首頁 >資料庫介紹
目錄
回上頁

冊名 食新娘茶講四句歌
編者 林有來
出版社 新竹竹林書局
出版年 1989
篇名 食新娘茶講四句歌三集
顯示 的款式:
Lô-má-jī 是
漢字是
新娘 賢會 人 清讚 ，
入門 富貴 保 平安 。
食茶 恭賀 真 大辨 ，
添丁 進財 壽如山 。
Sin-niû hiân-huē lâng tshing-tsàn ,
Li̍p-bn̂g hù-kuì pó pîng-an .
Tsia̍h-tê kiong-hō tsin tuā-pān ,
Thiam-ting tsìn-tsâi siū-lû-san .
新娘 生 水 好 骨格 ，
好意 雙手 請 甜茶 。
恭賀 新婚 照 古例 ，
入門 好命 大 發 家 。
Sin-niû sinn suí hó kut-keh ,
Hó-ì sang-tshiú tshiánn tinn-tê .
Kiong-hō sin-hun tsiàu kóo-lē ,
Li̍p-bn̂g hó-miā tuā hua ke .
新娘 有 水 實在 講 ，
卜 接 甜茶 雙手 捧 。
食茶 好 話 說 相 送 ，
富貴 好 某 配 好 尫 。
Sin-niû ū suí si̍t-tsāi káng ,
Beh tsiap tinn-tê sang-tshiú phâng .
Tsia̍h-tê hó uē seh sann sàng ,
Hù-kuì hó bóo phuè hó ang .
新娘 生 水 有 上 算 ，
請 客 甜茶 煎 冰糖 。
三日 做客 雙人 返 ，
丁 財 福 壽 真 十全 。
Sin-niû sinn suí ū tsiūnn sǹg ,
Tshiánn kheh tinn-tê tsuann ping-thn̂g .
Sann-li̍t tsuè-kheh sang-lâng tńg ,
Ting tsâi hok siū tsin tsa̍p-tsn̂g .
來 食 喜茶 招 朋友 ，
嫁妝 專 是 緞 甲 綢 。
窈窕 淑女 姻緣 就 ，
君子 好 求 真 自由 。
Lâi tsia̍h hí-tê tsio pîng-iú ,
Kè-tsng tsuan sī tuān kah tiû .
Iáu-thiáu siok-lú in-iân tsiū ,
Kun-tsú hó kiû tsin tsū-iû .
人客 坐 歸廳 ，
聽 着 甌仔聲 。
新娘 塊 準備 ，
有 食 不免 驚 。
Lâng-kheh tsē kui-thiann ,
Thiann tio̍h au-á-siann .
Sin-niû teh tsún-pī ,
Ū tsia̍h m̄-bián kiann .
新娘 行 出 房 ，
茶盤 雙手 捧 。
確實 有 成意 ，
卜 且 咱 眾人 。
Sin-niû kiânn tshut pang ,
Tê-puânn sang-tshiú phâng .
Khak-si̍t ū sîng-ì ,
Beh tshiánn lán tsìng-lâng .
新娘 出 房宮 ，
茶 捧 幾十鍾 。
新娘 加 伊 講 ，
乎 人 且 代先 。
Sin-niû tshut pâng-king ,
Tê phâng kuí-tsa̍p-tsing .
Sin-niu kā i kóng ,
Hōo lâng tshiánn tāi-sing .
咱 人客 坐 歸排 ，
看 新娘 个 人才 。
新娘 塊 報 伊 知 ，
對 喜平 請過來 。
Lán lâng-kheh tsē kui-pai ,
Khuànn sin-niû ê lâng-tsâi .
Sin-niû teh pó i tsai ,
Tuì hí-pîng tshiánn--kè--lâi .
新娘 真 好意 ，
茶 捧 喜平 去 。
確實 有影勅 ，
衫 穿 粉紅色 。
Sin-niu tsin hó-ì ,
Tê phâng hí-pîng khì .
Khak-si̍t ū-iánn-thik ,
Sann tshīng hún-âng-sik .
坐 者 乙直 等 ，
野袂 着 到 咱 。
人 講 新娘 水 ，
果然 有影贊 。
Tsē tsia it-ti̍t tán ,
Iá-bē tio̍h kàu lán .
Lâng kóng sin-niû suí ,
Ko-liân ū-iánn-tsán .
真 白肉 小粒只 ，
玻璃襪 金薛薛 ，
甜茶 若 捧來 ，
咱 着 緊 共 接 。
Tsin pe̍h-bah suè-lia̍p-tsí ,
Po-lê-be̍h kim-si̍h-si̍h ,
Tinn-tê nā phâng--lâi ,
Lán tio̍h kín ka tsi̍h .
派頭 有 閣 大風 ，
待 人 又 能通 。
一對 那 龍鳳 ，
入門 財 丁 旺 。
Phài-thâu ū koh tāi-hong ,
Thāi lîn iū lîng-thong .
Tsi̍t-tuì ná lîng-hōng ,
Li̍p-bn̂g tsâi ting ōng .
人客 免 相 銃 ，
是 恁 愛 不是 我 興 。
四句 講 了 若 有通 ，
茶 卜 準 酒 共 恁 敬 。
Lâng-kheh bián siunn tshìng ,
Sī lín ài m̄-sī guá hìng .
Sì-kù kóng liáu nā ū-thong ,
Tê beh tsún tsiú kā lín kìng .
賢會 新娘 人 清讚 ，
入門 全家 保 平安 。
新娘 生 水 閣 大辦 ，
祝 恁 家官 壽 如 山 。
Hiân-huē sin-niû lâng tshing-tsàn ,
Li̍p-bn̂g tsuân-ke pó pîng-an .
Sin-niû sinn suí koh tuā-pān ,
Tsiok lín ke-kuann siū lû san .
到 者 無 拵 好朋友 ，
我 是 用 茶 準 燒酒 。
若 興 即 來 刺 看覓 ，
即 知 省 人 恰 技手 。
Kàu tsia bô tsûn hó-pîng-iú ,
Guá sī īng tê tsún sio-tsiú .
Nā hìng tsiah lâi tshì khuànn-bāi ,
Tsiah tsai siánn lâng khah ki-tshiú .
看 汝 四句 學 外多 ？
着 趁 今夜 兮 機會 。
冬瓜 拴 便便 ，
箭 甲 乎 汝 袂 講話 。
Khuànn lí sì-kù o̍h guā-tsuē ?
Tio̍h thàn kim-iā ê ki-huē .
Tang-kue tshuân piān-piān ,
Tsìnn kah hōo lí bē kóng-uē .
四句 若是 講 有通 ，
新娘 替 我 罩 威風 。
看 是 省人 袂曉 講 ，
甜茶 着 飲 三 碗公 。
Sì-kù nā-sī kóng ū-thong ,
Sin-niû thè guá tàu ui-hong .
Khuànn sī siánn-lâng bē-hiáu kóng ,
Tinn-tê tio̍h lim sann uánn-kong .
甜茶 捧 來 到 面前 ，
新娘 免 塊 倘 蚋榮 。
無 汝 兮 代志 ，
卜 典 四句 等 恰程 。
Tinn-tê phâng lâi kàu bīn-tsîng ,
Sin-niû bián teh siunn lâ-îng .
Bô lí ê tāi-tsì ,
Beh tián sì-kù tán khah-thîng .
今日 娶 入門 ，
嫁妝 滿 廳堂 。
新娘 閣 巧裝 ，
目啁又 廷純 。
Kin-li̍t tshuā li̍p-bn̂g ,
Kè-tsng muá thiann-tn̂g .
Sin-niû koh khá-tsng ,
Ba̍k-tsiuiū tîng-sûn .
好話 緊 講 ，
今夜 洞房 。
話 無 亂凸 ，
財 丁 興旺 。
Hó-uē kín kóng ,
Kim-iā tōng-pông .
Uē bô luān-phòng ,
Tsâi ting hing-ōng .
廳堂 物 真 多 ，
數 千 个 人客 。
喜酒 若 食過 ，
閣 討 新娘茶 。
Thiann-tn̂g bn̍gh tsin tsē ,
Sòo tshing ê lâng-kheh .
Hí-tsiú nā tsia̍h--kè ,
Koh thó sin-niû-tê .
新娘 甲 新人 ，
野 著 新娘房 。
先走 都 無隙 ，
甜茶 着 緊 捧 。
Sin-niû kah sin-lâng ,
Iá tī sin-niû-pâng .
Sian-tsáu too bô-phāng ,
Tinn-tê tio̍h kín phâng .
新娘 緊 出 阮 看覓 ，
紅包 治 阮 袋仔內 。
人 講 水醜 有 至再 ，
不通 乎 阮 箱 等待 。
Sin-niû kín tshut gún khuànn-bāi ,
Âng-pau tī gún tē-á-lāi .
Lâng kóng suí-bái ū tsi̍h-tsài ,
M̄-thang hōo gún siunn tán-thāi .
提錢 等 卜 壓茶鍾 ，
對 恁 家官 收 代先 。
新娘 入門 才子 盛 ，
男 宗保 女 木 桂英 。
The̍h-tsînn tan beh teh-tê-tsing ,
Tuì lín ke-kuann siu tāi-sing .
Sin-niû li̍p-bn̂g tsâi-tsú sīng ,
Lâm Tsong-pó lú Bo̍k Kuì-ing .
茶盤 淺淺 ，
茶甌 顯顯 。
我 無 恁 片 ，
止 有 二錢 。
Tê-puânn tshián-tshián ,
Tê-au hián-hián .
Guá bô lín phiàn ,
Tsí ū ln̄g-sián .
錢 是 ，
流通 者兮 好 。
食 好 相 打報 ，
乎 恁 發 萬草 。
Tsînn sī ,
Liû-thong tsiah-ē hó .
Tsia̍h hó sann phah-pò ,
Hōo lín huat bān-tshó .
新郎 娶 着 好 妻位 ，
所有 困難 今 放開 。
腹內 能通 人 閣 水 ，
今夜 恁 着 好 安睡 。
Sin-lông tshuā tio̍h hó tshe-uī ,
Sóo-ū khùn-lân tann pàng-khui .
Pat-lāi lîng-thong lâng koh suí ,
Kim-iā lín tio̍h hó an-suī .
翁姑 着 孝順 ，
客 來 好嘴 問 。
兒女 生 大群 ，
講話 那 詩韻 。
Ong-koo tio̍h hàu-sūn ,
Kheh lâi hó-tshuì būn .
Lî-lú sinn tuā-kûn ,
Kóng-uē ná si-ūn .
門當 戶對 ，
龍鳳 相隨 。
玳魚 落水 ，
永久 不開 。
Bûn-tong hōo-tuì ,
Liông-hōng siong-suî .
Tāi-hî lo̍h-tsuí ,
Íng-kiú m̄-khui .
好歹 尫某 愛 相勸 ，
有話 來 講 恰 甜 糖 。
婚姻 成就 免閣 問 ，
二姓 合婚 久長長 。
Hó-pái ang-bóo ài sann-khǹg ,
Ū-uē lâi kóng khah tinn thn̂g .
Hun-in sîng-tsiū bián-koh bn̄g ,
Lióng-sìng ha̍p-hun kú-tn̂g-tn̂g .
食新娘茶講四句歌二集 食新娘茶講四句歌四集