首頁 >資料庫介紹
目錄
回上頁

冊名 最新落陰相褒歌
編者 未知
出版社 新竹竹林書局
出版年 1987
篇名 上本
顯示 的款式:
Lô-má-jī 是
漢字是
編出 落陰 卜 相褒 ，
聲聲 句句 念 兮和 。
有人 聽歌 那 卜 學 ，
無 好 心神 是 學無 。
Pian-tshut lo̍h-im beh sio-po ,
Siann-siann kù-kù liām ē-hô .
Ū-lâng thiann-kua nā beh o̍h ,
Bô hó sim-sîn sī o̍h-bô .
大家 聽歌 聽 分明 ，
我 這 唱歌 是 正經 。
好 呆 歌詩 是 不等 ，
聲聲 句句 說 分明 。
Ta̍k-ke thiann-kua thiann hun-bîng ,
Guá tse tshiùnn-kua sī tsìng-king .
Hó phái kua-si sī put-tíng ,
Siann-siann kù-kù seh hun-bîng .
君 身 有時 頭殼 痛 ，
冥日 思想 無 心成 。
吩咐 人 來 我 知影 ，
那 知 君 汝 無 運 行 。
Kun sin ū-sî thâu-khak thiànn ,
Mî-li̍t su-sióng bô sim-tsiânn .
Huan-hù lâng lâi guá tsai-iánn ,
Nà tsai kun lí bô ūn kiânn .
頭殼 若 痛 真 不好 ，
汝 娘 差人 買 瘋膏 。
來 搭 賓邊 即時 好 ，
隨時 乎 哥 通 迌 。
Thâu-khak nā thiànn tsin m̄-hó ,
Lí niû tshe-lâng bué hong-ko .
Lâi tah pìn-pinn tsik-sî hó ,
Suî-sî hōo ko thang thit-thô .
甲 娘 瘋膏 不通 買 ，
瘋膏 來 貼 無 聖會 。
汝 哥 只病 是 身底 ，
頭殼 即 會 致 虛衰 。
Kah niû hong-ko m̄-thang bué ,
Hong-ko lâi tah bô siánn-huè .
Lí ko tsí-pīnn sī sin-tué ,
Thâu-khak tsiah ē tì hi-sue .
人 說 瘋膏 即 時行 ，
卜 買 瘋膏 來 救 兄 。
都是 我 兄 不 知影 ，
那 貼 鬢邊 就 袂 痛 。
Lâng seh hong-ko tsiah sî-kiânn ,
Beh bué hong-ko lâi kiù hiann .
Too-sī guá hiann m̄ tsai-iánn ,
Nā tah pìn-pinn tio̍h buē thiànn .
汝 哥 有 致 身底 病 ，
何用 瘋膏 貼 鬢邊 ?
人馬 即 多 撻撻鄭 ，
予 人 笑 我 半頭青 。
Lí ko ū tì sin-tué pīnn ,
Hô-iōng hong-ko tah pìn-pinn ?
Lîn-má tsiah tsuē that-that-tīnn ,
Hōo lâng tshiò guá puànn-thâu-tshinn .
聽 哥 汝 說 身底 病 ，
我 娘 共 哥 請 先生 。
算盤 打去 不着 見 ，
必定 呆運 着 了錢 。
Thiann ko lí seh sin-tué pīnn ,
Guá niû kā ko tshiánn sian-sinn .
Sǹg-puânn phah--khì m̄-tio̍h kìnn ,
Pit-tīng phái-ūn tio̍h liáu-tsînn .
小娘 有心 我 都 知 ，
廣着 先生 緊 請來 。
安 落 脈古 札 看 覓 ，
症頭 臨危 我 真知 。
Sió-niû ū-sim guá too tsai ,
Kóng-tio̍h sian-sinn kín tshiánn--lâi .
Àn lo̍h be̍h-kóo tsat khuànn bāi ,
Tsìng-thâu lîm-guî guá tsin-tsai .
有 請 先生 節脈理 ，
症頭 臨危 不敢 醫 。
娘 汝 這辦 無 福氣 ，
尋 無 真仙 救 哥 起 。
Ū tshiánn sian-sinn tsat-be̍h-lí ,
Tsìng-thâu lîm-guî m̄-kánn i .
Niû lí tsit-pān bô hok-khì ,
Tshē bô tsin-sian kiù ko khí .
我 娘 請 先生 到位 ，
節脈 症頭 大 臨危 。
予 我 想着 土 大愧 ，
敢 會 予 娘 汝 克虧 。
Guá niû tshiánn sian-sinn kàu-uī ,
Tsat-be̍h tsìng-thâu tuā lîm-guî .
Hōo guá siūnn-tio̍h thóo tuā-khuì ,
Kán ē hōo niû lí khik-khui .
先生 有 請 我 厝 返 ，
看脈 煞 無 開 藥方 。
先生 卜 行 真 打算 ，
無 開 君臣 通 煎湯 。
Sian-sinn ū tshiánn guá tshù tńg ,
Khuànn-be̍h suah bô khui io̍h-hng .
Sian-sinn beh kiânn tsin phah-sńg ,
Bô khui kun-sîn thang tsuann-thng .
我 今 共 娘 說 清楚 ，
看 這 病症 敢 袂好 。
就 勸 我 娘 免 煩惱 ，
我 个 性命 敢 兮 無 ？
Guá tann kā niû seh tshing-tshó ,
Khuànn tse pīnn-tsìng kánn buē-hó .
Tio̍h khǹg guá niû bián huân-ló ,
Guá ê sìnn-miā kán ē bô ?
共 哥 汝 說 呆 字運 ，
燒香 共 哥 下 灶君 。
米糕 雞蛋 來 補運 ，
本命 兮 錢 哥 出運 。
Kā ko lí seh phái lī-ūn ,
Sio-hiunn kā ko hē tsàu-kun .
Bí-ko kue-ln̄g lâi póo-ūn ,
Pún-miā ê tsînn ko tshut-ūn .
我 聽 小娘 汝 塊 講 ，
共 我 緊 下 灶君公 。
娘 汝 着說 恰 定擋 ，
趕緊 退我 去 走崇 。
Guá thiann sió-niû lí teh kóng ,
Kā guá kín hē tsàu-kun-kong .
Niû lí tio̍h-seh khah tīng-tòng ,
Kuánn-kín thuè-guá khì tsáu-tsông .
聽 哥 汝 說 者 僥倖 ，
我 緊 燒香 下 神明 。
全望 神明 着 感應 ，
保庇 福祿壽 康寧 。
Thiann ko lí seh tsiah hiau-hīng ,
Guá kín sio-hiunn hē sîn-bîng .
Tsn̂g-bāng sîn-bîng tio̍h kám-ìng ,
Pó-pì hok-lo̍k-siū khong-lîng .
雖然 神明 各處 下 ，
共 娘 汝 說 恰 着脈 。
我 今 事 真 難得 假 ，
性命 敢 會 閻君 个 。
Sui-liân sîn-bîng kok-tshù hē ,
Kā niû lí seh khah tio̍h-be̍h .
Guá tann sū tsin lân-tit ké ,
Sìnn-miā kán ē giâm-kun ê .
聽 哥 汝 講 我 就 哮 ，
想着 目屎 煞 直 流 。
我 君 貴人 若 不到 ，
想 只 症頭 無 應效 。
Thiann ko lí kóng guá tio̍h háu ,
Siūnn-tio̍h ba̍k-sái suah ti̍t lâu .
Guá kun kuì-lîn nā m̄-kàu ,
Siūnn tsí tsìng-thâu bô ìng-hāu .
我 今 真情 共 娘 講 ，
這病 除非 下 城隍 。
症頭 沉重 人 若 戇 ，
娘 汝 今日 着 知 防 。
Guá tann tsin-tsîng kā niû kóng ,
Tsit-pīnn tî-hui hē sîng-hông .
Tsìng-thâu tîm-tāng lâng nā gông ,
Niû lí kin-li̍t tio̍h tsai hông .
說 到 城隍 我 緊 下 ，
我 君 那 好 夯 刀枷 !
雙腳 跪落 說 詳細 ，
下日 隨香 阮 二个 。
Seh kàu sîng-hông guá kín hē ,
Guá kunnà nà hó giâ to-kê !
Siang-kha kuī-lo̍h seh siông-sè ,
Ē-li̍t suî-hiunn gún ln̄g-ê .
問 娘 城隍 下 按盞 ？
一拵 燒熱 一陣 寒 。
症頭 臨危 娘 着看 ，
全望 我 娘 汝 主盤 。
Bn̄g niû sîng-hông hē àn-tsuánn ?
Tsi̍t-tsūn sio-lua̍h tsi̍t-tsūn kuânn .
Tsìng-thâu lîm-guî niû tio̍h-khuànn ,
Tsn̂g-bāng guá niû lí tsú-puânn .
听哥 汝 說 卜 按怎 ？
緊 請 城隍 來 出壇 。
城隍 跳 起 就 請 看 ，
隨 派 爐丹 共 化單 。
Thiann-ko lí seh beh àn-tsuánn ?
Kín tshiánn sîng-hông lâi tshut-tuânn .
Sîng-hông tiô khí tio̍h tshiánn khuànn ,
Suî phài lôo-tan kāng huà-tuann .
提起 爐丹 緊 煎便 ，
煎 好 捧來 過 香煙 。
看 哥 身體 人 真 善 ，
緊 捧 乎 飲 不通 踐 。
The̍h-khí lôo-tan kín tsuann-piān ,
Tsuann hó phâng-lâi kè hiunn-ian .
Khuànn ko sin-thé lâng tsin siān ,
Kín phâng hoo lim m̄-thang tshiân .
等 娘 爐丹 捧 到 嘴 ，
症頭 臨危 嘴 袂 開 。
予 娘 想着 喘 大愧 ，
尋 無 真仙 通 改為 。
Tán niû lôo-tan phâng kàu tshuì ,
Tsìng-thâu lîm-guî tshuì buē khui .
Hōo niû siūnn-tio̍h tshuán tuā-khuì ,
Tshē bô tsin-sian thang kái-uî .
我 娘 汝 看 真 煩惱 ，
症頭 臨危 吞 袂落 。
目啁 金金 塊 看嫂 ，
今日 我 娘 着 伐落 。
Guá niû lí khuànn tsin huân-ló ,
Tsìng-thâu lîm-guî thun buē-lo̍h .
Ba̍k-tsiu kim-kim teh khuànn-só ,
Kin-li̍t guá niû tio̍h hua̍t-lo̍h .
藥 吞 袂落 敢 會 死 ，
小娘 趕緊 夯 湯匙 。
若 吞 過 喉 就 欣喜 ，
城隍 保庇 我 君 伊 。
Io̍h thun buē-lo̍h kán ē sí ,
Sió-niû kuánn-kín gia̍h thng-sî .
Nā thun kè âu tio̍h huann-hí ,
Sîng-hông pó-pì guá kun i .
我 今 照實 共 娘 報 ，
房中 小鬼 卜 捉 哥 。
盡情 幾句 交帶 嫂 ，
我 兮 性命 敢 會 無 ？
Guá tann tsiàu-si̍t kā niû pò ,
Pâng-tiong sió-kuí beh lia̍h ko .
Tsīn-tsîng kuí-kù kau-tāi só ,
Guá ê sìnn-miā kán ē bô ?
是 哥 熱狂 亂亂報 ，
汝 說 有 鬼 得確 無 。
房中 一个 就是 嫂 ，
就是 店 者 塊 顧 哥 。
Sī ko lia̍t-kông luān-luān-pò ,
Lí seh ū kuí tik-khak bô .
Pâng-tiong tsi̍t-ê tio̍h-sī só ,
Tio̍h-sī tiàm tsia teh kòo ko .
真真 有影 即有 講 ，
房中 小鬼 有 三人 。
一个 頭鬃 如蔥蔥 ，
一个 目睭 紅紅紅 。
Tsin-tsin ū-iánn tsiah-ū káng ,
Pâng-tiong sió-kuí ū sann-lâng .
Tsi̍t-ê thâu-tsang lû-tsháng-tsháng ,
Tsi̍t-ê ba̍k-tsiu âng-âng-âng .
聽 哥 汝 說 一 下項 ，
小鬼 目睭 簡 兮 紅 。
是 哥 熱狂 亂亂講 ，
是 我 塊 顧 汝 一人 。
Thiann ko lí seh tsit ē-hāng ,
Sió-kuí ba̍k-tsiu kán ē âng .
Sī ko lia̍t-kông luān-luān-káng ,
Sī guá teh kòo lí tsi̍t-lâng .
不是 熱狂 亂亂講 ，
一个 塊 扭 我 頭鬃 ，
一个 攬身 全 不放 ，
一个 塊 摃 我 腳銅 。
M̄-sī lia̍t-kông luān-luān-káng ,
Tsi̍t-ê teh giú guá thâu-tsang ,
Tsi̍t-ê lám-sin tsuân m̄-pàng ,
Tsi̍t-ê teh kòng guá kha-tâng .
聽 哥 汝 說 嫂 就 戇 ，
趕緊 共 哥 叫 司公 。
就叫 司公 共 哥 創 ，
收除 小鬼 皆 滅亡 。
Thiann ko lí seh só tio̍h gông ,
Kuánn-kín kā ko kiò sai-kong .
Tio̍h-kiò sai-kong kā ko tshòng ,
Siu-tî sió-kuí kai bia̍t-bông .
小娘 心肝 有 去處 ，
趕緊 共 哥 叫 法師 。
小鬼 先 治 那 不去 ，
性命 註定 伊 收除 。
Sió-niû sim-kuann ū khì-tshù ,
Kuánn-kín kā ko kiò huat-su .
Sió-kuí sian tī nā m̄-khì ,
Sìnn-miā tsù-tiānn i siu-tî .
法師 請神 束 鹽米 ，
就 貼 靈符 無 延遲 。
小鬼 全 不 過 鄉里 ，
我 今 共 娘 汝 通知 。
Huat-su tshiánn-sîn siak iâm-bí ,
Tio̍h tah lîng-hû bô iân-tî .
Sió-kuí tsuân bô kè hiunn-lí ,
Guá tann kā niû lí thong-ti .
法師 請神 銅鐘 聲 ，
手 捧 鹽米 入 房 行 。
不貼 皇旨 有 据定 ，
就叫 正神 扶持 兄 。
Huat-su tshiánn-sîn tâng-tsing siann ,
Tshiú phâng iâm-bí li̍p pâng kiânn .
M̄-tah hông-tsí ū kù-tiānn ,
Tio̍h-kiò tsìng-sîn hû-tshî hiann .
法師 行入 房宮 內 ，
小鬼 笑 甲 唏獅獅 。
全無 着驚 過 所在 ，
對 兄 頭殼 一直 獅 。
Huat-su kiânn-li̍p pâng-king lāi ,
Sió-kuí tshiò kah hi-sai-sai .
Tsuân-bô tio̍h-kiann kè sóo-tsāi ,
Tuì hiann thâu-khak it-ti̍t sai .
法師 入房 進 符令 ，
手 捧 法氣 做 頭前 。
靈符 貼 在 蚊帳 頂 ，
一張 掛 在 兄 胸前 。
Huat-su li̍p-pâng tsìn hû-līng ,
Tshiú phâng huat-khì tsuè thâu-tsîng .
Lîng-hû tah tī báng-tà tíng ,
Tsi̍t-tiunn kuà tī hiann hing-tsîng .
法師 入房 鎮 符令 ，
小鬼 掠 兄 店 塊 爭 。
想 到 性命 真 僥倖 ，
無彩 小娘 汝 奉成 。
Huat-su li̍p-pâng tìn hû-līng ,
Sió-kuí lia̍h hiann tiàm teh tsing .
Siūnn kàu sìnn-miā tsin hiau-hīng ,
Bô-tshái sió-niû lí hōng-sîng .
法師 入房 打 法索 ，
看 伊 小鬼 出去 無 ？
保庇 我 兄 着 緊好 ，
免 娘 干苦 塊 顧 哥 。
Huat-su li̍p-pâng phah huat-soh ,
Khuànn i sió-kuí tshut-khì bô ?
Pó-pì guá hiann tio̍h kín-hó ,
Bián niû kan-khóo teh kòo ko .
法師 一時 打 法索 ，
小鬼 緊去 舉 大刀 。
我 今 盡情 勸 大嫂 ，
緊 辭 司公 來 返 和 。
Huat-su tsi̍t-sî phah huat-soh ,
Sió-kuí kín-khì gia̍h tuā-to .
Guá tann tsīn-tsîng khǹg tuā-só ,
Kín sî sai-kong lâi tńg hô .
聽見 郎君 塊 勸 阮 ，
予 我 泪滓 準 飯 吞 。
就請 司公 來 議論 ，
緊 去 廳中 收 哥 魂 。
Thiann-kìnn lông-kun teh khǹg gún ,
Hōo guá ba̍k-tsái tsún pn̄g thun .
Tio̍h-tshiánn sai-kong lâi gī-lūn ,
Kín khì thiann-tiong siu ko hûn .
身紙 魂魄 收 無倒 ，
無彩 我 娘 兮 功勞 。
我 今 幾句 通知 嫂 ，
費神 我 娘 奉承 哥 。
Sin-tsuá hûn-phik siu bô-tò ,
Bô-tshái guá niû ê kong-lô .
Guá tann kuí-kù thong-ti só ,
Huì-sîn guá niû hōng-sîng ko .
法師 魂衫 提 乎 阮 ，
小娘 衫帕 收 哥 魂 。
點香 三支 叫 一困 ，
三魂 七魄 歸 哥 身 。
Huat-su hûn-sann the̍h hōo gún ,
Sió-niû sann-phè siu ko hûn .
Tiám-hiunn sann-ki kiò tsi̍t-khùn ,
Sam-hûn tshit-phik kui ko sin .
我 今 勸 娘 着 打算 ，
緊 辭 司公 通 出門 。
身紙 魂魄 收 袂 返 ，
症頭 倒返 不 離床 。
Guá tann khǹg niû tio̍h phah-sǹg ,
Kín sî sai-kong thang tshut-bn̂g .
Sin-tsuá hûn-phik siu buē tńg ,
Tsìng-thâu tò-tńg m̄ lî-tshn̂g .
聽哥 汝 說 娘 就哮 ，
手 提 紅紙 包 紅包 。
望卜 共 哥 好 到 老 ，
誰 知 我 哥 致 症頭 。
Thiann-ko lí seh niû tio̍h-háu ,
Tshiú the̍h âng-tsuá pau âng-pau .
Bāng-beh kāng ko hó kàu lāu ,
Tsuî tsai guá ko tì tsìng-thâu .
人 說 生死 天 註定 ，
勸 娘 不免 可憐 兄 。
真仙 難救 無命 子 ，
壽數 皆 終 難 改晟 。
Lâng seh sinn-sú thinn tsù-tiānn ,
Khǹg niû m̄-bián khó-liân hiann .
Tsin-sian lân-kiù bô-miā kiánn ,
Siū-sòo kai tsiong lân kái-tshiânn .
聽 哥 汝 說 真 失德 ，
恰慘 刈 娘 腳堵肉 。
留 我 呆命 無 路益 ，
塊君 汝 死 恰 明白 。
Thiann ko lí seh tsin sit-tik ,
Khah-tshám kuah niû kha-tóo-hi̍k .
Lâu guá phái-miā bô lōo-ik ,
Tè-kun lí sí khah bîng-pi̍k .
共 娘 汝 說 是 實在 ，
緊 去 叫 阮 小弟 來 。
我 若 死了 伊 即來 ，
責娘 兮 罪 娘 就 知 。
Kā niû lí seh sī si̍t-tsāi ,
Kín khì kiò gún sió-tī lâi .
Guá nā sí-liáu i tsiah-lâi ,
Tsik-niû ê tsuē niû tio̍h tsai .
甲 阮 去 叫 恁 賢弟 ，
無人 共 哥 捧 茶湯 。
生 阮 查某 恰 須世 ，
無人 替 我 通 岸家 。
Kah gún khì kiò lín hiân-tē ,
Bô-lâng kā ko phâng tê-thng .
Sinn gún tsa-bóo khah su-sè ,
Bô-lâng thuè guá thang huānn-ke .
我 今 真情 通知 嫂 ，
我 只 茶湯 吞 袂落 。
姑 不 如章 走 去 報 ，
我 死 即來 就 花糕 。
Guá tann tsin-tsîng thong-ti só ,
Guá tsí tê-thng thun buē-lo̍h .
Koo put lî-tsiong tsáu khì pò ,
Guá sí tsiah-lâi tio̍h hue-ko .
望卜 我 哥 病 快好 ，
甲 阮 害 哥 斷然 無 。
伊 來 若敢 橫橫過 ，
終身 來死 通 塊 哥 。
Bāng-beh guá ko pīnn kìn-hó ,
Kah gún hāi ko tuān-liân bô .
I lâi nā-kánn huâinn-huâinn-kò ,
Tsiong-sin lâi--sí thang tè ko .
央 娘 去 叫 阮 小弟 ，
無 叫 伊 來 就 竅欺 。
欠彩 下 日 一下 死 ，
說 娘 毒藥 害 君 裡 。
Iong niû khì kiò gún sió-tī ,
Bô kiò i lâi tio̍h khiau-khi .
Kiám-tshái ē li̍t tsi̍t-ē sí ,
Seh niû to̍k-io̍h hāi kun lí .
央 我 去 叫 恁 小弟 ，
叫 伊 來 看 就 知枝 。
煩惱 過 多 共卜死 ，
卜行 腳骨 難得 移 。
Iang guá khì kiò lín sió-tī ,
Kiò i lâi khuànn tio̍h tsai-ki .
Huân-ló kè tsuē kiông-beh-sí ,
Beh-kiânn kha-kut lân-tit î .
好呆 是 娘 八字 命 ，
姑不而將 亦着 行 。
去 報 舍弟 伊 知影 ，
即袂 講 娘 害死 兄 。
Hó-phái sī niû pueh-lī miā ,
Koo-put-lî-tsiong ia̍h-tio̍h kiânn .
Khì pò sià-tē i tsai-iánn ,
Tsiah-buē kóng niû hāi-sí hiann .
汝 娘 小心 塊 奉待 ，
伊 來 探聽 就 會知 。
見着 聖佛 趕緊 拜 ，
下 卜 我君 早 起來 。
Lí niû sió-sim teh hōng-thāi ,
I lâi thàm-thiann tio̍h ē-tsai .
Kìnn-tio̍h siànn-pu̍t kuánn-kín pài ,
Hē beh guá-kun tsá khí--lâi .
我 今 今日 敢 會 死 ，
牽 娘 兮 手 交 鎖匙 。
甲 娘 床廚 緊 開 起 ，
去 提 銀兩 勿 延遲 。
Guá tann kin-li̍t kánn ē sí ,
Khan iû ê tshiú kau só-sî .
Kah niû tshn̂g-tû kín khui khí ,
Khì the̍h gûn-niú mài iân-tî .
郎君 鎖匙 交 予 嫂 ，
看 只 辦世 敢 會 無 !
去 開 床廚 真 煩惱 ，
真 驚 見 銀 不 見 哥 。
Lông-kun só-sî kau hōo só ,
Khuànn tsí pān-sè kánn ē bô !
Khì khui tshn̂g-tû tsin huân-ló ,
Tsin kiann kìnn gûn m̄ kìnn ko .
講 娘 盡心 奉承 阮 ，
交代 我 娘 三百 銀 。
一百 庫錢 打 予 阮 ，
一百 乞子 通 傳 君 。
Kóng niû tsīn-sim hōng-sîng gún ,
Kau-tāi guá niû sann-pah gûn .
Tsi̍t-pah khòo-tsînn phah hōo gún ,
Tsi̍t-pah khit-kiánn thang thuân kun .
做 哥 功德 來 做巡 ，
廳中 卜 安 君 靈魂 。
君 死 留 阮 真 呆命 ，
終 身 自盡 塊 君 行 。
Tsuè ko kong-tik lâi tsuè-sûn ,
Thiann-tiong beh an kun lîng-hûn .
Kun sí lâu gún tsin phái-miā ,
Tsiong sin tsū-tsīn tè kun kiânn .
一百 予 娘 乞 校生 ，
一百 共 我 打 庫錢 。
我 今 那 說 喉 那 鄭 ，
我 命 因何 安年生 ！
Tsi̍t-pah hōo niû khit hāu-sinn ,
Tsi̍t-pah kā guá phah khòo-tsînn .
Guá tann ná seh âu ná tīnn ,
Guá miā in-hô àn-nî-sinn !
一百 共 君 做 功果 ，
做 卜 予 君 汝 去 蘇 。
放拶 汝 娘 卜 省步 ？
克開 君 死 去 困土 。
Tsi̍t-pah kā kun tsuè kong-kóo ,
Tsuè beh hōo kun lí khì soo .
Pàng-sak lí niû beh siánn-pōo ?
Khik-khui kun sí khì khùn-thôo .
無 放 家伙 予 娘 得 ，
一百 予 娘 度 伙食 。
勸 娘 煩惱 是 不必 ，
蛤 人 度苦 罔 過日 。
Bô pàng ke-hé hōo niû tit ,
Tsi̍t-pah hōo niû tōo hué-si̍t .
Khǹg niû huân-ló sī put-pit ,
Kap lâng tōo-khóo bóng kè-li̍t .
一百 花銀 宰樣 度 ？
放拶 阮 身 卜 奈何 ！
不知 我 身 塊 艱苦 ，
天光 哭 甲 日落烏 。
Tsi̍t-pah hue-gûn tsáinn-iūnn tōo ?
Pàng-sak gún sin beh nāi-hôo !
M̄-tsai guá sin teh kan-khóo ,
Thinn-kng khàu kah li̍t-lo̍h-oo .
就 共 我 娘 說 實在 ，
我 今 落陰 袂 返來 。
勸 娘 心肝 着 在 ，
小娘 艱苦 哥 不知 。
Tio̍h kā guá niû seh si̍t-tsāi ,
Guá tann lo̍h-im buē tńg--lâi .
Khǹg niû sim-kuann tio̍h huānn-tsāi ,
Sió-niû kan-khóo ko m̄-tsai .
中本