陳塘關內 一个 叫 李 靖 ，
杜 惠 真人 个 學生 ，
杜 惠 知 伊 有 本等 ，
叫 伊 下山 做 總兵 。
|
Tîn-tông-kuan-lāi tsi̍t-ê kiò Lí Tsīng ,
Tōo Huī tsin-lîn ê ha̍k-sing ,
Tōo Huī tsai i ū pún-tíng ,
Kiò i hā-san tsuè tsóng-ping .
|
李 靖 本 有 二个子 ，
太子 金吒 二 木吒 ，
殷氏 夫人 腹肚 疼 ，
三年 六月 生 哪叱 。
|
Lí Tsīng pún ū nn̄g-ê-kiánn ,
Thài-tsú Kim-tshia lī Bo̍k-tshia ,
Un-sì hu-lîn pak-tóo thiànn ,
Sann-nî la̍k-ge̍h sinn Lô-tshia .
|
卜 唱 哪叱 來 出世 ，
正是 玉帝 靈珠兒 ，
人因 老母 ，
有 花喜 ，
三年 六月 即 生 伊 。
|
Beh tshiùnn Lô-tshia lâi tshut-sì ,
Tsiànn-sī Gio̍k-tè lîng-tsu-lî ,
In lāu-bú ,
Ū hue-hí ,
Sann-nî la̍k-ge̍h tsiah sinn i .
|
李 靖 在帶 陳塘關 ，
有 學 仙法 猶 未完 ，
杜 惠 叫 伊 來 下凡 ，
來 共 紂王 把 三關 。
|
Lí Tsīng tsāi-uà Tîn-tông-kuan ,
Ū o̍h sian-huat iah buē-uân ,
Tōo Huī kiò i lâi hā-huân ,
Lâi kā Tiū-ông pé sam-kuan .
|
李 靖 師父 杜 惠 師 ，
亦 有 教 伊 五行符 ，
學 甲 能 騰雲 兼 駕霧 ，
武藝 學 甲 歸身軀 。
|
Lí Tsīng su-hū Tōo Huī su ,
Ia̍h ū kà i ngóo-hîng-hû ,
O̍h kah ē thîng-hûn kiam kà-bū ,
Bú-gē o̍h kah kui-sin-khu .
|
李 靖 鎮守 做 總鎮 ，
武藝 學 甲 外 認真 ，
人因 牽手个 有 身孕 ，
人因某 叫做 殷 夫人 。
|
Lí Tsīng tìn-siú tsuè tsóng-tìn ,
Bú-gē o̍h kah guā līn-tsin ,
In khan-tshiú-ê ū sin-īn ,
In-bóo kiò-tsuè Un hu-lîn .
|
哪叱 坐胎 三年半 ，
害 人因 老母 割 心肝 ，
出世 落塗 真好 看 ，
一粒 肉球 蓋成 蛋單 。
|
Lô-tshia tsē-thai sann-nî-puànn ,
Hāi in lāu-bó kuah sim-kuann ,
Tshut-sì lo̍h-thôo tsin-hó khuànn ,
Tsi̍t-lia̍p bah-kiû kài-sîng nn̄g-tuann .
|
哪叱 出世 就 能行 ，
肉球 內面 能 應聲 ，
破開 一个 囡仔子 ，
李 靖 嫌疑 是 妖精 。
|
Lô-tshia tshut-sì to̍h ē-kiânn ,
Bah-kiû lāi-bīn ē ìn-siann ,
Phuà-khui tsi̍t-ê gín-á-kiánn ,
Lí Tsīng hiâm-gî sī iau-tsiann .
|
破開 一个 囡仔哥 ，
玉帝 賜來 下 天曹 ，
___ 這 也是 玉王 个 至寶 ，
李 靖 看了 無奈何 。
|
Phuà-khui tsi̍t-ê gín-á-ko ,
Gio̍k-tè sù--lâi hā thian-tsô ,
, Tse iā-sī Gio̍k-ông ê tsì-pó ,
Lí Tsīng khuànn-liáu bô-nāi-hô .
|
肉球 來 包 囝仔身 ，
內底 一條 坤天綾 ，
二項 寶貝 在 內面 ，
這 是 玉帝 賞賜 真當真 。
|
Bah-kiû lâi pau gín-á-sin ,
Lāi-tué tsi̍t-tiâu khun-thian-lîn ,
Nn̄g-hāng pó-puè tī lāi-bīn ,
Tse sī Gio̍k-tè siúnn-sù tsin-tang-tsin .
|
一个 金箍 真 巧路 ，
起先 囥致 八卦爐 ，
天兵 天將 致 照顧 ，
元始天尊 送 金箍 。
|
Tsi̍t-ê kim-khoo tsin khiáu-lōo ,
Khí-sing khǹg-tì pat-kuà-lôo ,
Thian-ping thian-tsiòng tì tsiàu-kòo ,
Guân-sú-thian-tsun sàng kim-khoo .
|
哪叱 出世 就 能 走 ，
閣能 講話 即 有 賢 ，
一條 紅綾 拗 三拗 ，
phua7在 哪叱 肩胛頭 。
|
Lô-tshia tshut-sì to̍h ē tsáu ,
Koh-ē kóng-uē tsiah ū gâu ,
Tsi̍t-tiâu âng-lîn áu sann-áu ,
Phuā-tī Lô-tshia king-kak-thâu .
|
李个 生 一个 哪叱 子 ，
一半 歡喜 一半 驚 ，
出世 落塗 三日 正 ，
太乙真人 來 號 名 。
|
Li--ê sinn tsi̍t-ê Lô-tshia kiánn ,
Tsi̍t-puànn huann-hí tsi̍t-puànn kiann ,
Tshut-sì lo̍h-thôo sann-li̍t tsiànn ,
Thài-it-tsin-lîn lâi hō miâ .
|
乾元 山頂 金光洞 ，
正是 太乙 个 仙宗 ，
十二門人 做 副統 ，
來 收 徒弟 即 開光 。
|
Khiân-guân suann-tíng Kim-kong-tōng ,
Tsiànn-sī Thài-it ê sian-tsong ,
Si̍p-ī-bûn-lîn tsuè hù-thóng ,
Lâi siu tôo-tē tsiah khai-kong .
|
哪叱 師父 太乙師 ，
亦有 教 伊 五行符 ，
學 甲 能 騰雲 兼 駕霧 ，
武藝 學 甲 歸 身軀 。
|
Lô-tshia su-hū Thài-it-su ,
Ia̍h-ū kà i ngóo-hîng-hû ,
O̍h kah ē thîng-hûn kiam kà-bū ,
Bú-gē o̍h kah kui sin-khu .
|
金叱 算是 人因 大兄 ，
木叱 排 致 第二名 ，
三个 keh 李 靖 个 子 ，
就是 紲尾 哪叱 上 出名 。
|
Kim-tshia sǹg-sī in tuā-hiann ,
Bo̍k-tshia pâi tì tē-lī-miâ ,
Sann-ê keh Lí Tshīng ê kiánn ,
To̍h-sī suà-bé Lô-tshia siāng tshut-miâ .
|
哪叱 在帶 陳塘府 ，
因為 大熱 洗 身軀 ，
大 鬧 東海 即 起事 ，
佳哉 玉帝 个 靈珠 。
|
Lô-tshia tsāi-tuà Tîn-tông-hú ,
In-uī tāi-lua̍h sué sin-khu ,
Tāi nāu Tang-hái tsiah khí-sū ,
Kai-tsài Gio̍k-tè ê lîng-tsu .
|
哪叱 來到 東海港 ，
紅綾 落水 水 齊 紅 ，
魚蝦 水卒 如滄滄 ，
害 一个 險險 死空空 。
|
Lô-tshia lâi-kàu Tang-hái-káng ,
Âng-lîn lo̍h-tsuí tsuí tsiâu âng ,
Hî-hê tsuí-tsut lî-tsháng-tsháng ,
Hāi tsi̍t-ê hiám-hiám sí-khang-khang .
|
哪叱 來到 東海面 ，
走 來 東海 洗 紅綾 ，
魚蝦 水卒 死 歸陣 ，
有个 死 甲 外 凄邊 ，
紅綾 做 現近 。
|
Lô-tshia lâi-kàu Tang-hái-bīn ,
Tsáu lâi Tang-hái sué âng-lîn ,
Hî-hê tsuí-tsut sí kui-tīn ,
Ū-ê sí kah guā tshi-pinn ,
Âng-lîn tsuè hiān-kīn .
|
李 哪叱 紅綾 棄落 海 ，
水底 下面 滾起來 ，
龍王 宮殿 強卜 敗 ，
山頂 親像 做 風颱 。
|
Lô-tshia âng-lîn hìnn-lo̍h hái ,
Tsuí-tué ē-bīn kún-khì-lâi ,
Lîng-ông kiong-tiān kiông-beh pāi ,
Suann-tíng tshin-tshiūnn tsuè hong-thai .
|
李 哪叱 紅綾 一下 搵 ，
魚蝦 水卒 齊 遭瘟 ，
這 也是 龍王 歹字運 ，
快快 點兵 出來 巡 。
|
Lí Lô-tshia âng-lîn tsi̍t-ē ùn ,
Hî-hê tsuí-tsut tsiâu tso-un ,
Tse iā-sī Lîng-ông phiánn-lī-ūn ,
Khuài-khuài tiám-ping tshut-lâi sûn .
|
予伊 紅綾 一下 拋 ，
魚蝦 水卒 浮 相疊 ，
予人 抾 去 食 甲 飽 ，
快快 點兵 來 調查 。
|
Hōo-i âng-lîn tsi̍t-ē pha ,
Hî-hê tsuí-tsut phû sio-tha̍h ,
Tsìng-lâng khioh khì tsia̍h kah pá ,
Khuài-khuài tiám-ping lâi tiāu-tsa .
|
海龍王 就 召 水夜叉 ，
去 看 水底 是 啥个 ，
魚蝦 水卒 死 即多 ，
共 看 逆畜 佗一个 。
|
Hái-lîng-ông tsiū kiàu tsuí-iā-tshe ,
Khì khuànn tsuí-tué sī siánn-ê ,
Hî-hê tsuí-tsut sí tsiah-tsē ,
Khì khuànn gi̍k-thiok tó-tsi̍t-ê .
|
夜叉 奉著 龍王令 ，
即時 行出 水晶宮 ，
水夜叉 來到 水面頂 ，
煞 去 予 哪叱 拖塊 舂 。
|
Iā-tshe hōng-tio̍h lîng-ông-līng ,
Tsik-sî kiânn-tshut tsuí-tsinn-king ,
Tsuí-iā-tshe lâi-kàu tsuí-bīn-tíng ,
Suah khì hōo Lô-tshia thua-teh tsing .
|
哪 叱七 歲 囡仔性 ，
大 鬧 東海 水晶宮 ，
果然 實在 有 本等 ，
舂 甲 夜叉 袂 反 爿 。
|
Lô-tshia tshit- hè gín-á-sìng ,
Tāi nāu Tang-hái Tsuí-tsinn-king ,
Kóo-liân si̍t-tsāi ū pún-tíng ,
Tsinn kah iā-tshe buē píng pîng .
|
水夜叉 舂 了 一个 疼 ，
脫走 行路 煞 消臂 ，
走 來 龍宮 討 救命 ，
虛久 龍王 即 知 驚 。
|
Tsuí-iā-tshe tsinn liáu tsi̍t-ē thiànn ,
Thust4-tsáu kiânn-lōo suah siau-phiann ,
Tsáu lâi gîng-king thó kiù-miā ,
Hit-kú Lîng-ông tsiah tsai kiann .
|
海龍王 就 召 三太子 ，
去 拿 哪叱 來 研灰 ，
大膽 敢 鬧 咱 水府 ，
快快 點兵 甲 伊 誅 。
|
Hái-lîng-ông tsiū tiàu Sam-thài-tsú ,
Khì lia̍h Lô-tshia lâi gíng-hu ,
Tuā-tánn kánn nāu lán tsuí-hú ,
Khuài-khuài tiám-ping kap i tu .
|
太子 一時 點 水兵 ，
龜精 好膽 做 頭前 ，
沙魚 相打 展 伊 猛 ，
茄仔 蜊仔 血蛤 靠 伊 殼 二爿 。
|
Thài-tsú tsi̍t-sî tiám tsuí-ping ,
Ku-tsinn hó-tánn tsuè thâu-tsîng ,
Sua-hî sio-phah tián i bíng ,
Kiô-á lā-á hui̍h-ham khò i khak nn̄g-pîng .
|
小卷 隨 能 放 火狼 ，
歸魚 展 伊 賢 歕風 ，
蟶仔 一个 成 竹管 ，
海翁 致 做 總兵王 。
|
Sió-kńg suî ē pàng hué-lōng ,
Kui-hî tián i gâu pûn-hong ,
Sing-á tsi̍t-ê sîng tik-kóng ,
Hái-ang tì tsuè tsóng-ping-ông .
|
白魚 小刀 白雪雪 ，
龍蝦 出戰 攑 攻叉 ，
蟳字 展 你 腳手 多 ，
別人 用 行 伊 用 把 。
|
Peh-hî sió-to pe̍h-seh-seh ,
Lîng-hê tshut-tsiàn gia̍h kong-tshe ,
Tsîm-lī tián lí kha-tshiú tsē ,
Pa̍t-lâng iōng kiânn i iōng pê .
|
丁鮸 一枝 透 甲 串 ，
水鮎 金鎗 第一 長 ，
飛烏 展 伊 賢 飛 遠 ，
海提 一模 那 籠床 。
|
Ting-bián tsi̍t-ki thàu kah tsǹg ,
Tsuí-tsam kim-tshiunn tē-it tn̂g ,
Pe-oo tián i gâu pe hn̄g ,
Hái-theh tsi̍t-bông ná lâng-sn̂g .
|
猶 閣 一陣 海加走 ，
歸陣 是 伊 上 斲猴 ，
飛廉 走壁 連邊 到 ，
甲 人 品文 品武 展 拳頭 。
|
Iáu koh tsi̍t-tīn hái-ka-tsáu ,
Tsuí-té sī i siāng tshi̍k-kâu ,
Pe-liâm tsáu-piah liân-pinn kàu ,
Kah lâng phín-bûn phín-bú tián kûn-thâu .
|
海鱟 第一 不成子 ，
翁仔某 鬥陣 即有 行 ，
一擺 死 著 双條 命 ，
予 人 拿 去 開 鱟桸 。
|
Hái-hāu tē-it m̄-tsiânn-kiánn ,
Ang-á-bóo tàu-tīn tsiah-ū kiânn ,
Tsi̍t-pái sí tio̍h siang-tiâu miā ,
Hōo lâng lia̍h khì khui hāu-hia .
|
粗皮 厚殼 是 石降 ，
火眼 金槍 目睭 紅 ，
看 人 腳手 齊 振動 ，
驚死 串 入去 石頭空 。
|
Tshoo-phê kāu-khah sī tsio̍h-kàng ,
Hé-gán kim-tshiunn ba̍k-tsiu âng ,
Khuànn lâng kha-tshiú tsiâu tín-tāng ,
Kiann-sí tsǹg li̍p-khì tsio̍h-thâu-khang .
|
鰹仔 第一 大箍獃 ，
又 惜 性命 驚 人 刣 ，
伊 又閣 大箍 甲 鎮海 ，
太子 揬膦 不 予伊 來 。
|
Kián-á tē-it tuā-khoo-tai ,
Iū sioh sìnn-miā kiann lâng thâi ,
I iū-koh tuā-khoo kah tìn-hái ,
Thài-tsú tu̍h-lān m̄ hōo-i lâi .
|
暗串箍 第一 大箍白 ，
通海 三班 上 皎家 ，
水卒 這項 蓋 狗祭 ，
朋友 無 交陪 半个 。
|
Àm-tshǹg-khoo tē-it tuā-khoo-pe̍h ,
Thong-hái sam-pan siāng kiáu-ke ,
Tsuí-tsut tsit-hāng kài káu-tsè ,
Pîng-iú bô kau-puê puànn-ê .
|
海鵝 第一 大箍健 ，
就是 爪仔 上 青驚 ，
通海 勿仔 蓋 軟芷 ，
今仔日 遭瘟 死 着 歸 海坪 。
|
Hái-gô tē-it tuā-khoo-kiānn ,
To̍h-sī tsiáu-á siāng tshinn-kiann ,
Thong-hái but-á kài nńg-tsiánn ,
Kin-á-li̍t tso-un sí tio̍h kui hái-phiânn .
|
許蚵 第一 無路用 ，
太子 共 伊 算 半丁 ，
打着 歸海 齊 也應 ，
較準 北國 吳羅兵 。
|
Khóo-ô tē-it bô-lōo-īng ,
Thài-tsú kāng i sǹg puànn-ting ,
Phah-tio̍h kui-hái tsiâu iā-ìng ,
Khah-tsún Pak-kok Ngôo-lô-ping .
|
海鰻 第一 上 無變 ，
不時 歸尾 軟 甲 蔫 ，
予 人 拿着 袂 滾堅 ，
水卒 這項 賢 假仙 。
|
Hái-muâ tē-it siāng bô-piàn ,
Put-sî kui-bé nńg kah lian ,
Hōo lâng lia̍h-tio̍h buē kún-kiān ,
Tsuí-tsut tsit-hāng gâu ké-sian .
|
烏喉 得定 有 壁鼓 ，
即 能 歸身 烏烏烏 ，
鴨片薰 見食 歸 腹肚 ，
嘴內 鳥 甲 頷頸箍 。
|
Oo-âu tit-tiānn ū piah-kóo ,
Tsiah ē kui-sin oo-oo-oo ,
Ah-phiàn-hun kiàn-tsia̍h kui pak-tóo ,
Tshuì-lāi oo kah ām-kún-khoo .
|
脫西仔 猶閣 較 無路用 ，
出戰 不敢 做 頭前 ，
歹運 去 遇着 鄭 國聖 ，
肉 去 予伊 拮 一爿 。
|
Tshuah-se-á iáu-koh khah bô-lōo-īng ,
Tshut-tsiàn m̄-kánn tsò thâu-tsîng ,
Pháinn-ūn khì gū-tio̍h Tīnn Kok-sìng ,
Bah khì hōo-i kiat tsi̍t-pîng .
|
芋仔 賢跳 甲 賢趒 ，
大沙 親像 犁頭縹 ，
魴魚 一尾 那 鶆鶚 ，
海參 一條 成 芎蕉 。
|
Ōo-á gâu-thiàu kah gâu-tiô ,
Tuā-sua tshin-tshiūnn luê-thâu-pio ,
Hóng-á tsi̍t-bé ná lāi-hio̍h ,
Hái-song tsi̍t-tiâu sîng kin-tsio .
|
赤宗魚 帶着 上 外 泳 ，
近 致 龍王 水晶宮 ，
受 着 上司 个 命令 ，
身 穿 紅襖 出 封亭 。
|
Tshiah-tsang-hî tuà-tī siōng guā íng ,
Kūn tì Lîng-ông Tsuí-tsinn-king ,
Siū tio̍h siōng-si ê bīng-līng ,
Sin tshīng âng-ó tshut hong-tîng .
|
東鏡生 伊 著 專門 做 巡掃 ，
水卒 這項 第一 賢 ，
不時 聲音 hinn3-hu3哮 ，
毋知 掠做 咧 歕 號頭 。
|
Tang-kiánn-sinn i tī tsuan-bûn tsuè sûn-sàu ,
Tsuí-tsut tsit-hāng tē-it gâu ,
Put-sî siann-im hìnn-hù-háu ,
M̄-tsai lia̍h-tsuè leh pûn hō-thâu .
|
第一 奸臣 大目廣 ，
三分 代誌 去 奏 龍王 ，
無影無跡 烏白講 ，
太子 封 伊 領 先鋒 。
|
Tē-it kan-sîn tuā-ba̍k-kòng ,
Sam-hun tāi-tsì khì tsàu Lîng-ông ,
Bô-iánn-bô-jiah oo-pe̍h-kóng ,
Thài-tsú hong i niá sian-hong .
|
角仔 著是 咧 做 保長 ，
下頦 留 甲 二支 鬚 ，
通海 水卒 做 剪柳 ，
著是 這項 第一彪 。
|
Kap-á to̍h-sī leh tsuè pó-tiúnn ,
Ē-hâi lâu kah nn̄g-ki tshiu ,
Thong-hái tsuí-tsut tsuè tsián-liú ,
To̍h-sī tsit-hāng tē-it-piu .
|
海龍王 三个 查某子 ，
正是 金色 鯉魚精 ，
卜 甲 哪叱 大 拼命 ，
不知 送 輸 送人 贏 。
|
Hái-lîng-ông sann-ê Tsa-bóo-kiánn ,
Tsiànn-sī kim-sik lí-hî-tsiann ,
Beh kah Lô-tshia tuā piànn-miā ,
M̄-tsai siáng su siáng-lâng iânn .
|
大囝 即有 二一二 ，
頭 梳 双鬃 賴 刀眉 ，
身 穿 珠衣 白薜薜 ，
日月双刀 攑 二枝 。
|
Tuā-kiánn tsiah-ū lī-it-lī ,
Thâu sue siang-tsang lua̍h to-bî ,
Sin tshīng tsu-i pe̍h-si̍h-si̍h ,
Li̍t-gua̍t-siang-to gia̍h nn̄g-ki .
|
第二个 即 有 二十歲 ，
頭 梳 屈菊 插 金花 ，
留 甲 二部 頭鬃尾 ，
手 攑 三股 托天叉 。
|
Tē-lī-ê tsiah ū lī-tsa̍p-hè ,
Thâu sue khut-kiok tshah kim-he ,
Lâu kah nn̄g-phō thâu-tsang-bé ,
Tshiú gia̍h sann-kóo thok-thian-tshe .
|
第三 查某囝 即 十八 ，
頭鬃 這馬 即 學 梳 ，
插 甲 二枝 騎雞尾 ，
身 穿 珠衣 甲 響皮 。
|
Tē-sann tsa-bóo-kiánn tsiah tsa̍p-pueh ,
Thâu-tsang tsit-má tsiah o̍h sue ,
Tshah kah nn̄g-ki kî-ke-bué ,
Sin tshīng tsu-i kah hiáng-phuê .
|
哪叱 軍兵 點 原在 ，
卜 甲 太子 大 相刣 ，
大家 得卜 試 看覓 ，
送贏送 輸 ___ 也 不知 。
|
Lô-tshia kun-ping tiám guân-tsāi ,
Bueh kah Thài-tsú tuā sio-thâi ,
Tāi-ke tit-beh tshì khuànn-māi ,
Siàng su siàng iânn iā m̄-tsai .
|
李 哪叱 目睭 看 伊 三太子 ，
看 伊 大展 个 工夫 ，
囡仔 正實 不驚事 ，
靠 伊 金箍 甲 伊 誅 。
|
Lí Lô-tshia ba̍k-tsiu khuànn i Sam-thài-tsú ,
Khuànn i tāi-tián ê kang-hu ,
Gín-á tsiann-si̍t m̄-kiann-sū ,
Khò i kim-khoo kap i tu .
|
預備 金箍 徛 在在 ，
存辦 卜 甲 伊 大刣 ，
就 罵 太子 不知禾黑 ，
性命 佇 我 掌甲眉 。
|
Ū-pī kim-khoo khiā tsāi-tsāi ,
Tshûn-pān beh kah i tuā-thâi ,
Tsiū mā Thài-tsú m̄-tsāi-bái ,
Sìnn-miā tī guá tsíng-kah-bâi .
|
太子 盡 靠 海龍王 ，
手 攑 大刀 弄 威風 ，
哪叱 看了 無 妥當 ，
祭起 金箍 緊 提防 。
|
Thài-tsú tsīn khò Hái-lîng-ông ,
Tshiú gia̍h tuā-to lāng ui-hong ,
Lô-tshia khuànn-liáu bô thò-tòng ,
Tsè-khí kim-khoo kín thê-hông .
|
金箍 祭上 半空中 ，
比 山 矺着 亦 甲 雄 ，
矺着 太子 變 形相 ，
現出 原形 一尾龍 。
|
Kim-khoo tsè-tsiūnn puàn-khong-tiong ,
Pí suann teh-tio̍h ia̍h khah hiông ,
Teh-tio̍h Thài-tsú piàn hîng-siòng ,
Piàn-tshut guân-hîng tsi̍t-bé-liông .
|
太子 矺着 大聲 哀 ，
魚蝦水卒 盡 圍來 ，
哪叱 性地 原 正歹 ，
脆脆 打死 魚蝦栽 。
|
Thài-tsú teh-tio̍h tuā-siann ai ,
Hî-hê-tsuí-tsut tsīn uî--lâi ,
Lô-tshia sìng-tē guân tsiann-pháinn ,
Tshuè-tshuè phah-sí hî-hê-tsai .
|
李 哪叱 打死 魚仔陣 ，
來 共 太子 抽 龍筋 ，
抽 來 身軀 縖 三輦 ，
虛久 即 甘願 起身 。
|
Lí Lô-tshia phah-sí hî-á-tīn ,
Lâi kā Thài-tsú thiu lîng-kin ,
Thiu lâi sin-khu hâ sann-lín ,
Hit-kú tsiah kam-guān khí-sin .
|
哪 叱七 歲 鬧 東海 ，
龍筋 紲 共 抽 返來 ，
李 靖 不知 這條代 ，
龍王 本等 代先 知 。
|
Lô-tshia tshit- hè nāu Tang-hái ,
Lîng-kin suà kāng thui tńg-lâi ,
Lí Tsīng m̄-tsai tsit-tiâu-tāi ,
Lîng-ông pún-tíng tāi-sing tsai .
|
海龍王 正實 真本等 ，
變做 白面 个 書生 ，
受氣 卜來 尋 李 靖 ，
帶 劍 行 出 水晶宮 。
|
Hái-lîng-ông tsiann-si̍t tsin-pún-tíng ,
Piàn-tsuè pe̍h-bīn ê su-sing ,
Siū-khì beh-lâi tshē Lí Tsīng ,
Tuà kiàm kiânn tshut Tuí-tsinn-king .
|
哪叱 返來 不敢 講 ，
龍王 遁到 一陣 風 ，
李个 你 猶 佯 戇戇 ，
即時 變面 跳 甲 傱 。
|
Lô-tshia tńg-lâi m̄-kánn kóng ,
Lîng-ông tūn-kàu tsi̍t-tūn hong ,
Lí--ê lí iáu tìnn gōng-gōng ,
Tsik-sî pìnn-bīn thiàu kah tsông .
|
海龍王 受氣 罵 李 靖 ，
你 無 帶念 當初 朋友情 ，
恁子 無教 來 寵恿 ，
總無 去 鬧 我 東海 水晶宮 。
|
Hái-lîng-ông siū-khì mā Lí Tsīng ,
Lí bô tài-liām tng-tshue pîng-iú-tsîng ,
Lín-kiánn bô-kà lâi thíng-sīng ,
Tsóng-bô khì nāu guá Tang-hái Tsuí-tsinn-king .
|
李 靖 連 信 嘛 不信 ，
到底 這是 佗 起因 ，
來 甲 龍王 辦 笑面 ，
事 著 予 我 查 甲 真 。
|
Lí Tsīng liân sìn mā m̄-sìn ,
Tàu-tí tse-sī tó khí-in ,
Lâi kah Lîng-ông piān tshiò-bīn ,
Sū tio̍h hōo guá tshâ khah tsin .
|
你 若 甲 能 推 不知影 ，
斡咧 變面 就 起行 ，
來 予 玉帝 做 平正 ，
卜 告 李 靖 頭一名 。
|
Lí nā kah ē the m̄-tsai-iánn ,
Uat-leh pìnn-bīn tsiū khí-kiânn ,
Lâi hōo Gio̍k-tè tsuè pînn-tsiànn ,
Beh kò Lí Tsīng thâu-tsi̍t-miâ .
|
|
