Gín-ná ài thiaⁿ ê kò͘-sū_Tham-sim ê Koân-sam
|
囡仔愛聽 ê 故事：貪心 ê 權三 |
| Hūi |
Hūi |
|
Kó͘-chá tī Ji̍t-pún pak Kiú-chiu ê Eng-gān soaⁿ kha ū chi̍t ê hiuⁿ-siā. Tī hia ū chi̍t ê tham-sim ê hó-gia̍h lâng kiò-chò Koân-sam, i ū chin-chē chîⁿ chioh lâng, siu chin tāng ê lī-sek, sio-siāng hit ê chng lāi ū chi̍t ê gín-ná Hàu-kiat, i ê chhù chin sàn-hiong, pa-pa iū koh phòa-pīⁿ chin kú, liân bé io̍h-á ê chîⁿ to bô. Hàu-kiat chiū khì chhōe hit ê hó-gia̍h lâng beh kā i chioh chîⁿ, chóng-sī Koân-sam lóng m̄ chioh i. Hàu-kiat kūi tī thô͘-kha kā i iau-kiû, i chiah ko͘-put-chiong hiat 10 ê gîn-kak-á hō͘ i. Chóng-sī Hàu-kiat ê pa-pa phòa-pīⁿ chin kú, chîⁿ ēng liáu lah; Hàu-kiat chiū koh khì chioh chîⁿ, Koân-sam tōa siaⁿ jióng,
|
古早tī日本北九州ê英彥山腳有1個香社。Tī hia有1個貪心ê好額人叫做權三，伊有真濟錢借人，收真重ê利息，相像hit ê庄內有1個囡仔孝傑，伊ê厝真散hiong，爸爸又koh破病真久，連買藥仔ê錢to無。孝傑就去chhōe hit ê好額人beh kā伊借錢，總--是權三攏m̄借伊。 孝傑跪tī塗腳kā伊要求，伊才姑不chiong hiat 10個銀角仔hō͘伊。總--是孝傑ê爸爸破病真久，錢用了lah；孝傑就koh去借錢，權三大聲嚷： |
|
“Lí káⁿ koh lâi chioh! Í-chêng chioh ê chîⁿ lī-sek the̍h lâi hêng”, chiū kā i kóaⁿ chhut-lâi, Hàu-kiat bô pān-hoat, ná kiâⁿ ná háu, lâi kàu tī soaⁿ-kha chi̍t châng tōa châng chhiū kha, hut-jiân-kan ū siaⁿ tùi chhiū-téng ū siaⁿ teh kiò kóng, “Hàu-kiat, Hàu-kiat, lí m̄ thang háu, góa chai-iáⁿ lí sī chi̍t ê chin iú-hàu ê koai gín-ná. Taⁿ góa chit siang chhâ-kia̍h hō͘ lí.” Hàu-kiat chi̍t ē khòaⁿ chi̍t ê chhēng pe̍h-saⁿ ê lâng chē tī chhiū-téng hiat chi̍t siang chhâ-kia̍h hō͘ i, chhâ-kia̍h ê ē-bīn bô pîⁿ, ū chi̍t lêng phok-phok ê só͘-chāi. Hàu-kiat kóng, “Chin to-siā, chóng-sī che thái ē chhēng-tit, chhēng lo̍h-khì m̄-nā bē kiâⁿ lō͘, ē poa̍h-tó”. Hit lâng ìn kóng, “M̄ sī án-ni, lí kan-ta chhēng teh poa̍h-tó chiū hó, lí peh-khí--lâi ê sî chiū ē-thang khioh tio̍h chi̍t tè kim-á, chóng-sī hit tè kim-á tio̍h ēng tī pang-chān pa̍t-lâng. Siat-sú lí nā khí tham-sim, jú poa̍h-tó ē jú sè-hàn khì. Lí m̄-thang bē kì-tit”.
|
「你敢koh來借！以前借ê錢利息提來還」，就kā伊趕出來，孝傑無辦法，那行那哮，來到tī山腳1 欉大欉樹腳，忽然間有聲tùi樹頂有聲teh叫講：「孝傑，孝傑，你m̄ thang哮，我知影你是1個真有孝ê乖囡仔。今我這雙柴屐hō͘你。」孝傑1下看1個穿白衫ê人坐tī樹頂hiat 1雙柴屐hō͘伊，柴屐ê下面無平，有1 lêng phok-phok ê所在。孝傑講：「真多謝，總--是這thái會穿得，穿落去m̄-nā bē行路，會跋倒。」Hit人應講：「M̄是án-ni,你kan-ta穿teh跋倒就好，你peh起--來ê時就會thang拾著1 塊金仔，總--是hit塊金仔著用tī幫贊別人。設使你若起貪心，愈跋倒會愈細漢去。你m̄-thang bē記得」。 |
|
I tò-khì liáu-āu poa̍h-tó tit-tio̍h kim- á lâi chhiáⁿ i-seng i pa-pa ê pēⁿ, iā hàu sūn pa-pa, koh pang-chān chhù-piⁿ ê sàn-hiong lâng. Tham-sim ê Koân-sam thiaⁿ-tio̍h chit ê hong-siaⁿ, chiū lâi kàu Hàu-kiat ê chhù-n̍i̍h, chiong hit siang chhâ-kia̍h chhiúⁿ khì, chò í-chêng só͘ chioh ê 10 kho͘-gîn ê tí-ah. Koân-sam the̍h chhâ-kia̍h tò-khì, khí tham-sim ti̍t-ti̍t poa̍h-tó, tit-tio̍h kui keng chhù ê kim-á, chóng-sī seng-khu ti̍t-ti̍t sè-hàn, āu-lâi sòa pìⁿ chò chhin-chhiūⁿ thâng hiah sè.
|
伊倒去了後跋倒得著金仔來請醫生醫爸爸ê病，也孝順爸爸，koh幫贊厝邊ê散hiong人。貪心ê權三聽著這個風聲，就來到孝傑ê厝n̍i̍h,將hit雙柴屐搶去，做以前所借ê 10箍銀ê抵押。權三提柴屐倒去，起貪心直直跋倒，得著歸間厝ê金仔，總--是身軀直直細漢，後來煞變做親像蟲hiah細。 |
|
Lia̍t-ūi sió pêng-iú, lán m̄-thang tham-sim, lán eng-kai thiàⁿ lâng koh pang-chān lâng. Tio̍h o̍h Hàu-kiat ê iú-hàu.
|
列位小朋友，咱m̄-thang貪心，咱應該疼人koh幫贊人。著學孝傑ê 有孝。 譯者 陳曉峰 |
|
(Ka-têng ê pêng-iú tē 65 kî, 1963 nî 7 ge̍h)
|
(家庭ê朋友第65期，1963年7月) |
