各位 聽眾 好兄弟 ， 聽 我 唸歌 來 講 起 ， 姓 黃 秋田 我 名字 ， 望 恁 疼惜 佮 支持 。

Kok-uī thiann-tsiòng hó-hiann-tī , Thiann guá liām-kua lâi kóng khí , Sènn N̂g Tshiu-tiân guá miâ-lī , Bāng lín thiànn-sioh kah tsi-tshî .

諸位 貴君 聽 我 唱 ， 歌詩 先款 較 熱場 ， 用心計較 編 這樣 ， 這站 陳唐 李 三娘 。

Tsu-uī kuì-kun thiann guá tshiùnn , Kua-si sing-khuán khah lia̍t-tiûnn , Iōng-sim-kè-kàu pian tsit-iūnn , Tsit-tsām Tân-tông Lí Sann-niû .

這站 陳唐 後五代 ， 編好 我 即 唸 出來 ， 卜 予 諸君 聽 看覓 ， 先 唱 三娘 劉 咬臍 。

Tsit-tsām Tân-tông Hiō-ngóo-tāi , Pian-hó guá tsiah liām tshut-lâi , Bueh hōo tsu-kun thiann khuànn-māi , Sing tshiùnn Sann-niû Lâu ngái-tsâi .

三娘 人因翁 劉 智遠 ， 彬州 投軍 去 征番 ， 死活 毋知 啥乜款 ， 無批 無信 回 中原 。

Sann-niû in-ang Lâu Tì-uán , Pin-tsiu tâu-kun khì tsing-huan , Sí-ua̍h m̄-tsai siánn-mi̍h-khuán , Bô-phe bô-sìn huê Tiong-guân .

十六年前 的 時陣 ， 智遠 彬州 去 投軍 ， 無批 無信 寄 予 阮 ， 予 阮 受苦 十二分 。

Tsa̍p-la̍k-nî-tsîng ê sî-tsūn , Tì-uán Pin-tsiu khì tâu-kun , Bô-phue bô-sìn kià hōo gún , Hōo gún siū-khóo tsa̍p-lī-hun .

十六年 來 無 批信 ， 聽 講 岳府 閣 招親 ， 貪戀 富貴 在 外面 ， 君 你 不義 佮 不仁 。

Tsa̍p-la̍k-nî lâi bô phue-sìn , Thiann kóng Ga̍k-hú koh tsio-tshin , Tham-luân huì-kuì tsāi guā-bīn , Kun lí put-gī kah put-lîn .

智遠 你 真 毋是人 ， 一去 投軍 十六冬 ， 拋離 前妻 罪掛 重 ， 放 我 受苦 在 磨房 。

Tì-uán lí tsin m̄-sī-lâng , Tsi̍t-khì tâu-kun tsa̍p-la̍k-tang , Phau-lî tsîng-tshe tsuē-kuà tāng , Pàng guá siū-khóo tsāi bō-pâng .

放 我 磨房 塊 受苦 ， 少人 心肝 即年 初 ， 無 想 結髮 的 翁某 ， 往費 出世 做 查甫 。

Pàng guá bō-pâng teh siū-khóo , Tsió-lâng sim-kuann tsiah--nî tshoo , Bô siūnn kiat-huat ê ang-bóo , Óng-huì tshut-sì tsò tsa-poo .

你 咱 頭毛 的 結髮 ， 冤家 情份 即年 絕 ， 阮嫂 心肝 真 斡拙 ， 想空 想縫 塊 刑罰

Lí lán thâu-mn̂g ê kiat-huat , Uan-ke tsîng-hūn tsiah--nî tsua̍t , Gún-só sim-kuann tsin uat-tsuat , Siūnn-khang siūnn-phāng teh hîng-hua̍t

阮嫂 做人 真 奸計 ， 每暗 著 挨 四斗麥 ， 毋做 阿嫂 赤扒扒 ， 一頓 限定 半碗糜 。

Guán-só tsò-lâng tsin kan-kè , Muí-àm tio̍h e sì-tàu-be̍h , M̄-tsò a-só tshiah-peh-peh , Tsi̍t-tǹg hān-tīng puànn-uánn-bê .

食 人 半碗 白目飯 ， 麥仔 著 挨 歸瞑昏 ， 枵飢失頓 跤手 軟 ， 阿嫂 鐵 拍 的 心腸 。

Tsia̍h lâng puànn-uánn pe̍h-ba̍k-pn̄g , Be̍h-á tio̍h e kui-mê-hng , Iau-ki-sit-tǹg kha-tshiú nńg , A-só tshi̍h phah ê sim-tn̂g .

每暗 著 挨 四五斗 ， 想著 命 歹 目屎 流 ， 麥仔 若是 挨 無夠 ， 四常 著 食 竹棍頭 。

Muí-àm tio̍h e sì-gōo-táu , Siūnn-tio̍h miā pháinn ba̍k-sái lâu , Be̍h-á nā-sī e bô-kàu , Sù-siông tio̍h tsia̍h tik-kùn-thâu .

按怎 我 會 即 歹命 ， 無 翁 通靠 倚 大廳 ， 阮嫂 拍人 毋驚 疼 ， 看 著 伊 面 我 著 驚 。

Àn-tsuánn guá ē tsa̍i̍h pháinn-miā , Bô ang thang-khò uá tuā-thiann , Gún-só phah-lâng m̄-kiann thiànn , Khuànn tio̍h i bīn guá tio̍h kiann .

明明 是 我 的 命運 ， 拍斷 喙齒 含 血 吞 ， 歸瞑 挨 麥 毋敢 睏 ， 阿嫂 定定 愛 來 巡 。

Bîng-bîng sī guá ê miā-ūn , Phah-tn̄g tshuì-khì hâm hueh thun , Kui-mê e be̍h m̄-kánn khùn , A-só tiānn-tiānn ài lâi sûn .

四常 一日 食 一頓 ， 麥仔 一瞑 挨 到 光 ， 徛 甲 腰骨 強 卜 斷 ， 尻脊 毋捌 倚 眠床 。

Sù-siông tsi̍t-li̍t tsia̍h tsi̍t-tǹg , Be̍h-á tsi̍t-mê e kàu kng , Khiā kah io-kut kiông beh tn̄g , Kha-tsiah m̄-bat uá bîn-tshn̂g .

第一 惡毒 阮 兄嫂 ， 歸瞑 袂睏 著 紲 磨 ， 四斗 麥仔 拄 挨好 ， 聽著 雞 啼 四五落 。

Tē-it ok-to̍k gún hiann-só , Kui-mê bē-khùn tio̍h suà bō , Sì-táu be̍h-á tú e-hó , Thiann-tio̍h ke thî sì-gōo-lo̍h .

天光 張氏 拄 來 到 ， 竹棍 攑 佇 尻川頭 ， 小姑 麥仔 挨 幾斗 ， 今 著 趕緊 提 來 交 。

Thinn-kng tiunn--sī tú lâi kàu , Tik-kùn gia̍h tī kha-tshng-thâu , Sió-koo be̍h-á e kuí-táu , Tann tio̍h kuánn-kín the̍h lâi kau .

三娘 對 喙 應 阿嫂 ， 麥仔 挨 好 卜 囥 佗 ， 人 我 早早 著 挨 好 ， 有通 食飯 抑是 無 。

Sann-niû tuì tshuì ìn a-só , Be̍h-á e hó beh khǹg tó , Lâng guá tsá-tsá tio̍h e hó , Ū-thang tsia̍h-pn̄g iah-sī bô .

張氏 惡毒 假 賢慧 ， 行 倚 共 伊 假 好衰 ， 食 卜 予 你 食 較濟 ， 盈暗 共 我 摒 四界 。

Tiunn--sī ok-to̍k ké hiân-huē , Kiânn uá kā i ké hó-sue , Tsia̍h beh hōo lí tsia̍h khah-tsuē , Îng-àm kā guá piànn sì-kuè .

阿嫂 共 伊 假 好喙 ， 早起 飯 亦 真 大堆 ， 食飽 通好 去 擔水 ， 好魚 好肉 漲 袂肥 。

A-só kā i ké hó-tshuì , Tsá-khí pn̄g ia̍h tsin tuā-tui , Tsia̍h-pá thang-hó khì tann-tsuí , Hó-hî hó-bah tiùnn bē-puî .

阮嫂 今日 即 好禮 ， 早起 飯 講 煮 較加 ， 拍算 醬菜 通好 配 ， 去 看 春 無 半碗 糜 。

Gún-só kin-li̍t tsiah hó-lé , Tsá-khí pn̄g kóng tsú khah-ke , Phah-sǹg tsiùnn-tshài thang-hó phuè , Khì khàunn tshun bô puànn-uánn bê .

三娘 行 倚 卜 食飯 ， 看 著 凊糜 攏 生湯 ， 半碗 予 我 準 一頓 ， 家治 看覓 攏 臭酸 。

Sann-niû kiânn uá beh tsia̍h-pn̄g , Khuànn tio̍h tshìn-muê lóng senn-thng , Puànn-uánn hōo guá tsún tsi̍t-tǹg , Ka-tī khuànn-māi lóng tshàu-sng .