Jî-tông Kò͘-sū_Chhong-bêng ê Kâu
|
兒童故事：聰明 ê 猴 |
| An-seng |
An-seng |
|
Í-chêng ū chi̍t chiah kâu tòa tī óa-kīn hái ê sim-lîm lāi, i múi-ji̍t tī sim-lîm lāi thiàu-lâi thiàu-khì, pak-tó͘ iau ê sî chiū bán chhiū-téng ê kóe-chí lâi chia̍h, kòe chin khoài-lo̍k ê seng-oa̍h. In-ūi chit ê sim-lîm lāi ū chin chē kóe-chí, só͘-í chit chiah kâu m̄ bián hoân-ló bô mi̍h thang chia̍h, i ū chē-chē sî-kan thang khì chhōe pêng-iú saⁿ-kap thit-thô, chin kín i chiū kap chi̍t bóe soa-hî chò chin hó ê pêng-iú, ta̍k-ji̍t soa-hî chiū lâi kàu chhiū kha thiaⁿ kâu kóng kò͘-sū.
|
以前有1隻猴tòa tī倚近海ê森林內，伊每日tī森林內跳來跳去，腹肚枵ê時就挽樹頂ê果子來食，過真快樂ê生活。因為這個森林內有真濟果子，所以這隻猴m̄免煩惱無物thang食，伊有濟濟時間thang去chhōe朋友相kap thit-thô,真緊伊就kap 1尾鯊魚做真好 ê 朋友，逐日鯊魚就來到樹腳聽猴講故事。 |
|
Hut-jiân ū chi̍t ji̍t, soa-hî tùi kâu kóng, “Hó pêng-iú! Góa kin-á-ji̍t chhōa lí lâi góa ê chhù thit-thô, sūn-sòa khòaⁿ goán ê kok-ông, kap goán tau el5ang. Góa siông-siông kā in kóng lí chin gâu kóng ōe koh chin súi; só͘-í in chin ài kín khòaⁿ-tio̍h lí, iā kap lí chò pêng-iú, lí hoaⁿ-hí bô?” Kâu thiaⁿ-tio̍h soa-hî kā i o-ló, sim-lāi hui-siông hoaⁿ-hí, kóng “Soa-hî hiaⁿ, lí ê hó-ì góa si̍t-chāi hui-siông kám-siā, chóng-sī lí iā chai-iáⁿ góa bē hiáu siû, góa beh cháiⁿ-iūⁿ khì lín tau?”
|
忽然有1日，鯊魚tùi猴講：「好朋友！我今仔日chhōa你來我 ê 厝thit-thô,順續看阮ê國王、kap阮兜ê人。我常常kā in講你真gâu講話koh真súi;所以in真愛緊看tio̍h你，也kap你做朋友，你歡喜無？」 猴聽著鯊魚kā伊o-ló,心內非常歡喜，講：「鯊魚兄，你ê好意我實在非常感謝，總--是你也知影我bē曉泅，我beh怎樣去你兜？」 |
|
Soa-hî kóng, “He chin kán-tan, lí chē tī góa ê ka-chiah, góa chiū chhōa lí lâi góa ê chhù, kóaⁿ-kín thiàu lo̍h-lâi! M̄-thang bē kì-tit, tio̍h khi̍p hō͘ tiâu.”
|
鯊魚講：「He真簡單，你坐tī我 ê ka-chiah，我就chhōa你來我ê厝，趕緊跳落來！M̄-thang bē記得，著 khi̍p hō͘ tiâu。」 |
|
Kâu chiū tùi chhiū téng thiàu lo̍h-lâi, chin hoaⁿ-hí chiū thiàu khì chē tī soa-hî ê ka-chiah, soa-hî sûi-sî khai-sí siû chúi, ti̍t-ti̍t kàu chin hn̄g ê só͘-chāi; chha-put-to bô khòaⁿ-kìⁿ sim-lîm lah. Chit sî soa-hî oa̍t-thâu kòe lâi tùi kâu kóng, “Kâu hiaⁿ, góa chhōa lí lâi m̄ sī beh hō͘ lí khì khòaⁿ hó pêng-iú; chiū-sī beh chiong lí sàng hō͘ goán ê kok-ông, in-ūi hiān-chāi goán ê kok-ông phòa-pīⁿ chin siong-tiōng, i-seng kóng, tio̍h chia̍h kâu ê ‘sim’ chiah ē hó”.
|
猴就tùi樹頂跳落來，真歡喜就跳去坐tī鯊魚ê ka-chiah，鯊魚隨時開始泅水，直直到真遠ê所在；差不多無看見森林lah。這時鯊魚越頭過來tùi猴講：「猴兄，我chhōa你來m̄是beh hō͘你去看好朋友；就是beh將你送hō͘阮ê國王，因為現在阮ê國王破病真siong重，醫生講，著食猴ê 『心』才會好」。 |
|
Kâu thiaⁿ-tio̍h khí-chho͘ chin kiaⁿ, chóng-sī i siūⁿ tiap-á kú, chiū tùi soa-hî kóng, “Ah, soa-hî hiaⁿ chin sit-lé, góa bē kì-tit tòa ‘sim’ ti sin-piⁿ neh!” Soa-hî tio̍h-kip kóng, “Cháiⁿ-iūⁿ? Lí ê sim bô tòa tī sin-piⁿ!” “Ah, sī sī, goán chò kâu kap lâng bô sio-siâng, goán ê sim pêng-siông bô tòa tī sin-piⁿ, góa chiong góa ê sim iáu kòa tī hit châng chhiū-á téng, lí nā koh chhōa góa tńg-khì, góa it-tēng chin kín the̍h lâi hō͘ lí.”
|
猴聽著起初真驚，總--是伊想tiap仔久，就tùi鯊魚講：「Ah，鯊魚兄真失禮，我bē記得帶『心』ti身邊neh！」鯊魚著急講：「怎樣？ 你ê心無帶tī身邊！」「Ah，是、是，阮做猴kap人無相像，阮ê心平常無帶tī身邊，我將我ê心iáu掛tī hit châng樹仔頂，你若koh chhōa我轉去，我一定真緊提來hō͘你。」 |
|
Soa-hî chin sit-bāng kóng, “Ah, goán lóng m̄ chai-iáⁿ, hó, lí nā kóng lí ê sim kòa tī chhiū téng, góa ko͘-put-chiong tio̍h kā lí chài tńg-khì the̍h!”
|
鯊魚真失望講：「Ah，阮攏m̄知影，好，你若講你ê心掛tī樹頂，我姑不chiong著kā你載轉去提！」 |
|
Tng soa-hî siû lâi kàu hōaⁿ-piⁿ ê sî, kâu chin tōa siaⁿ hoah kóng, “Tī hia, tī hia, hō͘ hio̍h-á cha̍h teh, lí khòaⁿ góa ê sim kòa tī hia. Lí thèng-hāu leh, góa sûi-sî the̍h hō͘ lí.” Kâu chin kín chiū peh kàu chhiū téng khì, soa-hî tī hia ti̍t-ti̍t thèng-hāu kâu beh the̍h lo̍h-lâi, chóng-sī lóng bô khòaⁿ-kìⁿ kâu lo̍h-lâi, chiū tōa siaⁿ hoah, “Oeh, kâu-á lí cháiⁿ-iūⁿ m̄ kóaⁿ-kín lo̍h-lâi, góa thèng-hāu chin kú lah, chhōe ū bô?”
|
當鯊魚泅來到岸邊ê時，猴真大聲喝講：「Tī hia,tī hia,hō͘葉仔cha̍h teh，你看我ê心掛tī hia。你聽候leh，我隨時提hō͘你。」猴真緊就peh到樹頂去，鯊魚tī hia直直聽候猴beh提落來，總--是攏無看見猴落來，就大聲喝：「Oeh，猴仔你怎樣m̄趕緊落來，我聽候真久lah，chhōe有無？」 |
|
Kâu chhiò-chhiò tùi i kóng, “Soa-hî hiaⁿ, góa ê sim m̄ sī kòa tī chhiū-á téng, sī tī góa ê sin-khu lāi, chóng-sī góa bô ài koh lo̍h-khì. Lí siūⁿ góa sī hiah gōng-tai ah? Lí sī chi̍t ê chhut-bē pêng-iú ê pháiⁿ-lâng, tùi kin-á-ji̍t khí góa bô beh koh kap lí chò pêng-iú, lí tńg-khì kā lín ê kok-ông kóng, m̄-thang gōng siūⁿ ài beh chia̍h góa ê sim.”
|
猴笑笑tùi伊講：「鯊魚兄，我ê心m̄是掛tī樹仔頂，是tī我ê身軀內，總--是我無ài koh落去。你想我是hiah憨呆ah？你是1個出賣朋友ê歹人，tùi今仔日起我無beh koh kap你做朋友，你轉去kā lín ê 國王講，m̄-thang憨想ài beh食我ê心。」 譯者 陳曉峰 |
|
(Ka-têng ê Pêng-iú tē 76 kî, 1964 nî 6 ge̍h)
|
(家庭ê朋友第76期，1964年6月) |
