首頁 >資料庫介紹
目錄
回上頁

冊名 最新落陰相褒歌
編者 未知
出版社 新竹竹林書局
出版年 1987
篇名 下本
顯示 的款式:
Lô-má-jī 是
漢字是
梧桐樹腳 佇 這落 ，
專收 枉死 無命 哥 。
三姑 趕緊 來 毛灬 嫂 ，
毛灬 我 入城 通 尋 哥 。
Ngôo-tông-tshiū-kha tī tsit-lo̍h ,
Tsuan-siu óng-sí bô-miā ko .
Sann-koo kuánn-kín lâi tshuā só ,
Tshuā guá li̍p-siânn thang tshē ko .
嫂嫂 行 到 東門 內 ，
不時 煩惱 淚哀哀 。
全望 三姑 相 敢界 ，
阮 大兄 回陽 來 。
Só-só kiânn kàu Tang-bn̂g lāi ,
Put-sî huân-ló luī-ai-ai .
Tsn̂g-bāng Sann-koo sann kám-kài ,
Tshuā gún tuā-hiann huê-iông lâi .
我 今 行 到 東門 來 ，
尋無 恁 兄 淚哀哀 。
予 我 想 着 流 目屎 ，
去 帶 佗位 我 不知 。
Guá tann kiânn kàu Tang-bn̂g lâi ,
Tshē-bô lín hiann luī-ai-ai .
Hōo guá siūnn tio̍h lâu ba̍k-sái ,
Khì tuà tó-uī guá m̄-tsai .
東門 過 了 到 西門 ，
嫂嫂 因何 店 塊 瘡 。
有名 有姓 通 汝 問 ，
四角城內 尋 十全 。
Tang-bn̂g kè liáu kàu Sai-bn̂g ,
Só-só in-hô tiàm eh tshn̍gh .
Ū-miâ ū-sìnn thang lí bn̄g ,
Sì-kak-siânn-lāi tshē tsa̍p-tsn̂g .
我 今 行 到 西門 內 ，
看見 我 君 遠遠來 。
頭 烏 面 紅 雄界界 ，
予 我 一看 流 目滓 。
Guá tann kiânn kàu Sai-bn̂g lāi ,
Khuànn-kìnn guá kun hn̄g-hn̄g-lâi .
Thâu oo bīn âng hiông-kài-kài ,
Hōo guá tsi̍t-khuànn lâu ba̍k-tsái .
西門 我 嫂 看着 哥 ，
看着 目滓 雙港 落 。
三姑 實在 真正 好 ，
緊 我 哥 返 家 和 。
Sai-bn̂g guá só khuànn-tio̍h ko ,
Khuànn-tio̍h ba̍k-tsái sang-káng lo̍h .
Sann-koo si̍t-tsāi tsin-tsiànn hó ,
Kín tshuā guá ko tńg ka hô .
我 看 郎君 敢 有 命 ?
腳酸 手軟 路 袂行 。
卜 過 陰間 着 打拼 ，
手 牽 郎君 卜 出城 。
Guá khuànn lông-kun kánn ū miā ?
Kha-sng tshiú-nńg lōo buē-kiânn .
Beh kè im-kan tio̍h phah-piànn ,
Tshiú khan lông-kun beh tshut-siânn .
我 嫂 行到 東門 外 ，
着 與 我兄 伊 相 。
三魂 七魄 收 伊 煞 ，
哥 魂 不通 相 放拔 。
Guá só kiânn-kàu Tang-bn̂g guā ,
Tio̍h kāng guá-hiann i sann-tshuā .
Sam-hûn tshit-phik siu i suah ,
Ko hûn m̄-thang sann pàng-pua̍h .
我 今 返到 十門市 ，
買 物 予 君 汝 止飢 。
為 君 煩惱 無捨四 ，
害我 冥日 湳淚啼 。
Guá tann tńg-kàu Tsa̍p-bn̂g-tshī ,
Bué mi̍h hōo kun lí tsí-ki .
Uī kun huân-ló bô-siá-sì ,
Hāi-guá mî-li̍t lâm-luī-thî .
嫂 汝 行 到 十門街 ，
我 哥 陰魂 收 返回 。
腹 飢 點心 汝 着 買 ，
若是 無錢 即 來 提 。
Só lí kiânn kàu Tsa̍p-bn̂g-kue ,
Guá ko im-hûn siu tńg-huê .
Pak ki tiám-sim lí tio̍h bué ,
Nā-sī bô-tsînn tsiah lâi the̍h .
魂魄 收來 松柏林 ，
自 君 死後 苦 到 今 。
為 君 汝 苦 吃人罵 ，
險險 害 我 去 落監 。
Hûn-phik siu-lâi Tshîng-phik-nâ ,
Tsū kun sí-āu khóo kàu tann .
Uī kun lí khóo tsia̍h-lâng-mā ,
Hiám-hiám hāi guá khì lo̍h-kann .
哥 嫂 行 到 松柏街 ，
緊緊 相 通 返回 。
不通 延路 塊 講話 ，
予 我 等 甲 目啁 花 。
Ko só kiânn kàu Tshîng-phik-kue ,
Kín-kín sann-tshuā thang tńg-huê .
M̄-thang iân-lōo teh kóng-uē ,
Hōo guá tán kah ba̍k-tsiu hue .
行 到 橋中 我 緊 叫 ，
郎君 緊 過 鐵線橋 。
是 君 緣份 得 阮 借 ，
調土 落陰 尋 到 着 。
Kiânn kàu kiô-tiong guá kín kiò ,
Lông-kun kín kè Thi̍h-suànn-kiô .
Sī kun iân-hūn tit gún sioh ,
Tiau-kang lo̍h-im tshē kàu tio̍h .
鐵線橋中 哥 嫂 返 ，
三姑 一位 有 耽當 。
三魂 七魄 巢 收 返 ，
趕緊 跳 過 陽間門 。
Thi̍h-suànn-kiô-tiong ko só tńg ,
Sann-koo tsit-uī ū tam-tng .
Sam-hûn tshit-phik tsâu siu tńg ,
Kuánn-kín thiàu kè Iông-kan-bn̂g .
我 今 行 到 三角埔 ，
無 燈 無 火 卜 奈何 。
燈火 全無 行 無路 ，
卜甲 阮 身 佗位 摸 。
Guá tann kiânn kàu Sann-kak-poo ,
Bô ting bô hué beh nāi-hôo .
Ting-hué tsuân-bô kiânn bô-lōo ,
Beh-kah gún sin tó-uī moo .
烏烏 暗暗 那 有影 ，
我 發 毫光 予 恁 行 。
三魂 七魄 收 伊 定 ，
十條 魂魄 着 歸 兄 。
Oo-oo àm-àm nà ū-iánn ,
Guá huat hô-kong hōo lín kiânn .
Sam-hûn tshit-phik siu i tiānn ,
Tsa̍p-tiâu hûn-phik tio̍h kui hiann .
我 今 行 到 生人宮 ，
汗 流 汁 滴 滿 胸前 。
為 君 只擺 大 僥倖 ，
陰府 兮 路 行 無 停 。
Guá tann kiânn kàu Tshinn-lâng-king ,
Kuānn lâu tsap ti̍h muá hing-tsîng .
Uī kun tsí-pài tuā hiau-hīng ,
Im-hú ê lōo kiânn bô thîng .
生人宮中 嫂 回倒 ，
魂魄 不通 打 失落 。
十條 魂魄 收 伊 伊 ，
緊 返 咱厝 通 家和 。
Tshinn-lâng-king-tiong só huê-tò ,
Hûn-phik m̄-thang phah sit-lo̍h .
Tsa̍p-tiâu hûn-phik siu i hó ,
Kín tńg lán-tshù thong ka-hô .
我 今 行 到 金光 橋 ，
我 君 神魂 塊 伊 着 。
福德 正神 相 保借 ，
若 無 三姑 不 得 着 。
Guá tann kiânn kàu Kim-kong kiô ,
Guá kun sîn-hûn tè i tio̍h .
Hok-tik tsìng-sîn sann pó-sioh ,
Nā bô Sann-koo m̄ tit tio̍h .
金光橋中 嫂 回倒 ，
金童 玉女 引接 哥 。
嫂 汝 魂魄 收 伊 好 ，
不通 一條 打 失落 。
Kim-kong-kiô-tiong só huê-tò ,
Kim-tông gio̍k-lú ín-tsiap ko .
Só lí hûn-phik siu i hó ,
M̄-thang tsi̍t-tiâu phah sit-lo̍h .
我 今 行 到 六角庄 ，
四角亭中 有 花園 。
我 君 魂魄 着 巢 返 ，
共 娘 來 帶 陽間庄 。
Guá tann kiânn kàu La̍k-kak-tsng ,
Sì-kak-tîng-tiong ū hue-hn̂g .
Guá kun hûn-phik tio̍h tsâu tńg ,
Kāng niû lâi tuà Iông-kan-tsng .
六角亭中 嫂 回來 ，
卜 行 着 叫 我 哥 知 。
我 哥 目睭 帶 狗界 ，
不通 卜 提 人 花栽 。
La̍k-kak-tîng-tiong só huê-lâi ,
Beh kiânn tio̍h kiò guá ko tsai .
Guá ko ba̍k-tsiu tuà káu-kuài ,
M̄-thang beh the̍h lâng hue-tsai .
心酸嶺後 嫂 回倒 ，
是 嫂 盡心 去 尋 哥 。
第一 盡情 就 是 嫂 ，
落陰 君 返家和 。
Sim-sng-niá-āu só huê-tò ,
Sī só tsīn-sim khì tshē ko .
Tē-it tsīn-tsîng tio̍h sī só ,
Lo̍h-im tshuā kun tńg-ka-hô .
我 今 行 到 奈河橋 ，
我 君 神魂 塊 伊 着 。
是 君 情份 得 娘 借 ，
君 汝 神魂 緊 過橋 。
Guá tann kiânn kàu Nāi-hô-kiô ,
Guá kun sîn-hûn tè i tio̍h .
Sī kun tsîng-hūn tit niû sioh ,
Kun lí sîn-hûn kín kè-kiô .
奈河橋中 嫂 回來 ，
汝 着 有 叫 哥 就 知 。
全望 嫂嫂 相 敢界 ，
着求 三姑 罩 來 。
Nāi-hô-kiô-tiong só huê-lâi ,
Li tio̍h ū kiò ko tio̍h tsai .
Tsn̂g-bāng só-só sann kám-kài ,
Tio̍h-kiû Sann-koo tàu tshuā--lâi .
冷水坑中 嫂 塊行 ，
回陽 兮 茶 賜 我 兄 。
着 報 大兄 伊 知影 ，
賢弟 在 厝 等 大兄 。
Líng-tsuí-khinn-tiong só teh-kiânn ,
Huê-iông ê tê sù guá hiann .
Tio̍h pò tuā-hiann i tsai-iánn ,
Hiân-tē tsāi tshù tán tuā-hiann .
刣牛坑中 一 地號 ，
汝 娘 塊 叫 鱸鰻哥 。
走 去 陰間 無 煩惱 ，
虧 我 冥日 塊 苦 哥 。
Thâi-gû-khinn-tiong tsi̍t tē-hō ,
Lí niû teh kiò lôo-muâ-ko .
Tsáu khì im-kan bô huân-ló ,
Khui guá mî-li̍t teh khóo ko .
刣狗坑中 一 地里 ，
嫂嫂 卜 行 勿 過 時 。
我 嫂 真正 有 情義 ，
去 阮 兄 無 時 停 。
Thâi-káu-khinn-tiong tsi̍t tē-lí ,
Só-só beh kiânn mài kè sî .
Guá só tsin-tsiànn ū tsîng-gī ,
Khì tshuā gún hiann bô sî thîng .
刣狗坑中 一 地界 ，
郎君 汝 着 塊 娘 來 。
陰間 這 路 大 呆代 ，
予 我 想 着 流 泪滓 。
Thâi-káu-khinn-tiong tsi̍t tē-kài ,
Lông-kun lí tio̍h tè niû lâi .
Im-kan tsit lōo tuā phái-tāi ,
Hōo guá siūnn tio̍h lâu ba̍k-tsái .
刣狗坑中 一 地號 ，
嫂嫂 着 叫 我 大哥 。
大家 相 行 伊 好 ，
不通 塊 無 打 失落 。
Thâi-káu-khinn-tiong tsi̍t tē-hō ,
Só-só tio̍h kiò guá tuā-ko .
Ta̍k-ke sann-tshuā kiânn i hó ,
M̄-thang tè bô phah sit-lo̍h .
我 今 來 到 郎君井 ，
四个 查某 在 井邊 。
想 着 郎君 喉 就 滇 ，
若 回陽 就 達錢 。
Guá tann lâi kàu Lông-kun-tsínn ,
Sì-ê tsa-bóo tī tsínn-pinn .
Siūnn tio̍h lông-kun âu tio̍h tīnn ,
Tshuā nā huê-iông tio̍h ta̍t-tsînn .
郎君井邊 嫂 就 叫 ，
嫂嫂 卜 行 着 相招 。
汝 今 那 行 着 那 叫 ，
我 兄 塊 汝 即 會 着 。
Lông-kun-tsínn-pinn só tio̍h kiò ,
Só-só beh kiânn tio̍h sann-tsio .
Lí tann ná kiânn tio̍h ná kiò ,
Guá hiann tè lí tsiah ē tio̍h .
我 今 行 到 草埔路 ，
着 收 七條 兮 路途 。
收 君 魂魄 真 艱苦 ，
予 我 心肝 想 甲 烏 。
Guá tann kiânn kàu Tsháu-poo-lōo ,
Tio̍h siu tshit-tiâu ê lōo-tôo .
Siu kun hûn-phik tsin kan-khóo ,
Hōo guá sim-kuann siūnn kah oo .
草埔路中 嫂 回倒 ，
着 收 七條 兮 路頭 。
小弟 在 厝 塊 等候 ，
哥 回陽 嫂 真肴 。
Tsháu-poo-lōo-tiong só huê-kàu ,
Tio̍h siu tshit-tiâu ê lōo-thâu .
Sió-tī tsāi tshù teh tán-hāu ,
Tshuā ko huê-iông só tsin-gâu .
行到 陽間 清水泉 ，
報 君 汝 看 陽間山 。
皆再 回陽 通 做伴 ，
免 得 汝 娘 受 飫寒 。
Kiânn-kàu iông-kan Tshing-tsuí-tsuânn ,
Pò kun lí khuànn Iông-kan-suann .
Kai-tsài huê-iông thang tsuè-phuānn ,
Bián tit lí niû siū iau-kuânn .
陽間 清水 嫂 塊 行 ，
路頭 着 報 我 親兄 。
嫂嫂 有情 我 知影 ，
福德 正神 扶 大兄 。
Iông-kan Tshing-tsuí só teh kiânn ,
Lōo-thâu tio̍h pò guá tshin-hiann .
Só-só ū-tsîng guá tsai-iánn ,
Hok-tik tsìng-sîn hû tuā-hiann .
陽間 所在 照 原樣 ，
收 君 魂魄 落 田洋 。
我 君 此 去 着 識想 ，
不通 卜 閣 放拶 娘 。
Iông-kan sóo-tsāi tsiò guân-iūnn ,
Siu kun hûn-phik lo̍h tshân-iûnn .
Guá kun tshú khì tio̍h pat-siūnn ,
M̄-thang beh koh pàng-sak niû .
陽間 田園 嫂 回 倒 ，
我 嫂 有情 去 尋 哥 。
望求 三姑 罩 到 ，
魂魄 即 袂 打 失落 。
Iông-kan tshân-hn̂g só huê tò ,
Guá só ū-tsîng khì tshē ko .
Bāng-kiû Sann-koo tàu tshuā kàu ,
Hûn-phik tsiah buē phah sit-lo̍h .
陽間 田園 行透透 ，
叫 君 魂魄 着 過 溝 。
閣 行 無 遠 就 卜 到 ，
這所 就 是 咱 庄頭 。
Iông-kan tshân-hn̂g kiânn-thàu-thàu ,
Kiò kun hûn-phik tio̍h kè kau .
Koh kiânn bô hn̄g tio̍h beh kàu ,
Tsit-sóo tio̍h sī lán tsng-thâu .
我 嫂 行 到 這 大埕 ，
即時 叫 我 等 大兄 。
我 嫂 實在 有 相痛 ，
福德正神 保護 兄 。
Guá só kiânn kàu tsit tuā-tiânn ,
Tsik-sî kiò guá tán tuā-hiann .
Guá só si̍t-tsāi ū sann-thiànn ,
Hok-tik-tsìng-sîn pó-hōo hiann .
我 今 行 到 大門口 ，
遇 着 小叔 相撞頭 。
今日 恁 兄 返 回 到 ，
小叔 汝 着 叫 過溝 。
Guá tann kiânn kàu tuā-bn̂g-kháu ,
Gū tio̍h sió-tsik sann-tn̄g-thâu .
Kin-li̍t lín hiann tńg huê kàu ,
Sió-tsik lí io̍h kiò kè-kau .
我 今 共 嫂 相借問 ，
就 引 我 哥 入 廳堂 。
我 哥 今日 再 回返 ，
親像 失月 閣 再 光 。
Guá tann kā só sann-tsioh-bn̄g ,
Tio̍h ín guá ko li̍p thiann-tn̂g .
Guá ko kin-li̍t tsài huê-tńg ,
Tshin-tshiūnn sit-gue̍h koh tsài kng .
嫂嫂 行 到 大廳 邊 ，
恰似 失月 再 團圓 。
今日 一家 得 相見 ，
死 了 活來 恰 達錢 。
Só-só kiânn kàu tuā-thiann pinn ,
Khah-sū sit-gue̍h tsài thuân-înn .
Kin-li̍t tsi̍t-ke tit sann-kìnn ,
Sí liáu ua̍h--lâi khah ta̍t-tsînn .
我 君 引入 眠床 內 ，
放 落 哥 魂 回陽 來 。
亦 是 前世 做 好代 ，
笑 甲 嘴仔 義西西 。
Guá kun ín-li̍p bîn-tshn̂g lāi ,
Pàng lo̍h ko hûn huê-iông lâi .
Ia̍h sī tsîng-sì tsuè hó-tāi ,
Tshiò kah tshuì-á gī-sai-sai .
引 入 房中 我 就 暢 ，
放 落 眠床 哥 回陽 。
兄弟 相 見 金金相 ，
我 嫂 十分 真 盡忠 。
Ín li̍p pâng-tiong guá tio̍h thiòng ,
Pàng lo̍h bîn-tshn̂g ko huê-iông .
Hiann-tī sann kìnn kim-kim-siòng ,
Guá só tsa̍p-hun tsin tsīn-tiong .
為 着 我 君 真 煩惱 ，
險險 去 做 犯人婆 。
小叔 與 我 刣 甲 錯 ，
講 我 毒藥 害死 哥 。
Uī io̍h guá kun tsin huân-ló ,
Hiám-hiám khì tsuè huān-lâng-pô .
Sió-tsik kā guá thâi kah tshoh ,
Kóng guá to̍k-io̍h hāi-sí ko .
嫂嫂 閒話 不通 講 ，
趕緊 來 去 拜 天公 。
着拜 土地 恰 定擋 ，
講 我 大兄 返 家鄉 。
Só-só îng-uē m̄-thang kóng ,
Kuánn-kín lâi hì pài thinn-kong .
Tio̍h-pài thóo-tī khah tīng-tòng ,
Kóng guá tuā-hiann tńg ka-hiong .
小叔 汝 去 點 香火 ，
着 拜 佛祖 不通 釵 。
咱 今 雙人 行 到 塊 ，
親像 雲 開 見 着 月 。
Sió-tsik lí khì tiám hiunn-hé ,
Tio̍h ài pu̍t-tsóo m̄-thang the .
Lán tann sang-lâng kiânn kàu tè ,
Tshin-tshiūnn hûn khui kìnn io̍h ge̍h .
我 今 香火 點 好好 ，
就 叫 嫂嫂 共 大哥 。
先 拜 佛祖 即 有 好 ，
佛祖 拜 好 拜 公婆 。
Guá tann hiunn-hué tiám hó-hó ,
Tio̍h kiò só-só kāng tuā-ko .
Sing pài pu̍t-tsóo tsiah ū hó ,
Pu̍t-tsóo pài hó pài kong-pô .
我 今 拜 好 都 定擋 ，
提錢 予 汝 買 豬公 。
我 今 真情 共 汝 講 ，
亦 着 買 羊 即 有 通 。
Guá tann pài hó too tīng-tòng ,
The̍h-tsînn hōo lí bué ti-kong .
Guá tann tsin-tsîng kā lí kóng ,
Ia̍h tio̍h bué iûnn tsiah ū thong .
嫂嫂 汝 今 交代 我 ，
買 豬 買 羊 卻 無絕 。
來去 落街 買 金紙 ，
答謝 神明 恰 快活 。
Só-só lí tann kau-tāi guá ,
Bué ti bué iûnn khiok bô-tsua̍h .
Lâi-khì lo̍h-kue bué kim-tsuá ,
Tap-siā sîn-bîng khah khuìnn-ua̍h .
金紙 卜買 上 中 下 ，
或 買 金座 無爭差 。
巧氣 小叔 免 人 教 ，
亦着 演戲 謝 三界 。
Kim-tsuá beh-bué siōng tiong hā ,
Hik bué kim-tsō bô-tsing-tsha .
Khiáu-khì sió-tsik bián lâng kà ,
Ia̍h-tio̍h ián-hì siā sam-kài .
我 今 落街 來 請 戲 ，
刣豬 刣羊 答謝 天 。
就 叫 朋友 去 借 椅 ，
椅棹 借 來 搭 戲棚 。
Guá tann lo̍h-kue lâi tshiánn hì ,
Thâi-ti thâi-iûnn tap-siā thinn .
Tio̍h kiò pîng-iú khì tsioh í ,
Í-toh tsioh lâi tah hì-pînn .
就叫 朋友 借 椅棹 ，
卜 搭 戲棚 舉 竹高 。
請 人 看戲 即 有 好 ，
不管 朋友 共 弟哥 。
Tio̍h-kiò pîng-iú tsioh í-toh ,
Beh tah hì-pînn gia̍h tik-ko .
Tshiánn lâng khuànn-hì tsiah ū hó ,
M̄-kuán pîng-iú kāng tī-ko .
朋友 弟兄 我 亦 請 ，
姑 姨 舅 妗 叫 伊 行 。
大姊 小妹 報 知影 ，
講 嫂 落陰 返 兄 。
Pîng-iú tī-hiann guá ia̍h tshiánn ,
Koo î kū kīm kiò i kiânn .
Tuā-tsí sió-muē pò tsai-iánn ,
Kóng só lo̍h-im tshuā tńg hiann .
卜 掠 豬公 謝 三界 ，
卜 演 好戲 笑西西 。
大家 來到 這 所在 ，
知 我 陰間 君 來 。
Beh lia̍h ti-kong siā sam-kài ,
Beh ián hó-hì tshiò-hai-hai .
Ta̍k-ke lâi-kàu tsit sóo-tsāi ,
Tsai guá im-kan tshuā kun lâi .
三界 謝 了 亦 定擋 ，
就 想 卜 閣 謝 城隍 。
共 恁 朋友 大家 講 ，
君 回陽 返 家鄉 。
Sam-kài siā liáu ia̍h tīng-tòng ,
Tio̍h siūnn beh koh siā sîng-hông .
Kā lín pîng-iú ta̍k-ke kóng ,
Tshuā kun huê-iông tńg ka-hiong .
勸 恁 朋友 着 做好 ，
奸雄 ___lng7- 二 字___ 不通 學 。
勸 恁 大家 着 學好 ，
不通 卜 夯 刣人刀 。
Khǹg lín pîng-iú tio̍h tsuè-hó ,
Kan-hiông ln̄g- lī m̄-thang o̍h .
Khǹg lín ta̍k-ke tio̍h o̍h-hó ,
M̄-thang beh gia̍h thâi-lâng-to .
歌中 唱來 真 會和 ，
竹林 印歌 別人 無 。
大家 朋友 着 學好 ，
不通 風梭 想 迌 。
Kua-tiong tshiùnn--lâi tsin ē-hô ,
Tik-nâ ìn-kua pa̍t-lâng bô .
Ta̍k-ke pîng-iú tio̍h o̍h-hó ,
M̄-thang hong-so siūnn thit-thô .
落陰 相褒 歌 者 止 ，
大家 聽 着 大 歡喜 。
恁 若 看了 有 趣味 ，
買 去 念看 就 知枝 。
Lo̍h-im sio-po kua tsia tsí ,
Ta̍k-ke thiann tio̍h tuā huann-hí .
Lín nā khuànn-liáu ū tshù-bī ,
Bué khì liām-khuànn tio̍h tsai-ki .
中本