Góa bán-hôe tiōng-hu ê ài-chêng
|
我挽回丈夫ê愛情 |
| Phian-chip-sek |
編輯室 |
|
Góa kap góa ê tiōng-hu kiat-hun ū 5 nî lah. I sī chi̍t ūi i-seng, 5 nî lâi goán ê ài-chêng lóng chin hó. Kin-nî góa í-keng sī 3 ê gín-á ê bú-chhin. Múi ji̍t tāi-pō͘-hūn ê sî-kan lóng hē tī gín-á ê sin-chiūⁿ. Sui-jiân in ōe hō͘ góa hoaⁿ-hí khoài-lo̍k, m̄-kú iā Chiām-chiām ōe hō͘ góa chin-chōe mâ-hoân; tùi chheng-chá kàu ji̍t-àm (chhim-iā), góa thong-ji̍t ūi in sin-khó͘ bô êng.
|
我kap我ê丈夫結婚有5年--lah。伊是一位醫生，五年來阮ê愛情攏真好。今年我已經是3個囡仔ê母親。每日大部份ê時間攏hē tī囡仔ê身上。雖然in會hō͘ 我歡喜快樂，m̄-kú也漸漸會hō͘ 我真濟麻煩；tùi 清早到日暗(深夜)，我通日為in辛苦無閒。 |
|
Góa kin-nî tú-tú 30 hè, khiok bô sǹg lāu, m̄-kú siū liáu gín-á ê liân-lūi, góa ka-kī kak-tit lāu lah; tông-sî góa tùi tī gín-á sī phāu-khí chi̍t ê sóng-khoài ê sim-chêng, ēng choân-pak ê cheng-sîn lâi chiàu-kò͘ in ê it-chhè. Pún lâi chhiàⁿ--ê khó-í thè chòe, nā-sī góa chóng bōe an-sim. Só͘-í ūi liáu gín-á, góa goān hi-seng liáu góa ka-kī, góa ài chòe chi̍t ê hiân-chhe liông-bú, hō͘ góa chi̍t ê sòe ka-têng kè-tio̍h iu-bí khoài-lo̍k ê seng-oa̍h.
|
我今年tú-tú 30歲，卻無算老，m̄-kú 受了囡仔ê連累，我家己覺得老--lah；同時我對tī囡仔是抱起一個爽快ê心情，用全腹ê精神來照顧in ê一切。本來倩--ê可以替做，若是我總bōe安心。所以為了囡仔，我願犧牲了我家己，我ài做一個賢妻良母，hō͘我一個細家庭過著優美快樂ê生活。 |
|
Ná ōe chai, góa ê tiōng-hu kūn-lâi tùi góa chiām-chiām léng-tām khí-lâi, tùi gín-á ê thài-tō͘ iā chin piàn lah. Gín-á ài pa-pah kā i bóe thit-thô mi̍h, i chiū bōe kì-tit lah, ài kap pa-pah thit-thô, i chiū the-sî kóng, pīⁿ-īⁿ chin bô-êng, pīⁿ-lâng thài chōe. Ta̍k-ji̍t chhim-iā 2 tiám chiah hôe-ka, iā thàu-chá chiū koh khì pīⁿ-īⁿ, liân pài 6 ē-po͘ to bô tī chhù-ni̍h. Khí-thâu góa siong-sìn sī pīⁿ-īⁿ ê kang-chok thài bô êng, in-ūi Tâi-oân ê khì-hāu gâu piàn, phòa-pīⁿ lâng chin chōe, só͘-í góa lóng bô teh giâu-gî i. Chóng-sī chi̍t ji̍t chi̍t ji̍t ê kè-khì, i tùi góa ê thài-tō͘ khiok sī chi̍t ji̍t chi̍t ji̍t ê léng-tām.
|
Ná會知，我ê丈夫近來對我漸漸冷淡--起來，對囡仔ê態度也真變--lah。囡仔ài爸爸kā伊買thit-thô 物，伊就bōe記--tit lah，ài kap爸爸thit-thô,伊就推辭講，病院真無閒，病人太濟。逐日深夜兩點才回家，也透早就koh去病院，連拜六e晡都無tī 厝--ni̍h。起頭我相信是病院ê工作太無閒，因為台灣ê氣候gâu變，破病人真濟，所以我攏無teh giâu疑--伊。總--是一日一日ê過去，伊對我ê態度卻是一日一日ê冷淡。 |
|
Góa thèng-hāu chhim-iā 1, 2 tiám, i tńg-lâi, chóng bōe bián ài mn̄g i chi̍t ji̍t kang-chok ê chêng-hêng, á-sī kap i kóng chi̍t kóa ka-bū ê sū-chêng, i chiū bô siáⁿ hoaⁿ-hí. Ūi-tio̍h án-ni, góa thong-mî bōe khùn-tit, thòng-khó͘ ê jím-siū it-chhè. Góa siūⁿ kóng, i sī tī gōa-bīn kang-chok-siōng ê mâ-hoân, lô-khó͘, tńg-lâi ke-lāi, tùi lāu-pô-á teh hoat-náu--ê, só͘-í góa iā goân-liōng i.
|
我聽候深夜一、兩點，伊轉--來，總未免ài問伊一日工作ê情形，抑是kap伊講一寡家務ê事情，伊就無啥歡喜。為著án-ni,我通暝bōe睏--tit，痛苦ê 忍受一切。我想講，伊是tī外面工作上ê麻煩、勞苦，轉來家內，對老婆仔teh發惱--ê,所以我也原諒--伊。 |
|
Ū chi̍t ji̍t, góa ê chhù-piⁿ, chhut-miâ kāu-ōe ê Ia̍p thài-thài, gû-jiân kàu góa ê ke lâi hân-tâm. I kóng, tī pài 6 àm óa 9 tiám pòaⁿ ū gū-tio̍h A-hiong ê pa-pah kap chi̍t ūi sió-chiá iā tī tiān-hì-īⁿ-ni̍h teh khòaⁿ “金玉盟.” Tùi Ia̍p thài-thài ê chhùi, góa chiah tōa kak-chhíⁿ, goân-lâi í-keng ū liáu pa̍t ê ài-jîn lah, koài-tit i tùi góa ê thài-tō͘, hut-jiân léng ki-ki. Góa thiaⁿ-liáu Ia̍p thài-thài ê pò-kò, chin-chiàⁿ siū-khì, jím bōe tiâu, ba̍k-sái liàn chhut-lâi, nā m̄-sī ūi-liáu ū chit 3 ê gín-ná, góa chiū lī-khui i cháu lah.
|
有一日，我ê厝邊，出名厚話ê葉太太，偶然到我ê家來閒談。伊講，tī拜六暗倚九點半有遇著阿香ê爸爸kap一位小姐也tī電戲院--ni̍h teh 看「金玉盟」。Tùi葉太太ê嘴，我才大覺醒，原來已經有了別ê 愛人--lah，怪tit伊對我ê態度，忽然冷ki-ki。我聽了葉太太ê報告，真正受氣，忍bōe tiâu,目屎liàn--出來，若m̄是為了有這三個囡仔，我就離開伊走--lah。 |
|
Góa sī chi̍t ê loán-jio̍k ê lú-sèng, chhá-ke, put-tàn éng-hióng liáu gín-á ê sim-chêng, hoán-tńg ōe ka-kiông tùi-hong ê iàm-o͘N3 ê sim-lí, m̄-kú nā bô chiong sū-chêng peh-khui, góa jím bōe tiâu, bān-it góa chek-mn̄g i, i tong-jiân sī m̄-khéng sêng-jīn ê. Siat-sú nā chit ê sū sī bô sū-si̍t leh, hoán-tńg ōe lâu chi̍t ê lōng kóe sêng chin ê tōe-pō͘. Chòe-āu góa koat-tēng tī bōe chiong sū lōng chheng-chhó ê chêng, chhái-chhú tiām-chēng ê thài-tō͘.
|
我是一個軟弱ê女性，吵家，不但影響了囡仔ê心情，反轉會加強對方ê 厭惡ê心理，m̄-kú若無將事情擘開，我忍bōe tiâu,萬一我責問--伊，伊當然是m̄肯承認--ê。設使若這個事是無事實--leh，反轉會留一個弄假成真ê地步。最後我決定tī未將事弄清楚ê前，採取恬靜ê態度。 |
|
Āu-lâi góa ê a-só tùi Hiong-káng lâi kàu Tâi-oân, góa chiū chiong chit kiāⁿ sū kap só-só chham-siông. I jīn chòe “Tiōng-hu koh ū pa̍t-lâng, thài-thài m̄-sī bô ū chek-jīm--ê. Ká-sú A-hiong ê pa-pah sī chi̍t ê i-seng, i kui ji̍t bô êng í-āu, hôe kàu ka-lāi, chóng-sī siūⁿ ài hióng-siū chi̍t-ē-á tiⁿ-bi̍t ê seng-oa̍h; nā-sī khòaⁿ thài-thài iā bô êng liāu-lí ka-bū, koh kiaⁿ seng-sán ê thòng-khó͘, m̄-káⁿ koh jiá lí ê mâ-hoân leh. Só͘-í chòe tiōng-hu--ê, iā ū i ê khó͘-būn. Nā-sī chòe chhe-chú--ê, ōe thòe tiōng-hu siūⁿ chi̍t siūⁿ, lâi ke-thiⁿ chi̍t tiám-á liáu-kái, chiū hu-chhe ê tiong-kan ê chêng, ún-tàng iā ōe hiong-ha̍p lah.”
|
後--來我ê阿嫂tùi香港來到台灣，我就將這件事kap嫂嫂參詳。伊認做「丈夫」koh有別人，太太m̄是無有責任--ê。假使阿香ê爸爸是一個醫生，伊歸日無閒以後，回到家內，總是想ài享受一下仔甜蜜ê生活；若是看太太也無閒料理家務，koh驚生產ê痛苦，m̄-káⁿ koh惹你ê麻煩--leh。所以做丈夫--ê,也有伊ê苦悶。若是做妻子--ê,會替丈夫想一想，來加添一點仔了解，就夫妻ê中間ê情，穩當也會相合--lah。 |
|
Góa thiaⁿ-liáu só-só chit ê khó͘-khǹg í-āu, múi-ji̍t lâu chi̍t su̍t-á sî-kan, ka-kī chng-thāⁿ chi̍t-ē-á. In-ūi tùi ū gín-á í-āu, hòa-chng-phín, phang-chúi, chá-chá chiū í-keng bô ēng lah. Hiān-chāi koh khai-sí boah-hún tit-tio̍h kap siáu-lú sî-tāi chi̍t iūⁿ ê phiau-liāng. Kè-khì in-ūi kiaⁿ-liáu koh ū sin (ū gín-ná), só͘-í chi̍t chhù, N̄g chhù, saⁿ chhù lóng kū-choa̍t liáu i ê iau-kiû, bōe-bián hō͘ i kiàn-siàu, àu-náu siū-khì. I khòaⁿ-tio̍h góa, chóng-sī bōe chhiò-bīn, piáu-sī bô ū chi̍t-sut-á lo̍k-chhù ê sim-chêng. Che khó-lêng sī i hiòng gōa hoat-tián ê goân-in ê chi̍t ê. Hô-hòng, i tī pīⁿ-īⁿ-ni̍h, múi-ji̍t kap it-poaⁿ phiau-liāng ê lú hō͘-sū chiap-chhiok, tī hia siū in ê iú-he̍k, koh i hôe-ka āu, khòaⁿ-tio̍h chi̍t ūi sàm-thâu, hô͘-bīn ê chhe-chú, chū-jiân tùi góa chiū bô kám-kak hèng-chhù lah.
|
我聽了嫂嫂這個苦勸以後，每日留一屑仔時間，家己chng-thāⁿ一下仔。因為tùi有囡仔以後，化妝品、芳水，早早就已經無用--lah。現在koh開始boah粉得著kap少女時代一樣ê漂亮。過去因為驚了koh有身(有囡仔)，所以一次、兩次、三次攏拒絕伊ê要求，未免hō͘伊見笑、懊惱受氣。伊看著我，總--是bōe笑面，表示無有一屑仔樂趣ê心情。Che可能是伊向外發展ê原因ê一個。何況，伊tī病院--ni̍h，每日kap一般漂亮ê女護士接觸，tī hia受in ê誘惑，koh伊回家後，看著一位sàm頭、hô͘面ê妻子，自然對我就無感覺興趣--lah。 |
|
Tùi góa kái-piàn liáu thài-tō͘ í-āu, chi̍t hong-bīn kái-chō góa ka-kī, chi̍t hong-bīn bán-hôe liáu i ê kái-piàn. Goán pún-lâi sī chi̍t tùi kám-chêng chin hó ê hu-chhe, keng-kòe pòaⁿ nî āu ê chhì-giām, goán hôe-ho̍k liáu í-chêng ê chōng-hóng, tiông-sin kiàn-li̍p goán chi̍t ê tiⁿ-bi̍t, sóng-khoài ê sin lo̍k-hn̂g.
|
Tùi我改變了態度以後，一方面改造我家己，一方面挽回了伊ê改變。阮本來是一對感情真好ê夫妻，經過半年後ê試驗，阮回復了以前ê狀況，重新建立阮一個甜蜜、爽快ê新樂園。 |
|
（Lú-soan Ge̍h-khan Tē 42 kî, 1963 nî 6 ge̍h)
|
﹝女宣月刊第42期，1963年6月﹞ |
