Hiaⁿ-tī hô-hó
|
兄弟和好 |
| Phian-chip-sek |
編輯室 |
|
e̍k
|
譯 |
|
Kó͘-chá ū N̄g ê chin siong-hó ê hiaⁿ-tī-á, saⁿ-kap tòa tī chi̍t ê soaⁿ-kok (山國). A-hiaⁿ khí-chhù tī soaⁿ ê tang-pêng, sió-tī khí chhù tī sai-pêng, N̄g ê hiaⁿ-tī-á lóng ū bó͘-kiáⁿ saⁿ-kap teh seng-oa̍h. Ū chi̍t nî tú-tio̍h chin tōa hong-thai, N̄g hiaⁿ-tī ê chhân lóng sit-siu, chí-ū siu 3 pió chhek nā-tiāⁿ.
|
古早有兩個真相好ê兄弟仔，相kap tòa tī一個山國。阿兄起厝tī山ê東爿，小弟起厝tī西爿，兩個兄弟仔攏有某子相kap teh生活。有一年tú著真大風颱，兩兄弟ê田攏失收，只有收三pió 粟nā-tiāⁿ。 |
|
Tòa tī soaⁿ ê tang-pêng ê ko-ko siūⁿ kóng, “Sió-tī koh siⁿ chi̍t ê eⁿ-á, bí phah-sǹg ōe chia̍h bô kàu, seng-oa̍h ōe khùn-lân, góa tio̍h giâ chi̍t pió chhek lâi khì hō͘ i, m̄-kú sió-tī kiám-chhái ōe kheh-khì, m̄-khéng siu iā bô tek-khak, só͘-í ji̍t nā àm, góa beh àm-chīⁿ giâ chi̍t pió lâi kā i lok hē sió-tī ê chhek-chhng.”
|
Tòa tī山ê東爿ê哥哥想講，「小弟koh生一個嬰仔，米扑算會食無夠，生活會困難，我著giâ一pió粟來去hō͘伊；m̄-kú小弟kiám-chhái會客氣，m̄肯收也無的確，所以日若暗，我beh暗靜giâ一pió來kā伊lok下小弟ê粟倉。」 |
|
Tòa tī soaⁿ ê sai-pêng ê sió-tī iā siūⁿ kóng, “Ko-ko in ê gín-ná tng teh tōa, teh gâu chia̍h, bí ún-tàng ōe chia̍h bô kàu, góa tio̍h àm-chīⁿ giâ chi̍t pió lâi kā i hē tī ko-ko ê chhek-chhng ni̍h.” Kó-jiân N̄g hiaⁿ-tī án-ni chòe.
|
Tòa tī山ê西爿ê小弟也想講，「哥哥in ê囡仔當teh大，teh gâu食，米穩當會食無夠，我著暗靜giâ一pió 來kā伊hē tī哥哥ê粟倉--ni̍h。」果然兩兄弟án-ni做。 |
|
Keh-ji̍t N̄g ê hiaⁿ-tī ê chhek-chhng, chiàu goân sī 3 pió bí. Nn̄g ê hiaⁿ-tī lóng kî-koài kóng, “Kî-koài ah! Hó! Ê-hng it-tēng koh chi̍t pái beh kā i giâ khì.” Chóng-sī keh chá-khí chi̍t-ē khòaⁿ, N̄g hiaⁿ-tī ê chhek-chhng pîⁿ-pîⁿ iā sī ū 3 pió.
|
隔日兩個兄弟ê粟倉，照原是三pió米。兩個兄弟攏奇怪講，「奇怪--ah！好！E昏一定koh一擺beh kā伊giâ--去。」總--是隔早起一下看，兩兄弟ê粟倉平平也是有三pió。 |
|
Tī hit àm, tī hit ê soaⁿ-piⁿ ni̍h, ū N̄g ê giâ chhek-pau ê sio gū-thâu. Ko-ko kóng, “A̍i̍h ah! Kiám m̄-sī sió-tī mah?”
|
Tī hit暗，tī hit個山邊--ni̍h，有兩個giâ 粟包--ê 相遇頭。哥哥講：「A̍i̍h--ah！Kiám m̄是小弟--mah？」 |
|
Sió-tī kóng, “A̍i̍h! Sī ko-ko lah.”
|
小弟講：「A̍i̍h！是哥哥--lah。」 |
|
Nn̄g ê hiaⁿ-tī chi̍t lâng giâ chi̍t pió chhek, chi̍t sî sòa gōng-gōng, bōe hiáu kóng sím-mi̍h.
|
兩個兄弟一人giâ一pió粟，一時續憨憨，bōe曉講甚物。 |
|
Āu-lâi N̄g hiaⁿ-tī chiah chiong in ê chhek hē thô͘-kha, iā chē tī chhiū-thâu ni̍h, ná chhit kōaⁿ, ná kóng, “Sió-tī ah! Chin to-siā lí, lí chiah-ni̍h teh hó sim! Góa hui-siông ê hoaⁿ-hí!”
|
後--來兩兄弟才將in ê粟下塗腳，也坐tī樹頭--ni̍h，那拭汗，那講：「小弟--ah！真多謝--你，你chiah-ni̍h teh好心！我非常ê歡喜！」 |
|
Sió-tī iā kóng, “Ko-ko ah! Góa koh-khah sī hoaⁿ-hí! Góa ū chiah-ni̍h teh hó ê ko-ko, góa si̍t-chāi ū hok-khì ah!”
|
小弟也講：「哥哥--ah！我koh較是歡喜！我有chiah-ni̍h teh好ê哥哥，我實在有福氣--ah！」 |
|
Jiân-āu N̄g hiaⁿ-tī chiah sûi lâng koh giâ in ê bí-pau tò-khì. Hit-sî gûn-sek ê ge̍h-liāng teh chiò in N̄g hiaⁿ-tī kng-liāng ê bīn.
|
然後兩兄弟chiah隨人koh giâ in ê米包倒--去。Hit時銀色ê月亮teh照in兩兄弟光亮ê面。 |
|
（Lú-soan Ge̍h-khan Tē 37 kî, 1963 nî 1 ge̍h)
|
（女宣月刊第37期，1963年1月） |
