khah-kín khui mn̂g.
|
馬：是我，陳牧師娘，我是馬大頭，請你較緊開門。 |
|
Lāu-bú: Saⁿ-kiⁿ mî-pòaⁿ, ū sím-mi̍h tāi-chì?
|
老母：三更暝半，有甚mi̍h代誌？ |
|
Io: Mài lô-so, kín khui mn̂g, thèng-hāu chi̍t-sî-á chiū chai (to̍k-to̍k, phah mn̂g ê siaⁿ).
|
么：Mài囉嗦開門，聽候一時仔就知（to̍k-to̍k,扑門ê聲）。 |
|
Lāu-bú: Ti̍h-ti̍h, khah kín khí-lâi, khì khui mn̂g.
|
老母：Ti̍h-ti̍h（弟弟），較緊起--來，去開門。 |
|
Sió-tī: (Khui mn̂g siaⁿ) sím-mi̍h lâng--ah?
|
小弟：（開門聲）甚mi̍h人--ah？ |
|
Má: Tân Bo̍k-su-niû! chin sit-lé, thoân-ni̍h ê bēng-lēng, chhiáⁿ lín cháu chi̍t chōa,(oa̍t-thâu) lāu Io, the̍h soh-á lâi pa̍k khí-lâi, thoa teh kiâⁿ.
|
馬：陳牧師娘！真失禮，團--ni̍h ê命令，請lín走一chōa,（越頭）老么，提索仔來縛--起來，拖teh行。 |
|
Sió-tī: Lí sī án-chóaⁿ teh pa̍k lâng, bô kóng lí-iû mah?
|
小弟：你是án-chóaⁿ teh縛人，無講理由--mah？ |
|
Io: Kóng lí-iû, sím-mi̍h lâng beh kap lín chiah ê pōe chong bông chó͘.
|
么：講理由，甚mi̍h人beh kap lín chiah ê背宗忘祖。 |
|
Sió-tī: Lí mē lâng!
|
小弟：你罵人！ |
|
Io: Mē lâng?! (phah lâng ê siaⁿ).
|
么：罵人？！（扑--人ê聲）。 |
|
Sió-tī: Lí phah lâng?
|
小弟：你扑--人？ |
|
Io: Phah Lâng! góa iáu beh koh thâi lâng leh.
|
么：扑--人！我iáu beh koh thâi人--leh。 |
|
Sió-bē: (Kiaⁿ kiò) ma-mah.
|
小妹：（驚叫）媽媽。 |
|
Lāu-bú: Má Tōa-thâu, goán phó͘-thong sî bô ge̍k-thāi lí, iā bô tek-chōe lí.
|
老母：馬大頭，阮普通時無虐待你，也無得罪你。 |
|
Má: Bô pān-hoat, Ta-mau-chu, Er-mau-chu Lóng sī lán Tiong-kok lâng ê tùi-te̍k, che sī thoân-ni̍h ê kui-tiâu, sím-mi̍h lâng iā m̄-káⁿ ûi-pōe......
|
馬：無辦法，【大毛子】，【二毛子】攏是咱中國人ê對敵，che是團--ni̍h ê規條，甚mi̍h人也m̄敢違背…… |
|
Lāu-bú: Lia̍t-ūi sin-khó͘ lah, góa chia ū kóa chîⁿ kap phoa̍h-liān, sàng lìn ta̍k elîm tê hó bô? ū tāi-chì bîn-á-chài chiah koh kóng hó bô?
|
老母：列位辛苦--lah，我chia有寡錢kap phoa̍h鍊 ，送lín逐個lim茶好--無？有代誌明仔再才koh講好--無？ |
|
Io: Thâu-ba̍k bōe sái kap i o͘-pe̍h kóng, thái ū hiah chōe bô lō͘-ēng ōe, kiâⁿ, kiâⁿ, (khún-pa̍k, thoa, lâng siaⁿ chiām-chiām hn̄g , im-ga̍k). (Choán-tiûⁿ, tong! tong! lô ê siaⁿ), (siaⁿ)khai sím Er-mau-chu tāi-hōe, kim-ji̍t siōng-ngó͘ 10 tiám, tichn̄g--ni̍h Sêng-hông-biō mn̂g-kháu, chng--ni̍h só͘ ū lâng beh chham-ka. (Tang, tang, lô siaⁿ) (Im-ga̍k tio̍h-kip kiaⁿ-hiâⁿ lâng-siaⁿ oe-oe khoeh-khoeh) (sió-khóa iân-tiông chi̍t-ē-á).
|
么：頭目bōe使kap伊烏白講，thài有hiah濟無路用話，行，行，（捆縛，拖，人聲漸漸遠，音樂）。（轉場，咚！咚！鑼ê聲），（聲）開審【二毛子】大會，今日上午10點，tī庄--ni̍h城隍廟門口，庄--ni̍h所有人beh參加。（Tang，tang，鑼聲）（音樂著急驚惶人聲oe-oe khoeh-khoeh）（小可延長一下仔）。 |
|
Má: Khan Tân--ke ê Er-mau-chu chhut-lâi (kha-pō͘ siaⁿ hiáng-siaⁿ).
|
馬：牽陳--家ê【二毛子】出--來（腳步聲－響聲）。 |
|
Io: Er-mau-chu lí ū khòaⁿ-kìⁿ bô? Chí-ū tio̍h ǹg lán ê sîn-bêng pài chi̍t-ē, kóng “M̄ koh chia̍h Iûⁿ-kàu” chiū khoan-sù lí chi̍t tiâu miā, heh-eh, m̄, sī ēng to thâi, á-sī oa̍h-oa̍h tâi, lí beh kiâⁿ tó chi̍t tiâu lō͘ ? Kín-kín kóng.
|
么：【二毛子】你有看--見無？只有著向咱ê神明拜一下，講「M̄ koh食洋教」就寬賜你一條命，heh-eh，m̄,是用刀thâi,抑是活活埋，你beh行tó一條路？緊緊講。 |
|
Sió-tī: Hé--eh , kiò góa kóng ǹg lín ê ngó͘-siōng pài, kiò góa kóng m̄-sìn Iâ-so͘, m̄-bián chòe bāng, choa̍t-tùi bōe-tàng ê.
|
小弟：Hé--eh，叫我講向lín ê偶像拜，叫我講m̄信耶穌，m̄免做夢，絕對bōe-tàng--ê。 |
|
Io: Pài á m̄ pài! m̄ pài chiū-sī chi̍t to,(chèng siaⁿ) Ài-ioh! khah kín kóng!
|
么：拜抑m̄拜？m̄拜就是一刀，（眾聲）Ài-ioh！較緊講！ |
|
Lāu-bú: Sió-tī khah ióng-kám leh, lán koat-toàn bô beh pài.
|
老母：小弟較勇敢--leh，咱決斷無beh拜。 |
|
Sió-tī: M̄ pài, m̄ pài, chi̍t pah ê m̄ pāi, Chi̍t chheng ê iā m̄ pài, chi̍t bān ê......
|
小弟：M̄拜，m̄拜，一百個m̄拜，一千個也m̄拜，一萬個…… |
|
Má: Hó! hó sió-kiáⁿ, tāng chhiú! (Chi̍t to, tùi keng-kah-thâu thâi sió-tī). (Ah-iò ê siaⁿ, lāu-bú ê siaⁿ) (chèng-lâng ai ê siaⁿ).
|
馬：好！好小子，動手！（一刀，對好小子肩胛頭thâi小弟）…（Ah--iò ê聲，老母ê聲）（眾人哀ê聲）… |
|
Sió-bē: (Ki-ki-kiò) (ǹg tùi lāu-bú ê heng-chêng bong) A-bú!
|
小妹：（Ki-ki叫）（向對老母ê胸前摸）阿母！ |
|
Lāu-bú: (Bong-bong leh un-jiû ê siaⁿ)mūi-mūi m̄-bián kiaⁿ, thèng-hāu chi̍t-sî-á, lán lóng beh khì kìⁿ thiàⁿ lán ê Chú Iâ-so͘ Ki-tok.
|
老母：（摸摸--leh溫柔ê聲）妹妹m̄免驚，聽候一時仔，咱攏beh去見疼咱ê主耶穌基督。 |
