Ōe-Ke̍k Sòng Siōng-chiat Phok-sū_03
|
話劇--宋尚節 博士_03 |
| Chhòa Ài-gī |
蔡愛義 |
|
Tē 8 Bō͘: Cheng-sîn pīⁿ-īⁿ ê Hōe-kheh-sek.
|
第8幕：精神病院ê會客室。 |
|
Pò͘-tì:Í, toh lóng chiâu-pī, Sòng chhēng chéng-chôe ê i-ho̍k kiâⁿ ji̍p sek-lāi, Hôa Phok-sū, i-seng, hō͘-sū khiā--khí-lâi.
|
佈置：椅，桌攏齊備，宋穿整齊ê衣服行入室內，花博士，醫生，護士企--起來。 |
|
Hôa Phok-sū: (Kap Sòng ak-chhiú). Sòng Phok-sū pêng-an! Bô phah-sǹg góa kap lí lī-pia̍t liáu-āu khì Au-chiu, kàu cha-ji̍t chiah tńg-lâi, tú-tú sī chi̍t nî, chit tiong-kan, sui-jiân siá chin-chōe tiuⁿ phoe hō͘ li8, tān-sī lóng bô chiap-tio̍h lí hôe phoe. Cha-ji̍t khì Hia̍p-hô Sîn-ha̍k-īⁿ chhē īⁿ-tiúⁿ, chiah chai-iáⁿ lí tī chia, thiaⁿ kóng í-keng 193 ji̍t lah. Siōng-tè pì-iū lí pêng an, chin kiong-hí.
|
華博士：（Kap宋握手）。宋博士平安！無扑算我kap你離別了後去歐洲，到昨日才轉--來，tú-tú是一年，這中間，雖然寫真濟張批hō͘你，但是攏無接著你回批。昨日去協和神學院chhē院長，才知影你tī chia，聽講已經193日--lah。上帝庇佑你平安，真恭喜。 |
|
Sòng Phok-sū: Hôa Kàu-siū, chin to-siā, góa hō͘ siáu īⁿ-tiúⁿ kap siáu i-seng koaiⁿ tòa siáu-lâng pīⁿ-īⁿ, chiok-chiok 193 ji̍t, Tān-sī góa tī pīⁿ-īⁿ tha̍k Sin Kū-iok ū 40 piàn, hō͘ góa tit-tio̍h Siōng-té ê un-tián kap Sèng-keng tiong ê khé-sī chin tōa, kám-kak chin khoài-lo̍k kap kám-siā. Siáu i-seng chin to-siā. (Khiā khí-lâi kap I-seng ak-chhiú).
|
宋博士：華教授，真多謝，我hō͘痟院長kap痟醫生關tòa痟人病院，足足193日，但是我tī病院讀新舊約有40遍，hō͘我得著上帝ê恩典kap聖經中ê啟示真大，感覺真快樂kap感謝。痟醫生真多謝。（企起--來kap醫生握手）。 |
|
I-seng: Hôa Phok-sū, m̄-chai lí khéng chòe pó-chèng-jîn chhōa Sòng Phok-sū chhut-īⁿ bô ? Tān--sī ū chi̍t ê tiâu-kiāⁿ ,chiū-sī chhut-īⁿ āu má-siōng sàng Sòng Phok-sū chē chûn tńg-khì Tiong-kok.
|
醫生：華博士，m̄知你肯做保證人chhōa宋博士出院--無？但是有一個條件，就是出院後馬上送宋博士坐船轉去中國。 |
|
Hôa Kàu-siū: Īⁿ-tiúⁿ góa khéng chòe pó-chèng-jîn, chhiáⁿ lí sûi-sî pān-lich2un Sòng Phok-sū chhut-īⁿ.
|
華教授：院長，我肯做保證人，請你隨時辦理准宋博士出院。 |
|
I-seng:（Hō͘-sū the̍h khah-phìⁿ hō͘ i-seng, i-seng chhiam-jī). Sòng Phok-sū, góa chún lí chhut-īⁿ, kiong-hí.
|
醫生：（護士提卡片hō͘醫生，醫生簽字）。宋博士，我准你出院，恭喜。 |
|
Hôa Hu-jin: Sòng Phok-sū kiong-hí, chhiáⁿ lâi-khì goán tau kiâⁿ-kiâⁿ. (Tāi-ke ak-chhiú lī-khui).
|
華夫人：宋博士恭喜，請來去阮兜行行。（逐家握手離開）。 |
|
Tē 9 Bō͘: Sòng Bo̍k-su kheh-thiaⁿ.
|
第9幕：宋牧師客廳。 |
|
Pò͘-tì: Kap chhut kok chêng siangkh7oan.
|
佈置：Kpa出國前像款。 |
|
Bō͘-āu ê hòng-sàng: Sòng Phok-sū lī-khui hiuⁿ-lí, pún-kok kap pē-bú í-keng 7 nî pòaⁿ. 1927 nî 11 ge̍h 8 ji̍t, sin-khu chhēng chi̍t niá chho͘-pò͘ tn̂g saⁿ, chhiú kōaⁿ hêng-lí tńg-lâi kò͘-hiong ta̍h ji̍p kheh-thiaⁿ.
|
幕後ê放送：宋博士離開鄉里、本國kap父母已經7年半。1927年11月8日，身軀穿一領粗布長衫，手kōaⁿ行李轉來故鄉踏入客廳。 |
|
Sòng Bo̍k-su: Lí sī siáⁿ lâng?
|
宋牧師：你是啥人？ |
|
Sòng Phok-sū: A-pa, góa sī Iok-hān.
|
宋博士：阿爸，我是約翰。 |
|
Sòng Bo̍k-su: Hò͘ ! Lí chiàⁿ-chiàⁿ sī Chú-un, kó-jiân sī khí khong, sím-mi̍h lí sī Iok-hān.
|
宋牧師：Hò͘!你正正是主恩，果然起khong，甚mi̍h你是約翰。 |
|
Sòng Phok-sū: A-pa, í-chêng ê Chú-un í-keng sí-lah, hiān-chāi sī ū oa̍h-miā ê Iok-hān tńg-lâi ê.
|
宋博士：阿爸，以前ê主恩已經死--lah，現在是有活命ê約翰轉--來ê。 |
|
Lâu-bú: Chú-un, Chú-un, góa so͘thíaⁿ ê kiáⁿ Chú-un, lí tńg-lâi lah. Kám-siā Chú ! O-ló Chú ! Góa kóaⁿ-kín lâi thâi lí só͘ ài chia̍h ê koe, iā sūn-sòa thong-ti Lîm Chhin-ke, chhiⁿ-ḿ kap Kím-hôa lâi (lāu-bú thè chhut).
|
老母：主恩，主恩，我所疼ê子主恩，你轉--來lah。感謝主！O-ló主！我趕緊來thâi你所愛食ê雞，也順續通知林親家，親姆kap錦華來（老母退出）。 |
|
Sòng Bo̍k-su: Chú-un, lí chit kiāⁿ hêng-lí, í-gōa iáu ū sím-mi̍h mi̍h-kiāⁿ bô?
|
宋牧師：主恩，你這件行李，以外有甚mi̍h物件--無？ |
|
Sòng Phok-sū: A-pa, góa só͘ ū ê mi̍h-kiāⁿ chiū-sī chit ê hêng-lí, lāi-bīn sī phòa koh kū ê saⁿ khò͘ nā-tiāⁿ, in-ūi góa só͘ tha̍k kè-khì ê chheh it-chhè to sio-liáu lah.
|
宋博士：阿爸，我所有ê物件就是這個行李，內面是破koh舊ê衫褲nā-tiāⁿ，因為我所讀過去ê冊一切都燒了--lah。 |
|
Lîm Chhin-ke: Chú-un kiong-hí, lí Pêng-an tńg-lâi. (Nn̄g lâng ak-chhiú).
|
林親家：主恩恭喜，你平安轉--來。（兩人握手）。 |
|
Sòng Phok-sū: A-pa, pêng-an! Kiong-hí !
|
宋博士：阿爸，平安！恭喜！ |
|
Lîm Chhiⁿ-ḿ: Chú-un kiong-hí !
|
林親姆：主恩恭喜！ |
|
Sòng Phok-sū: A-bú, pêng-an! (tāi-ke ak-chhiú).
|
宋博士：阿母，平安！（逐家握手）。 |
|
Sòng Phok-sū: Kím-hôa pêng-an, chinto-siā, góa chhut kok tiong pē-bú tit-tio̍h lí ê pang-bâng, chin to-sāi. (Nn̄g lâng ak-chhiú, Kím-hôa lâu ba̍k-sái, Gô͘ Hāu-tiúⁿ kiâⁿ ji̍p-lâi).
|
宋博士：錦華平安，真多謝，我出國中父母得著你ê幫忙，真多謝。（兩人握手，錦華流目屎，吳校長行--入來）。 |
|
Gô͘ Hāu-tiúⁿ: Sòng Phok-sū kiong-hí !
|
吳校長：宋博士恭喜！ |
|
Sòng Phok-sū: Gô͘ Hāu-tiúⁿ pêng-an,(ak-chhiú, siāng-sî lāu-bú phâng pn̄g chhài ji̍p-lâi, Kím-hôa má-siōng kā pang-bâng, tāi-ke chē chòe-hóe, Sòng Bo̍k-su khí-lâi kám-siā).
|
宋博士：吳校長平安，（握手，像時老母捧飯菜入--來，錦華馬上kā幫忙，逐家坐做伙，宋牧師起來感謝）。 |
|
Sòng Bo̍k-su: To-siā Thiⁿ-pē Siōng-tè, goán ê chhùi tio̍h chheng-chàn Lí ê koân-lêng, Lí ê thiàⁿ-thàng, Lí ê lîn-bín hō͘ goán bōe chhek-to̍k tit, lí siúⁿ-sù góa ê kiáⁿ-jî Chú-un, 7 nî pòaⁿ kú chhut kok, kin-á-ji̍t pêng-an tńg-lâi ,choân-ke hoaⁿ-hí saⁿ-kìⁿ, goán chhim-chhim kám-siā put chīn, kim-āu it-chhè ê sū kiû Lí kā goán an-pâi. Hiān-chāi goán beh hióng-siū Lí só͘ siúⁿ-sùe it-chhè, bē hióng-siū ê tāi-seng khò Iâ-so͘ ê miâ kám-siā. À-bēng.（Tāi-ke chīn-la̍t chia̍h, chia̍h liáu-āu phok-sū khiā khí-lâi.）
|
宋牧師：多謝天父上帝，我ê嘴著稱讚你ê 權能，你ê疼痛，你ê憐憫hō͘阮bōe測度--tit，你賞賜我ê 子兒主恩，7年半久出國，今仔日平安轉--來，全家歡喜相見，阮深深感謝不盡，今後一切ê事求你kā阮安排。現在阮beh享受你所賞賜ê 一切，bē享受ê代先靠耶穌ê名感謝。阿們。（逐家盡力食，食了後博士企--起來）。 |
|
Sòng phok-sū: Kèng-ài ê hāu-tiúⁿ, a-pa, a-bú kap chu-ūi. Góa kap lín lī-pia̍t 7 nî pòaⁿ, kim-ji̍t pêng-an tńg-lâi, khòaⁿ-kìⁿ tāi-ke pêng-an, chin khoài-lo̍k, kám-siā Siōng-tè ê hông-un. Góa sui-jiân tī Bí-kok tit-tio̍h Hòa-ha̍k Phok-sū, iā tit-to̍h Kim-sî chióng-chiong. Tān--sī phok-sū ê bûn-pîn kap chióng-chiong í-keng kā tìm lo̍h-khì Thài-pêng-iûⁿ--lah, góa só͘ tha̍k-kè ê chheh choân-pō͘ kā sio liáu lah, chí-ū tòa chi̍t pún, sī góa tha̍k 40 piàn ê Sèng-keng tńg-lâi jî-í. Í-chêng ê Chú-un í-keng sí lah, hiān-chāi sī Kiù-chù Iâ-so͘ kā góa kái miâ ê Iok-hān teh oa̍h. Kim-āu it-chhè lóng sī thàn Chú ê bēng-lēng, chí-sī lâi oa̍h jî-í.
|
宋博士：敬愛ê校長，阿爸，阿母kap諸位。我kap lín離別7年半，今日平安轉--來，看見逐家平安，真快樂，感謝上帝ê宏恩。我雖然tī美國得著化學博士，也得著金匙獎章。但是博士ê文憑kap獎章已經kā tìm落去太平洋--lah，我所讀過ê冊全部kā燒了--lah，只有帶一本，是我讀40遍ê聖經轉--來而已。以前ê主恩已經死--lah，現在是救主耶穌kā我改名ê約翰teh活。今後一切攏是趁主ê命令，指示來活而已。 |
|
Sòng Bo̍k-su: Chú-un, lí í-keng the̍h Phok-sū tńg-lâi, iā tio̍h thòe góa thàn chi̍t-tiám-á chîⁿ lâi pang-chān ke-lāi ê seng-oa̍h-hùi, in-ūi hiān-chāi góa ê ge̍h-kip chiah ū 35 kho͘ nā-tiāⁿ.
|
宋牧師：主恩，你已經提博士轉--來，也著替我趁一點仔錢來幫贊家內ê生活費，因為現在我ê 月給才有35箍nā-tiāⁿ。 |
|
Sòng Phok-sū: A-pa, góa tit-tio̍h Hòa-ha̍k Phok-sū ê sî. Pak-kiaⁿ Tāi-ha̍k ê I-ha̍k īⁿ-tiúⁿ ū phah tiān-pò lâi beh chhiáⁿ góa khì kà chheh, nî-hōng beh chi̍t bān kho͘, góa ū kā I kū-choa̍t lah. Góa pit-giap2 ê Tāi-ha̍k kiò góa khì Pak-kiaⁿ Tāi-ha̍k, choan-kong hòa-ha̍k, góa ū kā i kū-choa̍t. Sè-kan it-chhè ê miâ, lī góa bô iân, chí-ū ūi Chú thoân hok-im sī góa it-seng ê sù-bēng.
|
宋博士：阿爸，我得著化學博士ê 時。北京大學ê醫學院長有扑電報來beh請我去教冊，年奉beh一萬箍，我有kā伊拒絕--lah。我畢業ê大學叫我去北京大學，專攻化學，我有kā伊拒絕。世間一切ê名，離我無緣，只有為主傳福音是一生ê使命。 |
|
Gô͘ Hāu-tiúⁿ: Sòng Phok-sū, lí ê miâ-siaⁿ thoân piàn Bí-kok, góa lóng chai-iáⁿ, put-kò hiān-chāi lí iáu-bē koat-tēng hong-chiam. Chiām-sî lâi bú-hāu kà Hòa-ha̍k hó bô? Chū-jiân góa bōe chó͘-chí lí hiòng ha̍k-seng thoân-tō ê sū.
|
吳校長：宋博士，你ê 名聲傳遍美國，我攏知影，不過現在iáu-bē決定方針。暫時來母校教化學好--無？自然我bōe阻止你向學生傳道ê事。 |
|
Sòng Phok-sū: Kì-jiân hāu-tiúⁿ ê hó-ì, góa hoaⁿ-hí chiap-siū, chū-jiân góa iā ū ì-sù hiòng ha̍k-seng thoân-tō.
|
宋博士：既然校長ê好意，我歡喜接受。自然我也有意思向學生傳道。 |
|
Lāu-bú: Chú-un, lí kin-á-ji̍t tńg-lâi, tāi-ke to sī chin hoaⁿ-hí, lí í-keng 25 hè,Kím-hôa iā sī 25 hè, góa siūⁿ kūn ji̍t tiong lâi kú-hêng kiat-hun tián-lé sī chòe hò, chòe iàu-kín ê sū.
|
老母：主恩，你今仔日轉--來，逐家是真歡喜，你已經25歲，錦華也是25歲，我想近日中來舉辦結婚典禮是最好，最要緊ê事。 |
|
Sòng Phok-sū: A-bú ê thiàⁿ-thàng un chhim bû ke̍k, koe chú liáu chin bó-chia̍h. Kiat-hun ê sū chhiáⁿ a-pa, a-bú siat-hoat chiū-sī, góa bô ì-kiàn.
|
宋博士：阿母ê疼痛恩深無極，雞煮了真好食。結婚ê事請阿爸，阿母設法就是，我無意見。 |
|
Lāu-bú: M̄-chai chhin-ke, chhiⁿ-ḿ cháiⁿ-iūⁿ, sím-mi̍h ì-kiàn?
|
老母：M̄知親家，親姆怎樣，甚mi̍h意見？ |
|
Lîm Chhiⁿ-ḿ: Tong-jiân goán bô īⁿ-gī, chàn-sêng, iā ōe chīn-liōng kóaⁿ-kín pang-chān Kím-hôa pī-pān kè-chng.
|
林親姆：當然阮無意見異議，贊成，也會儘量趕緊幫贊錦華備辦嫁妝。 |
|
Lîm Chhin-ke: Chhin-ke, chhiⁿ-ḿ chin to-siā, hō͘ lín chhiáⁿ chin pá, chhiáⁿ Chú-un lí chiah siông lâi goán tau thit-thô, goán seng sit-lé. Kím-hôa lí chiah chia pang-bâng chhiⁿ-ḿ, khang-khè chòe liáu chiah tńg-lâi. Lí chhiáⁿ.
|
林親家：親家，親姆真多謝，hō͘ lín請真飽，請主恩你chiah常來阮兜thit-thô,阮先失禮。錦華你chiah chia幫忙親姆，工課做了才轉--來。你請。 |
|
Tē 10 Bō͘: Ē-mn̂g cha-keng hùn-heng-hōe.
|
第10幕：廈門查經奮興會。 |
|
Pò͘-tì: Í, toh chiâu pâi, ián-oanch5oan-pō͘ chham-ka.
|
佈置：椅，桌齊排，演員全部參加。 |
|
Bō͘-āu hòng-sàng: 1936 nî 7 ge̍h, SongPhok3-sū tī Ē-mn̂g khui cha-keng hùn-heng-hōe, chham-ka ê lâng ū 1600 miâ. Tùi 哈爾濱,北京,南京,漢口,福州,台灣,新加坡,菲律賓,南洋,馬來亞téng-téng ê só͘-chāi, lóng ū chin-chōe lâng lâi chham-ka. Hōe-kî sī chi̍t kò ge̍h, thang kóng sī khong chiân bī iú ê sēng-hóng. (Hōe-chiòng chôe siaⁿ chhiùⁿ chòe chhin-ài ê un-ài tī góa sim-lāi. Gîm-si tiong bō͘ chiām-chiām khui, gîm liáu, Sòng khí-lip3).
|
幕後放送：1936年7月，宋博士tī廈門開查經奮興會，參加ê人有1600名。Tùi哈爾濱、北京、南京、漢口、福州、台灣、新加坡、菲律賓、南洋、馬來亞等等ê所在，攏有真濟人來參加。會期是一個月，thang講是空前未有ê盛況。（會眾齊聲唱「最親愛ê恩愛tī我心內」。吟詩中幕漸漸開，吟了，宋起立）。 |
|
Sòng Phok-sū: Chòe chhin-ài Chú-lāi hiaⁿ-tī chí-bē, lán í-keng saⁿ-kap seng-oa̍h kèng-pài Siōng-tè, gîm-si, kî-tó, cha-keng chiong-kūn chi̍t kò ge̍h lah,koh bô kúi ji̍t chiū ōe kiat-sok, ta̍k lâng, sûi lâng, tang sai lâm pak khì, siáⁿ sî chiah ōe saⁿ-kìⁿ, tû-khí Siōng-tēi-gōa, bô ū lâng ōe chai. Siōng-tè nā khéng te̍k-pia̍t koán-kò͘, ǹg-bāng kim-āu ū tē 3 chhù ê cha-keng-hōe. Lán chit ê cha-keng-hōe kàu kiat-sok ê sî, choân-pún Sèng-keng kiōng 1189 chiuⁿ lóng ōe thang cha oân, í-āu ǹg-bāng lán tāi-ke tńg-khì ta̍k lang8 ê tōe-hng chòe chi̍t ê Ki-tok ê cheng-peng pē Chú ê si̍p-jī-kè, chiong-lâi lán tāi-ke tī thiⁿ-téng saⁿ kiⁿ, hióng-siū éng-oán ê hok-khì. Chit sî góa ài thiaⁿ hái-gōa lâi ê hiaⁿ-tī chū góa kap lín lī-pia̍t hôe Tiong-kok í-āu lín cháiⁿ-iūⁿ oa̍h-tāng ê pò-kò. Tāi-seng chhiáⁿ Sin-ka-pho lâi ê hiaⁿ-tī, tē jī chhiáⁿ Hui-li̍p-pin ehiâⁿ-tī, tē saⁿ Tâi-oân ê hiaⁿ-tī lâi pò-kò.
|
宋博士：最親愛主內兄弟姊妹，咱已經相kap生活敬拜上帝，吟詩，祈禱，話劇查經將近一個月--lah，koh無幾日就會結束，逐人，隨人東西南北去，啥時才會相見，除起上帝以外，無有人會知。上帝若肯特別管顧，向望今後有第3次查經會。咱這個查經會到結束ê時。全本聖經共1189章，攏會thang查完，以後向望咱逐家轉去逐人ê地方做一個基督ê精兵背主ê十字架，將來咱逐家tī天頂相見，享受永遠ê福氣。這時我愛聽海外來ê兄弟自我kap lín離別回中國以後lín怎樣活動ê報告。代先請新加坡來ê兄弟，第二請菲律賓ê兄弟，第三台灣ê兄弟來報告。 |
|
Sin-ka-pho hiaⁿ-tī: Sòng Phok-sū kipchu8-ūi hiaⁿ-tī, góa chin kong-êng lâi pò-kò, Sòng Phok-sū lâi Sin-ka-pho thâu bé kiōng 6 chhù, só͘ tit-tio̍h ê bō͘-tō-iú iok 5 chheng miâ, goán ê pò͘-tō-tūi ū nn̄g pah liân tūi, tūi-oân lóng sī khéng chia̍h-khó͘ o̍h Sòng Phok-sū ê kha-pō͘. Ǹg-bāng chiong-lâi ū ki-hōe koh chhiáⁿ Sòng Phok-sū lâi kian-kò͘ goán tāi-ke ê sìn-gióng.
|
新加坡兄弟：宋博士及諸位兄弟，我真光榮來報告，宋博士來新加坡頭尾6次，所得著ê慕道友約5千名，阮ê佈道隊有兩百連隊，隊員攏是肯食苦學宋博士ê腳步。向望將來有機會koh請宋博士來堅固阮逐家ê信仰。 |
|
Hui-li̍p-pin hiaⁿ-tī: Góa sī tùi Hui-li̍p-pin lâi ê, Sòng Phok-sū lâi Hui-li̍p-pin ū saⁿ pái, múi pái thiaⁿ tō-lí ê iok ū nn̄g chheng gōa miâ. Sòng Phok-sū beh lī-khui Hui-li̍p-pin ê sî, chi̍t chheng gōa miâ ê hiaⁿ-tī sàng kàu má-thâu chhiùⁿ lī-pia̍t si ê sî. chú-pin choân-pō͘ to thòng-khó͘ lâu ba̍k-sái, m̄-kam lī-pia̍t. Che sī Hui-li̍p-pin má-thâu khong-chiân bē ū ê chhin-bi̍t ê chêng-kéng. Taⁿ goán iā ū chó͘-chit chi̍t pah gōa tūi ê pò͘-tō-tūi tò-chhù pò͘-tō. Chhiáⁿ chèng hiaⁿ-tī sî-siông thòe goán kî-tó.
|
菲律賓兄弟：我是tùi菲律賓來--ê,宋博士來菲律賓有三擺，每擺聽道理ê約有兩千外名。宋博士beh離開菲律賓ê時，一千外名ê兄弟送到碼頭唱離別詩ê時。主賓全部都痛苦流目屎，m̄甘離別。Che是菲律賓碼頭空前未有ê親密ê情景。今阮也有組織一百外隊ê佈道隊到處佈道。請眾兄弟時常替阮祈禱。 |
|
Tâi-oân chí-bē: Góa sī tùi Tâi-oân lâi ê, kap góa saⁿ-kap lâi ê ū chi̍t pah gōa lâng. Sòng Phok-sū tī Tâi-lâm Sîn-ha̍k-īⁿ káng-tō ê sî, múi chhù to ū 5 chheng miâ í-siōng ê lâng lâi thiaⁿ, hōe-chiòng thiaⁿ liáu lóng jīn chōe, hoán-hóe thòng-khó͘ lâu ba̍k-sái, kàu-hōe ho̍k-heng. Hiān-chāi chó͘-chit 295 tūi ê pò͘-tō-tūi, chek-ke̍k soan-iông hok-im. Khó-sioh Ji̍t-pún chèng-hú khī-sī Ki-tok-tô͘, ū sî siū kan-sia̍p, ap-pek, chhiáⁿ chu-ūi hiaⁿ-tī chí-bē thòe goán kî-tó͘.
|
台灣姊妹：阮是tùi台灣來--ê,kap我相kap來--ê有一百外人。宋博士tī台南神學院講道ê時，每次都有5千名以上ê人來聽，會眾聽了攏認罪，反悔痛苦流目屎，教會復興。現在組織295隊ê佈道隊，積極宣揚福音。可惜日本政府歧視基督徒，有時干涉，壓迫，請諸位兄弟姊妹替阮祈禱。 |
|
Sòng Phok-sū: Chin hoaⁿ-hí ê hó siau-sit, goān êng-kng kui Chú ê miâ. A-men. Kin-ji̍t te̍k-pia̍t beh kóng gō͘ ê piáⁿ nn̄g bé hî ê sū. Iâ-so͘ tī sè-kan ê sî, chin-chōe bîn-chiòng ài khòaⁿ I, ài thiaⁿ I ê thoân hok-im, ài I i-hó ū pīⁿ ê lâng. Hit ji̍t iok-lio̍k ū 5 chheng lâng tī khòng-iá, in-ūi sî í-keng àm, bîn-chiòng iau-gō tòng bōe tiâu, Iâ-so͘ khó-lîn in,kiò ha̍k-seng hō͘ bîn-chiòng chia̍h, chóng-sī Hui-le̍k kóng, ká-sú ū jī-cha̍p niú gûn lâi bóe piáⁿ, bîn-chiòng thài chōe, kun-pún iā chia̍h bô sím-mi̍h. Chóng-sī Ná-tàn-gia̍p kóng, ū chi̍t ê sòe-kiáⁿ tòa gō͘ ê piáⁿ nn̄g bé hî, Iâ-so͘ kiò I tòa lâi, ǹg thiⁿ chiok-siā peh phòa the̍h hō͘ ha̍k-seng, ha̍k-seng pun hō͘ bîn-chiòng. Múi lâng chia̍h kàu pá, siu-si̍p só͘ chhun ê piáⁿ-chhùi iáu ū cha̍p-jī kheng. Tùi chit hāng sū thang khòaⁿ chhut Iâ-so͘ ê koân-lêng, thiàⁿ-sim, kap iau-gō ê bîn-chiòng sī thài chōe. Hiān-chāi lán ê tông-pau iā sī iau-gō ê lâng móa-móa sī, lín iā tio̍h hō͘ in chia̍h. Lín ta̍k lâng iā gō͘ ê piáⁿ nn̄g bé hî, lín ê ngó͘-koan, phīⁿ ba̍k ki̍p lín ê ngó͘-cháiⁿ, ngó͘-chí chiū-sī lín só͘ ū ê gō͘ ê piáⁿ, lín ê nn̄g ki chhiú, nn̄g ki kha, nn̄g lúi ba̍k-chiu, nn̄g ê hī chiū-sī nn̄g bé hî. Lí nā khéng hōng-hiàn hō͘ Chú, chú ōe kái-piàn lín chiâⁿ-chòe chhī gō͘ chheng lâng, he̍k-sī sò͘ bān lâng ê cheng-sîn bí-niû. Chhian-bān m̄-thang siūⁿ beh pó-liû lí ê piáⁿ kap hî, chiū-sī lín ê ngó͘-koan, kha-chhiú chòe ka-kī ê lō͘-ēng, iā m̄-thang siūⁿ bîn-chiòng tng iau-gō ê sî chiong piáⁿ bōe koân kè, thàn tōa chîⁿ, chhin-chhiūⁿ lí siūⁿ góa sī chi̍t ê ha̍k-chiá, kho-ha̍k ka, ū tōe-ūi, ū châi-kàn, lâng nā chhiáⁿ lí thoân-tō, lí chiū beh chin-chōe ê nî-hōng, nā bô chiū m̄-chòe. Iā chhian-bān m̄-thang siūⁿ ka-kī ê châi-lêng kan-ta lâu teh, ēng tī chhin-chiâⁿ, he̍k-sī siūⁿ kóng iau-gō ê bîn-chiòng hiah chōe, kun-pún gō͘ ê piáⁿ nn̄g bé hî ū sím-mi̍h chok-iōng, put jû siù-chhiú pông-koan, jīm-ì hòng-tōng hióng-lo̍k, bô lī-ek ka-kī, iā bô lī-ek sè-kan, lâng jû-kó án-ni, chiū-sī kai-sí ! Chhin-ài ê hiaⁿ-tī chí-bē, Iâ-so͘ khoài lâi lah! Sèng-kang tng bâng, nā bô ki̍p-sî kóaⁿ-kín chòe kang, hit-sî khiā tī Chú ê bīn-chêng ná ōe thang tit-tio̍h Chú kóng, lí sī hó koh chīn-tiong ê lô͘-po̍k, thang ji̍p tī Chú-lâng ê khoài-lo̍k ah? Chhin-ài ê hiaⁿ-chí ! Sî sī ji̍t-sî, tio̍h chòe kang, mî-sî nā kàu chiū bô ki-hōe lah! Goān lán chiong choân-sin hiàn hō͘ Chú, chòe oa̍h-oa̍h ê chè Chú ōe kái-piàn lí chòe úi-tāi ê khì-kū. Lán tāi-ke lâi chhiùⁿ Gòa ê sìⁿ-miā hiàn hō͘ Lí, chòe Lí chhe-ēng kàu chi̍t sì ê si.
|
宋博士：真歡喜ê好消息，願榮光歸主ê名。阿們。今日特別beh講五個餅兩尾魚ê事。耶穌tī世間ê時，真濟民眾愛看伊，愛聽伊ê 傳福音，愛伊醫好有病ê人。Hit日約略有5千人tī曠野，因為時已經暗，民眾枵餓擋bōe tiâu,耶穌可憐in，叫學生hō͘民眾食，總--是腓力講，假使有二十兩銀來買餅，民眾太濟，根本也食無甚mi̍h。總--是拿但業講，有一個細子帶五個餅兩尾魚，耶穌叫伊帶--來，向天祝謝剝破提hō͘學生，學生分hō͘民眾。每人食到飽，收拾所chhun ê餅脆iáu有12筐。Tùi這項事thang看出耶穌ê權能，疼心，kap枵餓ê民眾是太濟。現在咱ê同胞也是枵餓ê人滿滿是，lín也著hō͘ in食。Lín逐人也五個餅兩尾魚，lín ê五官，鼻目及lín ê五指，五趾就是lín所有ê五個餅，lín ê兩支手、兩支腳、兩蕊目睭，兩個耳就是兩尾魚。你若肯奉獻hō͘主，主會改變lín成做飼五千人，或是數萬人ê精神米糧。千萬m̄-thang想beh保留你ê餅kap魚，就是lín ê五官，腳手做家己ê路用，也m̄-thang想民眾當枵餓ê時，將餅賣懸價，趁大錢，親像你想我是一個學者，科學家，有地位，有材幹，人若請你傳道，你就beh真濟ê年奉，若無就m̄做。也千萬m̄-thang想家己ê才能kan-ta留--teh，用tī親情，或是想講枵餓ê民眾hiah濟，根本五個餅兩尾魚有甚mi̍h作用，不如袖手旁觀，任意放蕩享樂，無利益家己，也無利益世間，人如果án-ni，就是該死！親愛ê兄弟姊妹，耶穌快來--lah！聖工當忙，若無及時趕緊做工，hit時企tī主ê面前那會thang得著主講：「你是好koh盡忠ê奴僕，thang入tī主人ê快樂--ah？」親愛ê兄姊！時是日--時，著做工，暝--時若到就無機會--lah !願咱將全身獻hō͘主，做活活ê祭，主會改變你做偉大ê器具。咱逐家來唱我ê生命獻hō͘你，做你差用到一世ê詩。 |
|
Tē 11 Bō͘: Pak-kiaⁿ Se-san siok-sià.
|
第11幕：北京西山宿舍。 |
|
Pò͘-tì: Pīⁿ-chhn̂g chi̍t ê, í saⁿ, sì liâu, toh-téng io̍h-koàn, chúi-pân, Sòng chhe ki̍p tē saⁿ cha-bó͘-kiáⁿ khiā tī chhn̂g-piⁿ.
|
佈置：病床一個，椅衫，四liâu,桌頂藥罐，水瓶，宋妻及第三查某子企tī床邊。 |
|
Bō͘-āu hòng-sàng: 1935 nî, Sòng Phok-sū chē chûn tī Iông-chú-kang ê sî, ū chi̍t mî bāng-kìⁿ i ê lāu-pē khiā tī i ê sin-piⁿ, tùi phok-sū kóng: Chú-un, góa tāi-seng lí khì kìⁿ Thiⁿ-pē, chóng-sī lí iáu ū 7 nî ê sèng-kang, kóng liáu hêng-iáⁿ chiū siau-sòaⁿ. Keh-ji̍t chûn-tiúⁿ the̍h chi̍t tiuⁿ tiān-pò hō͘ Sòng Phok-sū, kó-jiân sī i ê lāu-pē í-keng khì-sè. Sòng Phok-sū kàu 1924 nî sèng-kang chiū oân-móa, 12 ge̍h 14 hō pīⁿ tāng tī Pak-pêng Hia̍p-hô i-īⁿ tē it pái chhiú-su̍t, 1943 nî 3 ge̍h 27 ji̍t tī Thian-tin tē jī pái chhiú-su̍t, 1944 nî 6 ge̍h 12 ji̍t tī pak-pêng Tek-kok pīⁿ-īⁿ tē 4 chhù chhiú-su̍t, chhiú-su̍t āu bô kú thè īⁿ, kap bó͘-kiáⁿ tī Se-san siok-sià chēng-ióng.
|
幕後放送：1935年，宋博士坐船tī揚子江ê時，有一暝望見伊ê老父企tī伊ê 身邊，對博士講：「主恩，我代先你去見天父，總--是你iáu有7年ê聖工」，講了形影就消散。隔日船長提一張電報hō͘宋博士，果然是伊ê老父已經去世。宋博士到1942年聖工就完滿，12月14號病重tī北平協和醫院第一擺手術，1943年3月27日tī天津第二擺手術，1944年6月12日tī北平德國病院第4次手術，手術後無久退院，kap某子tī西山宿舍靜養。 |
|
Sòng Phok-sū: Chòe chhin-ài ê hiân-chhe, góa chū tē it chhù chhiú-su̍t í-āu ,tit-tio̍h lí mî-ji̍t ê chiàu-kò͘ ki̍p múi jit ê kî-tó, góa ê sim chin pêng-an, góa sìn góa ê lêng-hûn siū Chú tiàu í-āu, lí ias7? kè-sio̍k sìn-khò Siōng-tè, chiàu-kò͘ ko͘-jî, si̍t-chāi kám-siā lí ê un-ài bô chīn. Góa it-seng ūi Chú lô-khó͘, lóng bô chek-chū châi-sán lâu hō͘ lín, jî-chhiáⁿ siⁿ-chêng iā bô chhiong-hun ê sî-kan khiā tī chhù-ni̍h hióng-siū hu-chhe, hū-chú thian-lûn ê hēng-hok kap khoài-lo̍k, jî-chhiáⁿ nn̄g ê kiáⁿ-jî hoān pīⁿ tîm-tiōng sí-khì, bâi-chòng, iā bô sî-kan lâi kìⁿ chi̍t bīn, chham-ka song-chòng, si̍t-chāi chòe lāu-pē, chòe tiōng-hu tōa sit-lo̍h pún-pūn, ka-kī iā sī thòng-khó͘ bān-hūn. Chóng-sī lán ê Chú ū kóng, Thiàⁿ pē-bú khah kè-thâu tī thiàⁿ góa ê, bōe kham-tit tī góa; thiàⁿ kiáⁿ, cha-bó͘-kiáⁿ khah kè-thâu tī thiàⁿ góa ê, bōe kham-tit tī góa, chit iám iā sī lí bêng-pe̍k ê só͘-chāi. Góa ê sèng-kang í-keng oân lah, Tiong-kok 35 séng bô ū chi̍t séng, chi̍t siâⁿ ki̍p hiong-tìn góa bô kàu ê só͘-chāi; hiān-chāi kàu-hōe í-keng hùn-heng lah, góa ê sim-goān, góa ê sù-bēng í-keng oân lah, chí-ū tán-hāu Chú tiàu nā-tiāⁿ. Song-chòng ê sū góa só͘ thiàⁿ ê Ông Bêng-tō ōe siat-hoat, bián khòa-ì, tio̍h an-sim.
|
宋博士：最親愛ê賢妻，我自第一次手術以後，得著你暝日ê照顧及每日ê祈禱，我ê心真平安，我信我ê靈魂受主召以後，你也是繼續信靠上帝，照顧孤兒，實在感謝你ê恩愛無盡。我一生為主勞苦，攏無積聚財產留hō͘ lín,而且生前也無充分ê時間企tī厝--ni̍h享受夫妻，父子天倫ê幸福kap快樂，而且兩個子兒患病沉重死--去，埋葬，也無時間來見一面，參加喪葬，實在做老父，做丈夫大失落本份，家己也是痛苦萬分。總--是咱ê主有講，疼父母較過頭tī疼我--ê,bōe堪得tī我；疼子，查某子較過頭tī疼我--ê,bōe堪得tī我，這點也是你明白ê所在。我ê 聖工已經完--lah，中國35省無有一省，一城及鄉鎮我無到ê所在；現在教會已經奮興--lah，我ê 心願，我ê使命已經完--lah，只有等候主召nā-tiāⁿ。喪葬ê事我所疼ê王明道會設法，免掛意，著安心。 |
|
Sòng chhe: Chhin-ài ê Iok-hān, góa bêng-pe̍k lí sī Siōng-tè chīn-tiong ê lô͘-po̍k, lí ê lô-khó͘. Lí ê tio̍h-bôa sī pêng siông lâng bô hoat-tō͘ chòe kah kàu ê,lí ê sin-thé ōe phah pháiⁿ-khì, iā sī tùi góa bô hoat-tō͘ kun-sûi lí, mî-ji̍t chiàu-kò͘ lí ê só͘ tì, si̍t-chāi chin kè bōe tit khí. Chóng-sī che iā sī chù-tēng ê ūn-miā, Siōng-tè ê chí-ì, góa iā goān-ì. Kap lí chia̍h khó͘ ê it-chhè ê sū í-keng piàn chiâⁿ chi̍t tiûⁿ ê bîn-bāng, chhiáⁿ lí an-sim, m̄-thang siong-sim.
|
宋妻：親愛ê約翰，我明白你是上帝盡忠ê奴僕，你ê勞苦。你ê著磨是平常人無法度做kah到--ê,你ê身體會扑歹--去，也是tùi我無法度跟隨你，暝日照顧你ê所致，實在真過bōe得起。總--是che也是注定ê運命，上帝ê旨意，我也願意。Kap你食苦ê一切事已經變成一場ê眠夢，請你安心，m̄ thang傷心。 |
|
Sòng Phok-sū: Gòa só͘ thiàⁿ ê cha-bó͘-kiáⁿ, góa tī sè-kan í-keng sī bô kú ê lâng lah, góa khì liáu-āu, lí piàn chiâⁿ bô pē ê ko͘-lú, lí tio̍h koai-koai, thiàⁿ sió-bē, iú-hàu lāu-bú, chiong-lâi nā chòe lú thoân-tō iā sī chin hò ê sū.
|
宋博士：我所疼ê查某子，我tī世間是無久ê人--lah，我去了後，你變成無父ê孤女，你著乖乖，疼小妹，有孝老母，將來若做女傳道也是真好ê事。 |
|
Sòng lú: A-pa, góa bêng-pe̍k lí ethîaⁿ. Góa ōe thiàⁿ sió-bē, iú-hàu a-bú, chhiáⁿ lí an-sim. Goán sui-jiân sī ko͘-jî, bô pē ê lú-chú, chóng-sī goán chhim-sìn lí sī khì thian-tông tiâu-kìⁿ Thiⁿ-pē, hióng-siū thian-tông ê hok-khì; goán sìn a-pa lí sī chit sè-kan chòe úi-tāi ê lāu-pē, góa kap a-bú ta̍k ji̍t teh thòe lí kî-tó bô soah, chhiáⁿ a-pa lí an-sim.(Ông Bêng-tō, i-seng ki̍p hō͘-sū kiâⁿ--ji̍p-lâi).
|
宋女：阿爸，我明白你ê 疼。我會疼小妹，有孝阿母，請你安心。阮雖然是孤兒，無父ê女子，總--是阮深信你是去天堂朝見天父，享受天堂ê福氣；阮信阿爸你是這世間最偉大ê老父，我kap阿母逐日teh替你祈禱無煞，請阿爸你安心。（王明道，醫生及護士行--入來）。 |
|
I-seng: (Bong me̍h liáu iô-thâu), Sòng Phok-sū, góa í-keng chīn liáu góa ê pún-hūn, koh chù chi̍t ki chu-ióng siā chiū hó.
|
醫生：（摸脈了搖頭），宋博士，我已經盡了我ê 本份，koh注一支滋養射就好。 |
|
Sòng Phok-sū: Chhin-ài ê i-seng, hō͘-sū kip góa só͘ thiàⁿ ê Bêng-tō, chin to-siā. Góa thâu-bóe pēⁿ nn̄g nî, chhiú-su̍t sì chhù, góa sin-piⁿ bô chi̍t hun gō͘ lî chîⁿ, tùi lí ê thiàⁿ-thàng kap hiân-bêng koh hó ê siat-hoat, it-chhè tùi thiàⁿ Chú ê hiaⁿ-tī kià lâi pang-chān. Góa ê sim-tiong ē kám-siā kap khoài-lo̍k bô hoat-tō͘ thang piáu-hiān. Goān Chú chiok-hok thiàⁿ i ê it-chhè ê lâng. Cha-mê Iâ-so͘ tùi góa kóng, Iok-hàn, lí tio̍h tńg-lâi lah. Kin chái-khí Iâ-so͘ chài lâi khiā tī mn̂g-kháu, só͘-í góa ê sim chin pêng-an hoaⁿ-hí, chhiáⁿ lí m̄-bián kiaⁿ, bián hoân-ló, tio̍h chhim-sìn kiù-chú Iâ-so͘; ūi Chú kiàn-chèng thoân hok-im, (Chhut-ián jîn-oân chìn-ji̍p).
|
宋博士：親愛ê醫生，護士及我所疼ê明道，真多謝。我頭尾病兩年，手術四次，我身邊無一分五釐錢，對你ê疼痛kap賢明koh好ê設法，一切tùi疼主ê兄弟寄來幫贊。我ê心中會感謝kap快樂無法度thang表現。願主祝福疼伊ê一切ê人。昨暝耶穌對我講，約翰，你著轉--來lah。今早起耶穌再來企tī門口，所以我ê 心真平安歡喜，請你m̄免驚，免煩惱，著深信救主耶穌；為主見證傳福音，（出演人員進入）。 |
|
I-seng: Sòng Phok-sū lêng-hûn í-keng lī-khui sè-kan lah!
|
醫生：宋博士靈魂已經離開世間--lah！ |
|
Ông Bêng-tō: Chu-ūi chhin-ài ê hiaⁿ-chí, Siōng-tè chīn-tiong ê po̍k-jîn,lán chòe kèng-thiàⁿ ê Sòng Phok-sū, i sī lán Tiong-kok iú sú í-lâi chòe úi-tāi ê pò͘-tō-ka, hùn-heng-ka, í-keng siū Chú tiàu lêng-hûn kui thian lah! I it-seng ūi Chú chia̍h-khó͘, thǹg chhiah-kha,chhēng chho͘-pò͘ tn̂g-phàu, ū sî siū lâng lêng-jio̍k, húi-pòng, khún-tio̍k,hām-hāi, chóng-sī Siōng-tè pì-iū i. I thoân-tō 18 nî, si-hô bô tham lâng chi̍t kho͘ gûn, i ê bó͘-kiáⁿ pîn-khùn kan-khó͘,chí-ū Siōng-tè chai nā-tiāⁿ. I sui-jiân sin-thé tài pīⁿ, chóng-sī choân-kok ê tông-pau chhiat-bāng i, ài thiaⁿ i ê káng-tō, ài i thòe in ê pīⁿ-lâng kî-tó, i khò Iâ-so͘ ê miâ i-hó chin-chōe ê pīⁿ-lâng, i kiaⁿ-liáu sèng-kang chòe bōe oân ,thoa-pīⁿ mî-ji̍t kóng tō-lí, an-ùi sò͘ pah bān sim-tiong thòng-khó͘ ê lâng, hō͘ inū Kiù-chú Iâ-so͘ ê kiù-un thang tit-tio̍h pêng-an. Chòe-āu i ê pīⁿ sī hì kiat-hu̍te pīⁿ, chóng-sī i ta̍k sî kap Chú tông-chāi, chiàn iâⁿ pīⁿ-mô͘. Hiān-chāi i í-keng tit-tio̍h Chú siúⁿ-sù êng-kng ê bián-liû, éng-oán hióng-siū thian-tông ê hok-khì. I ūi-tio̍h lán tông-pau hoān-chōe só͘ lâu ê ba̍k-sái, Siōng-tè í-keng thòe i chhit lah. Ǹg-bāng lán tāi-ke kian-kò͘ sìn-sim, lâi o̍h i ê kha-pō͘ thoân hok-im, chiong-lâi ōe kap Sòng Phok-sū saⁿ-kap tī thian-tông saⁿ-kìⁿ. Chit sî lán lâi gîm Thian-tông sī góa ke, tò-lâi ah, sè-kan bián khòa-ì, Thian-tông sī góa ke, tò-lâi ah, sè-kan bián khòa-ì.
|
王明道：諸位親愛ê兄姊，上帝盡忠ê僕人，咱最敬疼ê宋博士，伊是咱中國有史以來ê佈道家，奮興家，已經受主召靈魂歸天--lah！伊一生為主食苦，褪赤腳，穿粗布長袍，有時受人凌辱，誹謗，窘逐，陷害，總--是上帝庇佑伊。伊傳道18年，絲毫無貪人一箍銀，伊ê某子貧困艱苦，只有上帝知nā-tiāⁿ。伊雖然身體帶病，總--是全國ê同胞切望伊，愛聽伊ê 講道，愛伊替in ê病人祈禱，伊靠耶穌ê名醫好真濟ê病人，伊驚了聖工做bōe完，拖病暝日講道理，安慰數百萬心中痛苦ê人，hō͘ in有救主耶穌ê救恩thang得著平安。最後伊ê 病是肺結核ê病，總--是伊逐時kap主同在，戰贏病魔。現在伊已經得著主賞賜榮光ê冕旒，永遠享受天堂ê福氣。伊為著咱同胞犯罪所流ê目屎，上帝已經替伊拭--lah。向望咱逐家堅固信心，來學伊ê腳步傳福音，將來會kap宋博士相kap tī天堂相見。這時咱來吟天堂是我家，倒--來ah，世間免掛意， 天堂是我家，倒--來ah，世間免掛意。 |
|
(Kàng-bō͘).
|
（降幕）。 |
|
Bō͘ āu hòng-sàng: Chhin-ài ê hiaⁿ-tī chí-bē, chòe-āu ê pò-kò sī Sòng Phok-Sū 1944 nî 8 ge̍h 18 ji̍t siōng-ngó͘ 7 tiám̄ hun, lêng-hûn siū tiàu kui thian. I ê koan-bo̍k sī iōng chòe hó ê hiuⁿ-chhâ lâi chòe. 8 ge̍h 22 jit chhut-chòng ê sî , choân-kok kok séng lóng ū tāi-piáu lâi hōe-chòng, chin-chōe pò͘-tō-thoân ê thoân-tiúⁿ; lâi kng i ê koan-bo̍k , chhut-soaⁿ ê sî sī iân-lō͘ gîm-si, sàng kàu Sòng Phok-sū siⁿ-chêng siông-siông tan-to̍k só͘ ài khì kî-tó ê chháu-po͘, tī hia an-chòng. I ê tōa chhian-kim miâ chòe Chhòng-sè-kì(thian kiáⁿ), hiān-chāi iáu jia̍t-sim chòe thoân-tō, ūi Chú thoân hok-im, sī lán chòe hoaⁿ-hí siū an-ùi ê só͘-chāi. Chòe-āu chiok chu-ūi kiān-khong. Chài-hōe!
|
幕後放送：親愛ê兄弟姊妹，最後ê報告是宋博士1944年8月18日上午7點7分，靈魂受召歸天。伊ê 棺木是用最好ê香材來做。8月22日出葬ê 時，全國各省攏有代表來會葬，真濟佈道團ê團長；來扛伊ê 棺木，出山ê 時是沿路吟詩，送到宋博士生前常常單獨所愛去祈禱ê草埔，ti̍hiā安葬。伊ê 大千金名做創世紀（天子），現在iáu熱心做傳道，為主傳福音，是咱最歡喜受安慰ê所在。最後祝諸位健康。再會！ |
|
(Tâi-oân Kàu-hōe Kong-pò tē 919-921, 922, 924-928 hō, 1963 nî 10 ge̍h-1964 nî 2 ge̍h)
|
（台灣教會公報第919-921、922、924-928號，1963年10月~1964年2月） |
