首頁 >資料庫介紹
目錄
回上頁

冊名 鄭國姓開台灣歌
編者 林有來
出版社 新竹竹林書局
出版年 1960
篇名 下本
顯示 的款式:
Lô-má-jī 是
漢字是
鴻章 下關 去 寫字 ，
尾省 臺灣 寫 乎 伊 。
咱 乎 清朝 賣 去死 ，
害 咱 干苦 五十 年 。
Hông-tsiong Hā-kuan khì siá-lī ,
Bé-síng Tâi-uân siá hōo i .
Lán hōo Tshing-tiâu buē khì-sí ,
Hāi lán kan-khóo gōo-tsa̍p nî .
今日 好 得 咱 祖國 ，
想着 臺灣 漢 民族 。
來 乎 日本 即 拘束 ，
即 用 心神 來 光復 。
Kin-li̍t hó tit lán tsóo-kok ,
Siūnn-tio̍h Tâi-uân hàn bîn-tso̍k .
Lâi hōo Li̍t-pún tsiah khu-sok ,
Tsiah iōng sim-sîn lâi kong-ho̍k .
卅四 年 祖國 到位 ，
索仔 即 共 咱 放開 。
有 話 今 通 講 扌透愧 ，
不免 心肝 結 歸雷 。
Sam-sì nî tsóo-kok kàu-uī ,
Soh-á tsiah kā lán pàng-khui .
Ū uē tann thang kóng tháu-khuì ,
M̄-bián sim-kuann kiat kui-luî .
臺灣 兄弟 眾 同胞 ，
束縛 日子 今 過頭 。
日本 今 朗總 赶走 ，
永遠 不肯 帶 咱 兜 。
Tâi-uân hiann-tī tsìng tông-pau ,
Sok-pa̍k li̍t-tsí tann kè-thâu .
Li̍t-pún tann lóng-tsóng kuánn-tsáu ,
Íng-uán m̄-khíng tuà lán tau .
全島 的 人 通 怨嘆 ，
日本 束縛 人 真 按 。
臺灣 以前 六百 萬 ，
事事 乎 伊 真 刁難 。
Tsuân-tó ê lâng thong uàn-thàn ,
Li̍t-pún sok-pa̍k lâng tsin ân .
Tâi-uân í-tsîng la̍k-pah bān ,
Sū-sū hōo i tsin tiau-lân .
日本 政府 人 不願 ，
放去 箱重 警察 權 。
冤枉 受刑 真 不滿 ，
咱 都 無 塊 通 訴冤 。
Li̍t-pún tsìng-hú lâng m̄-guān ,
Pàng-khì siunn-tiōng kíng-tshat kuân .
Uan-óng siū-hîng tsin put-buán ,
Lán too bô tè thang sòo-uan .
並並 百姓 食 咱 到 ，
官廳 因 恰 有 勢頭 。
臭狗 因 是 為 臭狗 ，
真 賢 欺負 咱 同胞 。
Pîng-pîng peh-sìnn tsia̍h lán kàu ,
Kuann-thiann in khah ū sè-thâu .
Tshàu-káu in sī uī tshàu-káu ,
Tsin gâu khi-hū lán tông-pau .
見面 咱 着 乎 伊 哄 ，
官廳 為 因 日本人 。
無通 乎 咱 講 半項 ，
搧 到 嘴胚 双平 紅 。
Kìnn-bīn lán tio̍h hōo i háng ,
Kuann-thiann uī in Li̍t-pún-lâng .
Bô-thang hōo lán kóng puànn-hāng ,
Siàn kah tshuì-phué siang-pîng âng .
今日 是 咱 的 日子 ，
重見 青天 白日旗 。
日本 敗戰 人 歡喜 ，
莫怪 眾人 怨恨 伊 。
Kin-li̍t sī lán ê li̍t-tsí ,
Tiông-kiàn tshing-thian pi̍k-li̍t-kî .
Li̍t-pún pāi-tsiàn lâng huann-hí ,
Bo̍k-kuài tsìng-lâng uàn-hūn i .
那 講 臺灣 的 干苦 ，
講 着 天頂 通 全 烏 。
四面 是 海 走 無路 ，
任 汝 做鳥 難得 逃 。
Nā kóng Tâi-uân ê kan-khóo ,
Kóng tio̍h thinn-tíng thong tsuân oo .
Sì-bīn sī hái tsáu bô-lōo ,
Līm lí tsuè-tsiáu lân-tit tôo .
臺灣 百姓 真 好 管 ，
日本 上 愛 咱 臺灣 。
全島 百姓 不 甘願 ，
克剝 一番 過 一番 。
Tâi-uân peh-sìnn tsin hó kuán ,
Li̍t-pún siōng ài lán Tâi-uân .
Tsuân-tó peh-sìnn m̄ kam-guān ,
Khik-pak tsi̍t-huan kè tsi̍t-huan .
日本 罪惡 上等 重 ，
上賢 克剝 臺灣 人 。
縛脚 縛手 袂 振動 ，
雖便 仝 咱 塞 耳空 。
Li̍t-pún tsuē-ok siōng-tíng tāng ,
Siōng-gâu khik-pak Tâi-uân lâng .
Pa̍k-kha pa̍k-tshiú buē tín-tāng ,
Suî-piān kāng lán sai hīnn-khang .
日本 卜 敗 天 隨 變 ，
乎 打 敢 怨 不敢 言 。
今日 失敗 即 看 現 ，
實在 有影 合 該然 。
Li̍t-pún beh pāi thinn suî piàn ,
Hoo phah kánn uàn m̄-kánn giân .
Kin-li̍t sit-pāi tsiah khuànn hiān ,
Si̍t-tsāi ū-iánn ha̍p kai-liân .
日本 今日 來 失敗 ，
亦是 對 咱 箱 亂來 。
事事 乎 伊 真 使派 ，
敗戰 百姓 叫 應該 。
Li̍t-pún kin-li̍t lâi sit-pāi ,
Ia̍h-sī tuì lán siunn luān-lâi .
Sū-sū hōo i tsin sái-phài ,
Pāi-tsiàn peh-sìnn kiò ing-kai .
就 到 今日 即 知 苦 ，
行為 做 了 箱 過 粗 。
分 廣 內地 共 本島 ，
職權 濫用 真 糊途 。
Tio̍h kàu kin-li̍t tsiah tsai khóo ,
Hîng-uî tsuè liáu siunn kè tshoo .
Hun kóng lāi-tē kāng pún-tóo ,
Tsit-kuân lām-īng tsin hôo-tôo .
代志 明明 是 冤枉 ，
重刑 有 認 恰 有功 。
不認 不時 刑 共 槓 ，
刑事 親像 活 閻王 。
Tāi-tsì bîng-bîng sī uan-óng ,
Tāng-hîng ū līn khah ū-kong .
M̄-līn put-sî hîng kāng kòng ,
Hîng-sū tshin-tshiūnn ua̍h Giâm-ông .
日本 刑法 通人 畏 ，
掠去 現現 着 青挮 。
松乳 罩 在 咱 兮 嘴 ，
灌水 即 閣 赤高槌 。
Li̍t-pún hîng-huat thong-lâng uì ,
Lia̍h--khì hiān-hiān tio̍h tshinn-thui .
Tshîng-lin tàu tsāi lán ê tshuì ,
Kuàn-tsuí tsiah koh tshiah-kuân-thuî .
等到 半冥 即 卜 問 ，
親像 閻王 坐 陰堂 。
刑事 打人 手 袂 軟 ，
不驚 人 死 打 到 光 。
Tán-kàu puànn-mî tsiah beh mn̄g ,
Tshin-tshiūnn Giâm-ông tsē im-tn̂g .
Hîng-sū phah-lâng tshiú buē nńg ,
M̄-kiann lâng sí phah kàu kng .
日本 無天 的 刑具 ，
打人 親像 那 打牛 。
無影 亦 卜 刑 到 有 ，
全然 無惜 人 身軀 。
Li̍t-pún bô-thinn ê hîng-kū ,
Phah-lâng tshin-tshiūnn ná phah-gû .
Bô-iánn ia̍h beh hîng kàu ū ,
Tsuân-liân bô-sioh lâng sin-khu .
日本 驚察 高等課 ，
下司 愛 卜 有 功勞 。
冤枉 有 認 上等 好 ，
不管 有影 亦 是 無 。
Li̍t-pún kìng-tshat ko-tíng-kò ,
Ē-si ài beh ū kong-lô .
Uan-óng ū līn siōng-kài hó ,
M̄-kuán ū-iánn iah sī bô .
面巾 蓋面 即 灌水 ，
頭調 向 天 嘴開開 。
灌 着 強強 卜 無愧 ，
腹肚 水 是 食 歸堆 。
Bīn-kun khàm-bīn tsiah kuàn-tsuí ,
Thâu-tiāu hiòng thinn tshuì-khui-khui .
Kuàn tio̍h kiông-kiông beh bô-khuì ,
Pak-tóo tsuí sī tsia̍h kui-tui .
日本 問案 刑罰 人 ，
打着 是 能 鑽 土空 。
犯罪 無論 輕 亦 重 ，
刑罰 脚腿 磧 石枋 。
Li̍t-pún mn̄g-àn hîng-hua̍t lâng ,
Phah--tio̍h sī ē tsǹg thôo-khang .
Huān-tsuē bô-lūn khin iah tāng ,
Hîng-hua̍t kha-thuí teh tsio̍h-pang .
石條 足 重 磧 真久 ，
双手 攪 在 脚頭龜 。
冤枉 強 卜 刑 到 有 ，
人 是 比 犬 亦 恰輸 。
Tsio̍h-liâu tsiok tāng teh tsin-kú ,
Siang-tshiú lám tsāi kha-thâu-u .
Uan-óng kiông beh hîng kah ū ,
Lâng sī pí khián iá khah-su .
講到 日本 的 刑具 ，
打人 相似 撻 金龜 。
索仔 縛吊 指頭母 ，
屎尿 溜 甲 歸 身軀 。
kóng-kàu li̍t-pún ê hîng-kū ,
Phah-lâng siong-sū ta̍t kim-ku .
Soh-á pa̍k-tiáu tsńg-thâu-bú ,
Sái-liō làu kah kui sin-ku .
煙枝 點火 共 咱 灸 ，
屏 灸 凸 歸 身軀 。
恰弱 的 人 當 無久 ，
實在 比 死 也 也___ 恰 輸 。
Hun-ki thiám-hué kā lán kù ,
Pîn kù phòng-phā kui sin-khu .
Khah-lio̍k ê lâng tòng bô-kú ,
Si̍t-tsāi pí sí iá khah su .
無 認 每時 共 咱 打 ，
刑事 掠頭 共 掠腳 。
手指 共 咱 折 指甲 ，
暈去 閣 再 用 脚 踏 。
Bô līn muí-sî kā lán phah ,
Hîng-sū lia̍h-thâu kāng lia̍h-kha .
Tshiú-tsuínn kā lán tiah tsńg-kah ,
Hūn--khì koh tsài īng kha ta̍h .
呆人 刑死 無要緊 ，
好人 刑死 成 可憐 。
奸諜 冤枉 歸 大陣 ，
十个 掠 無 一个 真 。
Phái-lâng hîng-sí bô-iàu-kín ,
Hó-lâng hîng-sí tsiânn khóo-lîn .
Kan-tia̍p uan-óng kui tuā-tīn ,
Tsa̍p-ê lia̍h bô tsi̍t-ê tsin .
咱 人 字運 那 恰 呆 ，
禍 就 落 對 天窓 來 。
掠 去 到位 苦憐 代 ，
能 哀 打 甲 汝 袂 哀 。
Lán lâng lī-ūn nā khah bái ,
Hō tio̍h lak tuì thinn-thang lâi .
Lia̍h khì kàu-uī khóo-lîn tāi ,
Ē ai phah kah lí buē ai .
只欵 朋友 得 人 罪 ，
起 無 空頭 生 問題 。
實在 奸諜 無影 做 ，
掠 去 打死 足 成 衰 。
Tsí-khuán pîng-iú tit lâng tsuē ,
Khí bô khang-thâu sinn būn-tuê .
Si̍t-tsāi kan-tia̍p bô-iánn tsuè ,
Lia̍h khì phah-sí tsiok tsiânn sue .
那 講 戰爭 罪 犯 重 ，
巫賴 奸諜 上 呆空 。
乎 伊 掠去 難得 放 ，
不管 汝 是 何等人 。
Nā kóng tsiàn-tsing tsuē huān tāng ,
Bû-luā kan-tia̍p siōng phái-khang .
Hōo i lia̍h--khì lân-tit pàng ,
M̄-kuán lí sī hô-tíng-lâng .
日本 全 無 惜 百姓 ，
下司 專 是 想 食錢 。
食 甲 腹肚 那 飽鄭 ，
不管 編私 無 公平 。
Li̍t-pún tsuân bô sioh peh-sìnn ,
Ē-si tsuan sī siūnn tsia̍h-tsînn .
Tsia̍h kah pak-tóo nā pá-tīnn ,
M̄-kuán phian-su bô kong-pînn .
有 食 後手 恰 免 打 ，
亦 有 燒茶 食 嘴乾 。
無 夏 後手 強強押 ，
有 夏 拘留 免 調查 。
Ū tsia̍h āu-tshiú khah bián phah ,
Ia̍h ū sio-tê tsia̍h tshuì-ta .
Bô hē āu-tshiú kiông-kiông-ah ,
Ū hē khu-liû bián tiâu-tsa .
刑事 食錢 賢 冤枉 ，
皆 打 乎 死 是 應當 。
己往 不究 今 免 講 ，
小可 警戒 是 無防 。
Hîng-sū tsia̍h-tsînn gâu uan-óng ,
Kai phah hoo sí sī ing-tong .
kì-óng put-kiù tann bián kóng ,
Sió-khuá kìng-kài sī bû-hông .
臭人 今 都 不免 打 ，
刑事 走 到 無 停腳 。
亦着 小可 共 伊 教 ，
即 知 伊 有 做 爭差 。
Tshàu-lâng tann too m̄-bián phah ,
Hîng-sū tsáu kah bô thîng-kha .
Ia̍h-tio̍h sió-khuá kā i kà ,
Tsiah tsai i ū tsuè tsing-tsha .
刑事 莫怪 人 怨嘆 ，
打人 心肝 足 粗田 。
前日 伊 能 來 打 咱 ，
光復 打 伊 無 相干 。
Hîng-sū bo̍k-kuài lâng uàn-thàn ,
Phah-lâng sim-kuann tsiok tshoo-tshân .
Tsîng-li̍t i ē lâi phah lán ,
Kong-ho̍k phah i bô siong-kan .
刑事 警察 罪惡 重 ，
真 賢 刑罰 臺灣人 。
今 卜 吊豆 亦 跳港 ，
那 卜 閃避 走 無 空 。
Hîng-sū kìng-tshat tsuē-ok tāng ,
Tsin gâu hîng-hua̍t Tâi-uân-lâng .
Tann beh tiàu-tāu iah thiàu-káng ,
Nā beh siám-phiah tsáu bô khang .
亦 着 做好 恰 有 底 ，
即 免 乎 人 炒 生蝦 。
刑事 警察 足 成 多 ，
若是 做好 無 問題 。
Ia̍h tio̍h tsuè-hó khah ū tué ,
Tsiah bián hōo lâng tshá tshinn-hê .
Hîng-sū kìng-tshat tsiok tsiânn tsuē ,
Nā-sī tsuè-hó bô būn-tuê .
做好 官警 閣 復職 ，
祖國 認定 有 老實 。
有 到 這欵 有 所得 ，
做 呆 現時 難 過日 。
Tsuè-hó kuann-kìng koh ho̍k-tsit ,
Tsóo-kok līn-tīng ū láu-si̍t .
Ū kàu tsit-khuán ū sóo-tit ,
Tsuè phái hiān-sî lân kè-li̍t .
列位 同胞 眾 朋友 ，
今 咱 免 講 報 冤仇 。
編歌 乎 人 做 研究 ，
配送 臺灣 分 五州 。
Lia̍t-uī tông-pau tsìng pîng-iú ,
Tann lán bián kóng pò uan-siû .
Pian-kua hōo lâng tsuè gián-kiù ,
Phuè-sàng Tâi-uân hun gōo-tsiu .
以前 罪惡 作 過 重 ，
呆運 遇着 只號 空 。
原子 爆彈 一 下 放 ，
昭和 着驚 緊 投行 。
Í-tsîng tsuē-ok tsuè kè tāng ,
Phái-ūn gū-tio̍h tsí-hō khang .
Guân-tsú po̍k-tuānn tsi̍t ē pàng ,
Tsiau-hô tio̍h-kiann kín tâu-hâng .
役場 內面 專 百姓 ，
尋 靴 辦事 無 公平 。
全 尋 內底 兮 書記 ，
公工 卜 抽 卜 食錢 。
Ia̍h-tiûnn lāi-bīn tsuan peh-sìnn ,
Tshuē hia pān-sū bô kong-pînn .
Tsuân tshuē lāi-tué ê su-kì ,
Kong-kang beh thiu beh tsia̍h-tsînn .
無論 富戶 亦 散赤 ，
不驚 無 趁 無 通 食 。
普通 頭路 亦 會社 ，
公工 一个 一份 額 。
Bô-lūn hù-hōo iah sàn-tshiah ,
M̄-kiann bô thàn bô thang tsia̍h .
Phóo-thong thâu-lōo iah huē-siā ,
Kong-kang tsi̍t-ê tsi̍t-hūn gia̍h .
臺灣 百姓 眾 朋友 ，
大家 愛 着 知 理由 。
好 得 祖國 緊 來 救 ，
那 無 大家 命 就 休 。
Tâi-uân peh-sìnn tsìng pîng-iú ,
Ta̍k-ke ài tio̍h tsai lí-iû .
Hó tit tsóo-kok kín lâi kiù ,
Nā bô ta̍k-ke miā tio̍h hiu .
不管 無力 袂 粗重 ，
強制 抽 去 做 公工 。
家族 疎開 去 下港 ，
乎 伊 返來 尋 無 人 。
M̄-kuán bô-la̍t buē tshoo-tāng ,
Kiông-tsè thiu khì tsuè kong-kang .
Ka-tso̍k soo-khai khì ē-káng ,
Hōo i tńg--lâi tshuē bô lâng .
屏 叫 不 乎 汝 知影 ，
抽 去 海外 也 着 行 。
返來 尋 無 某仔子 ，
想 真 臭狗 人 兮 驚 。
Pîn kiò m̄ hōo lí tsai-iánn ,
Thiu khì hái-guā ia̍h tio̍h kiânn .
Tńg--lâi tshuē bô bóo-á-kiánn ,
Siūnn tsin tshàu-káu lâng ê kiann .
那 担 無法 廣 屏段 ，
隨時 咱 厝 吊 米單 。
三餐 無 食 卜 按盞 ，
上毒 日本 惡 心肝 。
Nā tann bô-huat kóng pîn-tāunn ,
Suî-sî lán tshù tiàu bí-tuann .
Sam-tshan bô tsia̍h beh àn-tsuánn ,
Siōng-to̍k Li̍t-pún ok sim-kuann .
講 到 公工 虛 時代 ，
听着 泪滓 流落來 。
日本 兮 來 乎 失敗 ，
大大 小小 吪 應該 。
Kóng kàu kong-kang hí sî-tāi ,
Thiann-tio̍h ba̍k-tsái lâu--lo̍h--lâi .
Li̍t-pún ē lâi hōo sit-pāi ,
Tuā-tuā suè-suè huah ing-kai .
恰 大 事業 亦 着 放 ，
着 緊 通 付 做 公工 。
某子 一汗 那 肉粽 ，
伊 不 驚 咱 餓 死人 。
Khah tuā sū-gia̍p ia̍h tio̍h pàng ,
Tio̍h kín thang hù tsuè kong-kang .
Bóo-kiánn tsi̍t-kuānn ná bah-tsàng ,
I m̄ kiann lán gō sí-lâng .
有 人 公工 作 三擺 ，
作 未 到 完 單 又 來 。
是 咱 加治 做 鬼怪 ，
乎 人 甲 打 合 應該 。
Ū lâng kong-kang tsuè sann-pái ,
Tsuè bē kàu uân tuann iū lâi .
Sī lán ka-tī tsuè kuí-kuài ,
Hōo lâng ka phah ha̍p ing-kai .
有 人 甲 伊 下 後手 ，
絕對 免 做 的 理由 。
買 物 送伊 請 燒酒 ，
公工 二字 免 憂愁 。
Ū lâng kā i hē āu-tshiú ,
Tsua̍t-tuì bián tsuè ê lí-iû .
Bé mi̍h sàng--i tshiánn sio-tsiú ,
Kong-kang nn̄g-lī bián iu-tshiû .
听見 朋友 塊 相箭 ，
辦事 的 人 無 公平 。
克開 貧窮 正 百姓 ，
無通 去 下 後手錢 。
Thiann-kìnn pîng-iú teh sio-tsìnn ,
Pān-sū ê lâng bô kong-pînn .
Khik-khui pîn-kîng tsìng peh-sìnn ,
Bô-thang khì hē āu-tshiú-tsînn .
第一 糊塗 勞務課 ，
上司 做事 無 下落 。
有 人 公工 常 接 作 ，
有 个 半擺 都 野 無 。
Tuē-it hôo-tôo lô-bū-kò ,
Siōng-si tsuè-sū bô hē-lo̍h .
Ū lâng kong-kang siông tsi̍h tsò ,
Ū ê puànn-pái too iá bô .
講到 日本 兮 政府 ，
天地 不平 應皆 輸 。
抽 咱 百姓 做 勞務 ，
全然 無惜 人 身軀 。
Kóng-kàu Li̍t-pún ê tsìng-hú ,
Thinn-tē put-pîng ing-kai su .
Thiu lán peh-sìnn tsuè lô-bū ,
Tsuân-liân bô-sioh lâng sin-khu .
講 到 公工 兮 干苦 ，
日本 政府 心 真 粗 。
乎 咱 餓腸 共 餓肚 ，
食 亦 無飽 着 挑塗 。
Kóng kah kong-kang ê kan-khóo ,
Li̍t-pún tsìng-hú sim tsin tshoo .
Hōo lán gō-tn̂g kāng gō-tōo ,
Tsia̍h ia̍h bô-pá tio̍h tann-thôo .
食 都 無飽 按盞 作 ？
飫着 腳手 軟趖趖 。
日本 第一 無 人道 ，
天良 二字 全然 無
Tsia̍h too bô-pá àn-tsuánn tsò ?
Iau-tio̍h kha-tshiú nńg-sô-sô .
Li̍t-pún tuē-it bô lîn-tō ,
Thian-liông nn̄g-lī tsuân-liân bô
食飽 閑閑 塊 監督 ，
叫 人 夯柴 共 枕木 。
工作 袂 做 足 正惡 ，
閣 罵 咱 是 清國奴 。
Tsia̍h-pá îng-îng teh kàm-tok ,
Kiò lâng giâ-tshâ kāng tsám-bo̍k .
Kang-tsok buē tsuè tsiok tsiânn-ok ,
Koh mā lán sī tshing-kok-lôo .
日本 明明 是 卜 敗 ，
出 有 只欵 即 亂來 。
共人 減米 共 減菜 ，
失敗 百姓 叫 應該 。
Li̍t-pún bîng-bîng sī beh pāi ,
Tshut ū tsí-khuán tsiah luān-lâi .
Kā-lâng kiám-bí kāng kiám-tshài ,
Sit-pāi peh-sìnn kiò ing-kai .
列位 同胞 想 看 覓 ，
好 得 咱 兮 祖國 來 。
日狗 害 咱 悽慘代 ，
着 打 乎 死 免 乎 哀 。
Lia̍t-uī tông-pau siūnn khuànn māi ,
Hó tit lán ê tsóo-kok lâi .
Li̍t-káu hāi lán tshi-tshám-tāi ,
Tio̍h phah hoo sí bián hoo ai .
愛國 也 着 人 尽忠 ，
國家 即 有 出 英雄 。
流傳 萬國 人 敬重 ，
不比 日本 即 奸雄 。
Ài-kok iā tio̍h lâng tsīn-tiong ,
Kok-ka tsiah ū tshut ing-hiông .
Liû-thuân bān-kok lâng kìng-tiōng ,
Put-pí Li̍t-pún tsiah kan-hiông .
美國 對 咱 有影 好 ，
看 咱 政治 袂 羅唆 。
咱 个 國家 有 公道 ，
萬國 對 咱 真 提高
Bí-kok tuì lán ū-iánn hó ,
khuànn lán tsìng-tī buē lo-so ;
Lán ê kok-ka ū kong-tō ,
Bān-kok tuì lán tsin thê-ko
日本 最後 想 反悔 ，
人 死 國土 了 一哇 。
伊 是 私偏 湳滲 做 ，
亡國 閣 煞 塊 連回
Lit-pún tsuè-āu siòng huán-hué ,
Lâng sí kok-thóo liáu tsit-kue̍h .
I sī su-phian lām-sám tsuè ,
Bông-kok koh suah teh liân-huê
效忠 領袖 蔣 總統 ，
軍民 準備 卜 反攻 。
光復 大陸 有 希望 ，
打倒 共產 走 無空 。
Hāu-tiong líng-siù Tsiúnn Tsóng-thóng ,
Kun-bîn tsún-pī beh huán-kong .
Kong-ho̍k Tāi-lio̍k ū hi-bāng ,
Tánn-tó kiāng-sáng tsáu bô-khang .
日本 做 去 箱 過 硬 ，
到者 即知 不 達錢 。
汝 咱 免 閣 伊 相見 ，
算 是 命運 由 在 天 。
Li̍t-pún tsuè khì siunn kè ngī ,
Kàu-tsia tsiat-tsai m̄ ta̍t-tsînn ,
Lí lán bián koh i sann-kìnn ,
Sǹg sī miā-ūn iû tsāi thinn .
此本 敗戰 說 詳細 ，
開台 國姓 伊 一个 。
請 恁 看了 那 合格 ，
每本 三角 寄 來 買 。
Tsit-pún pāi-tsiān sueh siông-sè ,
Khai-tâi Kok-sìng i tsi̍t-ê ,
Tshiánn lín khuà-liáu nā ha̍p-keh .
Muí-pún sann-kak kià lâi bé .
上本