總 請 列位 緊 來 听 ，
這抱 歌詩 大 時行 ，
民間 故事 是 有影 ，
改勸 老貝 青年兄 。
|
Tsóng tshiánn lia̍t-uī kín lâi thiann ,
Tsit-phō kua-si tuā sî-kiânn ,
Bîn-kan kòo-sū sī ū-iánn ,
Kái-khǹg lāu-puè tshing-liân-hiann .
|
臺南 運河 的 奇案 ，
開利 金快 彼 一層 ，
環境 壓迫 真 怨嘆 ，
同心 同意 離 世間 。
|
Tâi-lâm ūn-hô ê kî-àn ,
Khai-lī Kim-khuài hit tsi̍t-tsân ,
Khuân-kíng ap-pik tsin uàn-thàn ,
Tông-sim tông-ì lî sè-kan .
|
世間 有天 甲 有地 ，
女 大 當 嫁 男 配妻 ，
世上 愛情 大 關係 ，
第一 相好 因 二个 。
|
Sè-kan ū-thinn kah ū-tē ,
Lú tāi tong kè lâm phuè-tshe ,
Sè-siōng ài-tsîng tuā kuan-hē ,
Tuē-it siong-hó in nn̄g-ê .
|
二十年 前 的 故事 ，
這部 不是 有 古書 ，
流傳 社會 是 真 久 ，
站節 做 去 真 工夫 。
|
Lī-tsa̍p-nî tsîng ê kòo-sū ,
Tsit-phō m̄-sī ū kóo-su ,
Liû-thuân siā-huē sī tsin kú ,
Tsām-tsat tsuè khì tsin kang-hu .
|
恰早 日本 的 時代 ，
即 的 流傳 當今 來 ，
是大 若是 有 慷慨 ，
青年 男女 未 悲哀 。
|
Khah-tsá Li̍t-pún ê sî-tāi ,
Tsiah ē liû-thuân tong-kim lâi ,
Sī-tuā nā-sī ū khóng-khài ,
Tshing-liân lâm-lú buē pi-ai .
|
社會 做人 愛 覺悟 ，
不通 損失 人 前途 ，
助 成 男女 做 尫某 ，
恰 贏 趁着 歸千 租 。
|
Siā-huē tsuè-lâng ài kak-ngōo ,
M̄-thang sńg-sit lâng tsiân-tôo ,
Tsōo sîng lâm-lú tsuè ang-bóo ,
Khah iânn thàn-tio̍h kui-tshing tsoo .
|
世上 着 做 好 模範 ，
好 呆 也的 奉 流傳 ，
大家 不通 學 這款 ，
萬事 了解 無 悲傷 。
|
Sè-siōng tio̍h tsuè hó bôo-huān ,
Hó phái iā-ē hōng liû-thuân ,
Ta̍k-ke m̄-thang o̍h tsit-khuán ,
Bān-sū liáu-kái bô pi-siong .
|
汝 咱 黃帝 的 後代 ，
中國 傳統 當今 來 ，
臺灣 風俗 是 無改 ，
鑼鼓 不 時 鬧猜猜 。
|
Lí lán N̂g-tè ê āu-tāi ,
Tiong-kok thuân-thóng tong-kim lâi ,
Tâi-uân hong-sio̍k sī bô-kái ,
Lô-kóo put sî nāu-tshai-tshai .
|
農曆 正月 十五 暗 ，
就是 古城 的 臺南 ，
有 迎 花燈 真 長站 ，
大炮 炮煙 白茫茫 。
|
Lông-li̍k tsiann-ge̍h tsa̍p-gōo àm ,
Tio̍h-sī kóo-siânn ê Tâi-lâm ,
Ū ngiâ hue-ting tsin tn̂g-tsām ,
Tuā-phàu phàu-ian pe̍h-bâng-bâng .
|
也 有 塊 郎 韓丹爺 ，
藝閣 有 粧 李 羅叱 ，
伊 鬧 東海 火輪 倚 ，
金圈 金鎗 双手 夯 。
|
Iā ū teh lòng Hân-tan-iâ ,
Gē-koh ū tsng Lí Lô-tshia ,
I nāu tang-hái hé-lûn khiā ,
Kim-khuân kim-tshiunn sang-tshiú gia̍h .
|
一款 弄龍 甲 弄獅 ，
獅 龍 陣頭 緊 迎來 ，
受着 環境 來 阻害 ，
着是 三伯 甲 英台 。
|
Tsi̍t-khuán lāng-lîng kah lāng-sai ,
Sai lîng tīn-thâu kín ngiâ-lâi ,
Tsiū-tio̍h khuân-kíng lâi tsóo-hāi ,
Tio̍h-sī sam-phik kah ing-tâi .
|
有 粧 三娘 塊 擔水 ，
公 揚 婆仔 界 古錐 。
令外 一閣 双腳 跪 ，
包公 跪 塊 請 五雷 。
|
Ū tsng sann-niû teh tann-tsuí ,
Kong iāng pô-á kài kóo-tsui .
Līng-guā tsi̍t-koh sang-kha kuī ,
Pau-kong kuī teh tshiánn ngóo-luî .
|
也有 一陣 小 老爹 ，
樑傘 紙糊 双手 夯 ，
一个 牽馬 頭前 倚 ，
紙馬 跑去 真正 邪 。
|
Iā-ū tsi̍t-tīn sió lāu-iâ ,
Niû-suànn tsuá-kôo sang-tshiú gia̍h ,
Tsi̍t-ê khan-bé thâu-tsîng khiā ,
Tsuá-bé pháu-khì tsin-tsiànn siâ .
|
一陣 昭君 去 和蕃 ，
尫某 分開 未 双全 ，
奸臣 陷害 真 不愿 ，
財散 人亡 未 團圓 。
|
Tsi̍t-tīn Tsiau-kun khì hô-huan ,
Ang-bóo pun-khui buē sang-tsuân ,
Kan-sîn hām-hāi tsin m̄-guān ,
Tsâi-sàn lîn-bông buē thuân-guân .
|
一出 雪梅 訓 商 路 ，
不听 教示 氣 歸埔 ，
甘愿 守節 忍 干苦 ，
商 路 進仲 有 功勞 。
|
Tsi̍t-tshut Suat-muî hùn Siong Lōo ,
M̄-thiann kà-sī khì kui-poo ,
Kam-gaūn siú-tsiat lím kan-khóo ,
Siong Lōo tsìn-tiòng ū kong-lôo .
|
鬧熱 一郡 過 一郡 ，
看 甲 大家 鬧紛紛 ，
陣頭 迎 透 總 休困 ，
海邊 水清 天 無雲 。
|
Lāu-lia̍t tsi̍t-kûn kè tsi̍t-kûn ,
Khuànn kah ta̍k-ke lāu-hun-hun ,
Tīn-thâu ngiâ thàu tsóng hioh-khùn ,
Hái-pinn tsuí-tshing thinn bô-hûn .
|
海乾 草茅 灯火 光 ，
一頂 古早 舊 眠床 ，
散赤 家庭 無 拼斷 ，
一个 老人 困 中央 。
|
Hái-kînn tsháu-mâu ting-hé kng ,
Tsi̍t-tíng kóo-tsá kū bîn-tshn̂g ,
Sàn-tshiah ka-tîng bô piànn-tn̄g ,
Tsi̍t-ê lāu-lâng khùn tiong-ng .
|
一領 蚊罩 破裂裂 ，
未輸 和尚 的 加裟 ，
一个 囝仔 箸 內底 ，
內面 干乾 因 二个 。
|
Tsi̍t-niá báng-tàu phuà-le-le ,
Buē-su hê-siūnn ê ka-se ,
Tsi̍t-ê gín-á tī lāi-té ,
Lāi-bīn kan-ta in nn̄g-ê .
|
這个 少女 十三歲 ，
海乾 倚 起 散赤 家 ，
奉待 因 母 身邊 坐 ，
第一 可憐 伊 一个 。
|
Tsit-ê siàu-lú tsa̍p-sann-hè ,
Hái-kînn khiā khí sàn-tshiah ke ,
Hōng-thāi in bú sin-pinn tsē ,
Tuē-it khónn-lîn i tsi̍t-ê .
|
對 因 老母 真 有孝 ，
小漢 有孝 是 真賢 ，
[亻+ 因 因] 母 病 重 不敢 哮 ，
每日 煩惱 頭 交交 。
|
Tuì in lāu-bú tsin iú-hàu ,
Suè-hàn iú-hàu sī tsin-gâu ,
In bú pīnn tāng m̄-kánn háu ,
Muí-li̍t huân-ló thâu kau-kau .
|
金快 煩惱 無 人 知 ，
母 死 葬費 對倒 來 ？
自恨 運命 那 即呆 ！
隨在 天地 去 摧排 。
|
Kim-khuài huân-ló bô lâng tsai ,
Bú sí tsòng-huì tuì-tó lâi ?
Tsū-hūn ūn-miā nà tsiah-phái !
Suî-tsāi thinn-tuē khì tshui-pâi .
|
金快 听見 母 塊 叫 ，
母親 身體 真 艾藕 ，
散赤 錢項 無 塊 借 ，
也是 無錢 通 折藥 。
|
Kim-khuài thiann-kìnn bú teh kiò ,
Bú-tshin sin-thé tsin gāi-giô ,
Sàn-tshiah tsînn-hāng bô tè tsioh ,
Iā-sī bô-tsînn thang thiah-io̍h .
|
無錢 實在 可憐 代 ，
双手 捧茶 面前 來 ，
母親 起來 飲 看覓 ，
不免 怨嘆 想 東西 。
|
Bô-tsînn si̍t-tsāi khónn-lîn tāi ,
Sang-tshiú phâng-tê bīn-tsîng lâi ,
Bú-tshin khí-lâi lim khuànn-bāi ,
M̄-bián uàn-thàn siūnn tang-sai .
|
子 汝 不通 流 目屎 ，
汝 母 未好 通 起來 ，
恁 爹 面前 塊 等待 ，
死了 簡單 共 我 台 。
|
Kiánn lí m̄-thang lâu ba̍k-sái ,
Lí bú buē-hó thang khí--lâi ,
Lín tia bīn-tsîng teh tán-thāi ,
Sí-liáu kán-tan kā guá tâi .
|
阿母 不通 按年 講 ，
醫生 講 汝 命 未亡 ，
卜來 共咱 認真 創 ，
身體 漸漸 的 健康 。
|
A-bú m̄-thang àn-nî kóng ,
I-sing kóng lí miā buē-bông ,
Beh-lâi kā-lán līn-tsin tshòng ,
Sin-thé tsiām-tsiām ē kiān-khong .
|
這是 醫生 塊 安慰 ，
恁 母 若死 子 克開 ，
這拵 強強 卜 斷氣 ，
死了 省人 通 用圍 。
|
Tsé-sī i-sing teh an-uì ,
Lín bú nā-sí kiánn khik-khui ,
Tsit-tsūn kiông-kiông beh tn̄g-khuì ,
Sí-liáu siânn-lâng thang îng-uî .
|
金快 汝着 斟酌聽 ，
大概 這拵 敢的 行 ，
若是 三長四短命 ，
未 得 葬身 尋 官廳 。
|
Kim-khuài lí-tio̍h tsim-tsiok-thiann ,
Tāi-khài tsit-tsūn kánn-ē kiânn ,
Nā-sī sann-tn̂g-sì-té-miā ,
Buē tit tsòng-sin tshē kuann-thiann .
|
請 汝 阿母 愛 養 靜 ，
明日 閣再 請 醫生 ，
病體 不通 急 心性 ，
剌激 精神 病 未輕 。
|
Tshiánn lí a-bú ài ióng tsīng ,
Bîn-li̍t koh-tsài tshiánn i-sing ,
Pīnn-thé m̄-thang kip sim-sìng ,
Tshì-kik tsing-sîn pīnn buē-khin .
|
看見 母親 箸塊 吼 ，
閣再 捧茶 乎 潤喉 ，
自 怨 爹親 早年 老 ，
一擔 即來 春 一頭 。
|
Khuànn-kìnn bú-tshin tī-teh háu ,
Koh-tsài phâng-tê hoo lūn-âu ,
Tsū uàn tia-tshin tsá-nî lāu ,
Tsi̍t-tànn tsiah-lâi tshun tsi̍t-thâu .
|
金快 看着 母 面容 ，
心內 就塊 暗 悲傷 ，
隱凍 的 死 是 未養 ，
死了 卜甲 啥參 詳 ___ 。
|
Kim-khuài khuànn-tio̍h bú bīn-iông ,
Sim-lāi tio̍h-teh àm pi-siong ,
Ún-tàng ē sí sī buē-ióng ,
Sí-liáu beh-kah siâng tsham-siông .
|
萬一 老母 那是 死 ，
變成 天滙 的 孤兒 ，
怎樣 生活 个得 去 ，
現時 厝內 無 半糸 。
|
Bān-it lāu-bú nā-sī sí ,
Pìnn-sîng thian-gâi ê koo-lî ,
Tsuánn-iūnn sing-ua̍h ē-tit khì ,
Hiān-sî tshù-lāi bô puànn-si .
|
怨嘆 呆命 目屎 類 ，
看着 母親 塊 安睡 ，
行到 窗邊 喘 大口氣 ，
十三 歲 着 即 克開 。
|
Uàn-thàn phái-miā ba̍k-sái tuī ,
Khuànn-tio̍h bú-tshin teh an-suì ,
Kiânn-kàu thang-pinn tshuán tuā-khuì ,
Tsa̍p-sann hè tio̍h tsiah khik-khui .
|
那 哭 那 塊 拭 目屎 ，
寒風 陣陣 吹 入內 ，
天地 怎樣 來 打派 ，
乎 我 呆命 真 不皆 。
|
Ná khàu ná teh tshit ba̍k-sái ,
Kuânn-hong tsūn-tsūn tshe li̍p-lāi ,
Thinn-tuē tsuánn-iūnn lâi phah-phài ,
Hōo guá phái-miā tsin put-kai .
|
听見 鑼鼓 炮仔聲 ，
鬧熱 不知 怎樣 迎 ，
自 恨 咱是 呆命 子 ，
未得 塊 人 去 府城 。
|
Thiann-kìnn lô-kóo phàu-á-siann ,
Lāu-lia̍t m̄-tsai tsuánn-iūnn ngiâ ,
Tsū hūn lán-sī phái-miā kiánn ,
Buē-tit tè lâng khì Hú-siânn .
|
金快 倚 在 窗仔 前 ，
有 看 人 夯 元宵燈 ，
世間 甲 人 無 比評 ，
爹 死 無 人 通 牽成 。
|
Kim-khuài khiā tsāi thang-á tsîng ,
Ū khuànn lâng gia̍h guân-siau-ting ,
Sè-kan kah lâng bô pí-phīng ,
Tia sí bô lâng thang khan-sîng .
|
想 見 舊年 元宵夜 ，
母親 塊 講 阮 阿爹 ，
在生 甲 人 有 坐倚 ，
也 買 兔灯 予 我 夯 。
|
Siūnn kìnn kū-nî guân-siau-iā ,
Bú-tshin teh kóng gún a-tia ,
Tsāi-sinn kah lâng ū tsē-khiā ,
Iā bué thòo-ting hōo guá gia̍h .
|
食飽  我 到 府城 ，
也是 鑼鼓 炮仔聲 ，
弄龍 弄獅 真 打拼 ，
有 看 元宵 塊 大迎 。
|
Tsia̍h-pá tshuā guá kàu Hú-siânn ,
Iā-sī lô-kóo phàu-á-siann ,
Lāng-lîng lāng-sai tsin phah-piànn ,
Ū khuànn guân-siau teh tuā-ngiâ .
|
不幸 爹親 煞 破病 ，
一年 中間 真正 纏 ，
死了 煞無 通 相見 ，
即个 欠人 靴多 錢 。
|
Put-hīng tia-tshin suah phuà-pīnn ,
Tsi̍t-nî tiong-kan tsin-tsiànn tînn ,
Sí-liáu suah-bô thang sann-kìnn ,
Tsiah-ē khiàm-lâng hiah-tsuē tsînn .
|
環境 迫 到 草茅 帶 ，
洗衫 趁錢 渡 生活 ，
海乾 希微 真 廣闊 ，
渡 苦 日旨 忍耐 拖 。
|
Khuân-kíng pik kàu tsháu-mâu tuà ,
Sué-sann thàn-tsînn tōo sing-ua̍h ,
Hái-kînn hi-bî tsin khòng-khuah ,
Tōo khóo li̍t-tsí lím-nāi thua .
|
母子 拖磨 守 飫寒 ，
因為 爹 死 起 因單 ，
老母 若死 就 無伴 ，
時 到 怎樣 的 收山 ？
|
Bú-kiánn thua-buâ tsiú iau-kuânn ,
In-uī tia sí khí in-tuann ,
Lāu-bú nā-sí tio̍h bô-phuānn ,
Sî kàu tsuánn-iūnn ē siu-suann ?
|
爹 死 母 來 真 危險 ，
現時 病體 真 煩嫌 ，
母親 困 起 嗽 未 沾 ，
吐 出 血痰 真正 粘 。
|
Tia sí bú lâi tsin guî-hiám ,
Hiān-sî pīnn-thé tsin huān-hiâm ,
Bú-tshin khùn khí sàu buē tiām ,
Thòo tshut hui̍h-thâm tsin-tsiànn liâm .
|
金快 大聲 叫 母親 ，
五形 直 脫 煞 失神 ，
若 死 恁 子 煞 無陣 ，
大概 的 害 子 終身 。
|
Kim-khuài tuā-siann kiò bú-tshin ,
Ngóo-hîng ti̍t thuat suah sit-sîn ,
Nā sí lín kiánn suah bô-thīn ,
Tāi-khài ē hāi kiánn tsiong-sin .
|
母親 天國 去 旅行 ，
人 若 死去 不 復生 ，
緊 叫 隔壁 阿賜嬸 ，
共 阮 發落 通 安靈 。
|
Bú-tshin thian-kok khì lí-hîng ,
Lâng nā sí--khì put hiū-sing ,
Kín kiò keh-piah A-sù-tsím ,
Kā gún hua̍t-lo̍h thang an-lîng .
|
安靈 就 皆 創 好細 ，
葬費 看 卜 對 倒 提 ？
煞 請 厝邊 老阿伯 ，
大家 參考 鬪 提携 。
|
An-lîng tio̍h kai tshòng hó-sè ,
Tsòng-huì khuànn beh tuì tó the̍h ?
Suà tshiánn tshù-pinn lāu-a-peh ,
Ta̍k-ke tsham-khónn tàu thê-hê .
|
緊 對 金快 問 看覓 ，
有 省 親成 汝 敢 知 ?
無親 無戚 真正 害 ，
阮厝 不識 人 往來 。
|
Kín tuì Kim-khuài mn̄g khuànn-bāi ,
Ū siánn tshin-tsiânn lí kám tsai ?
Bô-tshin bô-tshik tsin-tsiànn hāi ,
Gún-tshù m̄-pat lâng óng-lâi .
|
正人 即 對 金快 講 ，
共 汝 參詳 是 無皇 ，
汝 來 賣身 共 母 葬 ，
照理 來 行 有 相當 。
|
Tsìng-lâng tsiah tuì Kim-khuài kóng ,
Kā lí tsham-siông sī bû-hông ,
Lí lâi buē-sin kā bú tsòng ,
Tsiàu-lí lâi kiânn ū siong-tong .
|
金快 也是 真 有孝 ，
無 應 干乾 用 朕頭 ，
按年 大家 做 的 到 ，
趕 到 媒人 英官 兜 。
|
Kim-khuài iā-sī tsin iú-hàu ,
Bô ìn kan-ta īng tìm-thâu ,
Àn-nî ta̍k-ke tsuè ē kàu ,
Kuánn kàu hm̂-lâng Ing-kuann tau .
|
英官 媒人 即 講 起 ，
來去 餅店 皆 通知 ，
店內 卜 買 一 女婢 ，
恁 是 愛 卜 外多 錢 。
|
Ing-kuann hm̂-lâng tsiah kóng khí ,
Lâi-khì piánn-tiàm kai thong-ti ,
Tiàm-lāi beh bué tsi̍t lú-pī ,
Lín sī ài beh guā-tsuē tsînn .
|
愛 用 參百 賣 身價 ，
以 外 不免 用 恰加 ，
參百元 銀 做 聘禮 ，
賣身 葬母 伊 一个 。
|
Ài īng sann-pah buē sin-kè ,
Í guā m̄-bián īng khah-ke ,
Sann-pah-khoo gûn tsuè phìng-lé ,
Buē-sin tsòng-bú i tsi̍t-ê .
|
若是 七旬 做 了後 ，
馬上 就卜 去 因兜 ，
不免 予 恁 塊 等候 ，
金快 想着 真 克喉 。
|
Nā-sī tshit-sûn tsuè liáu-āu ,
Má-siōng tio̍h-beh khì in-tau ,
M̄-bián hōo lín teh tán-hāu ,
Kim-khuài siūnn-tio̍h tsin khik-âu .
|
這 是 對 母 行 孝順 ，
有 守 天理 順 五倫 ，
金快 終身 真 怨恨 ，
双親 做 伊 見 閻君 。
|
Tse sī tuì bú hîng hàu-sūn ,
Ū siú thinn-lí sūn ngóo-lûn ,
Kim-khuài tsiong-sin tsin uàn-hūn ,
Sang-tshin tsuè i kìnn Giâm-kun .
|
萬項 都是 人 運命 ，
甲 因 餅店 結 親成 ，
店 箸 餅店 學 做餅 ，
頭家 教示 真 肯 听 。
|
Bān-hāng too-sī lâng ūn-miā ,
Kah in piánn-tiàm kiat tshin-tsiânn ,
Tiàm tī piánn-tiàm o̍h tsuè-piánn ,
Thâu-ke kà-sī tsin khíng thiann .
|
每日 打拼 真 無榮 ，
做事 親像 走馬灯 ，
頭家娘 是 急 心性 ，
對 我 金快 真 無情 。
|
Muí-li̍t phah-phiànn tsin bô-îng ,
Tsuè-sū tshin-tshiūnn tsáu-bé-ting ,
Thâu-ke-niû sī kip sim-sìng ,
Tuì guá Kim-khuài tsin bô-tsîng .
|
二月 初二 透早 時 ，
寒風 吹 着 冷枝枝 ，
金快 皆忌 無 亻細俐 ，
風邪 煞 來 感 入脾 。
|
Lī-ge̍h tshue-lī thàu-tsá sî ,
Kuânn-hong tshe tio̍h líng-ki-ki ,
Kim-khuài ka-kī bô suè-lī ,
Hong-siâ suah lâi kám li̍p-pî .
|
感到 風邪 枯不終 ，
頭家 叫 甲 真 呆雄 ，
親像 雷 陳 大聲 兩 ，
金快 怨嘆 塊 悲傷 。
|
Kám-tio̍h hong-siâ koo-put-tsiong ,
Thâu-ke kiò kah tsin tshinn-hiông ,
Tshin-tshiūnn luî tân tuā-siann lióng ,
Kim-khuài uàn-thàn teh pi-siong .
|
張 桂英 是 頭家娘 ，
店內 全部 伊 主張 ，
野猫 甲人 無 親像 ，
吪聲 未輸 人 開場 。
|
Tiunn Kuì-ing sī thâu-ke-niû ,
Tiàm-lāi tsuân-pōo i tsú-tiunn ,
Iá-bâ kah-lâng bô tshin-tshiūnn ,
Huah-siann buē-su lâng khui-tiûnn .
|
頭家娘 來 開 房門 ，
彼拵 [門@|] 好 天 卜光 ，
叫 伊 金快 煮 早飯 ，
現時 日頭 是 無 長 。
|
Thâu-ke-niû lâi khui pâng-mn̂g ,
Hit-tsūn tú hó thinn beh-kng ,
Kiò i Kim-khuài tsú tsá-pn̄g ,
Hiān-sî li̍t-thâu sī bô tn̂g .
|
金快 听着 開步 走 ，
順手 清茶 捧 一歐 ，
捧來 桂英 房 門 口 ，
接去 隨時 緊 潤喉 。
|
Kim-khuài thiann--tio̍h khui-pōo tsau ,
Sūn-tshiú tshing-tê phâng tsi̍t-au ,
Phâng-lâi Kuì-ing pâng mn̂g kháu ,
Tsi̍h--khì suî-sî kín lūn-âu .
|
飯菜 煮好 排 棹頂 ，
頭家 伸盧 食 大光 ，
金快 做人 大 不幸 ，
衫褲 洗 甲 九 點鐘 。
|
Pn̄g-tshài tsú-hó pâi toh-tíng ,
Thâu-ke sin-lôo tsia̍h tāi-sing ,
Kim-khuài tsuè-lâng tuā put-hīng ,
Sann-khòo sué kah káu tiám-tsing .
|
九點外 鐘 即 食飯 ，
飯菜 親像 卜 臭酸 ，
每日 做 甲 嬰嬰返 ，
關心 做事 真 十全 。
|
Káu-tiám-guā tsing tsiah tsia̍h-pn̄g ,
Pn̄g-tshài tshin-tshiūnn beh tshàu-sng ,
Muí-li̍t tsuè kah inn-inn-tńg ,
Kuan-sim tsuè-sū tsin tsa̍p-tsn̂g .
|
年例 三月 二十三 ，
青菜 洗 甲 歸 大籃 ，
頭家娘 是 湳滲 罵 ，
透早 亂汝 罵 甲 擔 。
|
Nî-lē sann-ge̍h lī-tsa̍p-sann ,
Tshinn-tshài sué kah kui tuā-nâ ,
Thâu-ke-niû sī lām-sám mā ,
Thàu-tsá luān-lû mā kah tann .
|
叫 伊 金快 免 洗菜 ，
去 買 螺肉 廉邊 來 ，
若無 緊來 汝 着 害 ，
慢來 着 的 大聲 哀 。
|
Kiò i Kim-khuài bián sué-tshài ,
Khì bué lê-bah liâm-pinn lâi ,
Nā-bô kín-lâi lí tio̍h hāi ,
Bān-lâi tio̍h ē tuā-siann ai .
|
洗菜 馬上 就 休困 ，
手 提 銀票 五元銀 ，
鬧熱 一陣 過 一拵 ，
迎 甲 歸街 乱紛紛 。
|
Sué-tshài má-siōng tio̍h hioh-khùn ,
Tshiú the̍h gûn-phiò gōo-khoo-gûn ,
Lāu-lia̍t tsi̍t-tsūn kè tsi̍t-tsūn ,
Ngiâ kah kui-kue luān-hun-hun .
|
天上聖母 做 壽誕 ，
陣頭 巧氣 真 賢編 ，
各陣 人氣 壠 照展 ，
媽祖廟 前 全 香煙 。
|
Thian-siōng-sìng-bú tsuè siū-tàn ,
Tīn-thâu khá-khuì tsin gâu-pian ,
Kok-tīn lîn-khì lóng tsiâu-tián ,
Má-tsóo-biō tsîng tsuân hiunn-ian .
|
香煙 鼻着 香銃銃 ，
金快 拼 甲 真 無榮 ，
來 到 這平 大街頂 ，
感刈 店頭 真 大宮 。
|
Hiunn-ian phīnn-tio̍h phang-tshìng-tshìng ,
Kim-khuài phiànn kah tsin bô-îng ,
Lâi kàu tsit-pîng tuā-kue-tíng ,
Kám-kuah tiàm-thâu tsin tuā-king .
|
吪聲 螺肉 買 半打 ，
林 無 銀票 頭 擔擔 ，
店頭 伸盧 噪 甲 罵 ，
卜騙 着 去 拔仔林 。
|
Huah-siann lê-bah bué puànn-tánn ,
Lîm bô gûn-phiò thâu tann-tann ,
Tiàm-thâu sin-lôo tshoh kah mā ,
Beh-phiàn tio̍h khì pua̍t-á-nâ .
|
金快 奉噪 沾靜靜 ，
想着 心肝 足成 迎 ，
省人 也敢 開 心幸 ，
提 我 五元 真 不明 。
|
Kim-khuài hōng-tshoh tiām-tsīng-tsīng ,
Siūnn-tio̍h sim-kuann tsiok-tsiânn gîng ,
Siánn-lâng iā-kánn khui sim-hīng ,
The̍h guá gōo-khoo tsin put-bîng .
|
那行 那尋 嬰嬰返 ，
買 無 不敢 卜 入門 ，
昨日 湯匙 來 打斷 ，
乎 阮 阿娘 打 脚瘡 。
|
Ná-kiânn ná-tshē inn-inn-tńg ,
Bué bô m̄-kánn beh li̍p-mn̂g ,
Tsā-li̍t thng-sî lâi phah-tn̄g ,
Hōo gún a-niâ phah kha-tshng .
|
五元 銀票 煞 打無 ，
想 不敢 返 足 花膏 ，
省人 靴哖 無 公道 ，
害 我 金快 滿街 趖 。
|
Gōo-khoo gûn-phiò suah phàng-bô ,
Siūnn m̄-kánn tńg tsiok hue-ko ,
Siánn-lâng hiah--nî bô kong-tō ,
Hāi guá Kim-khuài muá-kue sô .
|
那 行 那 尋 那 塊 哭 ，
哮 甲 目屎 双港 流 ，
吳 開利 [門@|] 行 來 到 ，
金快 哮 甲 頭 交交 。
|
Ná kiânn ná tshē ná teh khàu ,
Háu kah ba̍k-sái sang-káng lâu ,
Ngôo Khai-lī tú kiânn lâi kàu ,
Kim-khuài háu kah thâu kau-kau .
|
開利 問 伊 哭 省代 ，
查某囝仔 倒位 來 ？
省款 即 替 汝 打派 ，
常細 汝 嗎 講 阮 知 。
|
Khai-lī mn̄g i khàu siánn-tāi ,
Tsa-bóo-gín-á tó-uī lâi ?
Siánn-kuánn tsiah thuè lí phah-phài ,
Siông-sè lí mā kóng gún tsai .
|
有 省麼代 着 緊 講 ，
對 我 來 講 有 相當 ，
有 省 事情 說 冤枉 ，
替 汝 報仇 嗎 無皇 。
|
Ū siánn-mi̍h-tāi tio̍h kín kóng ,
Tuì guá lâi kóng ū siong-tong ,
Ū siánn sū-tsîng seh uan-óng ,
Thuè lí pò-siû mā bû-hông .
|
我 是 姓 陳 名 金環 ，
不是 甲 人 省麼 冤 ，
阮 娘 毒打 真 不愿 ，
想着 心肝 結 歸丸 。
|
Guá sī sìnn Tân miâ Kim-khuân ,
M̄-sī kah lâng siánn-mi̍h uan ,
Gún niâ to̍k-phah tsin m̄-gaūn ,
Siūnn-tio̍h sim-kuann kiat kui-uân .
|
而且 爹親 早 過世 ，
做着 陳家 的 女兒 ，
二三年前 母 煞死 ，
墜落 這款 呆 時機 。
|
Lî-tshiánn tia-tshin tsá kè-sì ,
Tsuè-tio̍h Tân--ka ê lú-lî ,
Nn̄g-sann-nî-tsîng bú suah-sí ,
Tuī-lo̍h tsit-khuán phái sî-ki .
|
因為 賣身 葬 母親 ，
受人 毒打 真 可憐 ，
餅店 做 女間 未 要緊 ，
每每 逆待 起 原因 。
|
In-uī buē-sin tsòng bú-tshin ,
Tsiū-lâng to̍k-phah tsin khónn-lîn ,
Piánn-tiàm tsuè kán buē iàu-kín ,
Muí-muí gi̍k-thāi khí guân-in .
|
賣 伊 做 女間 在 萬泰 ，
若 無 講起 汝 不知 ，
阮 娘 桂英 真 利害 ，
三番 五處 貢 甲 獅 。
|
Buē i tsuè kán tsāi Bān-thài ,
Nā bô kóng-khí lí m̄-tsai ,
Gún niû Kuì-ing tsin lī-hāi ,
Sam-huan ngóo-tshù kòng kah sai .
|
阮 娘 叫 我 買 螺肉 ，
行 到 對面 停仔腳 ，
五元 失落 倒一搭 ？
行來 行去 無塊 柴 。
|
Gún niâ kiò guá bué lê-bah ,
Kiânn kàu tuì-bīn tîng-á-kha ,
Gōo-khoo sit-lo̍h tó-tsi̍t-tah ?
Kiânn-lâi kiânn-khì bô-tè tshâ .
|
錢 來 打無 不敢 返 ，
開利 想着 心頭 酸 ，
林起 五元 即 皆勸 ，
去 買 螺肉 通 入門 。
|
Tsînn lâi phàng-bô m̄-kánn tńg ,
Khai-lī siūnn-tio̍h sim-thâu sng ,
Lîm-khí gōo-khoo tsiah kai-khǹg ,
Khì bué lê-bah thang li̍p-mn̂g .
|
金快 接錢 金金看 ，
世上 都有 好心肝 ，
共 伊 接錢 卜 按盞 ，
目屍 流出 那 水泉 。
|
Kim-khuài tsi̍h-tsînn kim-kim-khuànn ,
Sè-siōng too-ū hó-sim-kuann ,
Kā i tsi̍h-tsînn beh àn-tsuánn ,
Ba̍k-sái lâu-tshut ná tsuí-tsuânn .
|
後日 想 卜 答謝 伊 ，
哮 甲 目眶 紅枝枝 ，
先生 貴姓 省 名字 ，
多謝 助 我 即 多錢 。
|
Āu-li̍t siūnn beh tap-siā i ,
Háu kah ba̍k-khoo âng-kì-kì ,
Sian-sinn kuì-sìnn siánn miâ-lī ,
To-siā tsōo guá tsiah tsuē-tsînn .
|
我 的 名姓 不免 問 ，
平平 台南 的 地方 ，
後 日 有時 行 相斷 ，
緊 買 螺肉 通 入門 。
|
Guá ê miâ-sìnn m̄-bián mn̄g ,
Pînn-pînn Tâi-lâm ê tuē-hng ,
Āu li̍t ū-sî kiânn sann-tn̄g ,
Kín bué lê-bah thang li̍p-mn̂g .
|
螺肉 買 好 緊 併返 ，
双腳 行 到 廳 中央 ，
桂英 野猫 走 來 問 ，
買 甲 靴久 即 入門 。
|
Lê-bah bué hó kín piànn-tńg ,
Sang-kha kiânn kàu thiann tiong-ng ,
Kuì-ing iá-bâ tsáu lâi mn̄g ,
Bué kah hiah1-kú tsiah li̍p-mn̂g .
|
桂英 着是 笑面虎 ，
一个 生 做 真 大嵙 ，
萬泰 餅店 頭家某 ，
差 女間 使 兒 箱 過 蘇 。
|
Kuì-ing tio̍h-sī tshiò-bīn-hóo ,
Tsi̍t-ê sinn tsuè tsin tuā-khoo ,
Bān-thài piánn-tiàm thâu-ke-bóo ,
Tshe kán sái lî siunn kè soo .
|
金快 罐頭 買 來 到 ，
野猫 腳 精 甲 拳頭 ，
爭着 金快 加隻 後 ，
打 甲 倒落 土腳兜 。
|
Kim-khuài kuàn-thâu bué lâi kàu ,
Iá-bâ kha tsinn kah kûn-thâu ,
Tsinn-tio̍h Kim-khuài ka-tsiah āu ,
Phah kah tó-lo̍h thôo-kha-tau .
|
土腳 扒起 哭 那 行 ，
乎 伊 打 甲 真 青京 ，
金快 腦海 浮 人影 ，
彼个 恩人 省麼 名 。
|
Thôo-kha peh-khí khàu ná kiânn ,
Hōo i phah kah tsin tshinn-kiann ,
Kim-khuài náu-hái phû lâng-iánn ,
Hit-ê un-lîn siánn-mi̍h miâ .
|
餅店 經過 三年 苦 ，
肥白 美貌 真 大嵙 ，
變成 一个 美 查某 ，
店內 出 有 怣 紳爐 。
|
Piánn-tiàm king-kè sann-nî khóo ,
Puî-pe̍h bí-bāu tsin tuā-khoo ,
Pìnn-sîng tsi̍t-ê suí tsa-bóo ,
Tiàm-lāi tshut ū gōng sin-lôo .
|
紳爐 叫 做 林 阿榮 ，
忠厚 變 做 無 正經 ，
煞 變 一个 真 手銃 ，
看着 金快 活能能 。
|
Sin-lôo kiò tsuè Lîm A-îng ,
Tiong-hōo pìnn tsuè bô tsìng-king ,
Suah pìnn tsi̍t-ê tsin tshiú-tshìng ,
Khuànn-tio̍h Kim-khuài ua̍h-lîng-lîng .
|
每回 都 卜 皆 喜弄 ，
金快 叫 伊 先 不通 ，
阮 娘 知影 無 穩凍 ，
打人 親像 塊 跳銅 。
|
Muí-huê too beh kai hí-lāng ,
Kim-khuài kiò i sian m̄-thang ,
Gún niâ tsai-iánn bô ún-tàng ,
Phah--lâng tshin-tshiūnn teh thiàu-tâng .
|
金快 五點 就 起床 ，
彼拵 着是 天 卜 光 ，
着 緊 洗米 煮 早飯 ，
阿榮 準備 開 店門 。
|
Kim-khuài gōo-tiám tio̍h khí-tshn̂g ,
Hit-tsūn tio̍h-sī thinn beh kng ,
Tio̍h kín sué-bí tsú tsá-pn̄g ,
A-îng tsún-pī khui tiàm-mn̂g .
|
阿榮 看着 金快 美 ，
生成 凸皮 真 古錐 ，
可惜 一人 困 一位 ，
着 用 怎樣 來 用圍 ？
|
A-îng khuànn-tio̍h Kim-khuài suí ,
Sinn-sîng phòng-phê tsin kóo-tsui ,
Khónn-sioh tsi̍t-lâng khùn tsi̍t-uī ,
Tio̍h īng tsuánn-iūnn lâi îng-uî ?
|
空顛 紳炉 歲 十九 ，
精神 不 時 乱抄抄 ，
愛 卜 金快 做 家後 ，
每擺 都卜 做 對頭 。
|
Khong-tian sin-lôo hè tsa̍p-káu ,
Tsing-sîn put sî luān-tshau-tshau ,
Ài beh Kim-khuài tsuè ke-āu ,
Muí-pái too-beh tsuè tuì-thâu .
|
透早 起來 無 別代 ，
行 瓦 身邊 湳滲 來 ，
阿榮 不通 來 相害 ，
不通 乱講 說 東西 。
|
Thàu-tsá khí--âi bô pa̍t-tāi ,
Kiânn uá sin-pinn lām-sám lâi ,
A-îng m̄-thang lâi siong-hāi ,
M̄-thang luān-kóng seh tang-sai .
|
汝 是 無尫 我 無某 ，
汝 是 女間婢 我 紳爐 ，
不免 箸塊 分 步數 ，
双人 做陣 上 對都 。
|
Lí sī bô-ang guá bô-bóo ,
Lí sī kán-pī guá sin-lôo ,
M̄-bián tī-teh hun pōo-sòo ,
Sang-lâng tsuè-tīn siōng tuì-too .
|
阿榮 汝 着 同情 我 ，
阮 是 呆命 渡 生活 ，
代志 不通 做 靴大 ，
怣話 勿 說 歸 大拖 。
|
A-îng lí tio̍h tông-tsîng guá ,
Gún sī phái-miā tōo sing-ua̍h ,
Tāi-tsì m̄-thang tsuè hiah-tuā ,
Gōng-uē mài seh kui tuā-thua .
|
未 建 未 肖 高高纏 ，
未 輸 狂狗 塊 哮口英 。
金快 氣 甲 面變變 ，
汝 是 三八 半頭青 。
|
Buē kiàn buē siàu kô-kô-tînn ,
Buē su kông-káu teh háu-hinn .
Kim-khuài khì kah bīn-pìnn-pìnn ,
Lí sī sam-pat puànn-thâu-tshin .
|
金快 不通 共 阮 罵 ，
今年 春頭 想 到 擔 ，
汝 那 不肯 我 是 敢 ，
我 若 受氣 貢破硿 。
|
Kim-khuài m̄-thang kā gún mā ,
Kin-nî tshun-thâu siūnn kàu tann ,
Lí nā m̄-khíng guá sī kánn ,
Guá nā siū-khì kòng-phuà-khann .
|
看着 阿榮 有 忠厚 ，
萬泰 餅店 做 [ 薪勞 紳爐] ，
十九 也是 未 娶某 ，
做 事 也是 未 湖 圖 。
|
Khuànn-tio̍h A-îng ū tiong-hōo ,
Bān-thài piánn-tiàm tsuè sin-lôo ,
Tsa̍p-káu iah-sī bē tshuā-bóo ,
Tsuè sū iā-sī buē hôo tôo .
|
救 我 金快 的 恩人 ，
頭尾 來 算 過 三冬 ，
這款 親像 那 眠夢 ，
甲 伊 阿榮 成 相同 。
|
Kiù guá Kim-khuài ê un-lâng ,
Thâu-bé lâi sǹg kè sann-tang ,
Tsit-kuánn tshin-tshiūnn ná bîn-bāng ,
Kah i A-îng tsiânn sann-kâng .
|
每 日 打併 煮 三噹 ，
煮熟 衫褲 捧 出門 ，
做 甲 無榮 嬰嬰返 ，
脚手 骨頭 真正 酸 。
|
Muí li̍t phah-phiànn tsú sann-tǹg ,
Tsú-si̍k sann-khòo phâng tshut-mn̂g ,
Tsuè kah bô-îng inn-inn-tńg ,
Kha-tshiú kut-thâu tsin-tsiànn sng .
|
這項 做煞 做 別欵 ，
桂英 野猫 極 多端 ，
阿榮 看着 大 不愿 ，
萬泰 頭家 真 限宣 。
|
Tsit-hāng tsuè-suah tsuè pa̍t-khuán ,
Kuì-ing iá-bâ ki̍k to-tuan ,
A-îng khuànn-tio̍h tuā m̄-gaūn ,
Bān-thài thâu-ke tsin hân-suan .
|
限宣 的 人 足 痛某 ，
因 某 吪聲 京 歸埔 ，
京某 也卜 做 頭路 ，
通街 罵 伊 是 某奴 。
|
Hân-suann ê lâng tsiok thiànn-bóo ,
In bóo huah-siann kiann kui-poo ,
Kiann-bóo iā-beh tsuè thâu-lōo ,
Thong-kue mā i sī bóo-lôo .
|
阿榮 金快 煞 甲意 ，
有時 相看 笑微微 ，
少年人 是 無 細利 ，
桂英 野猫 煞 嫌疑 。
|
A-îng Kim-khuài suah kah-ì ,
Ū-sî sann-khuànn tshiò-bi-bi ,
Siàu-liân-lâng sī bô suè-lī ,
Kuì-ing iá-bâ suah hiâm-gî .
|
看着 野猫 箸塊 來 ，
阿榮 伊 也 假 不知 ，
假意 便所 去 消改 ，
看見 野猫 塊皆 獅 。
|
Khuànn-tio̍h iá-bâ tī-teh lâi ,
A-îng i iā ké m̄-tsai ,
Ké-ì piān-sóo khì siau-kái ,
Khuànn-kìnn iá-bâ teh-kai sai .
|
出手 獅了 即 加 問 ，
阿榮 甲 汝 歸 瞑方 ，
什麼 時拵 甲 汝 損 ，
甜粿 發粿 吹 幾竹成 。
|
Tshut-tshiú sai-liáu tsiah ka mn̄g ,
A-îng kah lí kui mî-hng ,
Siánn-mi̍h sî-tsūn kah lí sńg ,
Tinn-kué huat-kué tshe kuí-sn̂g .
|
金快 真正 好 大膽 ，
十六 春 頭 猫 甲 担 ，
恁 阿娘 是 無愛 罵 ，
偷食 閣再 想 卜 兼 。
|
Kim-khuài tsin-tsiànn hó tuā-tánn ,
Tsa̍p-la̍k tshun thâu niau kah tann ,
Lín a-niâ sī bô-ài mā ,
Thau-tsia̍h koh-tsài siūnn beh kiam .
|
阿娘 我 是 無 做呆 ，
若有 甘愿 乎 汝 刣 ，
不信 阿榮 問 看覓 ，
人 伊 不敢 湳滲 來 。
|
A-niâ guá sī bô tsuè-phái ,
Nā-ū kam-gaūn hōo lí thâi ,
M̄-sìn A-îng mn̄g khuànn-bāi ,
Lâng i m̄-kánn lām-sám lâi .
|
頭家娘 塊 叫 阿榮 ，
少年 做事 無 正經 ，
近來 學 了 真 手銃 ，
二个 情話 講 無 停 。
|
Thâu-ke-niû teh kiò A-îng ,
Siàu-liân tsuè-sū bô tsìng-king ,
Kūn-lâi o̍h liáu tsin tshiú-tshìng ,
Nn̄g-ê tsîng-uē kóng bô thîng .
|
頭家娘 塊 講 怣話 ，
替人 做事 省 問題 ，
見面 汝 着 乱乱蕊 ，
無諒 着病 汝 真袞 。
|
Thâu-ke-niû teh kóng gōng-uē ,
Thuè-lâng tsuè-sū siánn būn-tuê ,
Kìnn-bīn lí tio̍h luān-luān-lué ,
Bô-liōng tio̍h-pīnn lí tsin-sue .
|
有時 替 伊 去 擔水 ，
不是 二个 塊 做堆 ，
棟 做 若 來 做 瘦口氣 ，
看着 汝 的 目吐蕾 。
|
Ū-sî thuè i khì tann-tsuí ,
M̄-sī nn̄g-ê teh tsuè-tui ,
Tòng tsuè nā lâi tsuè sán-khuì ,
Khuànn-tio̍h lí ē ba̍k-thóo-luî .
|
替 伊 做事 是 怎樣 ？
帶念 你 是 頭家娘 ，
若無 汝着 呆 看相 ，
不京 天公 恁 姓張 。
|
Thuè i tsuè-sū sī tsuánn-iūnn ?
Tài-liām lí sī thâu-ke-niû ,
Nā-bô lí-tio̍h phái khuànn-siùnn ,
M̄-kiann thinn-kong lín sìnn-tiunn .
|
這款 無量 的 野猫 ，
有錢 汝着 靴年蚋 ，
不 甲 恁 帶 換 別塔 ，
卜看 恁 死 無 棺柴 。
|
Tsit-khuán bô-liōng ê iá-bâ ,
Ū-tsînn lí-tio̍h hiah--nî-la ,
M̄ kah lín tuà uānn pa̍t-tah ,
Beh-khuànn lín sí bô kuann-tshâ .
|
阿榮 無愛 店 這間 ，
死無人哭 真 鵠形 ，
野猫 無塊 通 比評 ，
頭路 辭了 就 起程 。
|
A-îng bô-ài tiàm tsit-king ,
Sí-bô-lâng-khàu tsin khok-hîng ,
Iá-bâ bô-tè thang pí-phīng ,
Thâu-lōo sî-liáu tio̍h khí-thîng .
|
阿榮 無 帶 去 了後 ，
一去 全然 無 回頭 ，
金快 暗中 想 着 哭 ，
悲哀 目屎 津津流 。
|
A-îng bô tuà khì liáu-āu ,
Tsi̍t-khì tsuân-liân bô huê-thâu ,
Kim-khuài àm-tiong siūnn tio̍h khàu ,
Pi-ai ba̍k-sái tin-tin-lâu .
|
桂英 受氣 閣再 打 ，
頭粽 坵 來 土腳 踏 ，
想 起 呆命 醉 甲 飽 ，
這款 惡毒 食 末 乾 。
|
Kuì-ing tsiū-khì koh-tsài phah ,
Thâu-tsang khiú lâi thôo-kha ta̍h ,
Siūnn khí phái-miā tsuì kah pá ,
Tsit-khuán ok-to̍k tsia̍h buē ta .
|
金快 跪 在 土腳兜 ，
哮 甲 目屎 双港流 ，
成家 頭家 行來到 ，
哀救 乙直 皆 朕頭 。
|
Kim-khuài kuī tsāi thôo-kha-tau ,
Háu kah ba̍k-sái sang-káng-lâu ,
Sîng-ka thâu-ke kiânn-lâi-kàu ,
Ai-kiû it-ti̍t kai tìm-thâu .
|
成家 叫 伊 扒起來 ___ ，
不免 跪 塊 哭 悲哀 ，
金 快 起來 拭 目屎 ，
怨嘆 運命 醋 催排 。
|
Sîng-ka kiò i peh--khí--lâi . ,
M̄-bián kuī teh khàu pi-ai ,
Kim khuài khí-lâi tshit ba̍k-sái ,
Uàn-thàn ūn-miā tshòo tshui-pâi .
|
阿榮 辭職 去 了後 ，
桂英 計測 在 心頭 ，
看着 喜官 媒人 到 ，
緊請 媒人 入 因兜 。
|
A-îng sî-tsit khì liáu-āu ,
Kuì-ing kè-tshik tsāi sim-thâu ,
Khuànn-tio̍h Hí-kuann hm̂-lâng kàu ,
Kín-tshiánn hm̂-lâng li̍p in-tau .
|
就 共 喜官 說 下項 ，
卜 來 勞動 汝 的 工 ，
金快 大漢 真 丿送 ，
拜託 共 阮 做 媒人 。
|
Tio̍h kā Hí-kuann seh ē-hāng ,
Beh lâi lôo-tōng lí ê kang ,
Kim-khuài tuā-hàn tsin phiat-sàng ,
Pài-thok kā gún tsuè hm̂-lâng .
|
金快 賢 唱 歌仔調 ，
體格 生成 真 妖嬌 ，
無論 卜 唱 什麼 調 ，
實在 會 唱 無 校邵 。
|
Kim-khuài gâu tshiùnn kua-á-tiāu ,
Thé-keh sinn-tsiânn tsin iau-kiau ,
Bô-lūn beh tshiùnn siánn-mi̍h tiāu ,
Si̍t-tsāi ē tshiùnn bô hau-siâu .
|
媒人 相辭 就 起程 ，
行到 新町 查某間 ，
喜官 心內 有 認定 ，
南花樓 是 穩凍 成 。
|
Hm̂-lâng sann-sî tio̍h khí-thîng ,
Kiânn-kàu Sin-ting tsa-bóo-king ,
Hí-kuann sim-lāi ū līn-tīng ,
Lâm-hua-lâu sī ún-tàng sîng .
|
南花樓 的 老頭家 ，
塊 叫 喜官 伊 一个 ，
對 伊 媒人 真 有禮 ，
內面 請烟 甲 請茶 。
|
Lâm-hua-lâu ê lāu-thâu-ke ,
Teh kiò Hí-kuann i tsi̍t-ê ,
Tuì i hm̂-lâng tsin ū-lé ,
Lāi-bīn tshiánn-hun kah tshiánn-tê .
|
喜官 即 對 頭家 講 ，
媒人 我 做 是 無皇 ，
餅店 一个 真 套棟 ，
肉菜 肥白 有 相當 。
|
Hí-kuann tsiah tuì thâu-ke kóng ,
Hm̂-lâng guá tshuè sī bû-hông ,
Piánn-tiàm tsi̍t-ê tsin thò-tòng ,
Bah-tshài puî-pe̍h ū siong-tong .
|
今年 着 是 十六 歲 ，
體格 妖嬌 面肉 白 ，
而且 不 高 甲 不 下 ，
歲頭 [門@|] 好 無 恰加 。
|
Kin-nî tio̍h sī tsa̍p-la̍k hè ,
Thé-keh iau-kiau bīn-bah pe̍h ,
Lî-tshiánn bô kuân kah bô kē ,
Hè-thâu tú- hó bô khah-ke .
|
紅綢 老葱 卜 去看 ，
等 我 招 阮 阿菊官 。
三个 那 行 那 做伴 ，
行 來 到位 即 落讕。 |
Âng-tiû lāu-tshnag1 beh khì-khuànn ,
Tán guá tsio gún A-kiok-kuann .
Sann-ê ná kiânn ná tsuè-phuānn ,
Kiânn lâi kàu-uī tsiah lo̍h-nuā |
媒人 相娶 到 店口 ，
餅店 頭家 皆 朕頭 ，
桂英 退 來 倚 櫃後 ，
就 叫 金快 出來 包 。
|
Hm̂-lâng sann-tshuā kàu tiàm-kháu ,
Piánn-tiàm thâu-ke kai tìm-thâu ,
Kuì-ing thè lâi khiā kuī-āu ,
Tio̍h kiò Kim-khuài tshut-lâi pau .
|
三位 人客 人 買餅 ，
叫 汝 出來 着 緊行 ，
出來 店口 隨 知影 。
心內 疑問 煞 着京 。
|
Sann-uī lâng-kheh beh bué-piánn ,
Kiò lí tshut--lâi tio̍h kín-kiânn ,
Tshut--lâi tiàm-kháu suî tsai-iánn .
Sim-lāi gî-būn suah tio̍h-kiann .
|
紅綢 對 伊 金金看 ，
看煞 即塊 來 落爛 ，
查某囝仔 京 按盞 ？
親像 那塊 起 慰寒 。
|
Âng-tiû tuì i kim-kim-khuànn ,
Khuànn-suah tsiah-teh lâi lo̍h-nuā ,
Tsa-bóo-gín-á kiann àn-tsuánn ?
Tshin-tshiūnn ná-teh khí uì-kuânn .
|
三个 出 店口 去 ，
那 講 那 行 笑微微 ，
若是 這个 有 甲意 ，
看 伊 卜碟 外多 錢 。
|
Sann-ê tshuā tshut tiàm-kháu khì ,
Ná kóng ná kiânn tshiò-bi-bi ,
Nā-sī tsit-ê ū kah-ì ,
Khuànn i beh-ti̍h guā-tsuē tsînn .
|
喜官 即來 問 桂英 ，
兩方 參詳 真多 程 ，
愛 卜 外多 汝 即 肯 ？
卜 碟 七佰 也 一千 ？
|
Hí-kuann tsiah-lâi mn̄g Kuì-ing ,
Lióng-hong tsham-siông tsin-tsuē thîng ,
Ài beh guā-tsuē lí tsiah khíng ?
Beh ti̍h tshit-pah iah tsi̍t-tshing ?
|
一千 全對 不免 講 ，
七佰 身價 有 相當 ，
兩方 引準 擔 套棟 ，
好勢 媒人 免閣 藏 。
|
Tsi̍t-tshing tsua̍t-tuì m̄-bián kóng ,
Tshit-pah sin-kè ū siong-tong ,
Lióng-hong ín-tsún tann thò-tòng ,
Hó-sè hm̂-lâng bián-koh tsông .
|
兩方 大家 講 好細 ，
七佰 馬上 就 現提 ，
五十 送 汝 媒人 禮 ，
明日 來 娶 無 問題 。
|
Lióng-hong ta̍k-ke kóng hó-sè ,
Tshit-pah má-siōng tio̍h hiān-the̍h ,
Gōo-tsa̍p sàng lí hm̂-lâng lé ,
Bîn-li̍t lâi tshuā bô būn-tê .
|
桂英 對 伊 金快 說 ，
紅綢 予 汝 做 乾家 ，
三層大樓 真 好勢 ，
汝 免 煮飯 甲 煎茶 。
|
Kuì-ing tuì i Kim-khuài sueh ,
Âng-tiû hōo lí tsuè ta-ke ,
Sann-tsàn-tuā-lâu tsin hó-sè ,
Lí bián tsú-pn̄g kah tsuann-tê .
|
金快 心內 知影 害 ，
哭 死 爹娘 嗎 不知 ，
墜落 黑暗 烟花界 。
過 無 外久 喜官 來 。
|
Kim-khuài sim-lāi tsai-iánn hāi ,
Khàu sí tia-niû mā m̄-tsai ,
Tuī-lo̍h oo-àm ian-hua-kài .
Kè bô guā-kú Hí-kuann lâi .
|
喜官 娶 伊 坐 上車 ，
有 帶 桃花 真正 邪 ，
乎 伊 甲人 有 坐倚 ，
穿 甲 歸身 夯夯夯 。
|
Hí-kuann tshuā i tsē tsiūnn-tshia ,
Ū tài thô-hue tsin-tsiànn siâ ,
Hōo i kah-lâng ū tsē-khiā ,
Tshīng kah kui-sin giâ-giâ-giâ .
|
到位 紅綢 真 欣喜 ，
就 叫 點心 來 止飢 ，
捧 起來 食 免 細俐 ，
媒人 卜 返 即 相辭 。
|
Kàu-uī Âng-tiû tsin huann-hí ,
Tio̍h kiò tiám-sim lâi tsí-ki ,
Phâng khí--lâi tsia̍h bián suè-lī ,
Hm̂-lâng beh tńg tsiah sann-sî .
|
金快 汝 是 免 客氣 ，
有 省 事情 叫 阿姨 ，
阿梅 汝 着 叫 阿姊 ，
和好 不通 來 相欺 。
|
Kim-khuài lí sī bián kheh-khì ,
Ū siánn sū-tsîng kiò a-î ,
A-muî lí tio̍h kiò a-tsí ,
Hô-hó m̄-thang lâi sann-khi .
|
問 汝 梅姐 帶 外久 ，
這間 怎樣 即 工夫 ？
查某 即 多 塊 居住 ，
未 輸 庄中 福德祠 。
|
Mn̄g lí Muî-tsé tuà guā-kú ,
Tsit-king tsuánn-iūnn tsiah kang-hu ?
Tsa-bóo tsiah tsuē teh ki-tsū ,
Buē su tsng-tiong Hok-tik-sû .
|
這間 不是 福德祠 ，
南北樓 的 貸座敷 ，
店這 不比 在 咱厝 ，
不是 自由 的 身軀 。
|
Tsit-king m̄-sī Hok-tik-sû ,
Lâm-pak-lâu ê tāi-tsē-hu ,
Tiàm-tsia put-pí tsāi lán-tshù ,
M̄-sī tsū-iû ê sin-khu .
|
貸座敷 名 萬花樓 ，
好呆 人客 嗎着 交 ，
無論 少年 也是 老 ，
有錢 來 開 困 同頭 。
|
Tāi-tsē-hu miâ Bān-hua-lâu ,
Hó-phái lâng-kheh mā-tio̍h kau ,
Bô-lūn siàu-liân iah-sī lāu ,
Ū-tsînn lâi khai khùn kâng-thâu .
|
金快 想着 真 有口氣 ，
運命 支配 真 克開 ，
怎樣 着愛 粧 美美 ，
想着 心肝 結 歸雷 。
|
Kim-khuài siūnn-tio̍h tsin ū-khuì ,
Ūn-miā tsi-phuè tsin khik-khui ,
Tsuánn-iūnn tio̍h-ài tsng suí-suí ,
Siūnn-tio̍h sim-kuann kiat kui-luî .
|
阿梅 叫 伊 免 憂容 ，
恨 咱 的 命 孤不終 。
烟花  迌 界 樂暢 ，
又 閣 有錢 通 好長 。
|
A-muî kiò i bián iu-iông ,
Hūn lán ê miā koo-put-tsiong .
Ian-hua thit-thô kài lo̍k-thiòng ,
Iū koh hū-tsînn thang hó-tiōng .
|
金快 想着 喉 就鄭 ，
呆命 經過 靴 多年 ，
為着 黃金 致 重病 ，
世間 萬惡 是 金錢 。
|
Kim-khuài siūnn-tio̍h âu tio̍h-tīnn ,
Phái-miā king-kè hiah tsuē-nî ,
Uī-tio̍h n̂g-kim tì tāng-pīnn ,
Sè-kan bān-ok sī kim-tsînn .
|
不免 出力 有 錢 趁 ，
恰嬴 農夫 塊 做田 ，
趁食 一款 的 增產 ，
又閣 樂暢 甲 清榮 。
|
M̄-bián tshut-la̍t ū tsînn thàn ,
Khah-iânn lông-hu teh tsuè-tshân ,
Thàn-tsia̍h kāng-khuán ē tsing-sán ,
Iū-koh lo̍k-thiòng kah tshing-hân .
|
紅綢 叫 伊 學 藝旦 ，
樂器 賢 挨 甲 的 彈 ，
學 曲 真巧 未 貪彈 ，
有 學 關公 困 土山 。
|
Âng-tiû kiò i o̍h gē-tuànn ,
Ga̍k-khì gâu ue kah ē tuânn ,
O̍h khik tsin-khiáu buē pîn-tuānn ,
Ū o̍h Kuan-kong khùn thôo-suann .
|
四郎 探母 外江 有 ，
也 學 一抱 吊 金亀 ，
雪梅 思君 學 恰久 ，
孔明 借 箭 做 秩序 。
|
Sù-lông thàm-bú guā-kang ū ,
Iā o̍h tsi̍t-phō tiàu kim-ku ,
Suat-muî su-kun o̍h khah-kú ,
Kóng-bîng tsioh tsìnn tsuè tia̍t-sū .
|
一塊 紹蟬 弄 董 卓 ，
鳳鶴樓 是 足 呆 學 ，
店內 正人 都 呵咾 ，
聰明 玲利 尋 都 無 。
|
Tsi̍t-tè Tiau-siâm lāng Táng Toh ,
Hông-ho̍h-lâu sī tsiok phái o̍h ,
Tiàm-lāi tsìng-lâng too o-ló ,
Tshong-bîng líng-lī tshē too bô .
|
人客 折曲 真 銃永 ，
有 折 銃殺 岩 瑞生 ，
家伙 開 了 無通 用 ，
謀殺 藝旦 名 戀英 。
|
Lâng-kheh tiah-khik tsin tshìng-íng ,
Ū tiah tshìng-sat Giâm Suī-sing ,
Ke-hé khai liáu bô-thang īng ,
Bôo-sat gē-tuànn miâ Luân-ing .
|
謀財 害命 有 奇巧 ，
唱了 聲音 真 明寮 ，
也着 閣 學 南管調 ，
人客 即未 看 衰邵 。
|
Bôo-tsâi hāi-miā ū khi-khiau ,
Tshiùnn-liáu siann-im tsin bîng-liâu ,
Iá-tio̍h koh o̍h lâm-kuán-tiāu ,
Lâng-kheh tsiah-buē khuànn sue-siâu .
|
南管 卜 學 真 多欵 ，
絃仔 个 線 吊 恰權 ，
頭塊 着 學 共君斷 ，
二塊 杏元 去 和蕃 。
|
Lâm-kuán beh o̍h tsin tsuē-khuán ,
Hiân-á ê suànn tiàu khah-kuân ,
Thâu-tè tio̍h o̍h kāng-kun-tuān ,
Lī-tè Hīng-guân khì hô-huan .
|
一塊 孔明 祭 七星 ，
板寮 念了 高高 纏 ，
來換 活捉 黑龍院 ，
這塊 卜 學 着 半年 。
|
Tsi̍t-tè Khóng-bîng tsè tshit-tshinn ,
Pán-liâu liām-liáu ko-ko tînn ,
Lâi-uānn ua̍h-lia̍h oo-liông-īnn ,
Tsit-tè beh o̍h tio̍h puànn-nî .
|
南曲 北曲 真 多欵 ，
也 有 關公 過 五關 ，
一抱 漢文 白蛇傳 ，
許仙 被 妖 來 迷戀 。
|
Lâm-khik pak-khik tsin tsuē-khuán ,
Iā ū Kuan-kong kè ngóo-kuan ,
Tsi̍t-phō Hàn-bûn Pi̍k-siâ-tuān ,
Khóo-sian pī iau lâi bê-luân .
|
南北 翹脚 學 真久 ，
金快 聰明 好 工夫 ，
這斬 續落 學 跳舞 ，
未曉 脚瘡 乙直 株 。
|
Lâm-pak khiàu-kha o̍h tsin-kú ,
Kim-khuài tshong-bîng hó kang-hu ,
Tsit-tsām suà-lo̍h o̍h thiàu-bú ,
Buē-hiáu kha-tshng it-ti̍t tu .
|
初回 卜 學 恰 秤彩 ，
相 來 到 跳舞 臺 ，
金快 實在 有 利害 ，
無論 省款 跳 下 來 。
|
Tshoo-huê beh o̍h khah tshìn-tshái ,
Sann tshuā lâi kàu thiàu-bú tâi ,
Kim-khuài si̍t-tsāi ū lī-hāi ,
Bô-lūn siánn-kuánn thiàu ē lâi .
|
西洋 若塊 請 人客 ，
不是 對 咱 請 煙茶 ，
全 用 跳舞 來 交際 ，
無論 紳士 文學家 。
|
Se-iûnn nā-teh tshiánn lâng-kheh ,
M̄-sī tuì lán tshiánn hun-tê ,
Tsuân īng thiàu-bú lâi kau-tsè ,
Bô-lūn sin-sū bûn-ha̍k-ke .
|
跳舞 也 有 脫衣體 ，
二个 抱 塊 隣浪廻 ，
也有 正行 甲 倒退 ，
有 的 塊 跳 單身 个 。
|
Thiàu-bú iā ū thuat-i-thé ,
Nn̄g-ê phō teh lîn-lōng-se̍h ,
Iā-ū tsiànn-kiânn kah tò-thè ,
Ū ê teh thiàu tuann-sin ê .
|
手 對 下腰 塊 加 抱 ，
腳步 也着 踏 甲 和 ，
親像 車鼓 是 無錯 ，
脚瘡 夯 塊 隣浪鵞 。
|
Tshiú tuì ē-io teh ka phō ,
Kha-pōo iā-tio̍h ta̍h kah hô ,
Tshin-tshiūnn tshia-kóo sī bô-tshò ,
Kha-tshng gia̍h teh lîn-lōng-gô .
|
跳 甲 二个 攬 相隨 ，
人客 不甘 來 放開 ，
有 的 跳 甲 嘴[門@|] 嘴 ，
精神 爽快 目 眛眛 。
|
Thiàu kah nn̄g-ê lám sann-suî ,
Lâng-kheh m̄-kam lâi pàng-khui ,
Ū ê thiàu kah tshuì-tú- tshuì ,
Tsing-sîn sóng-khuài ba̍k bui-bui .
|
光陰 如箭 過 一年 ，
夜夜 伴君 過 五更 ，
金 快 想着 喉 就 鄭 ，
夜夜 新郎 在 身邊 。
|
Kong-im lû-tsìnn kè tsi̍t-nî ,
Iā-iā phuānn-kun kè gōo-kinn ,
Kim khuài siūnn--tio̍h âu tio̍h tīnn ,
Iā-iā sin-lông tsāi sin-pinn .
|
自恨 運命 這層 代 。
樓脚 人客 卜 來 開 ，
探頭 著塊 皆 看覓 ，
這位 人客 倒位 來 ？
|
Tsū-hūn ūn-miā tsit-tsân tāi .
Lâu-kha lâng-kheh beh lâi khai ,
Thàm-thâu tī-teh kai khuànn-bāi ,
Tsit-uī lâng-kheh tó-uī lâi ?
|
金快 走 來 卜 請煙 ，
目周 看 甲 無 輪返 ，
明明 熟晒 無 青份 ，
記得 助 阮 好 郎君 。
|
Kim-khuài tsáu lâi beh tshiánn-hun ,
Ba̍k-tsiu khuànn kah bô tńg-lûn ,
Bîng-bîng si̍k-sāi bô tshinn-hūn ,
Kì-tit tsōo gún hó lông-kun .
|
走水 返來 吳 開利 ，
看着 金快 笑微微 ，
心內 那 想 那 甲意 ，
酒菜 注文 無 停 時 。
|
Tsáu-tsuí tńg--lâi Ngôo Khai-lī ,
Khuànn-tio̍h Kim-khuài tshiò-bi-bi ,
Sim-lāi ná siūnn ná kah-ì ,
Tsiú-tshài tsù-bûn bô thîng sî .
|
酒菜 備辨 野 未 好 ，
先 點 烟盤 恰 藕刀 ，
着 唱 貂蟬 弄 董 卓 ，
精神 爽快 着 未 鵞 。
|
Tsiú-tshài pī-pān iá bē hó ,
Sing tiám hun-puânn khah gió-toh ,
Tio̍h tshiùnn Tiau-siâm lāng Táng Toh ,
Tsing-sîn sóng-khuài tio̍h buē gô .
|
酒菜 辦 好 上 餐廳 ，
二个 講話 同陣 行 。
金快 心內 有 岸定 ，
吳先生 汝 什麼 名 ？
|
Tsiú-tshài pān hó tsiūnn tshan-thiann ,
Nn̄g-ê kóng-uē kâng-tīn kiânn .
Kim-khuài sim-lāi ū huānn-tiānn ,
Góo--sian--sinn lí siánn-mi̍h miâ ?
|
問 我 的 名 卜 省代 ，
報 名 報 姓 乎 汝 知 ，
今日 廈門 即 返來 ___ ，
吳 開利 卜 甲 汝 開 。
|
Mn̄g guá ê miâ beh siánn-tāi ,
Pò miâ pò sìnn hōo lí tsai ,
Kim-li̍t Ē-mn̂g tsiah tńg--lâi . ,
Ngôo Khai-lī beh kā lí khai .
|
金快 女士 着 是 汝 ，
兩方 相逢 真正 奇 ，
四年前 有 省 代志 ，
問 我 的 話 真 試宜 。
|
Kim-khuài lú-sū tio̍h sī lí ,
Lióng-hong siong-hông tsin-tsiànn kî ,
Sì-nî-tsîng ū siánn tāi-tsì ,
Mn̄g guá ê uē tsin tshi-gî .
|
四年前 是 十三歲 ，
賣身 葬母 餅店 差 ，
彼拵 無 母 甲 無 父 ，
助 阮 五元 汝 一个 。
|
Sì-nî-tsîng sī tsa̍p-sann-hè ,
Buē-sin tsòng-bú piánn-tiàm tshe ,
Hit-tsūn bô bú kah bô pē ,
Tsōo gún gōo-khoo lí tsi̍t-ê .
|
金快 汝 是 真 有情 ，
以後 定着 來 這間 ，
汝 是 為着 省 環境 ，
來 店 菜店 塊 無榮 。
|
Kim-khuài lí sī tsin ū-tsîng ,
Í-āu tiānn-tio̍h lâi tsit-king ,
Lí sī uī-tio̍h siánn khuân-kíng ,
Lâi tiàm tshài-tiàm teh bô-îng .
|
餅店 野猫 共 我 賣 ，
賣 伊 七佰 代先 提 ，
老葱 來 店 這底 ，
第一 呆命 我 一个 。
|
Piánn-tiàm iá-bâ kā guá buē ,
Buē i tshit-pah tāi-sing thue̍h ,
Lāu-tshang tshuā lâi tiàm tsit-tué ,
Tuē-it phái-miā guá tsi̍t-ê .
|
重重 疊疊 的 呆命 ，
兩个 行 來 到 餐廳 ，
飲酒 摧拳 直透 拼 ，
吪拳 兩方 未 輸嬴 。
|
Tîng-tîng tha̍h-tha̍h ê phái-miā ,
Nn̄g-ê kiânn lâi kàu tshan-thiann ,
Lim-tsiú tshui-kûn ti̍t-thàu phiànn ,
Huah-kûn lióng-hong buē su-iânn .
|
暢飲 酒宴 請 休困 ，
金 快 緊去 提 面巾 ，
四年前 的 好 緣份 ，
等 甲 下方 即 報恩 。
|
Thiòng-ím tsiú-iàn tshiánn hioh-khùn ,
Kim khuài kín-khì the̍h bīn-kun ,
Sì-nî-tsîng ê hó iân-hūn ,
Tán kah ē-hng tsiah pò-un .
|
戀愛 熱度 銃 真高 ，
走 水 往來 數十 番 ，
情份 用刀 切 未 斷 ，
兩方 煞 來 變 迷戀 。
|
Luân-ài lia̍t-tōo tshìng tsin-kuân ,
Tsáu tsuí óng-lâi sòo-tsa̍p huan ,
Tsîng-hūn īng-to tshiat buē tuān ,
Lióng-hong suah lâi pìnn bê-luân .
|
想着 烟花 即 呆命 ，
金快 講 乎 吳送 聽 ，
風流 我 也 不 知影 ，
這條 的 路 不扒 行 。
|
Siūnn-tio̍h ian-hua tsiah phái-miā ,
Kim-khuài kóng hōo Ngóo--sàng thiann ,
Hong-liû guá iā m̄ tsai-iánn ,
Tsit-tiâu ê lōo m̄-pat kiânn .
|
趁食 我 是 無 希望 ，
阮 嗎 想 卜 來 嫁尫 ，
烟花 歸尾 真 悽慘 ，
誤人 前途 歸世人 。
|
Thàn-tsia̍h guá sī bô hi-bāng ,
Gún mā siūnn beh lâi kè-ang ,
Ian-hua kui-hé tsin tshinn-tshám ,
Ngōo-lâng tsiân-tôo kui-sì-lâng .
|
乎 人 騙 入 迷魂陣 ，
父母 早死 真 可憐 ，
想 着 趁食 情 就 盡 ，
呆命 無人 通 牽成 |
Hōo lâng phiàn li̍p bê-hûn-tīn ,
Pē-bú tsá-sí tsin khónn-lîn ,
Siūnn tio̍h thàn-tsia̍h tsîng tio̍h tsīn ,
Phái-miā bô-lâng thang khan-sîng |
就 勸 金快 免 煩惱 ，
開利 替 汝 來 伐落 ，
乎汝 後 ___ 日 有 所 鵠 ，
即來 致蔭 汝 迌 。
|
Tio̍h khǹg Kim-khuài bián huân-ló ,
Khai-lī thuè lí lâi hua̍t-lo̍h ,
Hōo lí āu- li̍t ū sóo khò ,
Tsiah-lâi tì-ìm lí thit-thô .
|
一夜 夫妻 來 打散 ，
吳送 不通 反 心肝 ，
一定 乎 汝 會 完滿 ，
不甘 放束 汝 孤單 。
|
It-iā hu-tshe lâi phah-suànn ,
Ngóo--sàng m̄-thang huán sim-kuann ,
It-tīng hōo lí ē uân-muá ,
M̄-kam pàng-sat lí koo-tuann .
|
看君 卜 返 恁 地界 ，
難分 難離 無人 知 ，
閣 共 吳送 汝 交 帶 ，
期待 成功 回 返來 。
|
Khuànn-kun beh tńg lín tuē-kài ,
Lân-hun lân-lî bô-lâng tsai ,
Koh kā Ngóo--sàng lí kau tāi ,
Kî-thāi sîng-kong huê tńg--lâi .
|
紅綢 老葱 走 來 問 ，
開利 卜 甲 汝 久長 ，
恁 阿姨 是 有 打算 ，
阿姨 不 乎 汝 出門 。
|
Âng-tiû lāu-tshang tsáu lâi mn̄g ,
Khai-lī beh kah lí kú-tn̂g ,
Lín a-î sī ū phah-sǹg ,
A-î m̄ hōo lí tshut-mn̂g .
|
甲 汝 阿姨 用 參詳 ，
好意 汝 也 來 中傷 ，
乎 阮 自由 無路用 ，
老葱 心肝 汝 真雄 。
|
Kah lí a-î īng tsham-siông ,
Hó-ì lí iā lâi tiòng-siong ,
Hōo gún tsū-iû bô-lōo-iōng ,
Lāu-tshang sim-kuann lí tsin-hiông .
|
叫 我 金快 奉 開彩 ，
彼款 的 人 呆 人材 ，
人材 又 閣 生 靴呆 ，
五十外 度 大嵙呆 。
|
Kiò guá Kim-khuài hōng khai-tshái ,
Hit-kuánn ê lâng phái lâng-tsâi ,
Lâng-tsâi iū koh sinn hiah-bái ,
Gōo-tsa̍p-guā tōo tuā-khoo-tai .
|
乎人 開彩 我 不肯 ，
逆待 毒打 共 阮 刑 ，
老葱頭 真 捨四症 ，
叫 人 永遠 落 花間 。
|
Hōo-lâng khai-tshái guá m̄-khíng ,
Gi̍k-thāi to̍k-tánn kā gún hîng ,
Lāu-tshang-thâu tsin sià-sì-tsìng ,
Kiò lâng íng-uán lo̍h hue-king .
|
汝 真 鐵齒 銅 牙嘈 ，
對 恁 阿姨 花膏膏 ，
金快 若無 照 公道 ，
卜 乎 汝 做 乞食婆 。
|
Lí tsin thi̍h-khí tâng gê-tsô ,
Tuì lín a-î hue-ko-ko ,
Kim-khuài nā-bô tsiàu kong-tō ,
Beh hōo lí tsuè khit-tsia̍h-pô .
|
乞食婆 嗎 無 要緊 ，
目弟 即未 奉 看輕 ，
來 甲 乞食 同 做陣 ，
恰 嬴 箸塊 落 花間 。
|
Khit-tsia̍h-pô mā bô iàu-kín ,
Ba̍k-tuē tsiah-buē hōng khuànn-khin ,
Lâi kah khit-tsia̍h kâng tsuè-tīn ,
Khah iânn tī-teh lo̍h hue-king .
|
金快 汝 真 食人到 ，
也 敢 罵 我 老葱頭 ，
柴棍 摃 着 若未 哭 ，
我 即 呵咾 汝 真賢 。
|
Kim-khuài lí tsin tsia̍h-lâng-kàu ,
Iā kánn mā guá lāu-tshang-thâu ,
Tshâ-kùn kòng tio̍h nā-buē khàu ,
Guá tsiah o-ló lí tsin-gâu .
|
在 萬花樓 好 人氣 ，
花選 算來 第一 枝 ，
眉 清 眼 秀 真 玲利 ，
紳士 相爭 愛卜 碟 。
|
Tsāi Bān-hua-lâu hó lîn-khì ,
Hue-suán sǹg--lâi tuē-it ki ,
Bî tshing gán siù tsin líng-lī ,
Sin-sū sann-tsinn ài-beh ti̍h .
|
臺南 布行 施 老板 ，
有 錢 心肝 足 成安 ，
鵠 伊 布疋 歸 大棧 ，
想 卜 開彩 真 粗田 。
|
Tâi-lâm pòo-hâng Si láu-pán ,
Ū tsînn sim-kuann tsiok tsiânn-ân ,
Khò i pòo-phit kui tuā-tsàn ,
Siūnn beh khai-tshái tsin tshoo-tshân .
|
老牛 卜 食 幼 竿筍 ，
敦刀 那 磨 是 那 敦 ，
不通 絕人 好 緣份 ，
社會 着愛 守 五倫 。
|
Lāu-gû beh tsia̍h iù kuann-sún ,
Tūn-to ná buâ sī ná tūn ,
M̄-thang tsua̍t-lâng hó iân-hūn ,
Siā-huē tio̍h-ài siú ngóo-lûn .
|
開利 走水 煞 失敗 ，
萬花樓 煞 不敢 來 ，
金快 每日 塊 等待 ，
有情 郎君 那 不知 。
|
Khai-lī tsáu-tsuí suah sit-pāi ,
Bān-hua-lâu suah m̄-kánn lâi ,
Kim-khuài muí-li̍t teh tán-thāi ,
Ū-tsîng lông-kun nà m̄-tsai .
|
這回 走水 總 破產 ，
經濟 煞 變 真正 安 ，
閣 予 官廳 罰 貳萬 ，
嚴重 打擊 心 不安 。
|
Tsit-huê tsáu-tsuí tsóng phò-sán ,
King-tsè suah pìnn tsin-tsiànn ân ,
Koh hōo kuann-thiann hua̍t nn̄g-bān ,
Giâm-tiōng tánn-kik sim put-an .
|
經濟 不 負 不敢 去 ，
金快 不知 甲 半糸 ，
開利 做人 有 志氣 ，
京 因 老葱 來 嫌疑 。
|
King-tsè put hu m̄-kánn khì ,
Kim-khuài m̄-tsai kah puànn-si ,
Khai-lī tsuè-lâng ū tsì-khì ,
Kiann in lāu-tshang lâi hiâm-gî .
|
貳萬 無 通 提 去 繳 ，
官廳 提人 頭一條 ，
開利 想 着 真 掛調 ，
準備 這 卜 緊 籠寮 。
|
Nn̄g-bān bô thang the̍h khì kiáu ,
Kuann-thiann lia̍h-lâng thâu-tsi̍t-tiâu ,
Khai-lī siūnn tio̍h tsin kuah-tiàu ,
Tsún-pī tse beh kín làng-liâu .
|
半瞑 走 來 菜店 後 ，
[門@|]着 金快 來 探頭 ，
吳送 怎樣 者 慢 到 ，
煞 來 煩惱 頭 交交 。
|
Puànn-mî tsáu lâi tshài-tiàm āu ,
Tú-tio̍h Kim-khuài lâi thàm-thâu ,
Ngóo--sàng tsuánn-iūnn tsiah bān kàu ,
Suah lâi huân-ló thâu kau-kau .
|
因為 官廳 來 沖公 ，
甲 伊 拼命 人 險亡 ，
有 話 這 卜 對 汝 講 ，
我 是 失敗 無 成功 。
|
In-uī kuann-thiann lâi tshiong-kong ,
Kah i phiànn-miā lâng hiám-bông ,
Ū uē tse beh tuì lí kóng ,
Guá sī sit-pāi bô sîng-kong .
|
吳送 這款 敢 有影 ，
汝 是 我 的 塔心兄 ，
叫 君 心肝 着 岸定 ，
我 也 甘愿 塊 汝 行 。
|
Ngóo--sàng tsit-kuánn kám ū-iánn ,
Lí sī guá ê tah-sim-hiann ,
Kiò kun sim-kuann tio̍h huānn-tiānn ,
Guá iā kam-gaūn tè lí kiânn .
|
現時 查某 治 外口 ，
吳送 汝 先 行 做頭 ，
悲哀 那 行 那塊 哭 ，
哮 甲 目屎 双港 流 。
|
Hiān-sî tsa-bóo tī guā-kháu ,
Ngóo--sàng lí sing kiânn tsuè-thâu ,
Pi-ai ná kiânn ná-teh khàu ,
Háu kah ba̍k-sái sang-káng lâu .
|
衫褲 穿好 併 來 到 ，
双人 行 對 彼平 頭 ，
若 卜 省款 相 等候 ，
同心 同意 通 透流 。
|
Sann-khòo tshīng-hó piànn lâi kàu ,
Sang-lâng kiânn tuì hit-pîng thâu ,
Nā beh siánn-kuánn sann tán-hāu ,
Tông-sim tông-ì thang thàu-lâu .
|
金快 就 問 吳先生 ，
汝 來 怨嘆 是 卜年 ？
鬪滴 為着 省 代志 ，
哭 甲 目箍 紅枝枝 。
|
Kim-khuài tio̍h mn̄g Góo--sian--sinn ,
Lí lâi uàn-thàn sī beh--nî ?
Tàu-tí uī-tio̍h siánn tāi-tsì ,
Khàu kah ba̍k-khoo âng-kì-kì .
|
這回 實在 呆 字運 ，
海關 戒嚴 出來 巡 。
二萬 沖公 煞 無 本 ，
着 去 監獄 受 處分 。
|
Tsit-huê si̍t-tsāi phái lī-ūn ,
Hái-kuan kài-giâm tshut-lâi sûn .
Ln̄g-bān tshiong-kong suah bô pún ,
Tio̍h khì kann-ga̍k tsiū tshú-hun .
|
按年 也是 可憐 代 ，
阮 老葱 的 湳滲來 。
叫 我 着 愛 奉 開彩 ，
布行 彼的 大 嵙呆 。
|
Àn-ní iā-sī khónn-lîn tāi ,
Gún lāu-tshang ē lām-sám-lâi .
Kiò guá tio̍h ài hōng khai-tshái ,
Pòo-hâng hit-ê tuā khoo-tai .
|
因為 不肯 共 阮 打 ，
歸身 疼痛 食 未 乾 ，
三噹 食未 一噹 飽 ，
南花樓 的 老 野猫 。
|
In-uī m̄-khíng kā gún phah ,
Kui-sin thàng-thiànn tsia̍h buē ta ,
Sann-tǹg tsia̍h-bē tsi̍t-tǹg pá ,
Lâm-hua-lâu ê lāu iá-bâ .
|
布行 頭家 卜閣 來 ，
叫 我 着愛 應 伊 開 ，
不肯 講 卜 共 我 害 ，
卜 用 小刀 共 阮 刣 。
|
Pòo-hâng thâu-ke beh-koh lâi ,
Kiò guá tio̍h-ài ìn i khai ,
M̄-khíng kóng beh kā guá hāi ,
Beh īng sió-to kā gún thâi .
|
兩方 也是 呆 運命 ，
世間 煞 無 路 通 行 ，
看着 海水 波浪影 ，
遠遠 有人 塊 叫聲 。
|
Lióng-hong iā-sī phái ūn-miā ,
Sè-kan suah bô lōo thang kiânn ,
Khuànn-tio̍h hái-tsuí pho-lōng-iánn ,
Hn̄g-hn̄g ū-lâng teh kiò-siann .
|
汝 咱 平平 是 呆運 ，
相 來去 見 閻君 ，
若是 同意 趁 這拵 ，
月娘 真 光 水 無雲 。
|
Lí lán pînn-pînn sī phái-ūn ,
Sann tshuā lâi-khì kìnn giâm-kun ,
Nā-sī tông-ì thàn tsit-tsūn ,
Ge̍h-niû tsin kng tshuí bô-hûn .
|
卜 甲 世間 來 離開 ，
双人 甘愿 縛 相隨 ，
看破 世情 卜 跳水 ，
永遠 个得 通 做堆 。
|
Beh kah sè-kan lâi lî-khui ,
Sang-lâng kam-gaūn pa̍k sann-suî ,
Khuànn-phuà sè-tsîng beh thiàu-tsuí ,
Íng-uán ē-tit thang tsuè-tui .
|
二人 相向 面對面 ，
卜 跳 運河 事 是 真 。
二个 永遠 通 做陣 ，
不甘 放汝 我 愛人 。
|
Nn̄g-lâng sann-hiòng bīn-tuì-bīn ,
Beh thiàu ūn-hô sū sī tsin .
Nn̄g-ê íng-uán thang tsuè-tīn ,
M̄-kam pàng-lí guá ài-lîn .
|
無論 省款 手牽手 ，
想着 人生 不 自由 ，
別人 希望 愛 長壽 ，
甘愿 投海 水 漂流 。
|
Bô-lūn siánn-kuánn tshiú-khan-tshiú ,
Siūnn-tio̍h lîn-sing put tsū-iû ,
Pa̍t-lâng hi-bāng ài tn̂g-siū ,
Kam-gaūn tâu-hái tsuí phiau-liû .
|
運河 的 水 起 波浪 ，
一旦 無常 萬事 空 ，
前生 罪故 無 冤枉 ，
為 情 來 死 嗎 無皇 。
|
Ūn-hô ê tsuí khí pho-lōng ,
It-tàn bû-siông bān-sū khong ,
Tsiân-sing tsē-kòo bô uan-óng ,
Uī tsîng lâi sí mā bû-hông .
|
看着 海 人 如葱葱 ，
現時 瞑尾 壠 無 人 。
世間 一切 甘愿 放 ，
汝 我 心肝 生 相同 。
|
Khuànn-tio̍h hái lâng lû-tsháng-tsháng ,
Hiān-sî mî-bé lóng bô lâng .
Sè-kan it-tshè kam-gaūn pàng ,
Lí guá sim-kuann sinn sann-kâng .
|
世間 一切 卜 看破 ，
無 卜 欣善 人 希花 ，
手 提 褲帶 縛 瓦瓦 ，
死了 不即 下 相拖 。
|
Sè-kan it-tshè beh khuànn-phuà ,
Bô beh him-siān lâng hi-hua ,
Tshiú the̍h khòo-tuà pa̍k uá-uá ,
Sí-liáu m̄-tsiah ē sann-thua .
|
褲帶 提來 縛 大腿 ，
死了 即 的 做 一堆 ，
即未 一人 流 一位 ，
二个 永遠 通 相隨 。
|
Khòo-tuà the̍h-lâi pa̍k tuā-thuí ,
Sí-liáu tsiah ē tsuè tsi̍t-tui ,
Tsiah-buē tsi̍t-lâng lâu tsi̍t-uī ,
Nn̄g-ê íng-uán thang sann-suî .
|
汝 我 真情 的 戀愛 ，
最 恨 月老 錯 推排 ，
甲 君 死 在 同 所在 ，
不免 每日 塊 悲哀 。
|
Lí guá tsin-tsîng ê luân-ài ,
Tsuè hūn Gua̍t-nóo tshò tshui-pâi ,
Kah kun sí tsāi kâng sóo-tsāi ,
M̄-bián muí-li̍t teh pi-ai .
|
世間 做人 咱 上好 ，
金快 塊 叫 搭心哥 ，
共 我 抱 瓦 放 乎 倒 ，
水 響 一聲 落 運河 。
|
Sè-kan tsuè-lâng lán siōng-hó ,
Kim-khuài teh kiò tah-sim-ko ,
Kā guá phō uá pàng hoo tó ,
Tsuí hiúnn tsi̍t-siann lo̍h ūn-hô .
|
因 厝 公婆 無 靈聖 ，
双人 到 枉死城 ，
運河 奇案 是 有影 ，
萬古 流傳 有 名聲 。
|
In tshù kong-pô bô lîng-siànn ,
Sang-lâng tshuā kàu Óng-sí-siânn ,
Ūn-hô kî-àn sī ū-iánn ,
Bān-kóo liû-thuân ū miâ-siann .
|
二个 跳 落 運河 內 ，
等 到 天光 人 即 知 ，
去 請 官廳 來 分解 ，
醫生 檢 好 煞 皆 台 。
|
Nn̄g-ê thiàu lo̍h ūn-hô lāi ,
Tán kàu thinn-kng lâng tsiah tsai ,
Khì tshiánn kuann-thiann lâi hun-kái ,
I-sing kiám hó suà kai tâi .
|
大家 心肝 着 理解 ，
被 色 所 迷 不英皆 ，
認真 打拼 顧 家內 ，
加 食 幾歲 即 的知 。
|
Ta̍k-ke sim-kuann tio̍h lí-kái ,
Pī sik sóo bê put-ing-kai ,
Līn-tsin phah-phiànn kòo ka-lāi ,
Ke tsia̍h kuí-hè tsiah ē-tsai .
|
煞勸 少年 着 立志 ，
知影 反悔 就 恰 遲 ，
江山 某子 着 建致 ，
不通 死 做 水流屍 。
|
Suà-khǹg siàu-liân tio̍h li̍p-tsì ,
Tsai-iánn huán-hué tio̍h khah tî ,
Kang-san bóo-kiánn tio̍h kiàn-tì ,
M̄-thang sí tsuè tsuí-lâu-si .
|
勸咱 社會 着 海海 ，
看着 這款 恁 着 知 ，
未得 結局 真 利害 ，
大家 着愛 鬪 主裁 。
|
Khǹg-lán siā-huē tio̍h hái-hái ,
Khuànn-tio̍h tsit-kuánn lín tio̍h tsai ,
Buē-tit kiat-kio̍k tsin lī-hāi ,
Ta̍k-ke tio̍h-ài tàu tsú-tshâi .
|
是大 是小 愛 參詳 ，
若來 強制 就 可傷 ，
男 女 大家 着 尊重 ，
不通 為 情 變 奸雄 。
|
Sī-tuā sī-suè ài tsham-siông ,
Nā-lâi kiông-tsè tio̍h khah-siong ,
Lâm lú ta̍k-ke tio̍h tsun-tiōng ,
M̄-thang uī tsîng pìnn kan-hiông .
|
身軀 不通 做 錢樹 ，
不通 束縛 人 自由 ，
一款 做人 真 妖壽 ，
害人 有 頭 無 尾鰍 。
|
Sin-khu m̄-thang tsuè tsînn-tshiū ,
M̄-thang sok-pa̍k lâng tsū-iû ,
Tsi̍t-khuán tsuè-lâng tsin iáu-siū ,
Hāi-lâng ū thâu bô bé-liu .
|
女 大 當 嫁 男 配妻 ，
男女 情殺 大 問題 ，
做人 是 真 大 關係 ，
拜託 官廳 闘 提携 。
|
Lú tāi tong kè lâm phuè-tshe ,
Lâm-lú tsîng-sat tuā būn-tê ,
Tsuè-lâng sī tsin tuā kuan-hē ,
Pài-thok kuann-thiann tàu thê-hê .
|
運河 奇案 這斬 止 ，
共 恁 列位 閣 通知 ，
世間 萬事 愛 注意 ，
代志 到位 反悔 遲 。
|
Ūn-hô kî-àn tsit-tsām tsí ,
Kā lín lia̍t-uī koh thong-ti ,
Sè-kan bān-sū ài tsù-ì ,
Tāi-tsì kàu-uī huán-hué tî .
|
運河 奇案 這斬 煞 ，
這抱 着 是 勸世歌 ，
姓 張 新興 着 是 我 ，
阮 厝 現時 帶 萬華 。
|
Ūn-hô kî-àn tsit-tsām suah ,
Tsit-phō tio̍h sī khǹg-sè-kua ,
Sìnn Tiunn Sin-hing tio̍h sī guá ,
Gún tshù hiān-sî tuà Bān-huâ .
|
|
