| 冊名 | 義戰噍吧哖——台語七字仔白話史詩 |
| 編者 | 周定邦 |
| 出版社 | 台灣說唱藝術工作室 |
| 出版年 | 2001 |
| 篇名 | 全文分九段：火種、掖種、莩芛、旋藤、扑莓、捻芛、起義、血祭、花謝。本網站只錄前面火種、掖種、莩芛三段。一、火種 hue2-tsing2 |
| 列位 朋友 佮 弟兄 ， 姓 周 定邦 我 的 名 ， 小弟 即陣 蹛 府城 ， 卜來 唸歌 予 恁 聽 。 |
Lia̍t-uī pîng-iú kah tī-hiann , Sènn Tsiu Tīng-pang guá ê miâ , Sió-tī tsit-tsūn tuà hú-siânn , Beh-lâi liām-kua hōo lín thiann . |
| 講 咱 台灣 的 運命 ， 咱 若 有閑 加減 聽 ， 卜講 噍吧哖 事件 ， 事前 環境 愛 知影 。 |
Kóng lán Tâi-uân ê ūn-miā , Lán nā ū-îng ke-kiám thiann , Beh-kóng Ta-pa-nî sū-kiānn , Sū-tsiân khuân-kíng ài tsai-iánn . |
| 一 八 九 五 乙未年 ， 馬關 條約 來 訂 起 ， 可嘆 唐山 毋愛 挃 ， 將 咱 台灣 送 狗 治 。 |
It pat kiú ngóo it-bī-nî , Má-kuan tiâu-iok lâi tīng khí , Khó-thàn Tn̂g-suann m̄-ài ti̍h , Tsiong lán Tâi-uân sàng káu tī . |
| 日本 狗仔 拄 來 台 ， 狗 軍 做前 將 人 刣 ， 守軍 義軍 卜 保 台 ， 奈何 天意 對 咱禾黑 。 |
Ji̍t-pún káu-á tú lâi Tâi , Káu kun tsò-tsîng tsiong lâng thâi , Siú-kun gī-kun beh pó Tâi , Nāi-hô thinn-ì tuì lán-bái . |
| 景崧 驚死 覕 唐山 ， 顯榮  狗 入 北城 ， 守軍 無頭 被 扑散 ， 義軍 戰敗 走 入 山 。 |
Kíng-siông kiann-sí bi̍h Tn̂g-suann , Hián-îng tshuā káu ji̍p pak-siânn , Siú-kun bô-thâu pī phah-suànn , Gī-kun tsiàn-pāi tsáu ji̍p suann . |
| 台北 城門 一下 開 ， 狗軍 落南 清 城池 ， 火燒 民厝 遍地 屍 ， 屠殺 同胞 四界 是 。 |
Tâi-pak siânn-mn̂g tsi̍t-ē khui , Káu-kun lo̍h-lâm tshing siânn-tî , Hué-sio bîn-tshù phiàn-tē si , Tôo-sat tông-pau sì-kè sī . |
| 血流 成河 毋敢 見 ， 男 女 老 幼 死 規堆 ， 民族 大仇 較 大 天 ， 從此 種 落 抗日 籽 。 |
Hiat-liû sîng-hô m̄-kánn kìnn , Lâm lú nóo iù sí kui-tui , Bîn-tso̍k tāi-siû khah tuā thinn , Tsiông-tshú tsìng lo̍h khòng-ji̍t tsí . |
| 且說 迄時 的 經濟 ， 鹽 薰 收 去 做 專賣 ， 樟腦 鴉片 攏 人因 的 ， 民生 問題 受 控制 。 |
Tshiánn-sueh hit-sî ê king-tsè , Iâm hun siu khì tsò tsuan-bē , Tsionn-ló a-phiàn lóng in ê , Bîn-sing būn-tê siū khòng-tsè . |
| 六 三 法案 匪徒 令 ， 鐵血 統治 來 實行 ， 保甲 制度 軍 領 政 ， 好殺 殘暴 矮人種 。 |
Lio̍k sam huat-àn huí-tôo līng , Thiat-hiat thóng-tī lâi si̍t-hîng , Pó-kah tsè-tōo kun niá tsìng , Hònn-sat tsân-pok é-lâng-tsíng . |
| 極權 統治 無 人性 ， 經濟 剝削 是 苦刑 ， 負債 奴工 日子 凝 ， 只 有 武力 來 抗爭 。 |
Ki̍k-khuân thóng-tī bô jîn-sìng , King-tsè pak-siah sī khóo-hîng , Hū-tsè lôo-kang ji̍t-tsí gîng , Tsí ū bú-li̍k lâi khòng-tsing . |
| 再 說 日本 初 佔 台 ， 起義 事件 是 常在 ， 擾亂 狗軍 十九 載 ， 抗日 火種 藏 心內 。 |
Tsài sueh Ji̍t-pún tshoo tsiàm Tâi , Khí-gī sū-kiānn sī siâng-tsāi , Jiáu-luān káu-kun tsa̍p-káu tsài , Khòng-ji̍t hué-tsíng tshàng sim-lāi . |
| 上 蓋 有名 三猛兄 ， 予 人因 日本 上 頭疼 ， 山頂 平地 扑 官廳 ， 狗軍 死傷 歹 算 件 。 |
Siōng kài ū-miâ sam-bíng-hiann , Hōo in Ji̍t-pún siōng thâu-thiànn , Suann-tíng pênn-tē phah kuann-thiann , Káu-kun sí-siong pháinn sǹg kiānn . |
| 狗軍 扑輸 換 步數 ， 換 用 三跤 出 漚步 ， 用 騙 用 拐 用 陰謀 ， 義軍 勢力 塗塗塗 。 |
Káu-kun phah-su uānn pōo-sòo , Uānn iōng sann-kha tshut àu-pōo , Iōng phiàn iōng kuái iōng im-bôo , Gī-kun sè-li̍k thôo-thôo-thôo . |
| 頭 先烈 被 刣死 ， 狗軍 報復 才 開始 ， 屠村 政策 足 哀悲 ， 男女老幼 走 袂 去 。 |
Tshuā-thâu sian-lia̍t pī thâi--sí , Kàu-kun pò-ho̍k tsiah khai-sí , Tôo-tshun tsìng-tshik tsok ai-pi , Lâm-lú-nóo-iù tsáu bē khì . |
| 台奸 三跤 眾 猙牲 ， 出賣 同胞 求 富貴 ， 害死 同胞 歹 算 起 ， 歹心 毒行 臭 名字 。 |
Tâi-kan sann-kha tsiòng tsing-sinn , Tshut-bē tông-pau kiû hù-kuì , Hāi-sí tông-pau pháinn sǹg khí , Pháinn-sim to̍k-hīng tshàu miâ-jī . |
| 時間 無情 若 火箭 ， 殖民 治 台 二十年 ， 抗日 失敗 為 啥乜 ， 毋是 先民 攏 驚死 。 |
Sî-kan bô-tsîng ná hué-tsìnn , Si̍t-bîn tī Tâi jī-tsa̍p-nî , Khòng-ji̍t sit-pāi uī siánn-mi̍h , M̄-sī siang-bîn lóng kiann-sí . |
| 毋是 攪沙 袂 做堆 ， 只是 全島 無 聯誼 ， 擱 有 大砲 佮 銃枝 ， 攏是 狗軍 佔 便宜 。 |
M̄-sī kiáu-sua bē tsò-tui , Tsí-sī tsuân-tó bô liân-gî , Koh ū tuā-phàu kah tshìng-ki , Lóng-sī káu-kun tsiàm pân-gî . |
